Nem Bilong Jehovah i Nambawan Tru!
“[Jehova], yu Bikpela bilong mipela. Long olgeta hap bilong graun nem bilong yu i nambawan tru.”—SAM 8:1, 9.
1. Bilong wanem Jehova i mekim na graun bilong Kenan i “trautim” ol lain bilong en?
EM NAU! Long yia 1473 B.C.E., lain Isrel i kamap pinis long dispela graun God i tok promis long givim long ol. Tasol ol i gat wok yet long mekim pait bilong God. God i tok ol i mas rausim ol lain i stap long dispela graun, long wanem pasin bilong ol i nogut tru. Ol i no gat sem moa. Tasol tru pasin bilong ol i nogut olsem? Yes, pasin bilong ol Kenan i nogut tru! Ol i lotuim ol god giaman na mekim pasin pamuk na kain kain pasin sem. Pasin bilong ol i nogut tru long ai bilong Jehova na em inap bagarapim gutpela pasin bilong lain bilong Jehova. Olsem na long maus bilong Moses, God Jehova i tokaut olsem em i makim lain holi bilong em, em lain Isrel, bilong pinisim ol dispela lain. Long dispela rot bai Jehova i mekim na dispela graun i “trautim” ol dispela lain i bihainim pasin doti.−Levitikas 18:1-30, NW; Diuteronomi 12:29-32.
2 Long nau ating yumi gat askim olsem: Olsem wanem long pasin bilong graun? Ating em nogut tru na God i mas pinisim? Olsem wanem long pasin bilong ol misin bilong dispela graun? Sori tru! Ol i no bin litimapim nem bilong Man i bin wokim olgeta samting, em God Jehova. Ol misin ol i kolim Kristen ol i lusim em pinis, em i “as bilong wara i gat laip, na ol i bin wokim ol narapela hul wara i bruk na wara i no inap pulap long en.” (Jeremaia 2:13, NW ) Ol i gat narapela narapela tingting na bilip na ‘wara bilong tok i tru’ i no stap long ol. Ol i kamapim long ples klia olsem ol i bilong dispela graun, long wanem ol i insait long ol pait na ol wok politik bilong en, na ol i orait long pasin pamuk na kain kain pasin sem ol man bilong dispela graun i mekim. Olsem Jisas i tok, “long pasin bilong ol” yumi inap save long ol.−Matyu 7:16, 17; lukim tu Galesia 6:7, 8.
3 Ol manmeri bilong dispela graun i bihainim wanem kain pasin? Long dispela taim nau, long olgeta hap graun, planti planti meri i rausim bel, na planti yangpela meri ol i kisim bel, planti man na meri marit ol i katim marit na famili i bruk. Ol dispela pasin i kamap bikpela long ol kantri ol i kolim Kristen. Long sampela kantri planti tru ol i katim marit, inap olsem 50 pesen. “Nupela lo” bilong maritpasin ol i kirap long bihainim long 1960 samting i kamapim kaikai nogut. Wanpela nius (The New York Times bilong Jun 13, 1986) i stori long wanpela hevi dispela i kamapim. Nius i tok, ‘SIK AIDS BAI KILIM I DAI PLANTI MAN MOA.’ Nius i tok, kirap long nau na i go inap long yia 1991 sik AIDS bai kisim 100,000 man long hap bilong Amerika, na long olgeta yia ol i mas tromoi 16 bilion dola bilong baim ol dokta na marasin samting. Dispela sik i save kilim i dai man. Planti man i kisim dispela sik long rot bilong pasin sodom, o pasin bilong kisim drak, o long rot bilong blut ol i kisim long haus sik−em olgeta dispela pasin i kalapim lo bilong God.−1 Korin 6:9, 10; Galesia 5:19-21; Aposel 15:19, 20.
4 Long taim bilong Josua, Jehova i salim lain holi bilong Em i go mekim pait tru bambai Graun Bilong Promis i kamap klinpela. Tasol nau yumi gat pait bilong spirit. (2 Korin 10:3, 4) Yumi ol Witnes yumi no save mekim pait bilong rausim ol man i sakim tok bilong God. Jehova yet bai rausim ol long taim na long rot em yet i makim pinis. (Diuteronomi 32:41, 43) Yumi no save poroman wantaim ol man i sakim lo bilong God, tasol yumi save mekim pasin sori tru na autim gutpela tok bilong Kingdom long ol. (1 Korin 15:33) Yumi ken stadi wantaim ol na lainim ol long ol tok bilong God long Baibel, na yumi ken kirapim ol long ‘senisim tingting nogut bilong ol, na tanim bel, na bai God i rausim sin bilong ol.’−Aposel 3:19; Matyu 21:31, 32; Luk 5:27-32.
