Go Klostu Long God

Jehova i Larim Yumi Yet Long Makim

Lo 30:​11-20

“PLANTI taim mi save pret nating olsem nogut bai mi no stap gut long Jehova.” Em tok bilong wanpela meri Kristen husat i pilim olsem ol samting nogut i painim em taim em i liklik, dispela i as na em bai karim hevi tasol. Yu ting dispela tok i stret? Yu ting ol samting nogut i bin painim yumi bipo i makim olsem oltaim hevi bai painim yumi? Nogat tru. God Jehova i givim yumi presen, olsem yumi stap fri long makim ol samting yumi laik mekim long i stap bilong yumi. Jehova i laik bai yumi makim gutpela rot, na Baibel i tokim yumi long mekim olsem. Orait, tingim tok Moses i mekim long Lo sapta 30.

Yu ting i hatwok long save long ol samting God i laik yumi mas mekim na bihain kirap mekim ol dispela samting?a Moses i tok: “Tok nau mi givim yupela, em i no hat tumas long yupela i save na bihainim. Nogat.” (Lo sapta 30 Ves 11) Jehova i no tokim yumi long mekim samting yumi no inap long mekim. Ol samting em i tokim yumi long mekim em yumi inap long mekim na i no hatwok. Na tu, yumi inap save long en. Yumi no inap go “antap long skai’ o long “hapsait bilong solwara” bilong save long ol samting God i laik yumi mas mekim, nogat. (Lo sapta 30 Ves 12, 13) Baibel i kamapim klia ol pasin yumi mas bihainim.​—⁠Maika 6:⁠8.

Tasol Jehova i no fosim yumi long bihainim tok bilong em. Long rot bilong Moses, Jehova i tok: “Mi soim yupela tupela rot. Sapos yupela i bihainim wanpela rot, yupela bai i kisim gutpela laip tru, na . . . narapela rot, bai yupela i kisim taim nogut na . . . bai yupela i dai.” (Lo sapta 30 Ves 15) Yumi stap fri long makim olsem yumi laikim laip o yumi laikim dai, na yumi laik bai gutpela samting i painim yumi o samting nogut. Yumi ken makim olsem yumi laik lotuim God na bihainim tok bilong em na kisim ol blesing, o yumi sakim tok na karim ol hevi. Maski wanem rot yumi makim, em samting bilong yumi yet.​—⁠Lo sapta 30 Ves 16-18; Galesia 6:​7, 8.

Orait, yu ting em i bikpela samting long Jehova wanem rot yumi makim? Yes, em i bikpela samting! God i givim tingting long Moses na Moses i tok: ‘Makim rot bilong i stap gut.’ (Lo sapta 30 Ves 19) Tasol olsem wanem yumi inap makim rot bilong laip? Moses i tok: “Yupela i mas laikim tru God, Bikpela bilong yumi, na . . . harim tok bilong en na bel tru long em oltaim.” (Lo sapta 30 Ves 20) Sapos yumi laikim tru Jehova, bai yumi bihainim tok bilong em na stap gut long em maski wanem samting bai kamap. Taim yumi mekim olsem, yumi makim rot bilong laip​—⁠em nambawan rot bilong bihainim long nau na wet long kisim laip oltaim long nupela taim God bai kamapim.​—⁠2 Pita 3:​11-13; 1 Jon 5:⁠3.

Tok bilong Moses i skulim yumi long wanpela gutpela tok i strongim yumi. Maski wanem samting i bin painim yu nau long dispela taim nogut, dispela i no makim olsem oltaim hevi bai painim yu; na tu, i no makim olsem ol wok yu mekim bai no kamap gutpela, nogat. Jehova givim yu dispela presen bilong yu yet i ken makim rot yu laik bihainim. Yes, yu inap makim olsem yu laikim Jehova, harim tok bilong em na stap gut long em. Sapos yu makim dispela rot, Jehova bai blesim yu.

Dispela tok​—⁠yumi stap fri long makim olsem yumi bai laikim Jehova na mekim wok bilong em⁠​—⁠​em wanpela tok tru i bin mekim gut bel bilong dispela meri yumi kamapim tok bilong em antap. Em i tok: “Mi laikim tru Jehova. Sampela taim mi save lusim tingting long nambawan bikpela samting em olsem, mi laikim tru Jehova. Olsem na mi inap long i stap gut long em.” Na Jehova inap helpim yu tu.

[Futnot]