Tok Bilong Jehova i Gat Laip
Sampela Bikpela Tok Bilong Buk Wok Pris
WANPELA yia i no lus yet long taim ol Israel i lusim kalabus long Isip. God i mekim ol i kamap wanpela nupela lain, na ol i wokabaut i go long Kenan. Jehova i tingting pinis olsem wanpela lain holi bai i stap long dispela ples. Tasol sindaun bilong ol lain Kenan na pasin bilong ol long lotu i nogut tru. Olsem na trupela God i givim ol lo long lain Israel na bai ol i stap narapela kain long ol dispela lain haiden. Ol dispela lo i stap long Buk Wok Pris. Profet Moses i raitim dispela buk long Sainai long yia 1512 B.C.E., na buk i stori long ol samting i kamap insait long wanpela mun. (Kisim Bek 40:17; Namba 1:1-3) Olgeta taim Jehova i save tokim ol man i lotuim em long i stap holi.—Wok Pris 11:44; 19:2; 20:7, 26.
Ol Witnes Bilong Jehova long nau ol i no stap aninit long Lo em God i givim long rot bilong Moses. Indai bilong Jisas Krais i pinisim dispela Lo. (Rom 6:14; Efesus 2:11-16) Tasol ol lo i stap long Wok Pris inap helpim yumi na skulim yumi long pasin bilong lotuim God Jehova.
OL OFA—GIVIM LONG LAIK BILONG OL YET NA LO I TOK OL I MAS MEKIM
Sampela ofa ol Israel i save givim long laik bilong ol yet, tasol sampela ofa Lo i tok ol i mas givim. Olsem, ofa bilong paia i kukim olgeta ol i save givim long laik bilong ol yet. Ol i save givim animal olgeta long God, olsem Jisas Krais i bin givim em yet olgeta olsem ofa bilong baim bek ol man. Tasol ofa bilong kamap wanbel wantaim God ol i save serim kaikai wantaim. Wanpela hap bilong ofa ol i ofaim long God long alta, narapela hap ol pris bai kaikai na man i mekim ofa em tu i kaikai hap bilong dispela ofa. Olsem tasol, Memorial em i wanpela kaikai bilong bung wantaim na ol Kristen God i bin makim ol i insait long en.—1 Korin 10:16-22.
Ofa bilong tekewe sin na ofa bilong mekim dai asua em samting Lo i tok ol Israel i mas mekim. Ofa bilong tekewe sin i bilong tekewe rong em man i popaia na mekim o em i no tingting gut na mekim. Na ol i mekim ofa bilong mekim dai asua taim ol i mekim sin i rongim narapela, na tu, ol i mekim dispela ofa bambai ol i ken kisim bek sampela gutpela wok ol i bin lusim olsem strafe ol i bin kisim long rong ol i mekim. Na ol i save mekim tu ofa bilong kukim wit bilong tingim ol samting Jehova i givim ol. Yumi mas tingim ol dispela ofa, long wanem, ol ofa em Lo i tok ol i mas mekim ol i makim ofa Jisas Krais i givim o ol samting i kamap long ofa bilong em.—Hibru 8:3-6; 9:9-14; 10:5-10.
Bekim Bilong Ol Askim Bilong Baibel:
2:11, 12—Bilong wanem Jehova i no orait long putim hani long “ofa na kukim long paia”? Hani em dispela ves i toktok long en i no bilong binen. Tru i tambu long putim hani long “ofa na kukim long paia,” tasol ol i ken givim hani na ol “nambawan gutpela . . . kaikai ol i bin kisim long gaden” olsem ofa. (2 Stori 31:5) Dispela hani em i wara bilong ol prut. Wara bilong ol prut inap mekim wok olsem yis, olsem na i tambu long putim long ofa na kukim long paia.
2:13—Bilong wanem ol i mas putim sol long “olgeta ofa”? Ol i no putim sol long ofa bilong mekim em i swit, nogat. Long olgeta hap bilong graun, ol i save putim sol long kaikai na bai em i no ken bagarap. Olsem na taim ol i putim sol long ol ofa ating dispela i makim samting i no save bagarap.
Skul Yumi Kisim:
3:17. Ol i tingim gris em i nambawan gutpela hap bilong animal na i tambu long ol Israel i kaikai, na dispela i kirapim ol Israel long tingim olsem nambawan gutpela hap i bilong Jehova. (Stat 45:18) Dispela i kirapim yumi long givim ol nambawan gutpela samting bilong yumi long Jehova.—Sindaun 3:9, 10; Kolosi 3:23, 24.
7:26, 27. Ol Israel i no ken kaikai blut. Long ai bilong God, blut i makim laip. Wok Pris 17:11 i tok: “Blut i save givim laip long olgeta man na animal.” Long nau tu ol man i lotu tru long God i save abrusim blut.—Aposel 15:28, 29.
OL I MAKIM WANPELA LAIN PRIS
Ol i givim wok bilong lukautim ol samting bilong ofa long husat? Ol i givim dispela wok long ol pris. God i tokim Moses long makim Aron long i stap hetpris na ol fopela pikinini man bilong em long i stap pris. Inap 7-pela de olgeta ol i mekim ol samting bilong makim ol pris, na ol pris i kirap mekim wok bilong ol long de bihain.
