Bilip Long Baibel Em Tok Tru Bilong God

“Oltaim mipela i save tok tenkyu long God long dispela samting tu. Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God. Na dispela tok i wok strong long bel bilong yupela ol manmeri i bilip long Krais.”​—⁠1 TESALONAIKA 2:⁠13.

BAIBEL em i buk ol i bin tanim long planti tok ples na tilim long planti man long planti hap, winim olgeta narapela buk. Ol man i save tokaut olsem em i wanpela gutpela buk tru. Tasol bikpela samting em olsem: Baibel i givim gutpela save long ol man bilong soim rot long ol. Long nau ol man bilong olgeta kain skin na olgeta lain, maski ol i gat wanem kain wok o wanem kain sindaun, ol i sot tru long dispela kain save. (KTH 14:​6, 7) Baibel i mekim gut bel na tingting bilong ol man, long wanem, em i bekim gut olkain askim olsem: Yumi stap bilong mekim wanem? (Stat 1:28; KTH 4:11) Bilong wanem ol gavman i no inap kamapim gutaim na gutpela sindaun i stap oltaim? (Jeremaia 10:23; KTH 13:​1, 2) Bilong wanem ol man i save dai? (Stat 2:​15-17; 3:​1-6; Rom 5:12) Olsem wanem yumi ken karim ol hevi i kamap planti long nau? (Song 119:105; Sindaun 3:​5, 6) Wanem samting bai kamap long bihain?​—⁠Daniel 2:44; KTH 21:​3-5.

² Bilong wanem Baibel inap bekim stret ol dispela askim? Long wanem, em i Tok Bilong God. God i givim tok long ol man na ol i raitim, olsem 2 Timoti 3:16 i tok, “spirit bilong God yet i bin kamapim olgeta tok i stap long buk bilong God.” Tingting bilong ol man yet long ol samting i painim ol, dispela i no as bilong ol tok bilong Baibel. “I no gat wanpela tok profet [tok bilong ol samting bai kamap bihain, lo bilong God, stretpela pasin Baibel i makim] i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.”​—⁠2 Pita 1:21.

³ Planti man i pilim tru gutpela wok Baibel inap mekim bilong helpim ol na ol i bin kisim Baibel na kaunim, maski ol inap i go kalabus o ol man i kilim ol i dai. Samting nogut olsem i bin kamap long kantri Spen em planti Katolik i stap long en. Ol pris i tambuim ol man long kaunim Baibel long tok ples bilong ol yet, nogut ol pris i no gat strong moa long bosim ol. Na dispela i kamap long kantri Albenia tu taim i gat gavman i no bilip long God na ol i mekim nogut tru long ol man bilong pinisim bilip bilong ol. Tasol ol man i pret long God ol i laikim tru Baibel, na ol i kaunim, na givim long ol narapela bilong kaunim. Long taim bilong Namba 2 Pait, insait long banis kalabus nogut bilong Saksenhausen, ol i hait na givim wanpela Baibel i go long ol man long narapela narapela haus slip (maski i tambu) na ol man i kisim na kaunim na putim gut long tingting bambai ol inap autim long ol narapela. Long yia 1950 inap 1959, long Is Jemani, em kantri Komyunis long dispela taim, sampela Witnes Bilong Jehova i stap long kalabus, long wanem, ol i holimpas bilip bilong ol. Ol i save givim sampela liklik hap bilong Baibel long ol narapela kalabusman bilong kaunim long nait, maski ol inap kalabus na stap wanpis long wanpela rum na ol i no inap toktok wantaim wanpela man inap longtaim moa. Bilong wanem ol i mekim olsem? Long wanem, ol i bilip tru olsem Baibel em i Tok Bilong God, na ol i save “yumi man i no inap kisim laip long kaikai tasol,” yumi mas “bihainim olgeta tok bilong God tu.” (Lo 8:⁠3) Ol dispela tok i stap long Baibel i bin helpim ol dispela Witnes long i stap strong long bilip, maski ol man i bin mekim nogut tru long ol.

⁴ Baibel i no buk bilong putim i stap na lukim long wan wan taim tasol, o bilong lukim long taim yu bung wantaim ol wanlotu long haus lotu. Yumi mas lukim long olgeta de bilong helpim yumi long ol hevi i save painim yumi, na bilong kisim save long stretpela rot yumi mas bihainim.​—⁠Song 25:​4, 5.

