‘Wanpela Haus Bilong Olgeta Lain i Ken Kam na Beten Long Mi’
“Buk bilong God i gat tok olsem, ‘Haus bilong mi bai i stap haus bilong ol manmeri bilong olgeta kantri i ken i kam long en na beten long mi.’ ”—MAK 11:17.
TAIM God i bin wokim Adam na Iv, tupela i pas gut wantaim Papa bilong ol long heven. God Jehova i toktok wantaim ol na em i tokim ol long gutpela laik bilong em long ol manmeri bilong graun. Ating planti taim bel bilong ol i bin kirap tru long litimapim nem bilong Jehova long ol gutpela gutpela samting em i bin wokim. Sapos Adam tupela Iv i mas kisim sampela tok bilong stiaim ol taim ol i tingim bikpela wok bilong ol long bihain, olsem ol bai stap papa na mama bilong olgeta manmeri bilong graun, ol i ken askim God long dispela samting, maski ol i stap long wanem wanem hap bilong ples Paradais bilong ol. Tupela i no gat wok long go long wanpela pris i stap long wanpela haus lotu.—Stat 1:28.
2 Tasol senis i kamap taim wanpela ensel i pulim Iv na Iv i ting i stap bilong em bai i kamap gutpela moa sapos em i sakim wok bos bilong God Jehova. Ensel i tok, em bai “kamap wankain olsem God.” Olsem na Iv i kaikai pikinini bilong diwai God i bin tambuim tupela long kaikai. Orait bihain Satan i kirapim Iv long grisim man bilong em long kaikai. Sori tru, Adam i harim tok bilong meri bilong em i bin mekim sin, na dispela i kamapim bel bilong em, em i tingting tumas long pas gut wantaim meri bilong em, na em i no tingting tumas long pas gut wantaim God. (Stat 3:4-7) Pasin Adam na Iv i mekim i makim olsem tupela i laik bai Satan i stap god bilong ol.—Skelim wantaim 2 Korin 4:4.
3 Taim namba wan man na meri i mekim olsem, tupela i no pas gut moa wantaim God, na tupela i no inap i stap oltaim long ples paradais long graun. Tupela i lus tru long dispela tupela samting. (Stat 2:16, 17) Nau sin i stap long tupela na skin bilong tupela i wok long bagarap i go i go na bihain tupela i dai. Ol pikinini bilong tupela i kisim sin long tupela. Olsem na “dai i kisim olgeta man,” olsem Baibel i tok.—Rom 5:12.
4 I mas i gat wanpela samting bilong helpim ol sinman bilong graun long kamap wanbel gen wantaim Man bilong wokim ol. Taim God i kolim strafe bilong tupela, em i tok promis long kamapim wanpela Pikinini em bai kisim bek ol man long ol samting nogut i bin kamap taim Satan i bikhet long God. (Stat 3:15) Bihain God i kamapim long ples klia olsem dispela Pikinini bilong mekim gut long ol man em bai kamap long lain bilong Abraham. (Stat 22:18) God i tingim dispela pasin sori em i laik mekim na em i makim ol tumbuna pikinini bilong Abraham, em ol Israel, long kamap lain bilong em stret.
5 Long yia 1513 B.C.E. ol Israel i go insait long wanpela kontrak wantaim God na ol i tok ol bai bihainim ol lo bilong em. Olgeta man i laik lotu long God long nau ol i mas laik tru long kisim save long dispela kontrak bilong Lo, long wanem, ol samting bilong Lo i makim dispela Pikinini God i tok promis long salim i kam. Pol i tok, dispela Lo i olsem ‘piksa bilong ol gutpela samting i laik kamap bihain.’ (Hibru 10:1) Taim Pol i mekim dispela tok, em i toktok long wok ol pris bilong Israel i mekim long wanpela haus sel, em ol inap brukim na karim i go. Ol i kolim olsem “haus bilong Bikpela [“Jehova,” NW].” (1 Samuel 1:9, 24) Sapos yumi skelim ol wok holi ol pris i bin mekim long haus bilong Jehova long graun, bai yumi inap pilim gut pasin marimari God i bin mekim, em i wokim rot bambai ol sinman bilong graun long nau ol inap kamap wanbel gen wantaim em.