Bekim Bilong Ol Askim Bilong Baibel:
9:9—Taim ol i kapsaitim blut long daunbilo bilong alta na ol i putim long sampela narapela samting, dispela i makim wanem samting? Dispela i makim olsem Jehova i save orait long blut ol i givim olsem ofa. Blut i as bilong olgeta samting ol i mas mekim bilong tekewe sin. Aposel Pol i tok, “long pasin bilong lo blut tasol i save mekim klostu olgeta samting i kamap klin. Na sapos ol i no kilim wanpela samting i dai na mekim blut bilong en i kapsait, orait God i no save rausim sin bilong ol manmeri.”—Hibru 9:22.
10:1, 2—Wanem samting i insait long sin tupela pikinini man bilong Aron, em Nadap na Abihu i mekim? Nadap na Abihu i mekim pasin i no stret taim tupela i mekim wok bilong tupela olsem pris na bihain liklik long dispela Jehova i putim tambu long ol pris i no ken dring wain o bia samting taim ol i mekim wok insait long haus lotu sel. (Wok Pris 10:9) Dispela samting i soim olsem tupela pikinini man bilong Aron i bin dring wain samting long dispela taim em stori antap i kamapim. Tasol, as tru na tupela i dai em tupela i putim “paia na paura bilong kamapim smok i gat gutpela smel long ol plet, na tupela i bringim dispela paia long Bikpela olsem ofa. Tasol Bikpela i no bin tokim tupela long bringim kain paia olsem.”
Skul Yumi Kisim:
10:1, 2. Ol wokman bilong Jehova long nau i mas bihainim ol lo bilong God. Na tu, ol i no ken hambak taim ol i mekim ol wok bilong ol.
10:9. Yumi no ken dring wain o bia samting taim yumi mekim wok bilong God.
MAN I LOTU LONG GOD I MAS STAP KLIN
Ol lo bilong kaikai, olsem ol animal i klin na i no klin i bin helpim ol Israel long tupela rot. Ol dispela lo i lukautim ol na ol i no kisim sik long ol binatang i stap insait long sampela animal, na i mekim ol i stap narapela kain long ol lain i stap klostu long ol. I gat ol arapela lo long ol i ken mekim wanem taim ol i holim skin bilong daiman, ol samting meri i ken mekim bilong kamap klin bihain long em i karim pikinini, ol samting man o meri i ken mekim taim em i gat sik lepra na taim susu i kamap long sem bilong em. Ol pris i mas mekim ol samting bilong mekim ol man i no klin i kamap klin.
Bekim Bilong Ol Askim Bilong Baibel:
12:2, 5—Taim meri i karim pikinini, bilong wanem em i “no klin”? God i wokim hap bilong bodi bilong meri long kamapim ol pikinini i gutpela olgeta, i no gat sin. Tasol sin bilong Adam i mekim na sin i save kalap long ol pikinini. Dispela ol haptaim we meri i “no klin,” em long taim meri i karim pikinini, na long taim em i kisim sik mun na taim meri i slip wantaim man, dispela i kirapim ol Israel long tingim sin ol i bin kisim long Adam. (Wok Pris 15:16-24; Song 51:5; Rom 5:12) Ol samting meri i mekim bilong kamap klin bai helpim ol Israel long pilim tru olsem i mas i gat wanpela man i dai bilong baim bek ol man na bai ol inap kamap gutpela olgeta gen. Olsem na Lo i stap olsem ‘waspapa bilong ol, bilong bringim ol i go long Krais.’—Galesia 3:24.
15:16-18—Wanem dispela “wara i kamap nating” long sem bilong man em ol dispela ves i toktok long en? Ating dispela i makim taim man i slip long nait na wara o melek i kamap nating na i kapsait, o taim em i mekim maritpasin wantaim meri bilong em.
Skul Yumi Kisim:
11:45. God Jehova em i holi na em i laik bai ol man i lotuim em ol i mas i stap holi tu. Ol i mas wok strong long i stap holi na i stap klin long skin na spirit.—2 Korin 7:1; 1 Pita 1:15, 16.
12:8. Jehova i orait long ol rabisman long givim pisin olsem ofa na i no sipsip i gat bikpela pe tru. Em i save tingim ol man i stap rabis.
WOK STRONG LONG I STAP HOLI
Ol ofa i bikpela samting tru em ol i save mekim long Bikpela De Bilong God i Tekewe Sin Bilong Ol Manmeri. Ol i save givim ol bulmakau olsem ofa bilong ol pris na ol lain Livai. Ol i save mekim ofa long meme bilong olgeta narapela lain bilong Israel. Bihain long pris i putim olgeta sin bilong ol manmeri antap long narapela meme, orait ol i mas salim em i go long ples drai nating. Dispela tupela meme wantaim i bilong wanpela ofa bilong rausim sin. Olgeta dispela samting i makim ofa Jisas Krais bai givim na pinisim olgeta sin.
