‘Ol i Mekim Olgeta Samting Olsem God i Tokim Ol’
“Sapos yumi laikim tru God, orait yumi save bihainim ol lo bilong en.”—1 JON 5:3.
“GOD yet em i as bilong dispela pasin bilong laikim ol arapela.” Olgeta man i save long God na ol i bihainim tok bilong em, ol i pilim tru dispela bikpela sori bilong God. “Pasin bilong laikim ol arapela, em i pasin bilong God. Yumi no ken ting, yumi bin laikim God pastaim. Nogat. God i laikim yumi pastaim. Olsem na em i bin salim Pikinini Man bilong en i kam long graun bilong lusim ol sin bilong yumi.” Sapos yumi bilip long dispela gutpela ofa bilong Jisas, bai “God i laikim yumi tru.” (1 Jon 4:8-10, 16) Olsem na bai yumi kisim planti blesing bilong spirit long nau, na long nupela taim i kamap bihain, bai yumi kisim laip i stap oltaim.—Jon 17:3; 1 Jon 2:15, 17.
2 Baibel i kamapim planti stori bilong ol man i bin bihainim ol lo bilong God na ol i kisim planti blesing. Sampela ol i bin i stap paslain long taim bilong ol witnes Kristen, na aposel Pol i stori long sampela olsem: “Ol dispela manmeri ol i bilip long God i go inap long taim ol i dai. Taim ol i stap long graun, ol i no kisim ol dispela gutpela samting God i bin promis long givim ol. Nogat. I olsem ol i sanap na lukluk i go long ol dispela samting i stap longwe tru long ol, na ol i amamas long lukim ol. Na ol i no sem long tokaut olsem, ‘Mipela i stap long dispela graun olsem ol manmeri bilong narapela kantri.’ ” (Hibru 11:13) Bihain sampela gutpela wokman bilong God i kisim “marimari wantaim [tok] i tru” i kam long rot bilong Krais Jisas. (Jon 1:17) Insait long dispela 6,000 yia ol man i stap long graun, Jehova i bin givim gutpela pe long ol witnes bilong em ol i bin i stap gut long em na bihainim ol lo bilong em, na dispela “ol lo bilong en i no givim hevi long yumi,” nogat tru.—1 Jon 5:2, 3.
Long Taim Bilong Noa
3 Baibel i tok: “Noa i bilip long God, na God i toksave long em long samting bai i kamap bihain, em samting Noa i no lukim yet. Orait em i bilipim tok bilong God na em i wokim wanpela sip. . . . Long dispela bilip bilong en, Noa i kamapim ples klia pasin nogut bilong olgeta arapela manmeri bilong graun. Noa i bilip long God na God i kolim em stretpela man, olsem God i save mekim long olgeta man i bilip long em.” “Noa em i man bilong tokaut long stretpela pasin,” na em i bihainim stret tok bilong God—em i givim toksave long ol man nogut i stap paslain long taim bilong Bikpela Tait long kot bilong God bai painim ol. (Hibru 11:7; 2 Pita 2:5) Taim Noa i wokim sip, em i bihainim stret piksa bilong wokim, olsem God i bin givim long em. Orait bihain em i kisim ol animal na kaikai i kam insait long sip olsem God yet i bin makim. “Orait Noa i mekim olgeta samting olsem God i tokim em.”—Stat 6:22.
4 Noa wantaim lain bilong em i stap namel long ol pasin nogut tru em ol bikhet ensel i kirapim ol man long mekim. Ol dispela pikinini bilong God ol i bin kisim skin bilong man na maritim ol meri bilong graun, na ol i kamapim ol pikinini i olsem hap man na hap ensel na ol i gat bikpela strong tru, winim ol man, na ol i bagarapim nabaut ol man. “Pasin bilong ol arapela manmeri i nogut tru. Long olgeta hap bilong graun ol i wok long pait na bikhet tasol.” Jehova i salim Bikpela Tait bilong pinisim dispela lain manmeri nogut. (Stat 6:4, 11-17; 7:1) Bihain long taim bilong Noa, God i no larim ol ensel nogut i kisim skin bilong man olsem ol i bin mekim bipo. Tasol ‘dispela graun olgeta em i stap yet aninit long strong bilong Satan.’ (1 Jon 5:19; KTH 12:9) Long tok profet bilong em, Jisas i tok dispela bikhet lain manmeri nogut long taim bilong Noa i wankain olsem ol manmeri bilong dispela taim nau, em ol i wok long sakim em taim mak bilong ‘i stap’ bilong em i kirap long kamap ples klia long 1914 na i kam inap long nau.—Matyu 24:3, 34, 37-39; Luk 17:26, 27.