Rum Tambu Tru
6 Baibel i tok: “God Antap Tru i no save stap long ol haus ol man i wokim.” (Aposel 7:48) Tasol i gat wanpela klaut olsem lait i stap long wanpela rum insait tru long haus bilong God, ol i kolim Rum Tambu Tru, na dispela i makim olsem God i stap long dispela haus. (Wok Pris 16:2) Dispela lait i lait strong na i givim lait long Rum Tambu Tru. Em i stap antap long wanpela bokis holi ol i kolim “Bokis Kontrak,” na insait long en i gat sampela plet ston God i bin raitim sampela lo em i bin givim long ol Israel. Long ai bilong Bokis i gat tupela ensel serap ol i bin wokim long gol na wing bilong tupela i op; ol i makim ol ensel long heven i gat bikpela namba insait long oganaisesen bilong God long heven. Dispela lait em i wanpela mirakel na em i stap antap long ai bilong Bokis namel long tupela ensel. (Kisim Bek 25:22) Dispela i makim God i Gat Olgeta Strong em i sindaun long sia king long wanpela karis long heven na ol ensel serap i gat laip i stap aninit na karim dispela karis. (1 Stori 28:18) Olsem na King Hesekia i beten olsem: “Bikpela I Gat Olgeta Strong, yu God bilong mipela Israel na yu stap antap long ol ensel na yu sindaun long sia king bilong yu.”—Aisaia 37:16.
Rum Tambu
7 Namba 2 rum long haus sel ol i kolim Rum Tambu. Insait long dispela rum, long han kais bilong dua i gat wanpela naispela stik lam i gat 7-pela han, na long han sut i gat wanpela tebol bilong putim bret ol i givim long God. Long ai bilong tebol wanpela alta i stap na i gat paura em paia i kukim, na smok i gat gutpela smel i wok long go antap. Dispela alta i stap long ai bilong wanpela laplap i stap olsem banis namel long Rum Tambu na Rum Tambu Tru.
8 Long olgeta moningtaim na apinun tru, wanpela pris i mas i go insait long dispela haus sel na kukim paura long dispela alta bilong kamapim smok i gat gutpela smel. (Kisim Bek 30:7, 8) Long moningtaim, taim paia i wok long kukim paura i gat gutpela smel, ol i mas pulimapim wel long 7-pela lam i sindaun long stik lam gol. Long apinun tru ol i save laitim ol lam na bai i gat lait insait long Rum Tambu. Long olgeta de Sabat wanpela pris i mas putim 12-pela nupela bret long tebol ol i save putim bret long en bilong givim long God.—Wok Pris 24:4-8.
Ples Bung Namel Long Alta na Haus
9 Dispela haus sel i gat wanpela hap graun olsem ples bung, na i gat wanpela banis i raunim olgeta, em ol i wokim long laplap sel. Long dispela ples bung i gat wanpela traipela dis ol pris i save wasim hanlek bilong ol long en taim ol i laik i go insait long Rum Tambu. Na ol i mas waswas tu taim ol i laik kukim ol ofa long alta i stap ausait long haus sel. (Kisim Bek 30:18-21) Dispela lo long ol pris i mas i stap klin, em inap kirapim tingting bilong ol wokman bilong God long nau olsem ol i mas wok strong long i stap klin long skin, na long pasin bilong ol, na long tingting, na long ol samting bilong spirit sapos ol i laik lotuim God long pasin em i laikim. (2 Korin 7:1) Bihain ol wokboi nating bilong haus bilong God em ol i no bilong lain Israel ol i save kisim paiawut bilong wokim paia long alta na karim wara bilong traipela dis.—Josua 9:27.
