Tok Bilong Jehova i Save Kamap tru
“Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.”—JOSUA 23:14.
1. Josua em i husat? Klostu long taim em i laik dai, em i mekim wanem?
EM I strongpela komanda bilong wanpela ami, em i man bilong bilip na em i stap gut long God. Em i bin wokabaut wantaim Moses, na Jehova i makim em long kisim lain Israel long ples drai nating na bringim ol i go long wanpela gutpela graun i gat planti gris. Klostu long taim em i laik dai, dispela man em ol narapela i rispektim em, em Josua, em i mekim laspela tok bilong em long ol hetman bilong lain Israel. Dispela tok i bin strongim bilip bilong ol man i harim. Em inap mekim wankain samting long yu tu.
2, 3. Taim Josua i mekim tok long ol hetman bilong lain Israel, ol Israel i stap olsem wanem? Josua i tok wanem?
2 Piksaim long tingting dispela samting Baibel i stori long en: “Planti yia i go pinis na Bikpela i givim gutpela taim long ol Israel. Na ol i no moa pait long ol birua i stap nabaut. Nau Josua i kamap lapun tru. Orait Josua i singautim olgeta Israel wantaim ol hetman na ol lida na ol bikman na ol ofisa bilong ol manmeri na em i tokim ol olsem, ‘Nau mi lapun pinis.’ ”—Josua 23:1, 2.
3 Josua i gat klostu 110 krismas, na insait long dispela haptaim em i bin stap, planti bikpela samting i bin painim ol manmeri bilong God. Em i bin lukim sampela strongpela wok bilong God, na em i bin lukim truim bilong planti tok promis bilong Jehova. Olsem na em inap long tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.”—Josua 23:14.
4. Jehova i givim wanem 3-pela tok promis long ol Israel?
4 Wanem ol tok bilong Jehova i bin kamap tru long taim bilong Josua? Bai yumi stori long 3-pela tok promis Jehova i bin givim long ol Israel. Namba wan, God bai kisim bek ol long wok kalabus. Namba 2, em bai lukautim ol. Namba 3, em bai helpim ol. Jehova i bin givim ol wankain tok promis long lain bilong em long nau, na wankain olsem Josua yumi bin lukim ol i kamap tru long taim bilong yumi. Paslain long yumi stori long ol samting Jehova i bin mekim long taim bilong yumi, yumi ken skelim ol samting em i bin mekim long taim bilong Josua.
Jehova i Kisim Bek Lain Bilong Em
5, 6. Jehova i mekim wanem bilong kisim bek ol Israel long Isip? Dispela i kamapim klia wanem samting?
5 Taim ol Israel i krai long God, long wanem, ol i wok kalabus long Isip, Jehova i harim krai bilong ol. (Kisim Bek 2:23-25) Long diwai i paia, Jehova i tokim Moses: “Mi kam daun bilong kisim bek ol [manmeri bilong mi] long han bilong ol Isip na bilong bringim ol i go long wanpela bikpela graun i gat planti gris.” (Kisim Bek 3:8) Man! Em gutpela samting tru long lukim Jehova i mekim dispela samting! Taim Fero, king bilong Isip, i no laik larim ol Israel i lusim Isip, Moses i tokim em God bai mekim wara bilong Nail i kamap blut. Tok bilong Jehova i kamap tru. Wara bilong Nail i kamap blut. Olgeta pis i dai, na ol manmeri i no inap dring dispela wara. (Kisim Bek 7:14-21) Fero i bikhet yet, na Jehova i kamapim 9-pela hevi moa. Paslain long ol wan wan hevi i kamap, Jehova i tokaut long samting em bai mekim. (Kisim Bek, sapta 8-12) Taim namba 10 hevi i kilim i dai olgeta namba wan pikinini bilong ol Isip, Fero i tokim ol Israel long lusim Isip na i go—na tru tumas, ol i mekim olsem!—Kisim Bek 12:29-32.
6 Dispela wok bilong kisim bek ol Israel i opim rot long Jehova i ken kisim ol olsem lain bilong em yet. Dispela i givim biknem long Jehova olsem Man i save truim ol tok promis bilong em. Na i kamapim klia olsem Jehova i stap nambawan tru na em i winim ol god bilong ol arapela lain. Taim yumi ritim stori bilong God i kisim bek ol, dispela i strongim bilip bilong yumi. Tingim sapos yumi bin stap na lukim dispela samting! Josua i luksave olsem Jehova em i “God Antap Tru” na i “bosim olgeta hap bilong graun.”—Song 83:18.
