Sabat

Stori: Ol i kisim dispela tok “sabat” long wanpela hap tok Hibru (sha·vathʹ), insait bilong en i olsem “malolo o pinis long mekim o lusim.” Lo Bilong Moses i makim wanpela de Sabat long wik, na sampela de moa long yia ol i de Sabat, na namba 7 yia na namba 50 yia tu i olsem Sabat. De Sabat long wik bilong ol Juda em i namba 7 de; em i kirap long taim san i go daun long Fraide na i pinis long taim san i go daun long Sarere. Ol man i tok ol i Kristen, planti ol i save makim Sande i olsem de malolo bilong ol na de bilong lotu; sampela i bihainim de em kalenda bilong ol Juda i makim.

Yu ting ol Kristen i mas bihainim lo bilong de Sabat?

Kis 31:​16, 17: “Yupela Israel i mas malolo long dispela de, long wanem, em i . . . olsem mak bilong kontrak namel long mi na yupela Israel na bai em i stap oltaim oltaim.” (De Sabat em i mak bilong kontrak i stap namel long Jehova na ol Israel, olsem na i no bilong olgeta lain, a? Hap tok Hibru [‛oh·lamʹ] ol i tanim olsem “oltaim oltaim” i makim bikpela hap taim nau ol i no inap save long pinis bilong en o pinis bilong en i olsem i stap hait. Olsem na sampela taim dispela tok i makim “oltaim oltaim,” na sampela taim nogat. Namba 25:13 i kolim dispela tok long wok pris, tasol dispela wok pris i no i stap long ol inap oltaim oltaim; bihain em i pinis olsem Hibru 7:12 i makim.)

Ro 10:4: “Krais em inapim pinis lo bilong Moses, bai olgeta manmeri i bilip long Krais, ol i ken kamap stretpela manmeri long ai bilong God.” (Lo bilong Sabat em hap bilong Lo Bilong Moses. Long rot bilong Krais, God i pinisim Lo Bilong Moses. Bilong kamap stretpela man long ai bilong God, yumi mas bilip long Krais; i no gat wok long holim de Sabat.) (Na Galesia 4:​9-11; Efesus 2:​13-16)

Kl 2:​13-16: “Lo i bin kotim yumi na kamapim ol rong bilong yumi, na mekim yumi i stap aninit long ol tok na strong bilong en. Tasol God i bin rausim olgeta dispela tok i kotim yumi . . . Olsem na yupela i no ken larim wanpela man i sutim tok long yupela, na tok yupela i no bihainim ol lo bilong kaikai na dring . . . na bilong de Sabat.” (Man i stap aninit long Lo Bilong Moses na em i brukim lo bilong Sabat, olgeta manmeri i mas tromoi ston long em na kilim em i dai, olsem Kisim Bek 31:14 na Namba 15:​32-35 i tok. Planti man i strong long bihainim de Sabat ol i mas amamas long yumi no aninit moa long dispela Lo. Olsem Kolosi sapta 2 i tok, bilong i stap gutpela long ai bilong God, i no gat wok moa long yumi bihainim lo bilong Sabat em God i bin givim long ol Israel.)

Bilong wanem planti misin i kisim Sande olsem bikpela de bilong lotu?

Krais i kirap bek long namba wan de bilong wik (nau ol i kolim Sande), tasol Baibel i no tok yumi mas makim dispela de i holi.

Wanpela buk i tok: “Lotu Kristen i holim yet olpela nem bilong bikpela de bilong ol long wik, olsem ‘Dies Solis,’ o ‘Sande,’ long wanem, ol i bin bungim bilip Haiden na bilip Kristen [ol i tok em i bilip Kristen] long taim Konstantin i tokim ol lain bilong em [long yia 321], em ol Haiden wantaim ol Kristen, ol i mas makim namba wan de bilong wik olsem ‘de bilong lotuim San.’ . . . Long dispela rot em i ting long mekim ol lotu long ol hap em i bosim ol i kamap wanbel, olsem wanpela lotu tasol.”​—⁠Lectures on the History of the Eastern Church, p. 291.

Yu ting God i givim lo bilong sabat long Adam na olgeta lain bilong Adam i mas bihainim?

God Jehova i redim graun bilong man i ken i stap long en, na bihain em i malolo long wokim ol samting long graun. Stat 2:​1-3 i tok olsem. Tasol i no gat wanpela tok long Baibel i tok God i bin tokim Adam long holim namba 7 de bilong olgeta wik olsem de Sabat.