Rehap na Ol Wanhaus Bilong Em
5 Taim ol Isrel i no brukim yet Wara Jodan, Jehova i kirapim Josua long salim tupela man i go luk stil long Jeriko long kantri Kenan. Josua i tokim tupela: “Yutupela i go lukim gut biktaun Jeriko na ol graun klostu long en.” Bilong wanem ol i mas i go long Jeriko? Dispela taun em i namba wan taun long rot i go insait long kantri Kenan. Em i no bikpela taun tumas na lain bilong en ol i no inap sakim bikpela ami bilong Isrel. Tasol taim dispela tupela man bilong Isrel i go long dispela taun, nau i olsem ol Jeriko i gat rot bilong kamapim bel bilong ol−ol i laikim Jehova o nogat. “Orait tupela man [bilong lukstil] i go long Jeriko na i kamap long haus bilong wanpela pamukmeri, nem bilong em Rehap. Na tupela i stap long haus bilong en.” (Josua 2:1-7) Ating God yet i stiaim tupela i go long haus bilong Rehap, olsem ol ensel i save stiaim ol Witnes long nau i go long ol man i beten askim God long helpim ol bambai ol i ken save long Em! “[Jehova] i lukautim ol stretpela man, na em i save harim beten bilong ol.”−Sam 34:15; lukim tu 2 Kronikel 16:9.
6 Tasol bilong wanem dispela tupela man bilong lukstil i go insait long haus bilong wanpela meri pamuk? I no bilong mekim pasin pamuk. Nogat. Ating em bilong giamanim ol man bilong Kenan i lukim ol i go insait. Ol tok Rehap i mekim long tupela i kamapim long ples klia olsem em i no tingting long mekim pasin pamuk wantaim tupela. Em i save tupela i wokboi bilong Jehova, na em i tokim tupela em i laik tru long lotuim Jehova. Em i haitim tupela long rup bilong haus na em i no pret long ol man bai kilim em i dai long dispela. Em i kain olsem “ol sipsip” long tok piksa bilong Jisas, em ol i mekim gut long ol “brata” bilong em. (Matyu 25:31-46) Ol Witnes Bilong Jehova long nau ol i bihainim savepasin, tasol ol i no pret long i go lukim ol kain manmeri olsem, em ol i laik harim tok na ol i ‘laikim pasin bel isi,’ na lainim ol long ol tok bilong Baibel.−Luk 10:5-7.
7 Rehap i save long ol bikpela wok Jehova i bin mekim. Em i bilip na em i tokim dispela tupela man bilong lukstil: “Mi save Bikpela givim dispela kantri long han bilong yupela Isrel. Na mi tok stret long yutupela. Mipela olgeta i pret long yupela, na mipela i guria nogut tru.” Em i stori long ol tok em i bin harim long ol bikpela wok Jehova i bin mekim, na em i tok: “God [Jehova], Bikpela bilong yupela, em i God bilong heven na graun. Orait nau yutupela i mas promis long ai bilong Bikpela bai yutupela i lukautim gut famili bilong mi, olsem mi bin lukautim gut yutupela. Na yutupela mas givim mi wanpela mak bilong strongim promis bilong yutupela.” (Josua 2:9-13) Olsem Rehap, ol nupela man i kisim save long tok i tru bilong God long nau ol tu i no ken pret long strafe em bai painim ol man long “de bilong Jehova.” (Sefanaia 1:14-18, NW ) Ol i mas lusim ol pasin bilong dispela graun na tokim lain bilong Jehova long helpim ol bambai ol i ken save long rot bilong abrusim bagarap na i stap laip.−Sam 3:6-8; Provep 18:10.