10 Long olgeta moningtaim na apinun tru, ol pris i mas ofaim wanpela yangpela sipsip man long alta na kukim long paia, na ol i mas ofaim sampela wit na wain tu. (Kisim Bek 29:38-41) Long ol bikpela de ol i mas mekim ol narapela ofa. Sampela taim, sapos wanpela i bin mekim rong, em i mas givim wanpela sipsip samting olsem ofa. (Wok Pris 5:5, 6) Na sampela taim, wanpela Israel inap mekim wanpela ofa long sipsip samting, na sampela hap bilong en ol pris i kaikai, na man i mekim dispela ofa em tu i kaikai sampela hap bilong en. Dispela i makim olsem ol sinman bilong graun inap i stap bel isi wantaim God na i olsem ol i kaikai wantaim em. Na ol man bilong narapela kantri i sindaun wantaim ol Israel ol tu inap lotuim Jehova na givim ofa long em long haus bilong em. Tasol bilong mekim gut long Jehova, ol pris i mas kisim ol nambawan gutpela ofa tasol long ol man. Taim ol i wokim plaua long wit samting bilong givim olsem ofa, ol i mas wokim gutpela tru, na taim man i laik givim wanpela animal olsem ofa bilong kukim long paia, em i mas kisim animal i gutpela tru, no gat sua o liklik bagarap long skin bilong en.—Wok Pris 2:1; 22:18-20; Malakai 1:6-8.
11 Ol pris i save putim blut bilong ol dispela animal long alta. Olsem na long olgeta de ol Israel i ken tingim sin bilong ol, em ol i sinman na i mas i gat wanpela man bilong kisim bek ol, na blut bilong em inap tekewe sin bilong ol inap oltaim oltaim na kisim bek ol long i dai. (Rom 7:24, 25; Galesia 3:24; skelim wantaim Hibru 10:3.) Na tu, dispela wok holi ol i mekim long blut i bilong kirapim tingting bilong ol Israel na ol i ken save, blut i makim laip, na laip bilong olgeta samting i bilong God. Long olgeta taim God i tambuim ol man long mekim ol narapela wok long blut.—Stat 9:4; Wok Pris 17:10-12; Aposel 15:28, 29.
Bikpela De Bilong Tekewe Sin
12 Wanpela taim long olgeta yia, long Bikpela De Bilong God i Tekewe Sin Bilong Ol Manmeri, lain Israel olgeta wantaim ol man bilong ol narapela lain i sindaun wantaim ol na ol i lotuim Jehova, ol i no ken mekim wanpela wok, na ol i mas i stap tambu long kaikai. (Wok Pris 16:29, 30) Long dispela bikpela de i olsem God i tekewe sin bilong ol bambai ol i ken i stap bel isi wantaim God inap wanpela yia moa. Orait nau yumi ken tingim ol Israel long dispela taim na sampela bikpela samting i bin kamap.
13 Hetpris i stap long ples bung ausait long haus sel. Em i waswas pinis long dispela dis i gat wara long en, na nau em i kilim wanpela bulmakau man bilong mekim ofa long en. Em i kapsaitim blut bilong en long wanpela plet. Em bai mekim wanpela bikpela wok long en bilong tekewe sin bilong ol pris bilong lain Livai. (Wok Pris 16:4, 6, 11) Tasol taim hetpris i no mekim yet narapela samting long dispela ofa, pastaim em i mas mekim wanpela samting. Em i kisim paura bilong kamapim smok i gat gutpela smel (ating em i pulimapim long wanpela plet), na em i go long alta na pulimapim hap paia long wanpela sospen ain. Nau em i go insait long Rum Tambu na wokabaut i go long laplap i banisim Rum Tambu Tru, na isi isi em i abrusim laplap na i go insait na sanap long ai bilong Bokis Kontrak. Orait nau em i kapsaitim paura antap long paia, na smok i gat gutpela smel i pulap long Rum Tambu Tru. I no gat narapela man i lukim dispela samting em i mekim.—Wok Pris 16:12, 13.
14 Nau God inap mekim pasin marimari long ol na em i orait long ol—em i mekim olsem wanpela piksa. Olsem na ol i kolim ai bilong Bokis Kontrak olsem “ples bilong lusim sin bilong ol manmeri.” (Hibru 9:5) Hetpris i lusim Rum Tambu Tru na em i kisim blut bilong dispela bulmakau na i go insait gen long Rum Tambu Tru. Olsem Lo i tok long mekim, em i putim pinga long blut na tromoi blut 7-pela taim long pes bilong Bokis Kontrak. (Wok Pris 16:14) Orait nau em i go ausait long ples bung na em i kilim wanpela meme, em i wanpela ofa bilong tekewe sin “bilong ol manmeri.” Em i kisim hap blut bilong meme i go insait long Rum Tambu Tru na em i mekim wankain pasin long en olsem em i bin mekim long blut bilong bulmakau. (Wok Pris 16:15) I gat ol narapela bikpela wok i bin kamap long Bikpela De Bilong God i Tekewe Sin Bilong Ol Manmeri, olsem: Hetpris i mas putim tupela han bilong em long het bilong namba 2 meme na kolim ‘olgeta sin bilong ol Israel.’ Bihain ol i bringim meme i go long ples drai nating na lusim em long dispela hap. I olsem dispela meme i karim sin bilong ol Israel i go. Long dispela pasin God i tekewe sin bilong “ol pris na olgeta manmeri bilong Israel” long olgeta wan wan yia.—Wok Pris 16:16, 21, 22, 33.