Em Bilong Kaunim na Save Long En

⁵ Long taim bilong yumi, long planti kantri ol man inap kisim Baibel, na mipela laik kirapim ol man i save kaunim Wastaua long kisim wanpela Baibel. Long taim bilong raitim Baibel, i no gat ol masin bilong prinim. Olsem na ol man i no gat Baibel bilong ol yet. Tasol Jehova i stretim rot bambai ol wokboi bilong em i ken harim ol tok i stap long Baibel. Olsem na Kisim Bek 24:7 i tok, taim Moses i raitim pinis ol tok Jehova i bin givim long em, em i “kisim buk bilong kontrak, ol tok bilong Bikpela i stap long en, na em i ritim long ol manmeri.” Ol i bin lukim ol narapela kain samting i kamap long maunten Sainai na ol i save, ol tok Moses i kaunim long ol em i tok bilong God na ol i mas save long en. (Kisim Bek 19:​9, 16-19; 20:22) Yumi tu i mas save long ol tok i stap long Baibel.​—⁠Song 19:​7-11.

⁶ Taim ol Israel i pinis long raun raun long ples nating na ol i laik brukim wara Jordan na go insait long Graun Bilong Promis, em gutpela taim bilong ol i ken tingim gen Lo bilong Jehova na ol samting em i bin mekim long ol. Spirit bilong God i kirapim Moses long stori gen long Lo. Em i kolim gen ol lo, na kamapim klia ol as tok na tingting em bai helpim ol long pas gut wantaim Jehova. (Lo 4:​9, 35; 7:​7, 8; 8:​10-14; 10:​12, 13) Olsem tasol taim yumi gat nupela wok yumi mas mekim o senis i kamap, gutpela sapos yumi tu i larim tok bilong Baibel i stiaim tingting bilong yumi na ol samting yumi mekim.

⁷ Ol Israel i brukim wara Jordan na bihain liklik ol i bung gen bilong tingim ol tok Jehova i bin givim long ol long rot bilong Moses. Ol i bung longwe long Jerusalem inap 50 kilomita long hap not. Ol i bruk long tupela lain; wanpela lain i sanap klostu long maunten Ebal na wanpela klostu long maunten Gerisim. Nau Josua “i ritim olgeta tok . . . long buk bilong lo. Em i ritim tok bilong God bai i mekim gut long ol sapos ol i bihainim tru tok bilong God, na tu em i ritim tok bilong God bai i bagarapim ol sapos ol i sakim tok bilong God.” Long dispela rot, long taim stret olgeta man bilong Israel, na ol meri pikinini, na ol manmeri bilong ol narapela ples i stap wantaim ol Israel, ol i harim gen ol dispela lo ol i mas bihainim bambai ol i ken kisim blesing, na sapos ol i sakim bai Jehova i birua long ol. (Josua 8:​34, 35) Ol i mas save gut wanem pasin i gutpela long ai bilong Jehova na wanem pasin i nogut. Ol i mas laik tru long mekim gutpela pasin na nolaik tru long ol pasin nogut. Dispela laik i mas pas strong long bel bilong ol. Na i wankain long yumi tu.​—⁠Song 97:10; 119:​103, 104; Amos 5:15.

⁸ Ol i bin ritim ol tok bilong Baibel long ol manmeri long ol dispela bikpela taim, na i gat ol narapela taim tu bilong mekim, olsem Lo 31:​10-12 i kolim. Long olgeta namba 7 yia olgeta manmeri i mas bung na harim ol tok bilong God ol i ritim long ol. Em rot bilong givim kaikai bilong spirit long ol. Em i kirapim bel na tingting bilong ol long bilip strong long ol tok promis long Pikinini na i stiaim tingting bilong ol i go long Mesaia. Ol pasin ol i kirapim long ples nating bilong kisim kaikai bilong spirit i no pinis long taim ol i go insait long Graun Bilong Promis. (1 Korin 10:​3, 4) Ol i skruim sampela tok moa long Tok Bilong God, em God i kamapim long maus bilong ol profet.