Lo 5:15: “Yupela [Israel] i mas tingim dispela taim yupela i bin stap wokboi nating long Isip, na long bikpela strong bilong mi, mi God, Bikpela bilong yupela, mi bin kisim yupela i kam. Long dispela as tasol nau mi tok yupela i mas bihainim gut dispela lo bilong de bilong malolo.” (Jehova i tok, lo bilong sabat i bilong taim em i bin kisim bek ol Israel long wok kalabus long Isip; i no bilong Iden.)

Kis 16:​1, 23-29: “Long de namba 15 bilong namba tu mun bihain long taim ol [Israel] i bin lusim Isip, ol i go kamap long dispela ples drai ol i kolim Sen. . . . Na Moses i tokim ol, ‘Bikpela i tok olsem, tumora em i de bilong malolo. Em i de Sabat, na em i de bilong Bikpela yet. . . . Long 6-pela de bilong olgeta wik, yupela i mas kisim dispela kaikai. Na de namba 7 em i de bilong malolo, olsem na long dispela de bai i no gat kaikai i stap long graun.’ . . . Bikpela i tokim Moses, . . . ‘Harim gut, mi Bikpela, mi givim yupela dispela de bilong malolo.’ ” (Ol i save makim ol wik i gat 7-pela de 7-pela de, tasol nau long namba wan taim God i makim wanpela de bilong wik em i de Sabat bilong ol.)

Yu ting Lo Bilong Moses i gat tupela hap, olsem ol lo bilong lotu na ol Tenpela Lo, na yu ting ol Kristen i mas bihainim ol Tenpela Lo?

Yu ting ol tok bilong Jisas i makim Lo i bruk long tupela hap?

Mt 5:​17, 21, 23, 27, 31, 38: “Yupela i no ken ting mi kam bilong rausim tok bilong lo . . . Mi kam bilong inapim tru.” Na lukim sampela tok moa Jisas i mekim: “Yupela i harim pinis dispela tok ol tumbuna i bin kisim, ‘Yupela i no ken kilim i dai ol arapela manmeri [Kis 20:13; namba 6 bilong ol Tenpela Lo].’ . . . ‘Sapos yu bringim ofa bilong yu i kam long alta [Lo 16:​16, 17; i no bilong ol Tenpela Lo]’ . . . ‘Yupela ol marit, yupela i no ken mekim pasin pamuk [Kis 20:14; namba 7 bilong ol Tenpela Lo].’ . . . ‘Sapos wanpela man i rausim meri bilong en, orait em i mas givim em wanpela pepa bilong katim marit [Lo 24:1; i no bilong ol Tenpela Lo].’ . . . ‘Sapos wanpela man i bagarapim ai bilong narapela man, orait yupela i mas bagarapim ai bilong en [Kis 21:​23-25; i no bilong ol Tenpela Lo].’ ” (Olsem na Jisas i no mekim olsem Lo Bilong Moses i gat tupela hap; em i bungim ol Tenpela Lo wantaim ol narapela lo. Yumi mas bihainim pasin bilong Jisas, a?)

Wanpela man i askim Jisas: “Tisa, wanem lo i namba wan na i winim olgeta arapela lo?” Jisas i bekim tok na em i no kolim ol Tenpela Lo. Em i tok: “ ‘Yupela i mas laikim [God] tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i . . . olsem, ‘Yu mas laikim ol [arapela] olsem yu laikim yu yet.’ Dispela tupela lo i as bilong olgeta tok bilong lo na bilong ol profet.” (Mt 22:​35-40) Sapos sampela i holim yet ol Tenpela Lo (Lo 5:​6-21) na ol i tok, ol Kristen i mas bihainim, tasol ol narapela lo nogat, i olsem ol i sakim tok bilong Jisas long wanem ol lo i bikpela na i namba wan tru (em i kolim tok bilong Lo 6:5; Wkp 19:18).

Taim Baibel i tok Lo Bilong Moses i pinis, Baibel i tok klia olsem ol Tenpela Lo tu i pinis o nogat?

Ro 7:​6, 7: “Yumi lusim ol dispela samting i bin holimpas yumi. Olsem na lo i no pasim yumi moa. . . . Orait bai yumi tok wanem? Lo em i samting nogut olsem sin yet, a? Nogat tru. Tasol sapos lo i no i stap bilong helpim mi long save long wanem ol pasin i nogut, orait bai mi no inap save sin em i wanem samting. Lo i tok olsem, ‘Yu no ken mangalim ol samting bilong narapela man.’ Sapos lo i no tok olsem, orait mi no inap save, dispela pasin bilong mangal, em i pasin nogut.” (Pol i tok, Lo i no pasim moa ol Kristen bilong lain Juda, na bihain stret em i stori long wanem lo? Em i kolim namba 10 lo bilong ol Tenpela Lo. Dispela i makim olsem taim God i rausim Lo Bilong Moses, em i rausim tu ol Tenpela Lo.)