Jehova i Lukautim Lain Bilong Em
7. Jehova i mekim wanem bilong lukautim ol Israel na bai ami bilong Fero i no ken kisim ol?
7 Olsem wanem long namba 2 tok promis—Jehova bai lukautim lain bilong em? Dispela promis em i insait long promis Jehova i bin mekim long kisim bek ol Israel long Isip na bringim ol i go insait long Graun Bilong Promis. Tingim: Fero i bin belhat na em wantaim strongpela ami bilong em i gat planti handet karis ol i ranim ol Israel. Ating dispela man i gat pasin antap em i ting em inap tru long kisim ol Israel, na moa yet taim ol i stap namel long ol maunten na solwara na i luk olsem ol i no gat rot long ranawe! Orait nau God i kirap mekim wanpela wok bilong lukautim lain bilong em. Em i putim wanpela klaut i stap namel long ol Israel na ol Isip. Hap ol Isip i stap long en i kamap tudak, tasol hap bilong ol Israel i gat lait. Klaut i pasim ol Isip long ranim ol Israel. Moses i litimapim stik bilong em na solwara Retsi i bruk tupela hap na i gat rot bilong ol Israel i ranawe. Taim ol Isip i bihainim ol, wara i kam bek na i karamapim ol. Jehova i bagarapim bikpela lain ami bilong Fero, tasol Em i lukautim lain bilong Em na Fero i no daunim ol.—Kisim Bek 14:19-28.
8. Olsem wanem Jehova i lukautim ol Israel long (a) ples drai nating? (b) taim ol i go insait long Graun Bilong Promis?
8 Taim ol i brukim pinis solwara Retsi, ol Israel i raun long “bikpela ples wesan nating [i drai olgeta], we i gat olkain snek na binatang i gat marasin nogut.” (Lo 8:15) Jehova i lukautim ol manmeri bilong em long dispela hap tu. Na olsem wanem taim ol i laik go insait long Graun Bilong Promis? Ol strongpela ami bilong ol Kenan i birua long ol. Tasol Jehova i tokim Josua: “Yu wantaim olgeta manmeri bilong Israel, yupela i mas brukim wara Jordan na i go kamap long dispela graun mi laik givim long yupela. Josua, long taim yu stap laip, i no gat wanpela lain man inap winim yupela long pait. Mi bai i stap wantaim yu olsem mi bin i stap wantaim Moses. Mi no ken lusim tingting long yu.” (Josua 1:2, 5) Ol dispela tok bilong Jehova i no popaia. Insait long 6-pela yia tasol, Josua i daunim 31 king na kirap bosim ol bikpela hap bilong Graun Bilong Promis. (Josua 12:7-24) Dispela wok bilong kisim Graun Bilong Promis i no inap kamap sapos Jehova i no bin lukautim ol.
Jehova i Helpim Ol Manmeri Bilong Em
9, 10. Olsem wanem Jehova i helpim ol manmeri bilong em long ples drai nating?
9 Orait nau tingim namba 3 tok promis—Jehova bai helpim ol manmeri bilong em. Bihain liklik long God i kisim bek ol Israel long Isip, em i tok promis long ol: “Mi bai mekim bret i pundaun long skai na yupela i ken kisim. Na long olgeta de wan wan ol manmeri i mas i go kisim kaikai bilong dispela de.” Olsem God i tok pinis, em i givim dispela “bret” long ol. “Ol Israel i lukim dispela samting, na . . . ol i askim ol yet olsem, ‘Em i wanem samting?’ ” Dispela samting ol i lukim em mana, em i dispela bret Jehova i bin tok promis long givim long ol.—Kisim Bek 16:4, 13-15.
10 Inap 40 yia long ples drai nating, Jehova i lukautim ol Israel. Em i givim kaikai na wara long ol. Na tu, em i mekim na klos bilong ol i no bruk, na lek bilong ol i no solap. (Lo 8:3, 4) Josua i lukim olgeta dispela samting. Jehova i bin kisim bek ol, lukautim ol, na helpim ol, olsem em i bin tok promis long mekim.
