Tok Bilong Jehova i Gat Laip
Sampela Bikpela Tok Bilong Buk Namba
TAIM lain Israel i lusim Isip, ol i kamap wanpela lain stret. Bihain liklik long dispela, ol inap go insait long Graun Bilong Promis, tasol ol i no go insait. Ol i mas raun raun inap 40 yia long “bikpela ples wesan nating.” (Lo 8:15) Bilong wanem ol i mekim olsem? Stori i stap long Buk Namba i tokim yumi long wanem samting i bin kamap. Em i mas kirapim yumi long bihainim tok bilong God Jehova na daun long ol man em i makim.
Moses i raitim dispela buk long ples drai nating na long Ples Stret bilong Moap, na Buk Namba i stori long ol samting i kamap insait long 38 yia na 9-pela mun—kirap long 1512 B.C.E. i go inap 1473 B.C.E. (Namba 1:1; Lo 1:3) Ol i kisim dispela nem long wok ol i mekim bilong kaunim namba bilong ol manmeri olsem sensas, ol i mekim tupela taim—ol i mekim namba wan taim na 38 yia bihain ol i mekim namba tu taim. (Sapta 1-4, 26) Buk i gat 3-pela hap bilong en. Namba wan hap i stori long ol samting i kamap long maunten Sainai. Namba tu hap i stori long ol samting i kamap long taim ol Israel i wokabaut long ples drai nating. Na laspela hap i stori long ol samting i kamap long Ples Stret bilong Moap. Taim yu ritim dispela buk, yu ken tingim ol dispela askim: ‘Ol dispela samting i skulim mi long wanem samting? I gat ol stiatok insait long dispela buk inap helpim mi long nau?’
LONG MAUNTEN SAINAI
Namba wan taim ol i kaunim ol man i kamap taim ol Israel i stap long maunten Sainai. Ol man i gat 20 krismas na i go antap, ol inap olsem 603,550, tasol ol i no kaunim ol Livai. Ol i mekim sensas, long wanem, ol i laik save hamas man inap insait long pait. Lain Israel olgeta, em ol meri, pikinini na ol lain Livai tu, ating namba bilong ol i winim 3 milion.
Taim ol i kisim sensas pinis, lain Israel i kisim tok long wanem kain pasin ol i ken bihainim taim ol i wokabaut i go, ol wok ol Livai i mas mekim na wok bilong ol long haus lotu sel, ol lo bilong ol man long i stap wanpis taim ol i sik, lo bilong ol man i bel nogut long narapela, na ol lo long ol strongpela tok promis em ol Promisman i bin mekim. Sapta 7 i stori long ol ofa em ol hetman i bin mekim bilong dediketim alta, na sapta 9 i stori long kaikai bilong Pasova. Ol Israel i kisim tok tu long wanem kain pasin ol i ken bihainim bilong wokim kem na taim ol i lusim hap ol i kem long en.
Bekim Bilong Ol Askim Bilong Baibel:
2:1, 2—Wanem ol dispela “plak” em ol tripela tripela lain bilong Israel i save wokim kem klostu long en taim ol i stap long ples drai nating? Baibel i no stori long ol dispela plak i luk olsem wanem. Tasol ol Israel i no save tingim plak i olsem samting holi na em i no samting bilong lotu. Ol dispela plak i bin mekim wok olsem mak tasol, bilong helpim man long painim hap stret bilong em insait long kem.
5:27—Taim wanpela maritmeri i mekim pasin pamuk, olsem wanem “samting bilong en bai i slek”? Dispela tok “samting bilong en” i makim hap bilong meri long kamapim pikinini. Dispela tok “slek” i makim olsem dispela hap bilong meri long kamapim pikinini bai i go liklik, na meri i no inap kisim bel.