2 Ko 3:​7-11: “Taim God i raitim dispela lo long ston na givim long ol, dispela lo i kam wantaim bikpela lait bilong God. Olsem na pastaim pes bilong Moses i lait tumas, na ol Israel i no inap lukluk long pes bilong en, na bihain tasol dispela lait i pinis. . . . Dispela wok bilong lo em i save kotim yumi na i tok yumi mas lus. . . . Dispela olpela wok i no inap i stap oltaim. Nogat. Em bai i pinis. Tasol em i bin kam wantaim bikpela lait bilong God. Olsem na yumi save, dispela nupela wok bilong i stap oltaim, em i kam wantaim bikpela lait bilong God moa moa yet.” (Dispela i stori long lo God i ‘raitim long ston,’ na ‘ol Israel i no inap lukluk long pes bilong Moses’ taim ol i kisim. Kisim Bek 34:​1, 28-30 i makim olsem dispela i stori long taim God i givim ol Tenpela Lo long ol Israel; em ol lo God i raitim long ston. Ol dispela lo i insait long dispela wok em 2 Korin sapta 3 i tok, “bai i pinis.”)

God i pinisim Lo Bilong Moses, em ol Tenpela Lo i hap bilong en, olsem na yu ting olgeta lo na tambu i pinis?

Nogat. Planti tambu i stap long ol Tenpela Lo, Ol Skripsa Grik i kolim gen. (Tasol lo bilong sabat, nogat.) Maski wanpela lo i gutpela, sapos sin i bosim ol laik bilong man, pasin bilong sakim lo bai i stap yet. Nupela kontrak i senisim kontrak bilong Lo, na long Hibru 8:​10, God i tok long nupela kontrak olsem: “Dispela nupela kontrak mi laik mekim wantaim ol manmeri bilong Israel, em i olsem. Bai mi putim olgeta lo bilong mi long tingting bilong ol, na bai mi raitim tok bilong mi long bel bilong ol.” Ol kain lo olsem bai kamapim gutpela wok tru, winim ol lo ol i bin raitim long ston!

Ro 6:​15-17: “Yumi no i stap moa aninit long lo, olsem na bai yumi mekim wanem? Nau yumi stap aninit long marimari bilong God, olsem na ating i orait long yumi mekim sin? Nogat tru. Ating yupela i no save? Sapos yupela i givim yupela yet long wanpela man na bihainim tok bilong em, orait yupela bai i stap wokboi bilong em. Olsem tasol, yupela i ken i stap wokboi bilong sin, na dispela bai i mekim yupela i dai. O yupela i ken wok long bihainim tok bilong God na bai yupela i kamap stretpela manmeri. Tru, bipo yupela i stap wokboi bilong sin, tasol bihain God i putim yupela aninit long tok bilong em, na yupela i save bihainim tru dispela tok. Long dispela yumi ken tenkyu long God.” (Lukim tu Galesia 5:​18-24.)

Ol Kristen i mas ting olsem wanem long de Sabat?

I gat “malolo bilong de Sabat” ol Kristen i kisim long olgeta de

Hi 4:​4-11: “[Long Stat 2:​2, God] i bin tok olsem . . . ‘Long de namba 7 God i lukim olgeta wok bilong en i pinis, na em i malolo long dispela de.’ Na [Song 95:11] . . . i tok olsem, ‘Ol i no inap i go insait long ples malolo bilong mi.’ Dispela i soim yumi olsem, dispela ples malolo bilong God i stap yet, na sampela manmeri bai inap i go insait long en. Ol dispela lain bipo ol i harim gutnius, ol i sakim tok bilong en, na ol i no i go insait. Tasol bihain . . . planti yia i go pinis na God i autim tok long maus bilong Devit [Song 95:​7, 8], olsem . . . ‘Nau sapos yupela i harim maus bilong mi God, orait yupela i no ken pasim strong bel bilong yupela.’ Long taim bilong Devit, God i tok, ‘Nau,’ na dispela i soim yumi olsem, em i makim narapela de gen bilong ol manmeri i ken i go insait long ples malolo bilong en. Sapos bipo Josua i bin givim malolo long ol, orait bihain God bai i no inap tok long narapela de. Olsem na yumi save, ol manmeri bilong God bai i gat malolo i stap yet, em i olsem malolo bilong de Sabat. Na yumi save, man i go insait long ples malolo bilong God, em i pinisim wok bilong en na i malolo, olsem bipo God i pinisim wok bilong em yet na i malolo. Orait yumi mas wok strong bilong i go insait . . . Nogut wanpela man i bihainim dispela pasin bilong sakim tok, olsem bipo ol i mekim, na em bai i pundaun na i lus.”