Jehova i Kisim Bek Lain Bilong Em Long Nau
11. Wanem samting i bin kamap long Brooklyn, New York, long 1914? Taim bilong wanem samting i kamap?
11 Olsem wanem long taim bilong yumi? Long Fraide moningtaim, Oktoba 2, 1914, Charles Russell, em i go pas long lukautim wok bilong ol Sumatin Bilong Baibel long dispela taim, em i kam insait long rum kaikai long Betel long Brooklyn, New York. Em i amamas na tok: “Moning olgeta.” Paslain long em i sindaun, em i tokaut: “Taim bilong ol man bilong ol arapela lain i pinis; strong bilong ol king bilong ol tu i pinis.” Em nau, taim i kamap pinis long Jehova, King bilong heven na graun, long helpim gen lain bilong em. Na tru tumas, em i mekim olsem!
12. Wanem wok bilong kisim bek lain bilong Jehova i bin kamap long 1919? Dispela i opim rot bilong wanem samting?
12 Faipela yia tasol bihain, Jehova i kisim bek ol manmeri bilong em long ‘Bikpela Babilon,’ em olgeta lotu giaman. (KTH 18:2) I no planti bilong yumi i bin stap long dispela taim na lukim dispela samting. Tasol yumi lukim ol gutpela samting i bin kamap long dispela. Jehova i kamapim bek lotu i tru na bungim ol manmeri i laik lotu long em na mekim ol i kamap wanpela lain. Em i bin tok profet long dispela long maus bilong profet Aisaia: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en.”—Aisaia 2:2.
13. Yu bin lukim lain bilong Jehova i go bikpela olsem wanem?
13 Tok bilong Aisaia i kamap tru. Long 1919 lain remnan i kirap long autim tok long olgeta hap na dispela i litimapim lotu bilong trupela God. Long 1930 samting, ol samting i kamapim klia tru olsem God i wok long singautim “ol arapela sipsip” long kam lotuim em. (Jon 10:16) Pastaim ol i no planti tumas, sampela tausen tasol, tasol nau ol i planti moa, inap olsem sampela milion, na ol i sapotim lotu i tru! Long wanpela visen aposel Jon i kisim, em i lukim ol i “planti manmeri tru . . . na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” (KTH 7:9) Yu yet i bin lukim wanem samting? Namba wan taim yu kisim save long tok i tru, i gat hamas Witnes Bilong Jehova i stap? Long nau, ol man i lotu long Jehova ol i planti tru, winim 6,700,000. Taim Jehova i kisim bek lain bilong em long Bikpela Babilon, dispela i opim rot na nau yumi lukim planti manmeri tru long olgeta hap i lotuim Jehova.
14. Wanem wok bilong kisim bek ol man bai kamap bihain?
14 I gat narapela wok Jehova bai mekim bilong kisim bek lain bilong em—em wanpela wok olgeta manmeri long graun bai insait long en. Jehova bai kamapim strong bilong em na pinisim olgeta lain i birua long em, na em bai kisim bek ol manmeri bilong em na bringim ol i go insait long wanpela nupela taim i gat stretpela pasin tasol i stap long en. Bai yumi amamas tru long lukim pasin nogut i pinis na gutpela taim tru i kamap, winim olgeta taim bipo!—KTH 21:1-4.
Jehova i Lukautim Lain Bilong Em Long Taim Bilong Yumi
15. Wanem samting i bin mekim na Jehova i mas lukautim lain bilong em long nau?
15 Olsem yumi stori pinis, i gat wok long Jehova i lukautim ol Israel long taim bilong Josua. Yu ting lain bilong Jehova long nau i narapela kain? Nogat! Jisas i tokim ol disaipel bilong em: “Bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.” (Matyu 24:9) I kam inap long nau, ol man i bin birua na mekim nogut long ol Witnes Bilong Jehova long planti kantri. Tasol Jehova i bin sambai long ol manmeri bilong em. (Rom 8:31) Baibel i tok promis olsem i no gat wanpela samting—olsem ‘samting bilong pait’—inap pasim wok bilong yumi long autim tok bilong Kingdom na lainim ol man.—Aisaia 54:17.
16. Wanem samting yu bin lukim i soim olsem Jehova i save lukautim lain bilong em?
16 Maski ol man bilong dispela graun i birua long ol manmeri bilong Jehova, ol i bin wok long kamap planti. Lain Witnes Bilong Jehova i stap long 236 kantri—na dispela i kamapim klia olsem Jehova i lukautim yumi na ol man i no inap bagarapim yumi o pasim maus bilong yumi. Olsem wanem? Yu tingim nem bilong sampela strongpela hetman bilong politik o lotu em long taim bilong yu ol i bin birua nogut tru long lain bilong God? Wanem samting i bin kamap long ol? Ol i stap we long nau? Wankain olsem Fero long taim bilong Moses na Josua, planti ol i no stap moa. Na olsem wanem long ol wokboi bilong God long nau ol i stap gut long em na ol i dai pinis? Jehova i tingim yet ol. Tru tumas, tok promis bilong Jehova long lukautim lain bilong em i bin kamap tru.