5 Long nau tu, wankain olsem long taim bilong Noa, Satan i wok strong long bagarapim olgeta man wantaim dispela graun bilong yumi tu. (KTH 11:15-18) Olsem na yumi no ken lusim taim—yumi mas hariap na bihainim tok bilong Baibel, em i tok: “Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.” (Efesus 6:11) Yumi kisim strong long mekim olsem taim yumi stadi long Tok Bilong God na bihainim. Na tu, yumi gat gutpela oganaisesen bilong Jehova i stap, na lain “wokboi” bilong en God i bin makim long spirit holi, na ol gutpela elda bilong en, ol i save lukautim yumi olsem wasman na isi isi ol i soim yumi long rot yumi mas bihainim. Yumi gat wanpela bikpela wok bilong autim tok long olgeta hap bilong graun. (Matyu 24:14, 45-47) Olsem Noa i bin bihainim olgeta tok bilong God, yumi tu i mas ‘mekim olgeta samting olsem God i tokim yumi.’
Moses—Man Bilong Pasin Daun Tru
6 Tingim narapela bilipman—Moses. Em inap kisim ol gutpela gutpela samting bilong Isip na bihainim olgeta laik bilong skin. Tasol em i givim baksait long ol dispela samting na em i laik “kisim hevi wantaim ol lain bilong God. Em i no laik bihainim pasin bilong sin na kisim amamas bilong sotpela taim tasol.” Em i wokman bilong Jehova, olsem na “em i ting long dispela gutpela pe God i laik givim em . . . Moses i mekim wankain pasin olsem man i bin lukim God, na em i stap strong tru.”—Hibru 11:23-28.
7 Namba 12:3 i tok: “Dispela man Moses em i man bilong daunim em yet, na i no gat wanpela man long dispela graun i save daunim em yet inap olsem Moses.” Tasol king bilong Isip i mekim pasin olsem hambakman tru, winim olgeta narapela man. Orait, taim Jehova i tokim Moses na Aron long tokaut long king olsem kot bilong Jehova bai painim em, tupela i mekim wanem? Baibel i tok: “Moses wantaim Aron i mekim olgeta samting olsem Bikpela i tok.” (Kisim Bek 7:4-7) Ol i gat strongpela bel tru na ol i stap olsem gutpela piksa bilong yumi ol man i save tokaut long kot bilong God bai painim ol man!
8 Olsem wanem? Ol Israel i stap gut long Moses na helpim em? Taim Jehova i salim pinis 9-pela samting nogut long Isip, em i tokim ol Israel long pasin bilong mekim Pasova. “Ol manmeri i harim dispela tok na ol i daunim het na lotu long God. Na bihain ol i kirap i go mekim ol dispela samting olsem Bikpela i bin tokim Moses na Aron.” (Kisim Bek 12:27, 28) Long biknait bilong dispela bikpela de bilong Nisan 14, long yia 1513 paslain long Krais, ensel bilong Jehova i kirap na kilim i dai olgeta namba wan pikinini bilong ol Isip, tasol ensel i kalapim haus bilong ol Israel. Bilong wanem em i no kilim i dai ol namba wan pikinini bilong ol Israel? Long wanem, ol i bin penim blut bilong pikinini sipsip bilong Pasova long dua bilong ol, na dispela i lukautim ol. Ol i bin mekim olgeta samting olsem Jehova i bin tokim Moses na Aron. (Kisim Bek 12:50, 51) Long solwara Retsi, Jehova i wokim narapela mirakel bilong lukautim lain bilong em ol i save bihainim tok bilong em, na em i bagarapim king bilong Isip wantaim ami bilong em na ol strongpela samting bilong pait. Man! Ol Israel i amamas nogut tru! Long nau tu, planti manmeri ol i bin bihainim tok bilong Jehova ol bai amamas long lukim ol samting Jehova bai mekim long Armagedon bilong kamapim long ples klia olsem em i Nambawan Bos bilong heven na graun.—Kisim Bek 15:1, 2; KTH 15:3, 4.
