“Ol Manmeri Husat i Putim Jehova i Stap God Bilong Ol”

 1. Sampela manmeri i pilim olsem wanem long dispela tingting olsem God i gat wanpela lain tasol long graun?

LONG nau, planti manmeri i skelim ol samting i kamap na ol i tok ol bikpela lotu bilong lain Kristendom na ol narapela lotu i no helpim ol manmeri. Sampela man i tok ol dispela lotu Kristendom i no skulim ol man long stretpela save bilong God, na wokabaut bilong ol i no stret long ai bilong God, olsem na God i no inap orait long ol. Ol i bilip olsem olgeta lotu long graun i gat ol man em bel bilong ol i stap stret, na God i lukim ol na em i orait long ol i lotuim em. Ol i pilim olsem kain lain olsem i no gat wok long lusim lotu giaman na ol yet i go bung long wanpela lotu. Yu ting God i holim kain tingting olsem? Yumi bai kisim bekim bilong dispela askim taim yumi skelim stori bilong Baibel long histori bilong ol manmeri i lotuim Jehova.

 2. (a) Long bipo, husat lain i bin i stap olsem lain manmeri tru bilong Jehova? (b) Wanem samting i mekim na ol i stap narapela kain long ol manmeri bilong ol narapela kantri? (Lukim piksa long kirap bilong stadi.)

² Inap olsem 2,000 yia paslain long taim bilong Krais, wanpela lain tasol i stap olsem lain manmeri tru bilong Jehova. Baibel i kolim Abraham olsem “papa bilong olgeta man em God i kolim ol stretpela man, long wanem, ol i bilip,” na em i stap olsem het bilong wanpela lain famili em namba bilong ol inap olsem planti handret. (Rom 4:11; Stt. 14:14) Ol king long Kenan i tingim em olsem “namba wan hetman tru” na ol i rispektim em. (Stt. 21:22; 23:6) Jehova i mekim kontrak wantaim Abraham na ol lain tumbuna pikinini bilong em. (Stt. 17:1, 2, 19) God i tokim Abraham olsem: “Yupela i mas bihainim dispela mak bilong kontrak bilong mi. . . . Yupela i mas katim skin [long sem] bilong olgeta pikinini man. . . . Dispela pasin bai i stap olsem mak bilong kontrak mi mekim wantaim yupela.” (Stt. 17:10-12) Olsem na Abraham na olgeta man long lain bilong em i katim skin long sem bilong ol. (Stt. 17:24-27) Pasin bilong katim skin i mekim na Abraham na lain tumbuna pikinini bilong em i stap narapela kain long olgeta narapela manmeri, na ol tasol i stap olsem lain em Jehova i mekim kontrak wantaim ol.

 3. Olsem wanem lain tumbuna pikinini bilong Abraham i kamap planti tru na ol i stap olsem wanpela lain stret?

³ Jekop, narapela nem bilong em Israel, em i tumbuna pikinini bilong Abraham, na em i gat 12-pela pikinini man. (Stt. 35:10, 22b-26) Ol dispela pikinini man bai kamap tumbuna papa bilong 12-pela lain bilong Israel. (Apo. 7:8) Bikpela hangre i kamap, olsem na Jekop wantaim ol wanhaus bilong em i go sindaun long Isip. Wanpela pikinini man bilong Jekop, nem bilong em Josep, em i bin kamap nambawan gavana bilong Fero na edministreta long sait bilong tilim kaikai. (Stt. 41:39-41; 42:6) Lain tumbuna pikinini bilong Jekop i kamap planti tru, olsem “bikpela lain manmeri.”—Stt. 48:4; ritim Aposel 7:17.

 4. Stori long pasin i bin i stap namel long lain Isip na ol lain tumbuna pikinini bilong Jekop.

⁴ Ol lain tumbuna pikinini bilong Jekop i stap long Isip winim 200 yia. Ol i stap long distrik Gosen, em wanpela hap bilong ples daun bilong Nail. (Stt. 45:9, 10) Inap olsem 100 yia samting, ol i stap wanbel wantaim ol Isip, na ol i stap long ol liklik taun na lukautim ol sipsip, meme, na bulmakau bilong ol. Fero i amamas na tok orait long ol i stap long Isip, long wanem, em i save gut long Josep na em i pilim tru wok em Josep i mekim. (Stt. 47:1-6) Tasol ol Isip i heitim tru ol lain i save lukautim sipsip. (Stt. 46:31-34) Maski i olsem, ol i mas orait long lain Israel i stap long Isip.

