Wok Strong Long Kaunim Buk Bilong God
“Sapos mi no inap i kam hariap, orait yu mas wok yet long ritim buk bilong God long ol manmeri na long autim as bilong tok long ol na long skulim ol gut long pasin God i laikim.”—1 TIMOTI 4:13.
GOD JEHOVA i bin inapim ol man long lain long wanpela gutpela samting tru—em pasin bilong rit rait. Na em i givim Baibel long yumi bambai em i ken skulim gut yumi. (Aisaia 30:20, 21) Yumi ken tok piksa olsem Baibel inap helpim yumi long “wokabaut” wantaim ol man i bin stap aninit long God long bipo, olsem Abraham na Aisak na Jekop. Na i olsem yumi inap “lukim” ol meri i bin bihainim stretpela pasin na i stap aninit long God, olsem Sara na Rebeka na gutpela meri Moap, em Rut. Na i olsem yumi inap “harim” Krais Jisas i mekim bikpela tok bilong em long maunten. Em nau, yumi inap kisim dispela bikpela amamas na gutpela skul long Baibel sapos yumi save gut long kaunim tok.
2 Yumi save, Krais Jisas, em man i nambawan olgeta, em i save gut tru long kaunim buk, na em i save moa yet long tok bilong Ol Skripsa Hibru. Olsem na taim Satan i traim em, planti taim em i tok: “Buk bilong God i gat tok olsem,” na nau em i kamapim sampela tok bilong Ol Skripsa Hibru. (Matyu 4:4, 7, 10) Wanpela taim long haus lotu bilong Nasaret, Jisas i kaunim wanpela hap tok profet bilong Aisaia long ol man na em i tokim ol, ol dispela tok i makim em yet. (Luk 4:16-21) Na olsem wanem long ol aposel bilong Jisas? Long ol hap bilong Baibel ol i bin raitim, planti taim ol i kamapim tok bilong Ol Skripsa Hibru. Tru, ol hetman bilong lain Juda i ting Pita na Jon em ol man nating i no save long rit rait, long wanem, ol i no bin skul long ol bikpela skul Hibru. Tasol ol pas bilong ol em spirit bilong God i bin stiaim ol long raitim, ol i kamapim klia olsem ol dispela aposel i save gut long rit rait. (Aposel 4:13) Tasol yu ting i bikpela samting long yumi gat save long kaunim tok?
“Man i Ritim Dispela Tok Long Ol Arapela, Em i Ken Amamas”
3 Sapos yumi kisim save long ol tok bilong Baibel na yumi bihainim, yumi inap kisim laip i stap oltaim. (Jon 17:3) Olsem na ol Witnes Bilong Jehova i save, em i bikpela samting tru long yumi mas kaunim na stadi long ol tok bilong Baibel Holi na ol buk na nius Kristen em God i givim long yumi long rot bilong lain wokboi i gat gutpela tingting, em ol Kristen God i bin makim long spirit holi. (Matyu 24:45-47) Long rot bilong sampela liklik buk samting em Sosaiti Was Taua i bin wokim (olsem buklet Lain Long Rit na Rait), planti ol i bin lain long kaunim tok na kisim ol save bilong Baibel em inap helpim man long kisim laip.
4 Taim yumi kaunim Tok Bilong God na bihainim, yumi save amamas. Em i olsem, long wanem, yumi mekim pasin God i laikim, na yumi givim biknem long God, na yumi kisim blesing long em, na bel bilong yumi i gutpela. Jehova i laik bai ol wokman bilong em i amamas. Olsem na em i tokim ol pris long kaunim Lo bilong em long ol Israel bilong bipo. (Lo 31:9-12) Esra em i man bilong raitim raitim ol tok bilong Lo, na taim em wantaim ol narapela i kaunim Lo long olgeta manmeri i bung long Jerusalem, ol i kamapim insait bilong ol dispela tok, olsem na olgeta manmeri “i amamas.” (Nehemia 8:6-8, 12) Bihain aposel Kristen, em Pol, em i tokim wanwok bilong em, Timoti: “Sapos mi no inap i kam hariap, orait yu mas wok yet long ritim buk bilong God long ol manmeri na long autim as bilong tok long ol na long skulim ol gut long pasin God i laikim.”—1 Timoti 4:13.
5 Taim yumi kaunim na bihainim Tok Bilong God, yumi save amamas. Dispela i kamap ples klia long Kamapim Tok Hait 1:3, em i tok: “Dispela tok em i tok profet i kam long God, na man i ritim dispela tok long ol arapela, em i ken amamas. Na ol manmeri i harim dispela tok na ol manmeri i bihainim dispela tok bilong God mi bin raitim, ol tu i ken amamas, long wanem, taim i laik kamap nau, na ol dispela samting God i tok pinis long mekim, em bai i mekim.” Yes, yumi mas kaunim long maus na harim ol tok profet bilong God i stap long Kamapim Tok Hait na ol narapela hap bilong Baibel. Man i amamas tru, em dispela man i save “laikim tumas lo bilong God, na em i save tingting long dispela lo [olsem kaunim] long san na long nait.” Wanem samting i kamap long dispela? “Olgeta samting em i mekim i save kamap gutpela.” (Song 1:1-3) Olsem na i gat gutpela as na oganaisesen bilong Jehova i laik kirapim yumi olgeta wan wan long kaunim na stadi long Baibel, olsem yumi yet i kaunim, na kaunim wantaim famili, na kaunim wantaim ol pren bilong yumi.