15 Kirap long taim God i kisim ol Israel olsem lain bilong em stret, inap 486 yia dispela haus sel ol i save brukim na karim i go, em i ples bilong lotuim God bilong ol, Jehova. Bihain Solomon i kisim wok bilong wokim wanpela haus tru bilong lotuim Jehova long en. Dispela haus bilong Jehova bai i bikpela na i gat ol gutpela bilas bilong en, tasol piksa bilong en Jehova i givim, i bihainim wankain mak olsem dispela haus sel. Tupela haus wantaim i olsem piksa bilong wanpela gutpela samting tru Jehova bai putim bilong ol man i ken lotuim em, na ol man i no wokim, nogat. Jehova yet bai wokim.—Hibru 8:2, 5; 9:9, 11.
Namba Wan na Namba Tu Haus
16 Taim Solomon i dediketim dispela naispela haus bilong God, em i askim God long wanpela samting em spirit holi yet i kirapim em long tingim, olsem: “Sapos ol man bilong ol arapela kantri i save long biknem bilong yu na long ol bikpela wok tru yu bin mekim bilong helpim mipela ol manmeri bilong yu, na sapos wanpela bilong ol i laik lotu long yu na i lusim as ples bilong en na i kam klostu long dispela haus na i beten long yu, orait Bikpela, yu stap long ples bilong yu long heven na yu ken harim beten bilong em na helpim em long wanem samting em i askim yu long en. Olsem na bai olgeta lain manmeri long olgeta kantri i ken save long yu na i stap aninit long yu, olsem mipela Israel, ol manmeri bilong yu, i save mekim. Na bai ol i ken save, dispela haus mi wokim, em i haus bilong yu yet na long dispela ples ol manmeri i ken i kam klostu long yu na lotuim yu.” (2 Stori 6:32, 33) God i kamapim long ples klia tru olsem em i orait long dispela beten bilong Solomon. God i salim paia i kam daun na i kukim olgeta sipsip samting i stap olsem ofa antap long alta, na bikpela lait bilong Jehova i pulapim haus.—2 Stori 7:1-3.
17 Tasol sori tru, bihain ol Israel i no pret moa long Jehova na stap aninit long em. Ol i kilim i dai ol man, na lotuim ol god giaman, na mekim pasin pamuk, na mekim pasin sem long ol wanblut, na ol i mekim nogut long ol pikinini i no gat papamama, na ol meri em man bilong ol i dai pinis, na ol manmeri bilong ol narapela kantri, na long dispela pasin ol i bagarapim nem bilong Jehova. (Esekiel 22:2, 3, 7, 11, 12, 26, 29) Olsem na long yia 607 B.C.E. Jehova i givim strafe long ol Israel—em i salim ol ami bilong Babilon i kam na bagarapim haus lotu bilong ol. Ol Israel i abrusim bagarap ol i go kalabus long Babilon.
18 Inap 70 yia bihain, hap lain bilong ol Juda i go bek long Jerusalem; ol i tanim bel pinis na ol i kisim gutpela wok tru bilong sanapim gen haus bilong Jehova. Ol i sot long ol pris na Livai bilong mekim wok long dispela namba 2 haus bilong Jehova. Olsem na wanpela lain wokboi ol i kolim Netinim, em ol tumbuna pikinini bilong wanpela lain wokboi nating bilong haus bilong God na ol i no bilong lain Israel, ol i kisim bikpela wok olsem wokman long haus bilong God. Tasol ol i no kisim wankain namba olsem ol pris na Livai, nogat.—Esra 7:24; 8:17, 20.
