STADI ATIKOL 47
Skul Yumi Inap Kisim Long Buk Wok Pris
“God em i as bilong olgeta tok i stap long Rait Holi, na ol i gutpela.”—2 TIM. 3:16.
SINGSING 98 [37] Baibel—Spirit Bilong God i Kamapim
PRIVIUa
1-2. Bilong wanem ol Kristen long nau i mas i gat laik long skelim Buk Wok Pris?
APOSEL Pol i kirapim yangpela pren bilong em, Timoti, long tingim olsem “God em i as bilong olgeta tok i stap long Rait Holi, na ol i gutpela.” (2 Tim. 3:16) Dispela i makim tu Buk Wok Pris. Yu pilim olsem wanem long dispela buk bilong Baibel? Sampela i pilim olsem em buk i gat lista bilong ol lo em ol i olpela na i no inap helpim yumi long nau, tasol ol Kristen tru i no holim kain tingting olsem.
2 Ol i raitim ol tok bilong Buk Wok Pris sampela 3,500 yia i go pinis, na Jehova i lukautim gut ol dispela tok “bilong skulim yumi.” (Rom 15:4) Buk Wok Pris i helpim yumi long kliagut long tingting bilong Jehova, olsem na yumi mas i gat laik long skelim ol tok bilong en. I gat planti lesen i stap long dispela buk. Yumi ken skelim 4-pela lesen.
ROT BILONG MEKIM JEHOVA I AMAMAS
3. Long olgeta yia, wai na ol i save mekim ofa long De Bilong Karamapim Sin?
3 Lesen 1: Yumi mas mekim Jehova i amamas na bai em inap orait long ol ofa bilong yumi. Long olgeta yia, long De Bilong Karamapim Sin, lain Israel i save kam bung wantaim na ofaim ol animal. Ol dispela ofa i helpim lain Israel long tingim olsem ol i gat sin na ol i mas mekim sampela samting bilong kamap klin! Tasol paslain long hetpris i kisim blut bilong animal ol i ofaim i go insait long Rum Holi Tru, em i mas mekim narapela wok—dispela wok em i bikpela samting moa winim wok bilong tekewe sin.
(Lukim paragraf 4)d
4. Olsem Wok Pris 16:12, 13 i kamapim, hetpris i mekim wanem long namba 1 taim em i go insait long Rum Holi Tru long De Bilong Karamapim Sin? (Lukim fran pes piksa.)
4 Ritim Wok Pris 16:12, 13. Piksaim long tingting samting i save kamap long De Bilong Karamapim Sin: Hetpris i go insait long haus lotu sel. Long dispela de, 3-pela taim em i save go insait long Rum Holi Tru. Long namba 1 taim, long wanpela han em i holim wanpela kontena i pulap long paura i gat gutpela smel, na long narapela han em i holim plet gol i pulap long sit bilong paia i lait yet. Em i stop liklik long keten i banisim Rum Holi Tru. Wantaim bikpela pasin rispek, em i save go insait long Rum Holi Tru na sanap long ai bilong Bokis Kontrak. I olsem em i sanap long ai bilong God Jehova! Orait nau, pris i save kapsaitim gut dispela paura holi long paia na rum i save pulap long switpela smel.b Bihain em i save kisim blut bilong animal ol i ofaim na go insait gen long Rum Holi Tru. Em i kukim paura i gat gutpela smel paslain long em i ofaim blut bilong ofa bilong tekewe sin.
5. Yumi inap kisim wanem skul long pasin bilong yusim paura i gat gutpela smel long De Bilong Karamapim Sin?
5 Yumi inap kisim wanem skul long pasin bilong yusim paura i gat gutpela smel long De Bilong Karamapim Sin? Baibel i tok ol beten bilong ol man i stap gut long lotuim Jehova i olsem smok i gat gutpela smel. (Sng. 141:2; Rev. 5:8) Tingim, hetpris i soim bikpela pasin rispek taim em i bringim paura i gat gutpela smel i go long ai bilong Jehova. Olsem tasol, taim yumi beten long Jehova, yumi mas soim bikpela pasin rispek. Yumi tenkyu tru olsem Krieta bilong yunives i larim yumi i go klostu long em, olsem pikinini i save go klostu long papa. (Jems 4:8) Em i amamas long yumi kamap pren bilong em! (Sng. 25:14) Dispela em gutpela blesing tru na yumi no ken mekim ol samting em i no orait long en.
6. Hetpris i kukim paura i gat gutpela smel paslain long em i ofaim ol sakrifais, na dispela i givim wanem skul long yumi?