Kristen i mas malolo long wanem samting? “Wok bilong en.” Wanem wok? Ol wok bipo em i mekim bilong kamap stretpela man. Nau ol Kristen i save, sapos ol i bihainim sampela lo na pasin bilong lotu, i no olsem God i mas baim ol na givim laip oltaim long ol. Ol Juda i no bilip ol i gat kain tingting kranki olsem; ol i ting ol inap kamap stretpela man ‘long strong bilong ol yet, na ol i no aninit long God na larim em i mekim ol i kamap stretpela man.’ (Ro 10:⁠3) Ol Kristen tru i save, taim mama i karim yumi, yumi olgeta i gat sin, na yumi mas bilip long ofa bilong Krais bambai yumi inap kamap stretpela man long ai bilong God. No gat narapela rot. Ol i wok strong long lainim na bihainim olgeta tok bilong Pikinini bilong God. Long pasin daun ol i harim na bihainim ol tok bilong Baibel i bilong stretim ol. Tasol ol i no ting sapos ol i mekim olsem God i mas orait long ol. Nogat. Ol i mekim ol dispela samting, long wanem, ol i laikim tumas God na bilip tru long em. Long dispela rot ol i klia long “pasin bilong sakim tok” ol Israel i bihainim.

“De namba 7” em Stat 2:2 i tok long en i no bilong 24 aua. (Lukim het-tok “God i Wokim Olgeta Samting,” pes 125, 126.) Olsem tasol “malolo bilong de Sabat” bilong ol Kristen i no bilong 24 aua tasol. Sapos ol i bilip na bihainim ol tok bilong Baibel, ol inap kisim dispela malolo long olgeta de, na bai ol i kisim moa yet long nupela taim God bai kamapim.

Bihain bai ol man i gat “Sabat” bilong 1,000 yia

Mk 2:​27, 28: “Jisas i tokim ol moa olsem, ‘God i . . . putim de Sabat bilong helpim ol manmeri. Olsem na Pikinini Bilong Man em i bosim de Sabat tu.’ ”

Jisas i save, Jehova i kamapim Sabat olsem mak namel long Em na ol Israel, na em bilong givim malolo long ol long wok bilong ol. Jisas i save tu, taim em i dai, dispela bai inapim na pinisim Lo Bilong Moses. Em i save, dispela Lo em lo bilong Sabat i hap bilong en, i olsem “piksa . . . bilong ol gutpela samting i laik kamap bihain.” (Hi 10:⁠1; Kl 2:​16, 17) Wanpela “gutpela samting” olsem i laik kamap bihain em wanpela “de Sabat” Jisas bai bosim.

Krais em i Bikpela i winim olgeta narapela bikman na em bai bosim graun inap 1,000 yia. (KTH 19:16; 20:6; Sng 2:​6-8) Taim em i stap long graun, em i bin mekim pasin marimari na wokim planti mirakel bilong oraitim ol sikman long de Sabat. Em i kamapim klia gutpela wok em bai mekim bilong helpim ol man bilong olgeta lain taim em i stap King long dispela 1,000 yia. (Lu 13:​10-13; Jo 5:​5-9; 9:​1-14) Ol man i save long samting tru em Sabat i makim, bai ol inap malolo long dispela “de Sabat” bilong 1,000 yia.

Sapos Man i Tok​—⁠

‘Ol Kristen i mas holim de Sabat’

Yu ken tok: ‘Mi laik askim yu, i gat wanem as na yu ting olsem?’ Na ating yu ken tok moa olsem: ‘Yumi mas tingim tok bilong Baibel long dispela samting, a? . . . I gat sampela tok bilong Baibel i bin helpim mi long save long dispela samting. Mi laik soim long yu. (Kamapim sampela tok i stap long ol pes paslain hia.)’

‘Bilong wanem yu no holim Sabat?’

Yu ken tok: ‘Pastaim mi mas save yu tok long wanem sabat, na bai mi inap bekim tok long yu. Baibel i no stori long wanpela sabat tasol, a? . . . God i givim ol lo bilong Sabat long ol Juda. Tasol Baibel i stori long narapela kain sabat bilong ol Kristen, a?’ Na ating yu ken tok moa olsem: (1) ‘Mipela i no save holim wanpela de long wik olsem de Sabat, long wanem, Baibel i tok, dispela lo “bai i pinis.” (2 Ko 3:​7-11; lukim sampela tok long dispela long pes 386.)’ (2) ‘Tasol i gat wanpela sabat mipela i save holim oltaim. (Hi 4:​4-11; lukim pes 387, 388.)’