Wokim Tingting na Tingim Gut Long Bel
6 Taim yu kaunim Baibel na ol narapela buk na nius Kristen, yu ken mekim wanem na bai dispela i ken helpim yu gut? Yu ken bihainim pasin bilong Josua, em wanpela hetman bilong Israel long bipo, na em i save pret long God. God i bin tokim em: “Dispela buk bilong lo i no ken lusim maus bilong yu, na yu mas kaunim isi long san na long nait, bambai yu ken was gut na bihainim olgeta tok i stap long dispela lo; long wanem, sapos yu mekim olsem, olgeta samting yu mekim bai i kamap gutpela tasol, na bai yu bihainim gutpela tingting.” (Josua 1:8, NW) Taim yu “kaunim isi,” i olsem yu kaunim long yu yet na yu no kaunim strong. Dispela i helpim yumi long putim gut ol dispela tok long tingting bilong yumi. Josua i mas kaunim Lo bilong God “long san na long nait,” olsem long olgeta de. Sapos em i mekim olsem, ol wok bilong em bai i kamap gutpela, na em bai bihainim gutpela tingting taim em i mekim ol wok God i bin givim long em. Sapos yu kaunim Tok Bilong God long olgeta de, dispela bai helpim yu tu.
7 Taim yu kaunim Baibel, yu no ken ting yu mas kaunim hariap hariap. Sapos yu bin makim hap taim bilong kaunim Baibel o sampela buk o nius Kristen, gutpela yu kaunim isi isi na yu no ken hariap. Dispela em i bikpela samting taim yu stadi na yu laik putim gut ol bikpela tok long tingting bilong yu. Na taim yu kaunim, wokim strong tingting bilong yu. Skelim gut ol tok bilong dispela man i bin raitim. Askim skin bilong yu yet: ‘I gat wanem as na em i raitim dispela tok? Mi mas mekim wanem bilong bihainim ol dispela tok?’
8 Taim yu kaunim Baibel, lusim hap taim long tingim tingim ol dispela tok. Dispela bai helpim yu long putim gut ol tok na stori bilong Baibel long tingting, na bihainim ol lo i stap insait long ol dispela tok bilong Baibel. Taim yu tingim tingim Tok Bilong God, na ol bikpela tok i pas gut long tingting bilong yu, orait taim man i askim yu long sampela tok bilong Baibel, bai yu kamapim ol tok i stap pinis long bel bilong yu, na yu no mekim nating tasol na bihain yu bel hevi long sampela tok yu bin autim. Wanpela savetok bilong Baibel i tok: “Stretpela man i save tingting gut pastaim, na bihain em i bekim tok long arapela man.”—Sindaun 15:28.
Bungim Nupela Save Wantaim Save Yu Kisim Pinis
9 Planti Kristen inap tokaut olsem pastaim ol i no gat save long God, na long tok bilong em long Baibel, na long ol samting God i laik mekim. Tasol nau ol dispela wokman Kristen bilong God inap stori gut long ol tok bilong Baibel, kirap long taim God i bin wokim olgeta samting na bihain namba wan man na meri i bin mekim sin, na ol inap kamapim klia olsem i gat wanem as na Krais i givim skin bilong em yet olsem ofa, na ol inap tokim ol man long God bai pinisim dispela pasin nogut i stap long graun, na ol inap stori gut olsem ol man i bihainim tok bilong God ol bai kisim laip i stap oltaim long Paradais bai kamap long graun. Ol dispela wokman bilong Jehova inap kamapim ol dispela tok, long wanem, ol i bin stadi long Baibel na ol buk na nius Kristen na nau ol i “save gut long God.” (Sindaun 2:1-5) Ol nupela tok ol i lainim, isi isi ol i wok long bungim wantaim ol tok ol i lainim pinis, na ol i lukim olsem narapela tok i stret wantaim narapela tok.
10 Dispela pasin bilong bungim nupela tok wantaim ol tok yu lainim pinis long Baibel, dispela bai helpim yu na bai yu kisim gutpela samting long en. (Aisaia 48:17) Taim yu kaunim ol lo bilong Baibel, o tok bilong Baibel i gat wanpela lo i stap insait long en, o sampela tok yu no save gut long as bilong en, bungim ol dispela tok wantaim ol tok yu save pinis long en. Nau yu ken wok long tingting, olsem wanem dispela nupela save i stret wantaim “ol dispela gutpela tok” yu kisim save pinis long en. (2 Timoti 1:13) Wok long painim sampela tok inap helpim yu long i go klostu moa long God, na helpim yu long bihainim moa yet ol pasin Kristen, na helpim yu long autim tok i tru bilong Baibel long ol man.
