Papamama—Trenim Ol Pikinini Long Laikim Jehova

 1. Jehova i givim wanem wok long ol papamama?

TAIM Jehova i wokim fes man na meri, em i givim ol laik bilong kamapim pikinini. Olsem na i stret long Baibel i tok: “Jehova i givim . . . ol pikinini . . . olsem presen.” (Sng. 127:3) Wanem mining bilong dispela tok? Tingim olsem wanpela gutpela pren i askim yu long lukautim bikpela mani bilong em. Yu bai pilim olsem wanem? Yu bai pilim tru pasin bilong em long trastim yu. Tasol ating yu bai tingting planti long olsem wanem yu inap lukautim gut mani na bai ol stilman i no ken stilim. Jehova em nambawan gutpela Pren, na em i givim ol papamama wanpela samting i dia tumas winim mani. Em i laik bai ol i lukautim gut pikinini na no ken larim wanpela samting i bagarapim laip bilong pikinini na pinisim amamas bilong em.

 2. Yumi bai skelim wanem ol askim?

² Husat i mas mekim disisen bilong tupela marit long kamapim pikinini, na wanem taim ol i ken kamapim pikinini? Papamama i ken mekim wanem bilong helpim ol pikinini long i stap amamas? Skelim sampela stiatok bilong Baibel we inap helpim ol marit Kristen long mekim gutpela disisen.

 3. (a) Husat bai mekim disisen bilong tupela marit long kamapim pikinini? (b) Ol pren na wanfamili i mas tingim wanem ol stiatok bilong Baibel?

³ Long sampela ples, ol manmeri i laik bai ol nupela marit i mas hariap long kamapim pikinini. Ol wanfamili na ol narapela tu inap putim presa long ol nupela marit. Jethro, wanpela brata long Esia, em i tok: “Insait long kongrigesen, sampela marit husat i gat pikinini, ol i putim presa long ol marit i no gat pikinini long ol tu i mas kamapim pikinini.” Jeffrey, narapela brata long Esia, em i tok: “Sampela manmeri i tokim ol marit i no gat pikinini olsem ol bai i no gat man bilong lukautim ol taim ol i kamap lapun.” Tasol i stret moa long ol marit yet i mekim dispela disisen. Em i no wok bilong ol narapela long mekim disisen bilong ol, nogat, em wok bilong ol yet. (Gal. 6:5) Em tru olsem ol pren na ol wanfamili i laik bai tupela nupela marit i stap amamas. Tasol olgeta i mas tingim olsem dispela tupela marit tasol bai mekim disisen bilong kamapim pikinini.—1 Tes. 4:11.

4-5. (a) Ol marit i mas skelim gut wanem 2-pela bikpela askim? (b) Wanem taim em gutpela long ol i skelim ol dispela askim? Eksplenim.

⁴ Sapos tupela marit i mekim disisen long kamapim pikinini, orait ol i mas skelim 2-pela bikpela askim. Namba 1: Wanem taim bai ol i kamapim pikinini? Namba 2: Ol i mas i gat hamaspela pikinini? Wanem taim em gutpela taim long tupela marit i ken skelim ol dispela askim? Wai na dispela 2-pela askim em bikpela samting?

⁵ Paslain long man na meri i marit, ol i ken toktok long disisen bilong ol long kamapim pikinini. Bilong wanem? Em i bikpela samting long tupela i holim wankain tingting long dispela disisen. Na tu, ol i mas skelim sapos ol i redi long mekim wok bilong lukautim pikinini. Bihain long weding, sampela marit i save wet inap wanpela o 2-pela yia paslain long ol i kamap papamama bikos dispela wok bai pinisim tru taim na strong bilong ol. Dispela bai helpim ol long lain gut long nupela laip bilong ol olsem ol marit na pas gut moa wantaim narapela narapela.—Efe. 5:33.