5, 6. (a) Lain Israel i bin stap gut long Isip, tasol bihain wanem hevi i painim ol? (b) Taim Fero i tok long kilim i dai olgeta nupela pikinini man bilong lain Israel, olsem wanem Moses i bin abrusim bagarap? (c) Olsem wanem Jehova i helpim lain bilong em?

⁵ Tasol i no longtaim, bikpela senis i kamap long sindaun bilong ol manmeri bilong God. “Planti yia bihain wanpela nupela king i kamap na em i bosim ol Isip. Dispela king i no save long Josep. Na king i tokim ol manmeri bilong en olsem, ‘Ol Israel i gat planti manmeri na strong bilong ol i winim strong bilong yumi.’ Na ol Isip i mekim ol Israel i wok hat nogut tru na sindaun bilong ol i kamap nogut olgeta. Ol Isip i mekim ol Israel i hatwok long wokim brik na wokim haus na mekim wok long gaden. Na ol i no sori liklik long ol Israel. Nogat tru.”—Kis. 1:8, 9, 13, 14.

⁶ Fero i tok strong olsem sapos ol meri Hibru i karim pikinini man, orait ol i mas kilim i dai dispela pikinini. (Kis. 1:15, 16) Mama i bin karim Moses long dispela taim. Taim Moses i gat 3-pela mun, mama i haitim em namel long ol pitpit long wara Nail na pikinini meri bilong Fero i lukim em long dispela hap. Bihain em i adoptim Moses. Gutpela tru olsem Jokebet, mama tru bilong Moses, em i lukautim Moses kirap long taim em i liklik yet, olsem na em i kamap gutpela wokman bilong Jehova. (Kis. 2:1-10; Hib. 11:23-25) Jehova “i lukim” olsem lain bilong em i karim planti pen na hevi long han bilong ol Isip, olsem na em i laik yusim Moses long kisim bek ol. (Kis. 2:24, 25; 3:9, 10) Long dispela rot, ol bai kamap lain em Jehova i “kisim bek” ol.—Kis. 15:13; ritim Lo 15:15.

7, 8. Olsem wanem lain Israel i kamap lain manmeri tru bilong Jehova?

⁷ Jehova i tingim lain Israel olsem ol manmeri bilong em, tasol em i no kirap yet long oganaisim ol na mekim ol i kamap wanpela kantri. Jehova i tokim Moses na Aron long tokim Fero olsem: “Bikpela, em God bilong mipela Israel, em i tok olsem, ‘Larim ol manmeri bilong mi i go long ples drai nating na mekim bikpela lotu bilong litimapim nem bilong mi.’”—Kis. 5:1.

⁸ Bihain long Tenpela Bikpela Hevi na bagarap i painim Fero na lain ami bilong em long solwara Retsi, rot i op long lain Israel i lusim kalabus long Isip. (Kis. 15:1-4) Klostu 3-pela mun bihain, Jehova i mekim kontrak wantaim lain Israel long maunten Sainai na em i tok promis olsem: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. . . . Bai yupela i stap ol manmeri tru bilong mi.”—Kis. 19:5, 6.

9, 10. (a) Olsem yumi ritim long Lo 4:5-8, olsem wanem Lo i mekim na lain Israel i stap narapela kain long ol man bilong narapela kantri? (b) Olsem wanem ol Israel inap soim olsem ol i “stap lain manmeri bilong God stret”?

⁹ Paslain long lain Israel i kamap wokboi nating long Isip, ol i sindaun long wan wan famili lain bilong ol, na tumbuna papa i stap olsem het bilong ol. Wankain olsem ol wokman bilong Jehova husat i stap paslain long taim bilong ol, ol dispela het bilong famili i mekim wok olsem hetman, jas, na pris long hauslain bilong ol yet. (Stt. 8:20; 18:19; Jop 1:4, 5) Long rot bilong Moses, Jehova i givim lo long lain Israel na bai ol i stap narapela kain long ol narapela lain. (Ritim Lo 4:5-8; Sng. 147:19, 20.) Lo i opim rot long wanpela lain inap mekim wok olsem ol pris, na “ol hetman” i gat gutpela tingting na save na ol i kirapim ol manmeri long bihainim stretpela pasin, olsem na ol manmeri i rispektim ol. (Lo 25:7, 8) Lo i stiaim dispela nupela lain long pasin bilong mekim lotu na ol narapela samting.

¹⁰ Paslain stret long lain Israel i go insait long Graun Bilong Promis, Jehova i kolim gen ol lo bilong em, na Moses i tokim ol olsem: “Nau God i kisim yupela olsem lain manmeri bilong em stret, olsem em yet i bin promis long yupela. Na em i tokim yupela long bihainim olgeta lo bilong em. Em bai i mekim yupela i kamap bikpela lain moa i winim olgeta lain pipel em i bin wokim long graun. Na bai ol i lukim gutpela pasin bilong yupela na bai ol i amamas na givim biknem long God. Na bai yupela i stap lain manmeri bilong God stret.”—Lo 26:18, 19.