19 Pastaim i olsem dispela namba 2 haus bilong God bai i no gutpela tru olsem namba wan haus. (Hagai 2:3) Tasol Jehova i tok promis olsem: “Bai mi seksekim olgeta lain man na bai ol gutpela samting bilong olgeta lain ol i mas i kam insait long haus bilong mi. Dispela nupela haus bai i kamap gutpela moa na bai i winim olpela haus.” (Hagai 2:7, 9, NW) Dispela tok promis i kamap tru na dispela namba 2 haus i kamap gutpela tru, winim narapela. Na nupela haus i stap planti yia moa, winim olpela haus inap 164 yia, na planti manmeri moa yet bilong ol narapela narapela lain ol i kam insait long banis bilong en bilong lotuim Jehova. (Skelim wantaim Aposel 2:5-11.) Long taim bilong King Herot ol i kirap stretim namba 2 haus, na ol ples bung bilong en insait long banis ol i wokim i go bikpela. Ol i wokim antap long traipela bet ston, na i gat ol naispela naispela pos ston i raunim, olsem na em i winim haus Solomon i bin wokim. Long ausait tru i gat wanpela bikpela ples bung bilong ol manmeri bilong ol narapela lain em ol i laik lotuim Jehova. I gat wanpela banis ston namel long dispela Ples Bung Bilong Ol Man Bilong Ol Arapela Lain na ol ples bung bilong ol Israel tasol, i stap insait liklik.
20 Dispela namba 2 haus i narapela kain, long wanem, Pikinini bilong God, em Krais Jisas, em i skulim ol man insait long ol ples bung bilong en. Tasol ol Juda i mekim long nupela haus olsem ol i bin mekim long namba wan haus—ol i no gat stretpela tingting long gutpela wok ol i kisim, em God i bin makim ol bilong lukautim haus bilong em. Ol i larim ol man i kam insait long ples bung bilong ol narapela lain insait long banis bilong haus bilong God na wokim bisnis bilong ol. Na taim ol man i karim ol kago samting bilong ol i go i kam long Jerusalem, ol i save larim ol i go insait long banis bilong haus na wokabaut i go bilong sotim rot. Fopela de paslain long taim Jisas i dai, em i rausim ol man bilong mekim ol dispela kain wok, na em i tok olsem: “Buk bilong God i gat tok olsem, ‘Haus bilong mi bai i stap haus bilong ol manmeri bilong olgeta kantri i ken i kam long en na beten long mi.’ Tasol yupela i mekim em i kamap olsem ples hait bilong ol stilman.”—Mak 11:15-17.
God i Lusim Tru Haus Bilong Em Long Graun
21 Jisas i strongim bel na em i sambai long klinpela lotu bilong Jehova, olsem na ol bikman bilong lotu Juda i strong long kilim em i dai. (Mak 11:18) Jisas i save, liklik taim bai ol i kilim em i dai, olsem na em i tokim ol bikman bilong lotu Juda: “Harim. Nau ples [olsem haus] bilong yupela bai i bagarap na i stap nating.” (Matyu 23:37, 38) Tok bilong em i makim olsem klostu nau na God bai i no ken orait moa long lotu ol man i mekim long haus bilong em long Jerusalem. Dispela haus i no ken i stap moa olsem ‘haus bilong ol manmeri bilong olgeta kantri i ken i kam long en na beten long em.’ Taim ol disaipel i tokim Jisas long lukim dispela naispela haus, em i tokim ol: “Yupela i lukim dispela olgeta gutpela haus, a? . . . Ol bai i no larim wanpela ston i stap antap long narapela ston. Ol bai i brukim olgeta na tromoi i go daun.”—Matyu 24:1, 2.
22 Tok profet bilong Jisas i kamap tru inap 37 yia bihain, olsem long yia 70, taim ol ami bilong Rom i bagarapim Jerusalem wantaim haus lotu bilong en. Dispela i kamapim long ples klia olsem God i bin lusim tru haus bilong em long graun. Jisas i no bin tok profet long ol bai wokim gen narapela haus bilong God long Jerusalem. Taim aposel Pol i raitim pas i go long ol Kristen Hibru, em i stori long dispela taun long graun na em i tok: “Long dispela graun yumi no gat wanpela taun i save stap oltaim. Tasol yumi wet long lukim dispela taun i laik kamap bihain.” (Hibru 13:14) Ol Kristen bilong pastaim ol i bin wet long kamap long “Jerusalem i stap long heven”—em Kingdom bilong God na i kain olsem wanpela taun. (Hibru 12:22) Olsem na long nau i no gat wanpela haus lotu bilong graun ol man i mas i kam long en bilong lotuim Jehova, nogat. Long stori i kamap bihain long dispela, bai yumi toktok long narapela samting i gutpela moa, em God i bin putim bilong helpim olgeta man i laik lotuim em long “Spirit na long pasin i tru.”—Jon 4:21, 24.