6 Tingim, hetpris i kukim paura bilong kamapim smok i gat gutpela smel paslain long em i ofaim ol sakrifais. Em i mekim samting em God bai amamas long en, olsem na God bai orait long ol ofa em i givim. Dispela i givim wanem skul long yumi? Taim Jisas i stap long graun, paslain long em i givim laip bilong em olsem ofa, em i mekim wanpela bikpela samting—dispela samting i winim tru pasin bilong kisim bek ol man. Em i mekim wanem? Em i stap gut long Jehova na mekim stretpela pasin na bai God i orait long ofa bilong em. Long dispela rot, Jisas i soim klia olsem yumi bihainim stretpela pasin taim yumi mekim ol samting olsem Jehova i makim. Jisas i kamapim klia olsem i stret Papa bilong em i stap nambawan bos.
7. Bilong wanem ol pasin Jisas i mekim long laip olgeta bilong em i amamasim Papa bilong em?
7 Taim Jisas i stap long graun, oltaim em i bihainim ol stretpela lo bilong Jehova. Maski em i save olsem em bai karim bikpela pen paslain long em i dai, em i no larim wanpela traim o hevi i daunim laik bilong em long sambai long stretpela wok bos bilong Papa bilong em. (Fili. 2:8) Taim bikpela hevi i painim Jisas, “em i bin singaut strong na krai na aiwara i pundaun taim em i beten.” (Hib. 5:7) Ol beten bilong em i soim olsem em i stap gut long God na dispela i strongim laik bilong em long bihainim tok. Long Jehova, ol beten bilong Jisas i olsem naispela switpela smel. Ol pasin Jisas i mekim long laip olgeta bilong em long graun i amamasim Papa bilong em na i kamapim klia olsem i stret tru long God i stap nambawan bikpela King.
8. Olsem wanem yumi inap bihainim pasin bilong Jisas?
8 Yumi inap bihainim pasin bilong Jisas taim yumi wok strong long bihainim ol pasin na lo bilong Jehova na stap gut long em. Yumi laik amamasim Jehova, olsem na taim ol traim i painim yumi, yumi beten strong long em i ken helpim yumi. Long dispela rot, yumi soim olsem yumi sambai long wok bos bilong Jehova. Yumi luksave olsem Jehova bai i no orait long ol beten bilong yumi sapos yumi mekim ol samting em i heitim. Sapos yumi bihainim ol lo bilong Jehova, yumi ken bilip tru olsem ol beten yumi pilim tru long bel i olsem smok i gat naispela switpela smel i go long Jehova. Na yumi ken bilip tru olsem taim yumi stap gut long Papa bilong yumi long heven na bihainim tok bilong em, yumi bai amamasim em.—Prov. 27:11.
TENKYU NA PASIN LAIKIM I KIRAPIM YUMI
(Lukim paragraf 9)e
9. Bilong wanem lain Israel i mekim ofa bilong kamap wanbel wantaim God?
9 Lesen 2: Yumi lotuim Jehova bikos yumi tenkyu tru long em. Yumi bai kisim save long dispela lesen taim yumi skelim ofa bilong kamap wanbel wantaim God, em narapela bikpela samting long lotu i tru long bipo.c Long Buk Wok Pris, yumi kisim save olsem man Israel inap mekim ofa bilong kamap wanbel wantaim God sapos em “i laik givim tenkyu long God.” (Wkp. 7:11-13, 16-18) Em i mekim dispela ofa long laik bilong em yet, na i no olsem ol narapela i tokim em long mekim. Em i mekim dispela ofa bikos em i laikim God bilong em, Jehova. Sampela lain tasol inap kaikai mit bilong animal em dispela man i ofaim—em yet, famili bilong em, na ol pris. Taim ol i ofaim animal, sampela hap bilong en i bilong Jehova tasol. Em wanem ol hap?
(Lukim paragraf 10)f
10. Sakrifais bilong kamap wanbel wantaim God olsem Wok Pris 3:6, 12, 14-16 i stori long en, i givim wanem skul long risen bilong Jisas long mekim laik bilong Papa?
10 Lesen 3: Pasin laikim i kirapim yumi long givim ol nambawan samting long Jehova. Long ai bilong Jehova, gris em nambawan gutpela hap bilong animal. Em i tokaut klia olsem sampela hap bilong animal, olsem kidni, ol i spesel tru long ai bilong em. (Ritim Wok Pris 3:6, 12, 14-16.) Jehova i save amamas tru taim wanpela man Israel i mekim ofa long laik bilong em yet na givim gris na ol dispela nambawan hap bilong animal long em. Dispela man i kamapim klia bikpela laik bilong em long givim ol nambawan samting tru long God. Long wankain pasin, Jisas i laikim tru Jehova na long laik bilong em yet em i givim ol nambawan samting tru long Em. (Jon 14:31) Jisas i amamas long bihainim laik bilong God; em i laikim tru ol lo bilong God. (Sng. 40:8) Jisas i mekim wok bilong Jehova long laik bilong em yet, na dispela i bin amamasim tru Jehova!