11-13. (a) Husat lain i bin kamap wanlain wantaim lain manmeri em God i bin makim? (b) Sapos wanpela man bilong ol narapela kantri i laik lotuim Jehova, orait em i save mekim wanem?

¹¹ Maski nau Jehova i gat lain bilong em long graun, em i no tambuim ol man bilong ol narapela kantri long bung wantaim lain Israel. Em i orait long “planti arapela lain manmeri” em ol i no bilong lain Israel, na sampela Isip tu, long i go wantaim lain bilong em taim em i kisim bek ol long han bilong ol Isip. (Kis. 12:38) Long taim bilong namba 7 hevi, “sampela ofisa bilong king” i pret na daun long tok bilong Jehova na ol i joinim planti arapela lain husat i lusim Isip na i go wantaim lain Israel.—Kis. 9:20.

¹² Paslain long lain Israel i brukim wara Jordan na i go kisim graun Kenan, Moses i tok ol “i mas laikim ol dispela man bilong narapela kantri” husat i stap wantaim ol. (Lo 10:17-19) Ol manmeri bilong God i mas orait long ol man bilong ol narapela kantri em ol i amamas long bihainim ol lo Moses i givim. (Wkp. 24:22) Sampela man bilong ol narapela kantri i kirap lotuim Jehova, na ol i gat wankain tingting olsem Rut, em meri Moap husat i tokim Naomi olsem: “Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:16) Ol dispela manmeri bilong ol narapela kantri i joinim lotu Juda, na ol man long lain bilong ol tu i katim skin long sem bilong ol. (Kis. 12:48, 49) Jehova i orait long ol tu inap bung wantaim ol manmeri bilong em na stap olsem lain bilong em.—Nam. 15:14, 15.

¹³ Taim lain Israel i dediketim tempel bilong Solomon, beten bilong Solomon i soim olsem i gat rot long ol manmeri bilong ol narapela kantri tu inap kisim helpim. Solomon i beten olsem: “Sapos ol man bilong ol arapela kantri i save long biknem bilong yu na long ol bikpela wok tru yu bin mekim bilong helpim mipela ol manmeri bilong yu, na sapos wanpela bilong ol i laik lotu long yu na i lusim as ples bilong en na i kam klostu long dispela haus na i beten long yu, orait Bikpela, yu stap long ples bilong yu long heven na yu ken harim beten bilong em na helpim em long wanem samting em i askim yu long en. Olsem na bai olgeta lain manmeri long olgeta kantri i ken save long yu na i stap aninit long yu, olsem mipela Israel, ol manmeri bilong yu, i save mekim. Na bai ol i ken save, dispela haus mi wokim, em i haus bilong yu yet na long dispela ples ol manmeri i ken i kam klostu long yu na lotuim yu.” (2 Sto. 6:32, 33) Long taim bilong Jisas tu, taim ol manmeri bilong ol narapela kantri i laik lotuim Jehova, ol i save kamap wanlain wantaim lain manmeri em God i bin mekim kontrak wantaim ol.—Jon 12:20; Apo. 8:27.

14-16. (a) Olsem wanem lain Israel i stap olsem lain witnes bilong Jehova? (b) Ol manmeri bilong Jehova long nau i gat wok long mekim wanem?

¹⁴ Lain Israel i lotuim Jehova, em God bilong ol, tasol ol man bilong ol narapela kantri i lotuim kain kain giaman god bilong ol yet. Long taim bilong profet Aisaia, Jehova i skelim pasin bilong ol manmeri long mekim lotu na em i tok dispela i olsem wanpela kot keis. Em i tromoi tok i go long ol giaman god bilong ol lain man, na askim ol long kamapim klia husat i stap olsem ol witnes bilong ol, na em i tok: “Olgeta manmeri bilong ol arapela kantri i kam bung pinis long kot. Wanem god bilong ol inap tokaut long olkain samting bai i kamap bihain? Na wanem god bilong ol bipo i bin tokaut long ol samting i wok long kamap nau? Husat inap sanap olsem witnes bilong ol na tokaut olsem, em i bin harim wanpela god i tok long samting bai i kamap, na bihain em i bin lukim dispela samting i kamap tru?”—Ais. 43:9.