9 Taim Jehova i tokim ol Israel long givim mani na gol samting bilong wokim haus lotu sel long ples wesan nating, ol i givim planti samting bilong helpim dispela wok. Bihain Moses wantaim ol wanwok bilong em ol i givim bel long bihainim olgeta liklik liklik samting bilong wokim dispela haus, wankain stret olsem piksa bilong haus Jehova i bin givim long em. “Olsem na olgeta wok bilong haus sel bilong bung wantaim God i pinis olgeta. Na ol Israel i bin wokim olgeta samting olsem Bikpela i bin tokim Moses.” Na i wankain tu long taim ol i kirapim wok pris, “Moses . . . i mekim olgeta samting olsem Bikpela i bin tokim em.” (Kisim Bek 39:32; 40:16) Long nau yumi gat rot long givim bel long helpim wok bilong autim tok na wokim ol haus samting bilong mekim wok bilong Kingdom i go bikpela. Olsem na yumi mas pas gut wantaim long mekim ol dispela wok—em gutpela samting tru yumi ken mekim.
Josua—Sanap Strong na i No Pret
10 Taim Jehova i makim Josua long bringim ol Israel i go insait long Graun Bilong Promis, i no gat planti hap bilong Baibel i stap—ating i gat 5-pela buk bilong Moses na wanpela o tupela Song, na Buk Jop. Moses i bin tokim Josua, taim ol i kamap pinis long Graun Bilong Promis, em i mas bungim ol manmeri na “ritim dispela lo long ol.” (Lo 31:10-12) Na Jehova yet i tokim Josua: “Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.”—Josua 1:8.
11 Josua i kaunim “buk” bilong Jehova long olgeta de, na dispela i strongim Josua long karim ol hevi bihain bai kamap. Na lain Witnes Bilong Jehova long nau tu, ol i kaunim Baibel long olgeta de na dispela i strongim ol long karim ol hevi bilong dispela taim nogut bilong las de. (2 Timoti 3:1) Yumi stap namel long ol man bilong pait na bagarapim man, olsem na yumi mas putim gut long bel wanpela tok Jehova i bin givim long Josua, em i tok: “Yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Josua 1:9) Taim ol i kisim kantri Kenan, ol lain bilong Israel i kisim gutpela pe tru taim ol i sindaun long ol hap graun ol i bin kisim. “Ol Israel i bihainim tok Bikpela i bin givim Moses.” (Josua 14:5) Na gutpela pe i wetim yumi ol manmeri bilong nau tu i save kaunim Baibel long olgeta de na bihainim tok bilong en, olsem ‘mekim olgeta samting olsem God i tokim yumi.’
Ol King—Gutpela na Nogut
12 Orait, olsem wanem long ol king bilong Israel? Jehova i bin givim lo long king olsem: “Taim em i kamap king, orait em i mas kisim wanpela buk ol i bin raitim ol lo bilong God long en. [Em] i mas bihainim buk bilong lo ol pris bilong Livai i holim, na raitim wankain tok tasol. Em i mas putim dispela buk i stap klostu long em na ritim hap tok long en long olgeta de. Olsem bai em i ken aninit long Bikpela na bihainim tru olgeta lo na tok bilong God i stap long dispela buk.” (Lo 17:18, 19) Olsem wanem? Ol king bilong Israel i bihainim dispela tok bilong God? Planti ol i no bihainim liklik, olsem na ol samting nogut i painim ol olsem Lo 28:15-68 i tok profet long en. Orait bihain Jehova i rausim ol Israel “i go nabaut nabaut long olgeta kantri, long olgeta hap bilong graun.”
13 Tasol Devit, em namba wan king i bin i stap gut long God long Israel, em i givim bel tru long Jehova. Em i kamapim klia olsem em i ‘wanpela yangpela laion long Juda,’ na em i piksa bilong Krais Jisas, em “dispela Laion i bin kamap long lain Juda, em dispela Kru i kamap long ol lain tumbuna bilong King Devit, em i winim pait na i daunim pinis ol birua bilong en.” (Stat 49:8, 9; KTH 5:5) Wanem samting i mekim na Devit i stap strong? Em i pilim tru ol gutpela tok i stap long Buk bilong Jehova na em i bihainim ol dispela tok. Song 19, em wanpela Song Devit i bin raitim, em i tok: “Lo bilong Bikpela em i stret olgeta.” Devit i stori long ol tok bilong Jehova bilong kirapim gen tingting, na lo bilong Jehova, na bihain em i tok: “Lo bilong Bikpela i swit tumas, na i winim hani. Em i winim tru gutpela switpela hani. Lo bilong yu i givim save long mi, wokman bilong yu. Mi bihainim lo bilong yu, olsem na yu save mekim sindaun bilong mi i gutpela tru.” (Song 19:7-11) Dispela pasin bilong kaunim na tingim gut Tok Bilong Jehova long olgeta de, em i bin helpim gut ol wokman bilong God ol i bin i stap 3,000 yia bipo, olsem na em bai helpim moa yet yumi ol man bilong nau, a?—Song 1:1-3; 13:6; 119:72, 97, 111.