⁹ Na i no long ol bikpela bung tasol ol i mas tingim gen ol tok i stap long buk bilong God. Long olgeta de ol i mas toktok wantaim long sampela tok bilong en na ol lo i stap long en. (Lo 6:​4-9) Long planti kantri long nau ol yangpela inap kisim Baibel na i gutpela ol i gat Baibel bilong ol yet. Tasol long Israel long bipo, i no olsem. Taim ol i laik skulim ol pikinini long ol tok bilong God, papamama i mas kamapim ol tok ol i holim long tingting, na ol tok i tru ol i bin putim gut long bel bilong ol, na ol liklik hap tok ating ol i bin raitim. Ol i save kolim kolim ol dispela tok na wok strong long kirapim ol pikinini long laikim tumas Jehova na ol pasin bilong em. Ol i no laik pulapim save long tingting; ol i laik helpim olgeta wan wan long famili long bihainim pasin i kamapim klia olsem ol i laikim tumas Jehova na tok bilong em.​—⁠Lo 11:​18, 19, 22, 23.

Ol i Kaunim Long Ol Haus Lotu

¹⁰ Ol Juda i go kalabus long Babilon na sampela yia bihain ol i kirap wokim ol haus lotu bilong ol. Ol i wokim tu planti Buk Bilong God, olsem raitim raitim long han, bambai ol inap kaunim ol tok bilong God na toktok long en taim ol i bung bilong mekim lotu. Olsem na i gat 6,000 samting olpela rait i stap yet bilong sampela hap tok bilong Olpela Testamen, em ol i bin raitim long han.

¹¹ Bikpela samting long taim ol i bung long haus lotu em ol i save kaunim buk ol i kolim Tora, olsem i stap long ol 5-pela buk bilong Moses long ol Baibel bilong nau. Aposel 15:21 i tok, long taim bilong ol aposel ol i save kaunim long olgeta de Sabat; na buk lotu bilong ol Juda (Mishnah) i makim olsem long yia 150 samting ol i save kaunim buk Tora long namba 2 de na namba 5 de bilong olgeta wik tu. Ol i makim sampela man bilong kaunim, na taim wanpela i kaunim pinis hap ol i makim bilong em, narapela i kirap long kaunim hap bilong em. Ol Juda i stap long Babilon ol i gat pasin bilong kaunim olgeta tok bilong Moses insait long wanpela yia; tasol long Palestain ol i save mekim insait long 3-pela yia. Ol i save kaunim hap tok bilong ol profet tu na autim as bilong en. Em pasin bilong Jisas long i go long haus lotu long ples bilong em long taim ol i kaunim Baibel long de Sabat.​—⁠Luk 4:​16-21.

Ol Yet i Mas Bilip na Bihainim

¹² Ol i no kaunim nating ol tok bilong buk bilong God, olsem ol i mekim nating wanpela pasin bilong lotu. Nogat. Na i no bilong givim save long ol man i laik kisim save tasol. Taim Moses i kaunim “buk bilong kontrak” long ol Israel long ples daun klostu long maunten Sainai, em i mekim olsem bambai ol i ken save long ol wok God i givim long ol na ol i ken mekim ol dispela wok. Ol bai mekim? Moses i kaunim tok na ol man i mas bekim. Ol manmeri i save long dispela na ol i bekim tok olsem: “Mipela bai bihainim stret olgeta tok bilong Bikpela.”​—⁠Kisim Bek 24:7; skelim wantaim Kisim Bek 19:8; 24:⁠3.

¹³ Bihain, taim Josua i kaunim tok long ol Israel, olsem ol bai kisim gutpela pe o pe nogut, ol tu i mas bekim tok. Long olgeta wan wan taim ol i harim tok long God bai i bagarapim ol man nogut, ol i mas bekim tok olsem: “Tru tumas, God i ken mekim olsem.” (Lo 27:​4-26) Long olgeta wan wan taim Josua i kolim pe bilong man nogut, ol manmeri i tokaut olsem i stret Jehova i tambuim dispela pasin na givim pe nogut long man i mekim. Taim olgeta wantaim i singaut strong olsem, dispela i helpim ol long pilim tru dispela tok!

¹⁴ Long taim bilong Nehemia olgeta manmeri i bung long Jerusalem bilong harim pris i kaunim Lo long ol, na ol i kisim save olsem ol i no bihainim stret ol tok bilong Lo. Long dispela taim ol i kirap kwik na bihainim tok. Na wanem samting i kamap? “Ol i amamas tru.” (Nehemia 8:​13-17) Long olgeta de inap wanpela wik ol i bung na harim ol tok bilong Lo, na ol i save i gat sampela samting moa ol i mas mekim. Ol i beten long Jehova na kolim ol samting em i bin mekim long lain bilong em kirap long taim bilong Abraham na i kam. Dispela i kirapim ol long mekim tok tru antap long ol bai bihainim ol tok bilong Lo, na ol i no ken maritim ol haiden, na ol bai lukautim haus lotu long Jerusalem na ol wok bilong en.​—⁠Nehemia, sapta 8-10.