 6. Olsem wanem dispela taim nogut yumi stap long en i putim hevi long sampela marit?

⁶ Ol narapela Kristen i mekim disisen long bihainim pasin bilong 3-pela pikinini man bilong Noa em ol i marit pinis. Ol i no hariap long kamapim pikinini. (Stt. 6:18; 9:18, 19; 10:1; 2 Pita 2:5) Jisas i tok taim bilong yumi i wankain long “taim bilong Noa,” na yumi luksave tru olsem yumi stap nau long “taim nogut” we i “givim hatwok long ol man.” (Mat. 24:37; 2 Tim. 3:1) Sampela marit i tingim dispela na ol tu i laik lusim bikpela haptaim moa long mekim wok autim tok, olsem na ol i no hariap long kamapim ol pikinini.

 7. Olsem wanem ol stiatok i stap long Luk 14:28, 29 na Provep 21:5 i helpim tupela marit?

⁷ Taim ol marit i laik mekim disisen long kamapim pikinini na hamaspela pikinini ol i laik kamapim, mobeta ol i “skelim gut pe bilong dispela samting.” (Ritim Luk 14:28, 29.) Ol papamama husat i bin lukautim ol pikinini, ol i tok ol i bin tromoi bikpela mani na lusim bikpela haptaim na strong bilong ol long mekim dispela wok. Olsem na em i bikpela samting long ol marit i ken skelim ol kain askim olsem: ‘Yumitupela wantaim bai mekim wok mani bilong lukautim famili? Yumitupela i wanbel long wanem ol samting famili bai nidim? Sapos yumitupela wantaim i mas wok, orait husat bai lukautim ol pikinini? Husat bai stiaim tingting na pasin bilong ol?’ Ol marit husat i toktok gut wantaim long ol dispela askim, ol i bihainim stiatok i stap long Provep 21:5.—Ritim.

 8. (a) Ol marit Kristen i mas redi long bungim wanem ol hevi? (b) Pasin laikim bai kirapim maritman long mekim wanem?

⁸ I stret long papa o mama i lusim sampela strong na haptaim bilong ol long lukautim pikinini. Sapos papamama i kamapim ol pikinini klostu klostu, strong bilong ol bai pinis na ol bai i no gat taim long tingim gut olgeta wan wan pikinini. Sampela marit i gat planti pikinini, na dispela i putim bikpela presa long ol yet. Mama inap pilim olsem olgeta strong bilong em i pinis na em i stap bel hevi. Yu ting dispela inap pasim em long mekim stadi, beten, na autim tok long olgeta taim? Narapela hatwok em long putim gut yau long taim bilong miting na kisim helpim long ol tok i kamap. Pasin laikim bai kirapim maritman long mekim ol samting em inap mekim bilong helpim meri long lukautim pikinini maski ol i stap long miting o long haus. Em i ken helpim meri long klinim haus, wasim klos, o redim kaikai. Na tu, em i mas mekim gut sediul na bai oltaim famili i kisim helpim long program bilong Famili Lotu. Na oltaim ol papa i mas go wantaim famili long mekim wok autim tok.

9-10. Ol papamama i mas mekim wanem bilong helpim ol pikinini?

⁹ Wanem sampela samting papamama i ken mekim bilong helpim ol pikinini long kisim pasin bilong laikim Jehova? Olsem wanem ol inap lukautim ol pikinini na bai ol samting bilong dispela graun i no ken bagarapim gutpela pasin bilong ol? Skelim sampela samting ol papamama i ken mekim.

¹⁰ Beten askim Jehova long givim helpim. Tingim Manoa na meri bilong em—tupela i kamap papamama bilong Samson. Taim Manoa i painimaut olsem em na meri bilong em bai gat wanpela pikinini man, em i askim Jehova long stiaim ol long lukautim gut dispela pikinini.

11. Olsem Hetman 13:8 i kamapim, olsem wanem ol papamama inap bihainim eksampel bilong Manoa?

¹¹ Tupela marit, em Nihad na Alma, ol i bilong Bosnia na Hetsagovina, na ol i bin kisim skul long eksampel bilong Manoa. Tupela i tok: “Olsem Manoa, mipela i askim Jehova long skulim mipela long kamap gutpela papamama. Na Jehova i harim beten na bekim long kain kain rot—long rot bilong Baibel, ol pablikesen bilong Baibel, ol miting bilong kongrigesen, na ol kibung.”—Ritim Hetman 13:8.