Skul Yumi Kisim:
6:1-7. Ol Promisman i mas sakim wain na olgeta strongpela dring, i olsem ol i mas daunim laik bilong skin. Ol i mas larim gras bilong ol i go longpela—dispela i makim olsem ol i daun long Jehova, olsem ol meri i mas daun long man o papa bilong ol. Bilong i stap klin ol Promisman i no ken go klostu long bodi bilong man i dai pinis, em bodi bilong ol famili bilong ol tu. Ol man i mekim wok bilong Jehova fultaim long nau ol tu i save lusim sampela samting bilong ol yet—ol i daunim laik bilong skin na aninit long Jehova na rot em i makim. Ol i mas go long narapela kantri, na ating dispela inap mekim na ol i no inap long go bek long ples bilong ol taim wanpela long famili i dai.
8:25, 26. Bilong ol man Livai i ken mekim gut wok bilong ol, na tu bilong tingim krismas bilong ol man i lapun, lo i tok long ol man i lapun i mas ritaia long wok bilong ol. Tasol ol i ken helpim ol narapela Livai long wok sapos ol i laik. Long nau yumi no inap ritaia long wok bilong autim tok bilong Kingdom, tasol stiatok long dispela lo i skulim yumi long wanpela bikpela samting. Sapos wanpela Kristen i no inap long mekim sampela wok, long wanem, em i lapun orait em i ken insait long wanpela wok i stret long strong bilong em.
SINDAUN LONG NARAPELA NARAPELA HAP BILONG PLES DRAI NATING
Taim klaut i stap antap long haus lotu sel i lusim bokis na i go, lain Israel i kirap wokabaut i go na 38 yia na tupela mun samting bihain ol i kamap long ples stret bilong Moap. Yu ken lukim pes 9 bilong buklet “See the Good Land,” em ol Witnes Bilong Jehova i wokim na bihainim raun bilong ol lain Israel.
Taim ol i wokabaut i go long Kades, long ples drai bilong Paran, tripela taim ol i toktok planti. Long namba wan taim ol i toktok planti, Jehova i salim paia i kam daun na kilim i dai sampela bilong ol. Long namba tu taim ol i toktok planti long kaikai abus, na Jehova i givim pisin long ol. Miriam na Aron i toktok planti long wok bilong Moses olsem na Miriam i kisim sik lepra.
Taim ol i stap long Kades, Moses i salim 12-pela man i go lukstil long Graun Bilong Promis. Ol i go bek long kem 40 de bihain. Ol manmeri i bilipim tok bilong 10-pela man i go lukstil, na ol i laik tromoi ston long Moses, Aron, Josua na Kalep. Jehova i tokim Moses olsem em bai salim bikpela sik i kam na bagarapim ol, tasol Moses i askim Jehova long lusim rong bilong ol, na God i tokaut olsem ol bai raun raun long ples drai nating inap 40 yia—inap long ol dispela man ol i bin kaunim ol taim ol i stap long maunten Sainai i dai.
Jehova i givim sampela lo moa. Kora na ol narapela ol i bikhet long Moses na Aron, na sampela bilong ol paia i kam daun na kukim ol na sampela narapela graun i op na ol i pundaun i go insait na ol i dai. Long de bihain olgeta manmeri i kros long Moses na Aron. Na dispela i mekim na Jehova i salim bikpela sik i kam na kilim i dai 14,700 manmeri. Bilong kamapim klia husat tru em i makim olsem hetpris, God i mekim stik bilong Aron i putim kru. Jehova i givim sampela lo moa long wok bilong ol Livai na long ol samting bilong mekim ol manmeri i kamap klin. Sit bilong paia bilong retpela bulmakau em ol i save mekim wok long en i makim ofa bilong Jisas i mekim ol man i kamap klin.—Hibru 9:13, 14.