14 Tasol ol wokman bilong God i no ken kisim save tasol—ol i mas bihainim ol dispela save ol i kisim—em laik bilong God long ol i mas mekim olsem. Yes, ol i mas ‘mekim olgeta samting olsem God i tokim ol.’ Yumi ken tingim pikinini bilong Devit, em Solomon, Jehova i bin makim em bilong i stap king na “bosim ol manmeri bilong Israel, dispela kantri bilong Bikpela.” Jehova i givim wok long Solomon long wokim haus lotu, na em i mas mekim wok long piksa bilong haus em Devit i bin kisim long Jehova. (1 Stori 28:5, 11-13) Olsem wanem Solomon inap mekim dispela bikpela wok tru? Jehova i harim beten bilong Solomon na em i givim gutpela tingting na bikpela save long em. Em nau, dispela gutpela tingting na save i helpim gut Solomon, na tu, em i bihainim stret dispela piksa bilong haus em Jehova i bin givim long Devit, olsem na em inap wokim dispela naispela haus tru, na bihain bikpela lait bilong God i pulap long dispela haus. (2 Stori 7:2, 3) Tasol bihain Solomon i pundaun. Em i pundaun olsem wanem? Lo bilong Jehova i tok long ol king bilong Israel olsem: “I tambu long king i maritim planti meri, long wanem, ol bai i mekim em i givim baksait long Bikpela.” (Lo 17:17) Tasol Solomon i kisim “700 meri na 300 namba 2 lain meri. Na ol dispela meri i . . . pulim tingting bilong en i go long ol giaman god.” Taim Solomon i lapun, em i lusim pasin bilong “mekim olgeta samting olsem God i tokim em.”—1 King 11:3, 4; Nehemia 13:26.
15 I gat wan wan king long Juda ol i bihainim tok bilong Jehova. Laspela king olsem, em Josaia. Long yia 648 paslain long Krais, em i kirap na rausim ol god giaman long Israel na em i stretim ol samting long haus bilong Jehova i bin bagarap. Long dispela haus yet hetpris i painim “buk i gat tok bilong lo bipo Bikpela i bin givim long ol Israel long han bilong Moses.” Orait Josaia i mekim wanem? “King i bungim ol pris na ol Livai na olgeta manmeri bilong Juda na Jerusalem, na ol i go bung long haus bilong Bikpela. Ol i bung pinis, orait em i kisim dispela buk bilong kontrak ol i bin kisim insait long haus bilong Bikpela, na em i ritim olgeta tok bilong buk long ol. King i sanap long ples bilong en, na em i mekim kontrak wantaim Bikpela, long em bai i bihainim olgeta tok bilong kontrak i stap insait long dispela buk. Em i promis long em bai i gat wanpela laik na tingting tasol, em long bihainim tru olgeta lo na tok bilong Bikpela.” (2 Stori 34:14, 30, 31) Yes, Josaia i “mekim olgeta samting olsem God i tokim em.” Em i stap gut long Jehova, olsem na dispela strafe Jehova i bin tok long givim long lain Juda i no bin i stap gut long em, em i no kamap long taim bilong Josaia; dispela strafe i kamap long taim bilong ol pikinini bilong em ol i bikhet long Jehova.
Bihainim Tok Bilong God
16 Nambawan man tru long graun i bin tingim gut Tok Bilong God na bihainim dispela tok, em Bikpela bilong yumi, Krais Jisas. Tok Bilong God i olsem kaikai bilong em. (Jon 4:34) Em i bin tokim ol manmeri: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim. Olgeta samting Papa i save mekim, em Pikinini tu i save mekim.” (Jon 5:19, 30; 7:28; 8:28, 42) Jisas i “mekim olgeta samting olsem God i tokim em,” na em i tok: “Mi no lusim heven na kam daun bilong bihainim laik bilong mi yet. Nogat. Mi kam daun bilong bihainim laik bilong Papa, em i bin salim mi na mi kam.” (Jon 6:38) Yumi ol Witnes Bilong Jehova i dediket pinis, yumi mas bihainim lek bilong Jisas na bai yumi ‘mekim olgeta samting olsem God i tokim yumi.’—Luk 9:23; 14:27; 1 Pita 2:21.