Ol Askim Bilong Tingim Gen
◻ Pastaim Adam na Iv i stap olsem wanem wantaim God na bihain dispela gutpela samting i lus long ol?
◻ Bilong wanem yumi mas laik long kisim save long sampela samting bilong haus sel bilong God?
◻ Ol samting ol i bin mekim long ples bung insait long banis bilong haus sel, dispela i skulim yumi long wanem samting?
◻ Bilong wanem God i larim ol narapela lain i bagarapim haus bilong em?
[Askim Bilong Stadi]
1. Pastaim Adam na Iv i stap olsem wanem wantaim God?
2. Taim Adam na Iv i mekim sin, wanem senis i kamap?
3. Taim Adam na Iv i bikhet long God, dispela i kamapim wanem ol samting nogut?
4. God i tok promis long ol sinman bilong graun inap wetim wanem gutpela samting?
5. Bilong wanem yumi mas laik long kisim save long ol samting bilong kontrak bilong Lo God i bin mekim wantaim ol Israel?
6. Wanem samting i stap insait long Rum Tambu Tru? Wanem samting i stap na i olsem God i stap insait long dispela rum?
7. Wanem ol samting i stap insait long Rum Tambu?
8. Ol pris i save mekim wanem ol wok insait long Rum Tambu?
9. Wanem wok bilong dis i gat wara long en? Dispela inap skulim yumi long wanem samting?
10. Wanem sampela ofa ol i bin mekim antap long alta?
11. (a) Ol i mekim wanem long blut bilong ol animal ol i wokim ofa long en? Dispela i makim wanem samting? (b) God i ting olsem wanem long blut bilong ol man na ol animal?
12, 13. (a) Wanem wok bilong Bikpela De Bilong God i Tekewe Sin Bilong Ol Manmeri? (b) Taim hetpris i no bringim blut i go yet insait long Rum Tambu Tru, pastaim em i mas mekim wanem?
14. Bilong wanem hetpris i mas karim blut bilong tupela kain animal i go insait long Rum Tambu Tru?
15. (a) Haus bilong God em Solomon i wokim, olsem wanem em i kain olsem haus sel bilong pastaim? (b) Buk Hibru long Baibel i tok wanem long wok holi ol pris i mekim long haus sel na haus Solomon i bin wokim?
16. (a) Taim Solomon i dediketim haus bilong God, em i askim God long wanem samting? (b) Olsem wanem Jehova i kamapim klia olsem em i orait long beten bilong Solomon?
17. Bihain wanem samting i painim haus bilong God em Solomon i bin wokim? Bilong wanem dispela samting i kamap?
18. Long namba 2 haus, sampela man i no bilong lain Israel na ol i givim bel tru long helpim lotu bilong Jehova, ol i kisim wanem gutpela wok?
19. Wanem tok promis God i bin mekim long namba 2 haus? Ol dispela tok i kamap tru olsem wanem?
20. (a) Haus ol i wokim gen, wanem bikpela samting bilong en i narapela kain long olpela haus? (b) Olsem wanem yumi save, ol Juda i gat tingting kranki long haus bilong God? Olsem na Jisas i mekim wanem?
21. Jisas i makim wanem samting bai painim haus bilong God long Jerusalem?
22. (a) Wanem samting i kamap na i truim tok bilong Jisas long dispela haus? (b) Ol Kristen bilong pastaim ol i wetim wanem samting na ol i no tingim wanpela taun long dispela graun?
[Ol Piksa long pes 10, 11]
Haus Lotu Em Herot i Wokim Gen
1. Rum Tambu Tru
2. Rum Tambu
3. Alta Bilong Kukim Ofa Long Paia
4. Bikpela Tang Wara Bras
5. Ples Bung Bilong Ol Pris
6. Ples Bung Bilong Ol Israel
7. Ples Bung Bilong Ol Meri