Ol Israel i go bek long Kades, na Miriam i dai long dispela hap. Ol Israel i toktok planti gen long Moses na Aron. Ol i toktok planti, long wanem, i no gat wara. Moses na Aron i no litimapim nem bilong Jehova taim ol i mekim mirakel na wara i kamap, olsem na tupela i no inap i go insait long Graun Bilong Promis. Ol Israel i lusim Kades na wokabaut i go, na Aron i dai long maunten Hor. Taim ol Israel i wokabaut i go abrusim graun bilong ol Idom, ol i les na ol i kros long God na Moses. Jehova i salim ol snek nogut i go long ol bilong givim strafe long ol. Long dispela taim tu Moses i askim God long lusim rong bilong ol manmeri, na God i tokim em long wokim piksa bilong wanpela snek na hangamapim antap long wanpela longpela pos na bai ol lain em snek i kaikaim ol, ol i ken lukluk long en bambai ol i no ken i dai. Dispela snek i olsem piksa na i makim Jisas Krais em ol man bai i nilim em long diwai pos bilong helpim yumi long kisim laip i stap gut oltaim oltaim. (Jon 3:14, 15) Lain Israel i daunim King Sihon na Ok bilong lain Amor na ol i kisim graun bilong ol.
Bekim Bilong Ol Askim Bilong Baibel:
12:1—Bilong wanem Miriam na Aron i toktok planti long Moses? Tupela i toktok planti, long wanem, Miriam i laik kisim bikpela namba moa. Taim meri bilong Moses, em Sipora, i bungim Moses long ples drai nating, ating Miriam i pret, nogut Sipora i kisim ples bilong em olsem meri i go pas long ol meri long kem.—Kisim Bek 18:1-5.
12:9-11—Bilong wanem Miriam tasol i kisim sik lepra? Ating em i go pas long toktok planti na em i kirapim Aron long bihainim em. Aron i mekim stretpela pasin taim em i tokaut long rong bilong em.
21:14, 15—Wanem dispela buk em dispela ves i toktok long en? Baibel i save kolim nem bilong sampela buk em ol man bilong raitim Baibel i bin yusim bilong kisim tok long en. (Josua 10:12, 13; 1 King 11:41; 14:19, 29) Dispela “buk i stori long ol pait bilong Bikpela” em kain buk olsem. Em i stori long ol pait em lain bilong Jehova i mekim.
Skul Yumi Kisim:
11:27-29. Moses i stap gutpela piksa long pasin yumi ken bihainim taim ol narapela i kisim sampela wok bilong Jehova. Em i no bel nogut na painim rot bilong litimapim nem bilong em yet, nogat, Moses i amamas taim Eldat na Medat i kirap mekim ol samting olsem ol profet.
12:2, 9, 10; 16:1-3, 12-14, 31-35, 41, 46-50. Jehova i laik bai ol man i lotuim em ol i daun long ol man em i makim.
14:24. Wanpela samting yumi inap mekim bilong sakim ol samting bilong dispela graun i laik pulim yumi long mekim pasin i no stret, em yumi mas i gat “narakain tingting.” Dispela tingting i mas narapela kain long tingting bilong dispela graun.
15:37-41. Dispela bilas i stap arere long klos bilong ol lain Israel i bilong kirapim ol long tingim olsem ol i lain i save lotuim God na bihainim ol lo bilong em. Yumi tu i mas bihainim ol lo bilong God na i stap narapela kain long ol man bilong dispela graun, a?
PLES STRET BILONG MOAP
Taim lain Israel i wokim kem long ples stret bilong Moap, lain Moap i pret nogut tru long ol. Olsem na King Balak i baim Balam long mekim tok bilong bagarapim lain Israel. Tasol Jehova i kirapim em long mekim tok i blesim ol. Orait ol i mekim wok long ol meri Moap na Midian long grisim ol man Israel long mekim pasin pamuk wantaim ol na lotuim ol giaman god bilong ol. Dispela i mekim na Jehova i kilim i dai 24,000 man i bin mekim rong. Dispela sik nogut i pinis taim Finias i kamapim klia olsem em i no orait long ol i lotuim ol narapela god.