8 Mak dispela tupela man bilong lukstil i givim long Rehap em wanpela “retpela string.” Ol i tokim Rehap em i mas pasim dispela retpela string long windo tupela i go daun long en. (Josua 2:17-21) Sapos Rehap i putim dispela mak, haus bilong em i no ken bagarap taim Jeriko i bagarap. Olsem tasol long nau, ol manmmeri i gat bilip wankain olsem Rehap ol i mas i gat mak, olsem ol i mas kamap man bilong lotuim Jehova na dediket long em na kisim baptais, bambai ol i no ken bagarap. Revelesen 7:9, 10, 14 i stori long ol dispela manmeri na i tok ol i ‘bikpela lain’ na “ol i bin wasim klos bilong ol long blut bilong Pikinini Sipsip, na klos i kamap waitpela.” Ol i bilip long blut bilong Jisas em i givim olsem ofa na ol i mekim ol wok bilong bilip. (Rom 10:9, 10) Long Jems 2:24, 25 Baibel i tok: “Orait nau yupela i save, long bilip nating tasol God i no save kolim man i stretpela man. Nogat. Em i ting long man i mekim gutpela pasin, na long dispela em i kolim em i stretpela man. Olsem tasol pamukmeri Rehap i lukautim ol man Josua i bin salim i kam na Rehap i salim ol i go bek long narapela rot. Olsem na God i kolim em stretpela meri.”
9 “Gutpela pasin” Rehap i mekim em olsem: Em i lukautim dispela tupela man i kam luk stil na em i bungim ol narapela man long haus bilong em bambai ol i no ken bagarap. Long wankain rot ol manmeri bilong ‘bikpela lain’ long nau ol i wok strong long helpim lain ‘gutpela wokboi,’ em dispela lain i givim kaikai bilong spirit “long taim bilong en” na ol i bosim wok bilong autim tok bilong Kingdom long olgeta hap bilong graun. (Matyu 24:45-47) Rehap i no pret long autim tok long lain bilong papa bilong em−maski bagarap inap painim em sapos wanpela i kamapim em long ol birua. (Skelim tok bilong Matyu 10:32-36.) Olsem tasol long nau, long planti kantri i gat birua i stap, tasol ol Witnes Bilong Jehova i no pret long autim tok. Long dispela rot planti man i kam bung na sampela famili olgeta ol i lusim Bikpela Babilon na kirap lotuim God tru, em Jehova.−Sam 73:28; 107:21, 22.
Jeriko—long Bipo na long Nau
10 Orait, nau yumi ken skelim gen ol dispela samting i bin kamap bipo na stori long narapela samting olsem piksa. “Ol Isrel i stap klostu pinis, olsem na ol Jeriko i pasim strong olgeta dua bilong banis bilong taun. Ol man i no inap i go i kam.” Jeriko em i namba wan taun bilong Kenan em Jehova i bagarapim. Em i olsem namba wan kaikai bilong gaden ol i givim olsem ofa long God. Olsem na Josua i tok: “Yumi mas bagarapim dispela taun na olgeta samting bilong en, olsem wanpela ofa yumi givim olgeta long Bikpela.”−Josua 6:1, 17; lukim tu Eksodas 22:29; Levitikas 27:26.
11 Jeriko bilong bipo i makim stret Bikpela Babilon long nau, em olgeta lotu giaman. Sin bilong en i olsem bikpela hip tru nau long dispela taim bilong kapsaitim blut bilong ol man! Em i laik pasim strong olgeta dua bilong en bambai ol Witnes Bilong Jehova i no ken i go insait. Olsem Rehap i tok, ol i “pret” long lain bilong God. Olsem: Wanpela nius bilong Itali (La Repubblica bilong Novemba 12, 1985) em i putim het-tok olsem: “MISIN I PRET LONG OL WITNES BILONG JEHOVA.” Nius i stori long wanpela bung wanpela bikpela bisop bilong Misin Katolik i kamapim long Bolona bilong “sakim” ol Witnes Bilong Jehova. Pop i salim telegram long dispela bung bilong strongim ol na helpim dispela wok ol i laik mekim. Long dispela bung ol i tok: ‘Ol Witnes i kamap planti tumas na ol i pulap pinis long olgeta hap bilong graun,’ na ol i tok, ‘misin i mas kirap mekim sampela samting’ bilong daunim dispela samting ‘i laik bagarapim em.’ Tasol yu ting ol inap mekim olsem?−Jeremaia 1:17-19.