¹⁵ Ol giaman god bilong ol narapela kantri i no gat rot long kamapim klia olsem ol i stap tru. Ol dispela giaman god em ol imis nating na ol i no inap toktok, na ol man yet i mas kisim ol long wanpela hap na bringim i go long narapela hap. (Ais. 46:5-7) Tasol Jehova i tokim lain Israel olsem: “Yupela i witnes bilong mi. Mi bin makim yupela bilong i stap wokman bilong mi. Olsem bai yupela inap save long mi na bilip long mi na bai yupela i save gut olsem mi wanpela tasol mi God tru. Bipo i no gat wanpela god i bin kamap na i stap pastaim long mi. Na bihain tu bai i no gat wanpela god i kisim ples bilong mi. Mi tasol mi [“Jehova,” NW], na oltaim mi save kisim bek yupela. . . . Yupela i witnes bilong mi. Mi wanpela tasol mi God.”—Ais. 43:10-12.

¹⁶ Tok pait i kamap long dispela askim olsem “Husat i stap olsem Nambawan God?” Olsem na ol manmeri bilong Jehova i mas tokaut strong na tokaut klia olsem Jehova tasol em i God tru. Em i tok: “Mi bin mekim ol dispela manmeri i kamap lain manmeri bilong mi yet, bai ol i ken amamas na tokaut long biknem bilong mi.” (Ais. 43:21) Nem bilong em i stap long ol. Jehova i bin kisim bek ol long Isip, olsem na ol i gat wok long stap daun long wok bos bilong em. Ol i mas mekim pasin olsem profet Maika i tok long en, na em pasin we ol manmeri bilong God long nau tu i mas mekim: “Olgeta lain manmeri bai wokabaut long nem bilong god bilong ol yet; tasol mipela bai wokabaut long nem bilong Jehova, em God bilong mipela, i go inap long taim bihain bihain, inap oltaim oltaim.”—Mai. 4:5, NW.

17. Long ai bilong Jehova, olsem wanem lain Israel i kamap olsem “rabis diwai wain bilong bus”?

¹⁷ Bihain, lain Israel i no stap gut long God bilong ol, em Jehova. Ol i bihainim pasin bilong ol manmeri bilong ol narapela kantri na lotuim ol giaman god em ol i wokim long diwai na ston. Inap olsem 800 yia paslain long taim bilong Jisas, profet Hosea i tok lain Israel i olsem diwai wain i nogut. Em i tok moa olsem: “Ol i save wokim ol alta . . . Ol i man bilong giaman tasol, olsem na nau bai ol i mas kisim pe nogut bilong asua bilong ol.” (Hos. 10:1, 2) Inap 150 yia bihain, Jeremaia i givim tok bilong Jehova long ol manmeri bilong Em: “Pastaim yu olsem wanpela gutpela diwai wain mi bin planim. Yu olsem kru bilong diwai wain i nambawan tru. Tasol olsem wanem na nau yu kamap rabis diwai wain bilong bus? . . . ‘We stap ol dispela god yupela Juda yet i bin wokim? . . . Taim yupela i gat trabel, ol yet i ken helpim yupela, sapos ol inap.’ . . . Yupela manmeri bilong mi i lusim tingting long mi.”—Jer. 2:21, 28, 32.

18, 19. (a) Olsem wanem Jehova i tokaut olsem em bai kamapim wanpela nupela lain husat bai holim nem bilong em? (b) Bai yumi skelim wanem ol askim long neks stadi?

¹⁸ Ol Israel i stap olsem lain witnes tru bilong Jehova, tasol ol i no stap gut long em na bihainim lotu i tru na bai ol inap kamapim ol gutpela pasin, nogat, ol i kirap lotuim ol giaman god na kamapim ol pasin i no stret. Olsem na Jisas i tokim ol hetman bilong lain Juda: “God bai tekewe Kingdom bilong en long yupela na givim long wanpela lain i karim kaikai bilong dispela Kingdom.” (Mat. 21:43) Long rot bilong profet Jeremaia, Jehova i tokaut olsem ol lain i insait long “nupela kontrak,” ol tasol bai kamap hap bilong dispela nupela lain, em lain Israel bilong God. Jehova i tingim ol na em i tok profet olsem: “Bai mi stap God bilong ol na bai ol i stap lain manmeri bilong mi.”—Jer. 31:31-33.

¹⁹ Long taim bilong ol aposel, lain Israel i no stap gut long Jehova, olsem na Jehova i mekim narapela lain i kamap lain manmeri bilong em, em lain Israel bilong God. Tasol long nau, husat i stap olsem lain manmeri bilong em long graun? Olsem wanem ol man i gat gutpela bel inap luksave long ol man i lotu tru long God? Yumi bai skelim ol dispela askim long neks stadi.