Namba tu sensas i soim olsem olgeta man em ol i bin kaunim long namba wan sensas ol i dai pinis, em Josua na Kalep tasol i stap laip yet. God i makim Josua long kisim ples bilong Moses. Ol Israel i kisim sampela lo long pasin bilong mekim sampela ofa na ol strongpela tok promis. Ol Israel i bagarapim tu lain Midian. Lain Ruben, lain Gat na hap lain bilong Manase ol i sindaun long hap is bilong wara Jordan. Ol Israel i kisim tok long ol samting ol bai mekim taim ol i brukim wara Jordan na kisim graun. Jehova i makim stret ol hap graun bilong olgeta lain bilong Israel. Ol bai pilai satu bilong makim ol hap graun. Ol i givim lain Livai 48 taun na 6-pela bilong ol dispela taun ol i stap olsem taun bilong hait.
Bekim Bilong Ol Askim Bilong Baibel:
22:20-22—Bilong wanem Jehova i kros long Balam? Jehova i bin tokim profet Balam long em i no ken mekim tok bilong bagarapim ol Israel. (Namba 22:12) Tasol dispela profet i go wantaim ol man bilong Balak na em i tingting long mekim tok bilong bagarapim ol Israel. Balam i laik amamasim king bilong Moap na kisim pe long em. (2 Pita 2:15, 16; Jut 11) Maski God i subim Balam long mekim tok bilong blesim lain Israel na i no bagarapim ol, Balam i laik bai king i orait long em olsem na em i tokim king long mekim wok long ol meri i save lotuim Bal long grisim ol man Israel. (Namba 31:15, 16) Olsem na God i kros long Balam long pasin nogut bilong em long mangal.
30:6-8—Olsem wanem? Wanpela man Kristen inap rausim tok promis meri bilong em i bin mekim? Long ol tok promis ol man i lotuim Jehova i mekim long nau, God i save tingim dispela i olsem samting bilong wan wan yet. Olsem, dediket em samting olgeta wan wan yet i mekim long Jehova. (Galesia 6:5) Man marit i no gat namba bilong rausim dispela kain tok promis. Tasol meri marit i no ken mekim wanpela tok promis i pait wantaim tok bilong God o long ol samting em i mas mekim long man bilong em.
Skul Yumi Kisim:
25:11. Finias i stap gutpela piksa tru yumi ken bihainim long pasin bilong strong long lotuim Jehova wanpela tasol! Yumi laik bai kongrigesen i stap klin olsem na dispela bai kirapim yumi long toksave long ol elda Kristen sapos yumi save olsem wanpela i mekim pasin pamuk.
35:9-29. I gat ol taun we sapos wanpela Israel i kilim nating wanpela wantok bilong en orait em i ken ranawe i go hait long wanpela bilong ol dispela taun inap sampela haptaim, na dispela i skulim yumi olsem laip em i holi na yumi mas tingim laip.
35:33. Graun em blut i kapsait long en inap kamap klin taim ol i kilim i dai dispela man i bin kilim narapela i dai. I stret tru long Jehova i bagarapim ol man nogut paslain long graun i kamap Paradais!
Tok Bilong God i Gat Strong
Yumi mas daun long Jehova na ol man em i makim bilong lukautim ol lain bilong em. Buk Namba i kamapim klia dispela tok i tru. Dispela em i skulim yumi long wanpela bikpela samting long pasin bilong i stap bel isi na wanbel wantaim insait long kongrigesen long nau!
Ol stori i stap insait long Buk Namba i soim olsem wanem ol man husat i no tingim ol samting bilong spirit ol inap mekim rong, kain olsem toktok planti, mekim pasin pamuk, na lotuim god giaman. Ol brata i ken mekim wok long sampela stori insait long dispela buk bilong Baibel long tok bilong helpim kongrigesen long Miting Bilong Wok. Tru tumas, “tok bilong God em i gat laip, na em i wok strong i stap” long laip bilong yumi.—Hibru 4:12.
[Piksa long pes 24, 25]
Long rot bilong wanpela klaut i stap antap long haus lotu sel, Jehova i stiaim ol Israel long wokim kem na long rausim kem na i go
[Ol Piksa long pes 26]
Jehova em inap tru long yumi mas bihainim tok bilong em na em i laik bai yumi mas daun long ol man em i makim