12 Ol lotu bilong Bikpela Babilon i lotuim planti planti god. Ol lotu ol i kolim Kristen ol i lotuim God Triwan, na ol lotu haiden i lotuim planti milion god. Taim Moses i laik givim wok long Josua, pastaim Moses i tok: “Yupela ol Isrel, yupela harim! Jehova, God bilong yumi, em wanpela tasol em i God.” Long nau ol Witnes Bilong Jehova tasol i save lotuim dispela “wanpela God, em i Papa bilong yumi olgeta.” Ol tasol i litimapim nem bilong Em. (Diuteronomi 6:4, NW, Efesas 4:6) Jehova bai i pait bilong helpim yumi olsem em i bin mekim long taim bilong Josua na ol narapela gutpela hetman bilong Isrel.−2 Kronikel 20:15, 17; 32:7, 8; Aisaia 54:17.
Strafe Bilong God i Painim Ol
13 Josua i redi gut bilong mekim pait long Jeriko. Ol i katim skin bilong sem bilong ol man mama i karim ol long ples wesan o ples nating. Dispela i makim olsem ol i lusim olgeta samting em inap pasim ol long givim bel olgeta long Jehova. (Diuteronomi 10:16; 30:5, 6) Ol i kirap mekim gen Pasova. Ol i kirap kisim kaikai long ol gaden long Kenan na ol i no kisim moa dispela kaikai God i bin givim long ol, em mana. Na “kepten bilong ami bilong God,” em Jisas taim em i no kam daun yet long graun, em i kamap long Josua na em i strongim Josua. Na Josua i daun long em na bihainim tok bilong em. Ol dispela samting i olsem piksa na i makim ol samting i bin painim lain bilong Jehova long nau taim ol i givim bel long mekim wok Jehova i bin givim long ol. Yumi kisim gutpela kaikai moa bilong spirit, em i kain kain. Lain ‘gutpela wokboi’ i bihainim Krais Jisas na givim ol dispela kaikai bilong spirit long yumi.−Josua 5:1-15.
14 Orait, nau yumi ken skelim ol samting i bin kamap taim ol i mekim pait. Jehova i tokim ol long mekim ol narapela kain samting! Em i tok ol pris i mas karim bokis kontrak na wokabaut raunim dispela taun wanpela taim long wanpela de inap long 6-pela de. Sevenpela pris i mas i go pas long ol na winim biugel, na sampela soldia bilong Isrel i wokabaut i go pas na sampela i kam bihain. Tasol long de namba 7 ol i kirap long moningtaim tru taim “tulait i bruk,” na ol i wokabaut raunim taun 7-pela taim olgeta. Ating ol Jeriko i guria nogut tru!−Josua 6:2-15.
15 Dispela i olsem piksa na i makim stret wok ol Witnes Bilong Jehova i mekim long nau long olgeta hap bilong graun. Nau long dispela taim wok bilong yumi long autim tok bilong Kingdom i go bikpela tru. Insait long 5-pela yia namel long 1980 na 1985, lain painia i go bikpela tru (inap 134 pesen). Ol painia na ol narapela “soldia” bilong Kingdom ol i save kirap long “moningtaim tru” na ol i wok strong long autim tok long strafe bilong Jehova i laik painim ol man. Long ai bilong ol hetman bilong ol lotu ol i kolim Kristen, ol dispela Witnes i “planti tumas.” Ol Witnes i wok strong long autim tok na planti man i gat gutpela bel ol i lusim ol dispela lotu na ol i kirap lotuim Jehova. Ol pris pasto i lukim dispela samting na dispela i “givim bikpela pen” long ol.−Joel 2:1-3, 6, NW.
16 Nau Josua i tokim ol manmeri: “Singaut strong! [Jehova] i givim taun long yupela pinis!” Ol manmeri i singaut bikpela. Graun i guria na bikpela mirakel i kamap−ol banis bilong taun Jeriko i bruk! Ol Isrel i bihainim tok na ol i ran i go bagarapim dispela taun na olgeta samting i stap laip long en. Bihain ol i kukim taun long paia. Tasol lukim! Wanpela liklik hap bilong banis bilong taun i sanap i stap na long windo bilong en wanpela retpela string i stap. Josua i salim dispela tupela man i bin i go luk stil long dispela ples ol i go insait long haus bilong Rehap na bringim em wantaim ol famili bilong em i kam. Rehap i bilip na em wantaim ol famili bilong em ol i no bagarap. Na bihain Rehap i kisim narapela gutpela pe tu−em i maritim wanpela Isrel, nem bilong em Salmon, na em i kamap wanpela tumbuna bilong Krais Jisas.−Josua 6:16-26; Matyu 1:5.