12. Olsem wanem Josep na Maria i soim gutpela eksampel long ol pikinini?

¹² Soim gutpela eksampel. Tok bilong yu em i bikpela samting; tasol pasin bilong yu bai i gat bikpela strong moa long stiaim pikinini. Yumi inap tok olsem Josep na Maria i bin stap gutpela eksampel long ol pikinini bilong ol, na long Jisas tu. Josep i wok hat long lukautim gut famili. Na tu, em i strongim ol long tingim tru pasin bilong lotuim God. (Lo 4:9, 10) Lo Bilong Moses i no makim olsem Josep i mas kisim famili i go wantaim em long Jerusalem “long olgeta yia” long bung bilong Pasova, tasol Josep i save kisim ol i go. (Luk 2:41, 42) Long dispela taim bipo, ating sampela papa bai pilim olsem dispela wokabaut i gat bikpela hatwok, bikpela haptaim bai lus, na ol bai tromoi bikpela mani. Tasol Josep i laikim tru pasin bilong lotuim God na em i skulim ol pikinini tu long kisim dispela pasin. Na tu, Maria i save gut long ol skripsa. Long rot bilong ol tok na ol pasin em i mekim, em i skulim ol pikinini tu long laikim Tok Bilong God.

13. Olsem wanem tupela marit i bihainim eksampel bilong Josep na Maria?

¹³ Nihad na Alma—yumi stori pinis long ol—ol i bihainim eksampel bilong Josep na Maria. Olsem wanem dispela i helpim ol long stiaim pikinini bilong ol long laikim God na mekim wok bilong em? Tupela i tok: “Long rot bilong pasin mipela i bihainim, mipela i traim long soim pikinini olsem em bai stap gut sapos em i bihainim ol stiatok bilong Jehova.” Nihad i tok: “Yu mas soim pasin we yu laik bai pikinini i bihainim.”

14. Wai na ol papamama i mas save long ol lain i stap pren bilong pikinini?

¹⁴ Helpim ol pikinini long makim ol gutpela pren. Papa na mama i mas save long ol pren bilong pikinini, na ol i mas save tu long ol samting em pikinini na ol pren i save mekim. Na tu, papamama i mas save long ol pikinini i toktok wantaim husat long rot bilong mobail fon na Intenet. Ol dispela poroman inap stiaim tingting na pasin bilong ol pikinini.—1 Kor. 15:33.

15. Ol papamama inap kisim wanem skul long eksampel bilong Jessie?

¹⁵ Papamama i ken mekim wanem sapos ol i no kliagut long ol samting ol man inap mekim long rot bilong kompiuta o mobail fon? Jessie em wanpela papa long Filipins, na em i tok: “Mipela i no gat bikpela save tumas long teknoloji. Tasol dispela i no pasim mipela long stori gut long ol pikinini long ol hevi inap painim ol long rot bilong mobail fon na Intenet.” Maski Jessie yet i no kliagut long wok bilong mobail fon na Intenet, em i no tambuim ol pikinini bilong em long yusim ol dispela samting. Em i tok: “Mi kirapim ol long yusim mobail fon na kompiuta long lainim nupela tokples, redim ol miting, na ritim Baibel long olgeta de.” Olsem wanem long yupela ol papamama? Yupela i bin ritim na toktok wantaim ol pikinini long sampela skultok long sait bilong salim teks na foto, olsem i stap long seksen bilong “Teenagers” long jw.org^®? Yupela i bin watsim na toktok wantaim ol long ol vidio Husat i Bos—Yu o Fon Bilong Yu? na Sosel Netwok—Bihainim Savetingting?b Ol dispela vidio inap helpim yu long skulim ol pikinini long bihainim stretpela tingting taim ol i yusim mobail fon na kompiuta.—Prov. 13:20.

16. Planti papamama i bin mekim wanem, na dispela i mekim wanem long pikinini?

¹⁶ Planti papamama i wok strong long stretim rot na bai ol pikinini inap bung wantaim ol lain husat i stap gutpela eksampel long mekim wok bilong God. N’Déni na Bomine, em tupela marit long Kot-Diwa. Planti taim tupela i save invaitim wasman sekit long stap long haus bilong ol. N’Déni i tok: “Dispela i bin helpim tru pikinini man bilong mipela. Em i kirap long mekim wok painia na nau em i helpim wok sekit.” Yu ting yu inap mekim kain samting olsem bilong helpim pikinini bilong yu?