17 Long olgeta taim, namba wan tingting bilong Jisas, em bilong bihainim laik bilong God. Em i save gut tru long tok bilong God long Baibel, olsem na em inap givim dispela tok bilong God long ol man bilong bekim ol askim bilong ol. (Matyu 4:1-11; 12:24-31) Sapos long olgeta taim yumi putim gut yau long tok bilong Baibel, orait yumi tu bai “i redi long mekim olgeta kain gutpela wok.” (2 Timoti 3:16, 17) Yumi mas bihainim pasin bilong ol gutpela wokman bilong Jehova long bipo yet na ol narapela i kamap bihain long taim bilong ol, na yumi mas bihainim moa yet pasin bilong Bikpela bilong yumi, Krais Jisas, em i bin tok: “Mi laik bai ol manmeri bilong graun i save, mi laikim tru Papa, na mi save mekim olgeta samting Papa i tokim mi long mekim.” (Jon 14:31) Yumi tu i mas wok yet long ‘mekim olgeta samting olsem God i tokim yumi,’ na long dispela rot yumi kamapim long ples klia olsem yumi laikim tru God.—Mak 12:29-31.
18 Taim yumi tingim pasin bilong ol wokman bilong God long bipo ol i bihainim gut tok bilong em, dispela i save kirapim yumi long mekim wok bilong Jehova nau long laspela taim bilong dispela pasin nogut bilong graun em Satan i bosim. (Rom 15:4-6) Tru tumas, dispela i mas kirapim yumi long ‘bihainim dispela tok yumi kisim,’ na stori i kamap bihain long dispela bai toktok long dispela samting.—Jems 1:22.
Yu Inap Tingim?
◻ Sapos “yumi laikim tru God,” yumi mas mekim wanem?
◻ Pasin bilong Noa na Moses na Josua i lainim yumi long wanem samting?
◻ Ol king long Israel i bin bihainim “tok” bilong God o olsem wanem?
◻ Olsem wanem Jisas i stap olsem nambawan gutpela piksa long “mekim olgeta samting olsem God i tokim em”?
[Askim Bilong Stadi]
1. Yumi ken tok wanem long pasin bilong God long laikim tru ol man?
2. Ol wokman bilong God i bihainim ol lo bilong em na dispela i helpim ol olsem wanem?
3. Olsem wanem Noa i bin “mekim olgeta samting olsem God i tokim em”?
4, 5. (a) Olsem wanem na pasin nogut i bin stiaim ol man i kam inap long nau? (b) Taim yumi bihainim tok bilong God, bilong wanem yumi mas ‘mekim olgeta samting olsem God i tokim yumi’?
6, 7. (a) Moses i laik mekim wanem? (b) Moses i bin mekim wanem na em i stap olsem gutpela piksa bilong man i gat strongpela bel?
8. Bilong ‘mekim olgeta samting olsem God i tokim ol,’ ol Israel i mas mekim wanem? Bikpela amamas ol i bin kisim long dispela, olsem wanem em bai kamap gen liklik taim?
9. Ol wok ol Israel i bin mekim long haus lotu sel, em ol i ‘mekim olgeta samting olsem God i tokim ol,’ dispela i olsem piksa na i makim wanem ol gutpela wok bilong mekim long nau?
10, 11. (a) Wanem samting i mekim na olgeta wok bilong Josua i kamap gutpela tasol? (b) Wanem samting inap strongim yumi long karim ol hevi bilong nau?
12. (a) Jehova i bin givim wanem tok long ol king bilong Israel? (b) Taim ol king i no bihainim tok bilong Jehova, wanem samting i kamap?
13. Sapos yumi kamapim klia olsem yumi laikim tru Tok Bilong Jehova, dispela bai helpim yumi olsem wanem, olsem em i bin mekim long Devit?
14. Rot Solomon i bihainim, olsem wanem em i kamapim klia olsem yumi no ken kisim save tasol?
15. Olsem wanem Josaia i “mekim olgeta samting olsem God i tokim em”?
16, 17. (a) Yumi mas mekim wanem bilong bihainim lek bilong Jisas? (b) Wanem ol narapela gutpela wokman bilong God i stap olsem gutpela piksa bilong yumi?
18. Wanem samting i mas kirapim yumi long ‘bihainim dispela tok yumi kisim’? Long stori i kamap bihain long dispela, bai yumi toktok long wanem samting?
[Ol Piksa long pes 15]
Noa na Moses na Josua i ‘mekim olgeta samting olsem God i tokim ol’