Jehova i Helpim Lain Bilong Em Long Nau
17. Jehova i mekim wanem tok promis long ol kaikai bilong spirit?
17 Jehova i bin helpim lain bilong em long ples drai nating, na em i save helpim lain bilong em long nau tu. Long rot bilong “wokboi i gat gutpela tingting” yumi kisim kaikai bilong spirit i bilong helpim yumi long go klostu moa long God. (Matyu 24:45) Yumi kisim save long ol tok tru bilong God em inap planti handet yia ol i bin i stap hait. Wanpela ensel i tokim Daniel: “Larim dispela tok i stap hait na pasim strong buk, inap long taim bilong pinis. Planti manmeri bai i raun long olgeta hap, na stretpela save bai kamap planti.”—Daniel 12:4, NW.
18. Olsem wanem yumi ken tok olsem stretpela save i kamap planti long nau?
18 Long nau yumi stap long taim bilong pinis, na tru tumas, i gat planti stretpela save. Long olgeta hap bilong graun, holi spirit i bin helpim ol man i laikim tumas tok i tru long kisim stretpela save long God na long ol samting em i tingting pinis long mekim. Long nau i gat planti Baibel tru, na planti buk tu bilong helpim ol man long kliagut long ol tok i tru i stap long Baibel. Tingim ol tok i stap insait long buk Tru Tru Baibel i Tok Wanem?a Nem bilong sampela sapta i olsem: “God Em i Wanem Kain Man Tru?,” “Ol Man i Dai Pinis Ol i Stap We?,” “Kingdom Bilong God Em i Wanem Samting?,” na “Bilong Wanem God i Larim Pen na Hevi i Stap?” Inap planti tausen yia ol man i laik save long bekim bilong ol dispela askim. Nau yumi inap save long bekim bilong ol. Maski inap planti handet yia ol man i no gat save long Baibel na lotu Kristendom i lainim ol man long ol bilip giaman, Tok Bilong God i stap strong, na i save strongim olgeta man husat i gat laik long mekim wok bilong Jehova.
19. Yu bin lukim wanem ol tok promis i kamap tru? Dispela i givim wanem tingting long yu?
19 Tru tumas, long ol samting yumi yet i bin lukim, yumi inap tok: “Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” (Josua 23:14) Jehova i save mekim wok bilong kisim bek, lukautim, na helpim ol wokboi bilong em. Olsem wanem? Yu inap kolim sampela tok promis bilong God i no bin kamap tru long taim bilong en? Nogat, yu no inap. Olsem na yumi save bilip long Tok Bilong God.
20. Bilong wanem yumi ken wetim gutpela samting i kamap bihain?
20 Olsem wanem long bihain? Jehova i tok planti bilong yumi i ken wet long stap long graun i kamap gutpela ples Paradais. Wan wan tasol bilong yumi i wet long mekim wok king wantaim Krais long heven. Tasol maski yumi bai kisim laip long heven o long graun, yumi mas stap gut long God olsem Josua i bin mekim. Taim bai kamap na samting yumi wet long en bai kamap tru. Long dispela taim bai yumi tingting bek long ol tok promis Jehova i bin mekim, na yumi tu bai tok: “Olgeta samting em i bin promis long mekim, ol i kamap pinis.”
[Futnot]
a Ol Witnes Bilong Jehova i Wokim.
Yu Inap Stori Long Dispela?
• Josua i lukim truim bilong wanem ol tok promis bilong Jehova?
• Yu bin lukim wanem ol promis bilong God i kamap tru?
• Yumi ken bilip tru long wanem samting bilong tok bilong God?
[Piksa long pes 23]
Jehova i mekim samting bilong kisim bek ol manmeri bilong em
[Piksa long pes 23]
Jehova i bin mekim wanem bilong kisim bek ol manmeri bilong em long solwara Retsi?
[Piksa long pes 24]
Jehova i mekim wanem bilong helpim ol manmeri bilong em long ples drai nating?
[Ol Piksa long pes 25]
Jehova i save helpim ol manmeri bilong em long nau