17-18. Wanem taim ol papamama i mas kirap long trenim ol pikinini?

¹⁷ Stat long trenim ol pikinini taim ol i liklik yet. Sapos papamama i kirap kwik long trenim ol pikinini, gutpela samting bai kamap. (Prov. 22:6) Tingim Timoti, em i bin raun wantaim aposel Pol. Mama bilong Timoti, em Yunis, na bubu meri Lois, ol i bin skulim em gut “kirap long taim [em i] stap bebi yet.”—2 Tim. 1:5; 3:15.

¹⁸ Narapela tupela marit long Kot-Diwa, em Jean-Claude na Peace. Ol i lukautim gut olgeta 6-pela pikinini bilong ol na olgeta i laikim Jehova na mekim wok bilong em. Wanem samting i helpim dispela tupela marit? Ol i bihainim eksampel bilong Yunis na Lois. Ol i tok: “Mipela i skulim ol pikinini long Tok Bilong God kirap long taim ol i bebi yet, bihain liklik long ol i bon.”—Lo 6:6, 7.

19. Olsem wanem papamama inap skulim ol pikinini long Tok Bilong God?

¹⁹ Olsem wanem yupela inap “skulim” ol pikinini long Tok Bilong Jehova? “Skulim” i makim olsem yupela i mas “kolim kolim gen planti taim.” Olsem na oltaim papamama i mas lusim sampela haptaim long stap wantaim ol liklik pikinini. Sampela taim papamama inap bel hevi bikos planti taim ol i mas tokim pikinini long wankain samting. Tasol papamama i mas tingim dispela olsem rot bilong helpim ol pikinini long kliagut long Tok Bilong God na bihainim.

20. Stori long olsem wanem papamama i ken bihainim tok bilong Song 127:4.

²⁰ Save gut long pikinini. Long Buk Song sapta 127, Baibel i tok ol pikinini i olsem ol spia. (Ritim Buk Song 127:4.) Ol man i save yusim kain kain samting long wokim ol spia, na sais bilong ol spia i no wankain. Orait olsem tasol, olgeta pikinini i no wankain. Olsem na ol papamama i mas skelim gut wanem pasin ol i laik bihainim long trenim ol pikinini. Long nau, tupela marit long Israel i bin skulim 2-pela pikinini bilong ol long mekim wok bilong Jehova. Ol i tok, “Mipela i mekim Baibel stadi wantaim wan wan bilong tupela long narapela narapela taim.” Ol het bilong ol wan wan famili yet i ken skelim sapos ol inap bihainim wankain pasin.

21. Olsem wanem Jehova inap helpim ol papamama?

²¹ Sampela taim papamama inap pilim olsem i hatwok tru long skulim ol pikinini, tasol ol pikinini i olsem presen i kam long Jehova. Oltaim God i stap redi long helpim ol. Em i save amamas long harim beten bilong ol papamama. Em i save bekim beten bilong ol papamama long rot bilong Baibel, ol pablikesen bilong yumi, na gutpela eksampel na skultok bilong ol narapela papamama long kongrigesen.

22. Papamama inap givim wanem ol gutpela samting long ol pikinini?

²² Sampela manmeri i save tok olsem wok bilong lukautim pikinini em wok bilong mekim insait long 20 yia, tasol wok papamama bai i no inap pinis. Ol gutpela samting tru em papamama inap givim long pikinini em pasin laikim, taim, na trening i kam long Baibel. Olgeta wan wan pikinini bai mekim narapela narapela pasin taim papamama i laik trenim ol. Planti bilong ol i bin gat papamama husat i laikim Jehova, na ol i pilim wankain olsem Joanna Mae, wanpela sista long Esia. Em i tok: “Taim mi tingim bek trening mi kisim long papamama, mi amamas tru olsem ol i bin stretim gut ol pasin bilong mi na skulim mi long laikim Jehova. Ol i bin kamapim mi, na tu, ol i mekim na laip bilong mi gat mining.” (Prov. 23:24, 25) Planti milion Kristen i holim wankain tingting.