Yumi givim ol nambawan samting long Jehova bikos yumi laikim em (Lukim paragraf 11-12)g
11. (a) Olsem wanem wok lotu bilong yumi i wankain olsem ol sakrifais bilong kamap wanbel wantaim God? (b) Olsem wanem dispela inap mekim isi bel bilong yumi?
11 Wankain olsem ol sakrifais bilong kamap wanbel wantaim Jehova, wok lotu bilong yumi i kamapim klia tingting i stap long bel bilong yumi. Yumi givim ol nambawan samting long Jehova bikos yumi laikim em tru long bel olgeta bilong yumi. Jehova i amamas tru long lukim planti milion manmeri i lotuim em bikos ol i laikim em tru na ol i laikim tu ol pasin bilong em! Yumi stap bel isi taim yumi tingim olsem Jehova i lukim na tingim tru ol wok yumi mekim na risen bilong yumi long mekim ol dispela wok. Sapos yu lapun na yu no inap moa long mekim bikpela wok olsem yu bin mekim long pastaim, yu ken bilip tru olsem Jehova i luksave long skel bilong yu. Ating yu pilim olsem yu no inap mekim planti wok, tasol Jehova i lukim olsem pasin laikim i kirapim yu long mekim wok yu inap long mekim. Em i amamas taim yu givim ol nambawan gutpela samting long em.
12. Jehova bai pilim olsem wanem taim yumi givim bel tru long lotuim em?
12 Yumi inap kisim wanem skul long ol sakrifais bilong kamap wanbel wantaim God? Taim paia i kukim ol nambawan gutpela hap bilong animal, smok i go antap na Jehova i amamas. Olsem tasol, Jehova i save amamas taim yu givim bel olgeta long lotuim em. (Kol. 3:23) Em i belgut tru long yu. Oltaim oltaim em bai tingim tru ol wok yu mekim bilong lotuim em, maski em bikpela wok o liklik wok.—Mat. 6:20; Hib. 6:10.
JEHOVA I BLESIM OGANAISESEN
13. Olsem Wok Pris 9:23, 24 i kamapim, olsem wanem Jehova i soim olsem em i amamas long ol nupela pris?
13 Lesen 4: Jehova i blesim oganaisesen bilong em long graun. Tingim samting i kamap long 1512 B.C.E. taim ol i sanapim haus lotu sel long as bilong Maunten Sainai. (Kis. 40:17) Moses i mekim wanpela bung na makim Aron na ol pikinini man bilong Aron long mekim wok pris. Taim ol i kamap pris, em bai fes taim bilong ol long givim ol animal olsem sakrifais, na lain Israel i kam bung long lukim dispela samting. (Wkp. 9:1-5) Olsem wanem Jehova i soim olsem em i amamas long ol dispela nupela pris? Taim Aron na Moses i blesim ol manmeri, Jehova i salim paia i kam long heven na i kukim olgeta sakrifais long alta.—Ritim Wok Pris 9:23, 24.
14. Jehova i orait long ol pris i kam long lain famili bilong Aron na dispela i gat wanem mining long yumi?
14 Taim Jehova i salim paia i kam long heven na i kukim olgeta sakrifais, dispela i soim klia wanem samting? Em i soim olsem em i wanbel long ol pris i kam long lain famili bilong Aron. Taim lain Israel i lukim dispela samting, ol i luksave olsem ol tu i mas sapotim wok bilong ol dispela pris. Yu ting dispela stori i gat mining long yumi? Yes! Lain pris long Israel i olsem piksa bilong lain pris husat bai mekim bikpela wok moa. Krais em bikpela Hetpris, em i gat 144,000 pris husat bai mekim wok king wantaim em long heven.—Hib. 4:14; 8:3-5; 10:1.
Jehova i blesim na stiaim oganaisesen bilong em. Yumi givim bel tru long sapotim dispela oganaisesen (Lukim paragraf 15-17)h
15-16. Olsem wanem Jehova i soim olsem em i sapotim “gutpela wokboi i gat savetingting”?
15 Long 1919, Jisas i makim sampela brata em God i anointim long stap olsem “gutpela wokboi i gat savetingting.” Dispela wokboi i go pas long autim tok na givim “kaikai long . . . taim stret” long ol disaipel bilong Krais. (Mat. 24:45) Olsem wanem? Yumi luksave long ol samting i soim klia olsem God i amamas long dispela gutpela wokboi i gat savetingting?