17 “Bikpela i stap wantaim Josua, olsem na ol man long olgeta hap bilong dispela kantri ol i givim biknem long em.” Olsem tasol long nau, taim “bikpela hevi tru” i kirap na ol i tekewe olgeta bilas samting bilong Bikpela Babilon na bagarapim em, dispela bai givim biknem tru long Jehova.−Josua 6:27; Revelesen 17:16; 18:9, 10, 15-17; Matyu 24:21, 22.
Man i Lusim Jehova Em i Lus Olgeta
18 Long Jeriko ol Isrel i win tru, tasol bihain, taim Josua i salim sampela soldia i go pait long taun klostu, nem bilong en Eyai, ol Eyai i ranim ol i kam bek na kilim sampela i dai. Ol Isrel i kirap nogut! Ol “i pret na i no moa sanap strong.” Josua i bel hevi tru na em i beten na em i tok: “O God, Bikpela! . . . bai yu mekim wanem samting nau bilong litimapim gutpela nem bilong yu?”−Josua 7:2-9.
19 Nau Jehova i toksave long Josua olsem wanpela Isrel i bin “mekim bikpela rong.” Ekan bilong lain Juda em i dispela man. Taim ol Isrel i pait na kisim ol samting bilong Jeriko, em i stilim wanpela “naispela klos bilong ol Babilon,” na hap silva na gol. Jehova i “givim hevi” long Ekan−ol Isrel i tromoi ston long em wantaim olgeta famili bilong em na kilim ol i dai. Bihain ol i kukim ol long paia wantaim olgeta samting bilong ol. Ol i hipim planti ston antap long bodi bilong Ekan bambai ol man i no lusim tingting long dispela strafe bilong Jehova i bin painim ol. Ol i kolim dispela ples “Ples Daun Bilong Ako.” Insait bilong dispela nem i olsem “Ples Daun Bilong Rong.” Nau Jehova i tokim Josua gen: “Maski pret na maski surik!” Bihain long dispela taim Josua i winim olgeta pait na dispela samting i litimapim tru nem bilong Jehova.−Josua 7:10–8:1.
20 Olsem wanem? Rong bilong Ekan i makim sampela samting long nau? Tru tumas. Aposel Pol i toksave long sampela man olsem “weldok nogut tru” bai ol i bikhet long ol man God i givim wok bos long ol na bai ol i bihainim laik bilong ol yet. Kirap long yia 1919, sampela taim kain man olsem ol i bin kam namel long lain bilong God. Olsem: Long 1975 samting, sampela elda i gat nem, ol i no amamas. Ol i sem long i go long ol haus na autim tok bilong Kingdom olsem ol aposel bilong Jisas i bin mekim bipo. Ol i pilim olsem dispela i daunim nem bilong ol. (Aposel 5:42; 20:20, 21, 29, 30) Ol i ting i gutpela sapos ol i bihainim gen ol tok bilong Babilon. Long pasin hait ol i wok long bagarapim bilip bilong ol brata bambai ol i ting olsem yumi no stap long “las taim” na bai ol i no wok strong moa long autim tok. (2 Pita 3:3, 4) Bihain kongrigesen i rausim ol dispela man.−2 Jon 10, 11; lukim tu Filipai 1:15-17; Hibru 6:4-8.
21 Wastaua bilong Februeri 1980 (tok Inglis, Julai 15, 1979) i kolim klia ol tok bilong Baibel i makim olsem i stret yumi mas i go long haus bilong ol man na autim tok long ol. Orait, kirap long 1980 na i kam inap long nau ol gutpela Witnes i bin wok strong! Bipo ol dispela wan wan man i bikhet long Jehova ol i stap long lain bilong yumi na ating dispela samting i mekim na namel long 1975 na 1979 planti brata i no wok strong moa long autim tok na lain bilong yumi i no i go bikpela long dispela taim. Em i go bikpela inap 1 pesen tasol. Tasol insait long 5-pela yia i go pinis, long olgeta yia lain bilong yumi i go bikpela inap 6 pesen na long 1985 i gat 3,024,131 manmeri ol i autim tok bilong Kingdom. Long 1975 i gat 2,179,256 tasol ol i autim tok. Jehova i wok yet long “hariapim” wok bilong em!−Aisaia 54:2, 3; 60:22, NW.
