Lotu i Helpim Yu Tru?

WIN, wara, kaikai, haus​—⁠yumi save yumi mas kisim ol dispela samting. Sapos nogat, bai yumi dai. Tasol hetman bilong ol Israel, em Moses, em i kolim narapela samting ol man i mas kisim, em i winim kaikai o wara. Moses i tok: “Yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip.”​—⁠Lo 8:⁠3.

Dispela tok bilong Moses i makim olsem yumi mas kisim ol samting bilong lotu o bilong spirit yumi sot long en. Yumi mas kisim dispela samting bambai yumi inap kisim laip! Taim ol Israel i raun long ples nating inap 40 yia, ol i kisim laip long ‘olgeta tok bilong Jehova.’ Ol inap bagarap, tasol nogat. God i tok na ol i kisim kaikai, ol i kolim mana, i pundaun long skai. Na ol i kisim wara long ston. God i lukautim ol long ol samting bilong skin, na em i mekim samting moa. Moses i tok: “[God] i save stretim yupela, olsem wanpela papa i save . . . stretim [pikinini].”​—⁠Lo 8:​4, 5; Kisim Bek 16:​31, 32; 17:​5, 6.

God i helpim ol Israel long save wanem pasin i stret na wanem pasin i no stret, long pasin bilong ol yet na long pasin bilong lotu. Em i givim Lo long ol long han bilong Moses, em ol lo bilong kaikai bilong helpim ol long i stap gutpela, na ol lo bilong waswas, na ol lo i makim stretpela pasin ol i mas bihainim, na ol lo bilong lotu. Em i helpim ol long i stap gutpela long skin na long spirit. Ol i kisim laip long ‘olgeta tok bilong Jehova.’

Olsem na ol Israel i narapela kain olgeta long ol narapela lain. Long taim bilong Moses, Isip em i nambawan strongpela kantri. Ol Isip i lain bilong lotu. Wanpela buk i tok: “Ol Isip bilong bipo i bilip olsem ol god (ol god meri tu) i bosim olgeta samting long graun na olgeta samting ol man i mekim. Olsem na ol i lotuim planti god. . . . Long olgeta wan wan bikpela na liklik taun long Isip, ol man i lotuim god bilong taun yet na ol narapela bikpela god.”

Dispela pasin bilong lotuim planti god, yu ting em i helpim ol Isip? Nogat. Em i kirapim ol long bihainim ol bilip giaman na mekim kain kain pasin sem. Em i no helpim ol long stap laip na no ken sik tumas; pasin bilong ol Isip i kamapim ol “sik nogut.” (Lo 7:15) Olsem na Baibel i tok, ol god giaman bilong ol Isip i “samting nogut.”​—⁠Esekiel 20:​7, 8.

Wankain pasin i stap long nau. Planti man i gat lotu; wan wan tasol i no gat god. Tasol ol dispela lotu i no bin helpim ol man. Sapos ol i “bihainim olgeta tok bilong God,” yu ting bai i gat ol hevi bilong nau, olsem ol pait, na pasin birua, na hangre, na planti man i stap rabis tru? Nogat, a? Tasol ol i no laik senisim lotu bilong ol. Sampela i no laik toktok long lotu o harim narapela tingting long lotu!

Olsem: Wanpela Kristen i autim tok long wanpela man long Gana, long Wes Afrika, na man i tok: “Mi ting God i givim tok bilong em long mipela ol Afrika long maus bilong ol strongpela pris na ol pris meri bilong mipela, olsem em i bin mekim long ol Juda long maus bilong ol profet. Tasol sori tru, mipela sampela Afrika i no tingim dispela ol pris na mipela i toktok long Jisas, na Mohamet, na ol narapela.”

Planti lain long Afrika i ting, lotu Kristen em lotu bilong ol waitskin. Ol i no laikim, long wanem, em bilong narapela ples na ol i ting em i no bin helpim tru ol Afrika. Tasol sapos yu pasim tingting olsem, yu ting dispela inap helpim yu long ol samting bilong spirit? Wanpela savetok bilong ol Afrika i tok: “Maski yu hangre, bai yu no putim tupela han wantaim long dis kaikai.” Dispela pasin bilong kaikai i no gutpela, na em inap bagarapim man sapos em i no save wanem samting i stap long dis! Tasol planti man i no skelim lotu pastaim na ol i bihainim​—⁠bel bilong ol i kirap nating na ol i bihainim o ol i bihainim nating lotu bilong famili.

Tasol yu mas skelim gut pastaim bambai yu inap “lotu tru long God.” (Rom 12:⁠1) Yu mas tingting: Wanem lotu i stret? Dispela kain lotu tasol inap helpim yu tru long ol samting bilong spirit. Olsem na nau yumi ken skelim sampela lotu bilong ol Afrika, na dispela inap helpim yumi olgeta.

[Piksa long pes 3]

Moses i makim olsem yumi mas kisim ol samting bilong spirit yumi sot long en

[Piksa long pes 4]

Ol Afrika i tingim pasin bilong ol misineri bilong ol misin ol i kolim Kristen na ol i no laikim Baibel