¹⁵ Olsem tasol insait long famili, ol i no ken skul nating long ol tok bilong God. Tok piksa bilong Lo 6:​6-9 i kamapim klia dispela samting. Em i tok, ol i mas ‘pasim tok bilong God long han bilong ol’​—⁠ol i mas mekim ol wok na pasin i kamapim klia olsem ol i laikim tumas ol pasin bilong Jehova. Na ol i mas pasim tok bilong God ‘long pes bilong ol’​—⁠oltaim ol i mas tingim ol lo long buk bilong God na bihainim long taim ol i skelim samting ol i laik mekim. (Skelim ol tok long Kisim Bek 13:​9, 14-16.) Ol i mas raitim ol tok bilong God ‘long ol dua bilong haus na bilong banis’​—⁠dispela i makim olsem long haus na namel long ol wanples ol i save tingim gut na bihainim ol tok bilong God. I olsem: Olgeta samting ol i mekim i mas kamapim klia olsem ol i laikim tumas ol stretpela lo bilong God na ol i bihainim. Dispela inap helpim ol gut tru! Olsem wanem? Tok Bilong God i bikpela samting olsem long ol famili bilong yumi long nau? Famili i save bihainim tok bilong Baibel long olgeta samting ol i mekim long olgeta de? Sori tru, ol Juda i kirap mekim nating ol dispela pasin bilong lotu​—⁠ol i putim hap rait bilong lo bilong God long liklik bokis na pasim long skin olsem samting bilong lukautim ol. Ol i no givim bel long Jehova na lotu tru long em, olsem na em i sakim lotu bilong ol.​—⁠Aisaia 29:​13, 14; Matyu 15:​7-9.

Wok Bilong Ol Man i Stap Wasman

¹⁶ Pasin bilong kaunim Baibel i bikpela samting bilong ol man i stap wasman bilong lain Israel. Jehova i tokim Josua: “Yu mas was gut na bihainim tru olgeta lo.” Bilong mekim olsem, Jehova i tok: “Long san na long nait yu mas skul gut long olgeta lo. . . . Sapos yu mekim olsem, orait olgeta arapela samting yu mekim bai i kamap gutpela tasol.” (Josua 1:​7, 8) Sapos Josua, o wasman Kristen long nau, i kaunim Baibel long olgeta taim, dispela bai helpim em long tingim klia ol lo Jehova i givim long lain bilong em. Na Josua i mas save long ol pasin Jehova i bin mekim long ol wokboi bilong Em long narapela narapela kain taim. Taim em i kaunim ol tok i kamapim laik bilong God, i bikpela samting long em i mas tingim wok bilong em yet long bihainim laik bilong God.

¹⁷ Jehova i tok, taim man i kamap king bilong lain bilong Em, em i mas lukim buk bilong Lo ol pris i holim, na em i mas raitim ol dispela lo bilong God long wanpela buk na “ritim hap tok long en long olgeta de.” I no bilong em i ken holim nating ol tok long tingting, nogat; em bilong helpim em “bai em i ken aninit long Bikpela,” na em i “no ken litimapim nem bilong em yet na daunim ol arapela Israel.” (Lo 17:​18-20) Olsem na em i mas kaunim ol tok na em i mas tingim gut long bel. Sampela king i pilim olsem ol i gat planti wok bilong bosim ol man na ol i no gat taim bilong mekim olsem. Ol i no mekim na dispela i nogutim lain Israel olgeta. Wok bilong ol elda long lain Kristen i no olsem wok bilong ol king, tasol olsem ol king, i bikpela samting long ol elda tu i mas kaunim Baibel na tingim gut long bel. Sapos ol i mekim olsem, dispela bai helpim ol long holim stretpela tingting long ol man God i putim long han bilong ol bilong lukautim. Na bai ol inap mekim wok bilong ol bilong skulim ol man long pasin i litimapim tru nem bilong God na i strongim bilip bilong ol brata Kristen bilong ol.​—⁠Taitus 1:9; skelim wantaim Jon 7:​16-18 na 1 Timoti 1:​6, 7.