22 Tru tumas, long olgeta hap bilong graun nem bilong Jehova i bin kamap nambawan tru! Tasol Jehova i “tokim” yumi long planti samting moa long hap bilong Josua long Baibel na nau yumi ken stori long ol dispela samting.−Aisaia 42:8, 9, NW.
Long Hap Bilong Josua long Baibel:—
◻ Wanem samting i olsem piksa bilong dispela graun long nau?
◻ Stori bilong Rehap i lainim yumi long wanem samting?
◻ I gat wanem stori i makim bikpela wok moa yumi mekim long nau?
◻ Jeriko i bagarap na dispela i makim wanem samting?
◻ Ol samting ol i mekim bilong stretim sin bilong Ekan i makim wanem samting?
2. Ol lotu bilong dispela graun i mekim wanem kain pasin?
3. Ol man bilong dispela graun i kalapim lo bilong God na wanem samting i kamap?
4. (a) Olsem wanem pait bilong yumi i narapela kain long pait ol Isrel long taim bilong Josua i mekim? (b) Yumi no save poroman wantaim ol man bilong dispela graun, tasol yumi save mekim wanem?
5, 6. (a) Dispela tupela man i go luk stil, bilong wanem ol i go long Jeriko na long haus bilong Rehap? (b) Long nau, planti taim Jehova i mekim wanem taim ol man i beten singaut long em bilong helpim ol long save long Em? (c) Rehap i mekim wanem na yumi save em i olsem ‘wanpela man i laikim pasin bel isi’?
7. (a) Rehap i mekim wanem na dispela i makim olsem em i bilip long Jehova? (b) Ol nupela man long nau i mas i gat wanem kain tingting? na ol i mas mekim wanem?
8. (a) Rehap i putim “retpela string” long windo na dispela i makim wanem samting long nau? (b) Rehap i mekim wanem na God i kolim em stretpela meri? Na wanem samting i kamap?
9. (a) Rehap i mekim wanem ol “gutpela pasin”? (b) Long nau yumi no pret long autim tok na wanem samting i bin kamap?
10. Ol i mas mekim wanem long Jeriko?
11. (a) Olsem wanem Jeriko bilong bipo i makim stret Bikpela Babilon long nau? (b) Kolim wanpela samting i mekim na Bikpela Babilon i “pret.”
12. (a) Bikpela Babilon i gat wanem tingting long “god” na i no stret wantaim tok i tru? (b) Bilong wanem Jehova bai pait bilong helpim ol witnes bilong em?
13. (a) Wanem ol samting i kamap pastaim na bihain ol i go pait long Jeriko? (b) Dispela i makim wanem samting long nau?
14. Taim ol i go kamap long Jeriko, Jehova i tokim ol long mekim wanem ol narapela kain samting?
15. Ol samting ol i mekim long Jeriko, olsem wanem dispela i kain olsem wok ol Witnes Bilong Jehova i mekim long nau?
16. (a) Wanem ol mirakel i kamap na ol i daunim Jeriko? (b) Rehap i bilip na em i kisim wanem ol gutpela pe?
17. Ol dispela mirakel Jehova i wokim i makim wanem samting bai kamap long nau?
18. (a) Bilong wanem ol Isrel i “pret”? (b) Josua i mekim wanem?
19, 20. (a) Jehova i mekim wanem bilong stretim sin bilong Ekan? Na em i tok wanem long Josua? (b) Dispela i makim wanem samting long nau?
21. (a) Ating wanem samting i mekim na namel long 1975 na 1979, planti brata i no wok strong moa long autim tok? (b) Ating wanem samting i “hariapim” dispela wok bihain long dispela taim?
22. Taim yumi skelim sampela stori moa i stap long hap bilong Josua long Baibel, yumi mas i gat wanem save long nem bilong Jehova?