Ol lo bilong wanem kain mit ol i ken kaikai na bilong ol narapela samting i kirapim yumi long i stap holi taim yumi lotuim Jehova. Ol pris i mas i stap holi. Ol tripela bikpela bung bilong lotu ol i taim bilong amamas na ol i taim bilong tok tenkyu long Man Bilong Wokim olgeta samting. Na tu, Jehova i givim lo long ol lain bilong em long ol i no ken mekim wok nogut long nem holi bilong em, na em i givim lo long ol long tingim de Sabat na namba 50 yia, na em i givim lo tu long wanem kain pasin ol i ken mekim long ol rabisman, na ol wokboi nating. Buk Wok Pris i kamapim ol blesing ol inap kisim taim ol i bihainim tok bilong God na ol hevi ol inap kisim taim ol i sakim tok bilong em. Em i givim tu lo long ol ofa ol i ken mekim taim ol i mekim strongpela promis na hamas mani ol i ken givim bilong baim bek ol yet, na lo bilong givim namba wan pikinini bilong ol animal na lo i tok long ol i mas tilim ol samting bilong ol long 10-pela hap na givim wanpela hap i go ‘long God.’
Bekim Bilong Ol Askim Bilong Baibel:
16:29—Bilong wanem ol Israel i mas “tambu long kaikai”? Dispela pasin bilong tambu long kaikai ol i save mekim bihain long taim bilong Bikpela De Bilong God i Tekewe Sin Bilong Ol Manmeri, na em i insait long ol samting ol i mekim bilong tekewe sin. Pasin bilong tambu long kaikai i kirapim ol Israel long tingim olsem ol i gat sin.
19:27—Wanem mining bilong dispela tok “no ken katim gras bilong het klostu long yau bilong yupela,” na “no ken katim na sotim mausgras”? God i givim dispela lo long ol Juda bilong pasim ol long bihainim wankain pasin olsem bilong ol haiden long katim mausgras o gras bilong het. (Jeremaia 9:25, 26; 25:23; 49:32) Tasol dispela lo bilong God i no makim olsem i tambu olgeta long ol Juda i no ken katim mausgras o gras bilong het, nogat.—2 Samuel 19:24.
25:35-37—Yu ting olgeta taim i no stret long ol Israel i kisim winmani taim wanpela i bekim dinau bilong ol? Sapos man i givim mani olsem dinau long narapela man long ol samting bilong bisnis, orait man i givim mani i ken askim long winmani. Tasol Lo i tambuim ol man long makim winmani taim ol i givim long ol rabisman. I no stret long kisim winmani long man i stap klostu long ol na em i rabisman.—Kisim Bek 22:25.
26:19—Olsem wanem ‘graun bai i kamap strong olgeta olsem ain’? Taim i no gat ren graun bai kamap strong olsem ain.
26:26— Wanem insait bilong dispela tok ‘wanpela paia bai kukim kaikai bilong 10-pela meri’? Meri i kukim kaikai i mas i gat paia bilong em yet long kuk. Tasol dispela tok i makim olsem kaikai i sot tru olsem na 10-pela meri inap long kukim kaikai wantaim long wanpela paia. God i bin tok dispela samting bai kamap sapos ol i no bihainim ol lo bilong i stap holi.
Skul Yumi Kisim:
20:9. Long ai bilong Jehova, pasin bilong i no laikim narapela na mekim nogut long narapela i wankain long pasin bilong kilim man i dai. Olsem na em i tok sapos wanpela man o meri i tok nogut long papa o mama bilong em ol i mas kilim em i dai. Dispela i mas kirapim yumi long soim olsem yumi laikim ol wanbilip bilong yumi, a?—1 Jon 3:14, 15.
22:32; 24:10-16, 23. Yumi no ken tok bilas long nem bilong Jehova. Yumi mas litimapim nem bilong em na beten long nem bilong em i mas stap holi.—Song 7:17; Matyu 6:9.
BUK WOK PRIS I MEKIM WANEM LONG PASIN BILONG YUMI LONG LOTU
Ol Witnes Bilong Jehova long nau ol i no stap aninit long Lo. (Galesia 3:23-25) Tasol ol tok i stap insait long Buk Wok Pris i kamapim tingting bilong Jehova long kain kain samting, olsem na em inap stiaim pasin bilong yumi long lotuim em.
Taim yu mekim Baibel ritim bilong yu bilong redi long miting bilong Skul Tiokratik Bilong Autim Tok, bai yu pilim tru olsem God bilong yumi i laik bai ol wokman bilong em i mas i stap holi. Dispela buk bilong Baibel bai helpim yu long givim nambawan gutpela samting bilong yu long God Antap Tru, na oltaim mekim ol samting bilong i stap holi na bai dispela i givim biknem long em.
[Piksa long pes 21]
Ol ofa ol i mekim aninit long Lo i makim Jisas Krais na ofa bilong em
[Piksa long pes 22]
Ol Bikpela De Bilong Bret i No Gat Yis em i taim bilong amamas
[Piksa long pes 23]
Ol bikpela bung, olsem Ol Bikpela De Bilong i Stap Long Haus Win, ol dispela bung i bilong tok tenkyu long Jehova