¹⁸ Aposel Pol i stap wasman long lain Kristen bilong pastaim na em i save gut long ol tok bilong buk bilong God. Taim em i autim tok long ol manmeri long taun Tesalonaika bilong bipo, em inap toktok gut wantaim ol long ol tok bilong God na helpim ol long kisim gut as bilong en. (Aposel 17:​1-4) Em i putim tok i go daun long bel bilong ol gutpela man i harim tok. Olsem na planti ol i bilip. (1 Tesalonaika 2:13) Olsem wanem long yu? Yu makim taim bilong kaunim Baibel na yu stadi gut long en, olsem na yu inap toktok gut wantaim ol man long ol tok bilong Baibel? Wok na pasin bilong yu long kaunim Baibel, dispela i makim olsem yu amamas tru yu gat Baibel? Stori i kamap bihain long dispela bai makim rot bilong yu ken Yesa long ol dispela askim, maski yu gat planti wok.

Bai Yu Bekim Olsem Wanem?

◻ Olsem wanem na sampela man i redi long i dai o i go kalabus bambai ol i ken kaunim Baibel?

◻ Taim yumi tingim gen ol samting ol i mekim long Israel bambai ol manmeri i ken harim Tok Bilong God, dispela i helpim yumi olsem wanem?

◻ Yumi mas mekim wanem wok long ol tok yumi kaunim long Baibel?

◻ Bilong wanem i bikpela samting long ol elda i mas kaunim Baibel na tingim gut long bel?

[Askim Bilong Stadi]

1. Wanem gutpela save i stap long Baibel na Baibel i winim tru ol narapela buk?

2. Olsem wanem na Baibel inap bekim stret ol askim bilong yumi?

3. (a) Kamapim sampela stori i makim olsem ol man long narapela narapela kantri i bin laikim tru Baibel. (b) Bilong wanem ol man i laik kaunim Baibel, maski ol inap kisim nogut long dispela rot?

4. Yumi mas mekim wanem wok long Baibel?

5. (a) Sapos yumi inap, yumi olgeta wan wan i mas kisim wanem samting? (b) Olsem wanem ol Israel bilong bipo i save long ol tok i stap long buk bilong God? (c) Tok bilong Song 19:​7-11 i givim wanem tingting long yu long kaunim Baibel?

6. (a) Taim lain Israel i laik go insait long Graun Bilong Promis, Moses i mekim wanem? (b) Olsem wanem yumi ken bihainim pasin bilong Moses?

7. Ol Israel i brukim wara Jordan na bihain liklik ol i mekim wanem bambai Lo bilong Jehova i ken pas strong long tingting na long bel bilong ol?

8. Ol i save kaunim buk bilong God long ol bikpela bung bilong lain Israel na dispela i helpim ol olsem wanem?

9. (a) Ol Israel i save kaunim buk bilong God long ol bikpela bung tasol o olsem wanem? Stori long dispela. (b) Olsem wanem ol papamama inap skulim pikinini bilong ol long ol tok bilong God? Papamama i laik mekim wanem?

10, 11. Ol i gat wanem pasin bilong kaunim buk bilong God insait long ol haus lotu? Jisas i ting olsem wanem long ol dispela taim bilong kaunim Baibel?

12. (a) Taim Moses i kaunim ol tok bilong Lo long ol manmeri, dispela i helpim ol olsem wanem? (b) Ol manmeri i bekim wanem tok?

13. Taim Josua i kaunim ol tok olsem God bai bagarapim ol man i sakim tok, ol manmeri i mas mekim wanem? Dispela i helpim ol olsem wanem?

14. Taim ol i kaunim Lo bilong God long ol manmeri long taim bilong Nehemia, olsem wanem dispela i helpim ol gut?

15. Olsem wanem tok bilong Lo 6:​6-9 i makim olsem insait long famili ol i no ken skul nating long ol tok bilong God?

16. Bilong wanem i bikpela samting long Josua i mas kaunim buk bilong God long olgeta taim?

17. (a) Jehova i tok ol king i mas kaunim Baibel, tasol bilong dispela i ken helpim ol, ol i mas mekim wanem samting tu wantaim? (b) Bilong wanem i bikpela samting long ol elda Kristen i mas kaunim Baibel long olgeta taim na tingim gut long bel?

18. Sapos oltaim yumi kaunim na stadi long Baibel, dispela bai helpim yumi long bihainim wanem pasin bilong aposel Pol?

[Piksa long pes 9]

Jehova i tokim Josua, em i mas kaunim “long san na long nait”