16 Satan na lain bilong em i mekim planti samting bilong putim hevi long wok bilong dispela wokboi. Tasol dispela wokboi i wok yet long givim kaikai bilong bilip long ol disaipel bilong Krais maski 2-pela bikpela woa i bin kamap, ol birua i mekim nogut tru long ol manmeri bilong God, na bikpela hevi i kamap long sait bilong mani. Long nau, kaikai bilong bilip i pulap tru na yumi kisim long rot bilong ol buk na nius em ol i stap long winim 900 tokples! Dispela i soim klia tru olsem God i sapotim wok bilong wokboi i gat savetingting. Wok autim tok tu em narapela samting i soim klia olsem Jehova i blesim wok bilong gutpela wokboi. Ol i autim gutnius “long olgeta hap bilong graun.” (Mat. 24:14) Yumi ken bilip tru olsem Jehova i stiaim na i blesim tru oganaisesen bilong em long nau.
17. Olsem wanem yumi inap soim olsem yumi sapotim oganaisesen em Jehova i yusim?
17 Yumi ken askim yumi yet olsem, ‘Mi amamas long bung wantaim oganaisesen bilong Jehova long graun?’ Wankain olsem Jehova i salim paia i kam long heven long taim bilong Moses na Aron, long nau tu em i soim klia olsem em i sapotim oganaisesen bilong em. Yumi gat planti samting bilong tok tenkyu long en. (1 Tes. 5:18, 19) Olsem wanem yumi inap soim olsem yumi sapotim oganaisesen em Jehova i yusim? Yumi mekim olsem taim yumi bihainim ol tok bilong Baibel i stap long ol pablikesen bilong yumi na i kamap long ol miting na kibung. Na tu, yumi sapotim dispela oganaisesen taim yumi insait tru long wok bilong autim tok na skulim man.—1 Kor. 15:58.
18. Yu tingting strong long mekim wanem?
18 Yumi mas tingting strong long bihainim ol lesen yumi lainim long Buk Wok Pris. Yumi laik bai Jehova i amamas long yumi na bai em i ken orait long ol sakrifais yumi givim. Yumi mekim wok bilong Jehova bikos yumi laik soim tenkyu bilong yumi. Yumi laik wok yet long givim ol nambawan samting long Jehova bikos yumi laikim em long bel olgeta bilong yumi. Yumi laik mekim olgeta samting yumi inap mekim bilong sapotim oganaisesen em i yusim long nau. Taim yumi mekim ol dispela samting, yumi inap soim Jehova olsem yumi tenkyu tru long blesing bilong yumi long stap olsem ol Witnes bilong em!
SINGSING 96 [48] Buk Bilong God—Gutpela Samting Tru
a Buk Wok Pris i gat ol lo em Jehova i givim long lain Israel bilong bipo. Yumi ol Kristen i no stap aninit long ol dispela lo, tasol yumi inap kisim helpim long en. Long dispela atikol, yumi bai stori long ol gutpela lesen em yumi inap kisim long Buk Wok Pris.
b Paura i gat gutpela smel em ol i kukim long haus lotu sel em samting i holi, na lain Israel bilong bipo i save yusim taim ol i mekim lotu long Jehova, na i no long ol narapela taim. (Kis. 30:34-38) I no gat wanpela tok i soim olsem ol Kristen long taim bilong ol aposel i save kukim paura i gat gutpela smel bilong mekim lotu.
c Bilong kisim sampela save moa long ofa bilong kamap wanbel wantaim God, lukim Insight on the Scriptures, Volium 2, p. 526 na Wastaua 2012 Janueri 15, p. 18-19, par. 11.
d STORI BILONG PIKSA: Long De Bilong Karamapim sin, hetpris bilong Israel i save kisim paura i gat gutplea smel na sit bilong paia i lait yet i go insait long Rum Holi Tru bilong kamapim naispela switpela smel. Bihain, em i save kisim blut bilong ol animal ol i givim olsem ofa bilong tekewe sin, na bringim i go insait gen long Rum Holi Tru.
e STORI BILONG PIKSA: Man Israel i givim wanpela sipsip long pris olsem sakrifais bilong kamap wanbel wantaim God, na dispela i makim olsem famili bilong em i laik tok tenkyu long Jehova.
f STORI BILONG PIKSA: Taim Jisas i stap long graun, em i bihainim ol lo bilong God na helpim ol disaipel tu long mekim olsem, na long dispela rot em i soim olsem em i laikim tru Jehova.
g STORI BILONG PIKSA: Sista i lapun na bodi bilong em i no gat strong, tasol em i raitim pas na autim tok, na long dispela rot em i givim nambawan samting long Jehova.
h STORI BILONG PIKSA: Long Februeri 2019, Brata Gerrit Lösch bilong Gavening Bodi i rilisim Baibel Nupela Taim Trenslesen long tokples Jeman na olgeta long odiens i amamas tru. Tude, ol pablisa long Jemani i amamas long yusim nupela Baibel bilong ol long autim tok, olsem dispela tupela sista i mekim.