11 Taim yu kaunim ol tok bilong Baibel long pasin yumi mas bihainim, wok long pilim sampela lo i stap insait long ol dispela tok. Tingim tingim dispela samting long bel, na nau tingim ol samting yu bai mekim sapos dispela samting i painim yu. Planti taim pikinini bilong Jekop, em Josep, em i sakim meri bilong Potifar na i no laik mekim pasin pamuk wantaim dispela meri. Josep i tokim em: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:7-9) Yu inap painim wanpela lo i stap insait long dispela stori—pasin pamuk em i wanpela rong long ai bilong God. Long tingting bilong yu, yu inap bungim dispela lo wantaim sampela tok moa bilong Baibel i stret wantaim dispela; olsem na taim sampela i laik pulim yu long mekim wanpela rong olsem, orait yu inap tingim dispela save yu kisim pinis na dispela bai helpim yu.—1 Korin 6:9-11.
Tingim Ol Tok Olsem Yu Lukim Tru
12 Bilong putim gut long tingting ol tok yu kaunim, yu mas tingim olsem yu lukim tru long ai bilong yu. Long tingting bilong yu, lukim dispela hap graun, na ol haus, na ol man. Harim nek bilong ol. Harim smel bilong bret ol i kukim long aven. Tingim olsem yu yet yu insait long ol samting i kamap. Sapos yu mekim olsem, ol dispela tok yu kaunim bai kirapim tru bel bilong yu, long wanem, i olsem yu lukim wanpela taun bilong bipo yet, o yu wokabaut i go antap long wanpela bikpela maunten, o yu kirap nogut long ol gutpela gutpela samting God i bin wokim, o yu bung wantaim ol man na meri i gat strongpela bilip.
13 Sapos yu wok long kaunim Hetman 7:19-22, yu ken mekim olsem: Long tingting bilong yu, lukim ol samting i kamap. Hetman Gideon wantaim 300 strongpela man Israel ol i sanap i stap long arere bilong kem bilong ol Midian. Em i olsem 10 klok nait, na “ol gat bilong ol Midian i senis pinis” na ol i sanap. Ol dispela birua bilong ol Israel i slip i stap na tudak i karamapim kem. Lukim! Gideon wantaim lain bilong em ol i holim biugel. Long han kais ol i holim ol bikpela sospen graun na insait long en i gat ol bombom i lait. Em nau, wantu tasol dispela 3-pela lain i gat wan handet wan handet man long en, olgeta wan wan i winim biugel, na brukim sospen, na holim bombom i go antap, na ol i singaut strong olsem: “Bainat bilong Bikpela na bilong Gideon.” Nau yu lukim dispela kem. Olaman! Ol Midian i kirap ranawe na ol i wok long singaut singaut! Dispela 3 handet man i wok yet long winim biugel, na God i kirapim ol Midian long pait namel long ol yet na narapela i kilim i dai narapela long bainat. Em nau, Jehova i helpim ol Israel long winim pait na rausim ol Midian.
Ol Bikpela Samting Yumi Lainim
14 Taim yumi kaunim Baibel, yumi inap lain long planti samting. Olsem: Ating yu laik skulim ol pikinini bilong yu long ol i mas mekim pasin daun. Orait, i no hatwok long ol i lukim long tingting na pilim as bilong tok profet bilong Jotam, em pikinini bilong Gideon. Kirap kaunim long Hetman 9:8. “Long wanpela de ol diwai i laik makim wanpela diwai namel long ol long kamap king bilong ol.” Orait diwai oliv, na diwai fik, na diwai wain, ol i no laik kamap king. Tasol liklik diwai nating i gat nil em i amamas long kamap king. Taim yu kaunim dispela stori long ol pikinini bilong yu, yu ken tokim ol olsem, ol dispela diwai oliv na diwai fik na diwai wain i gat bikpela wok bilong ol, ol i olsem piksa na i makim ol man i bin mekim gutpela wok na ol inap tru long i stap king na bosim ol wantok Israel, tasol ol i no wok long kisim dispela bikpela namba. Orait, dispela liklik diwai nating i gat nil em i gat wok olsem paiawut tasol, na em i makim wok king bilong hambakman Abimelek, em i wanpela kilman na em i laik bosim ol man, tasol bihain em i kisim bagarap, na dispela i truim tok profet bilong Jotam. (Hetman, sapta 9) Ating i no gat wanpela pikinini i laik go bikpela na kamap olsem wanpela liklik diwai nating i gat nil, a?
15 Pasin bilong i stap gut long narapela em i bikpela samting, na dispela i kamap ples klia long Buk Rut long Baibel. Orait, tingim olsem ol wan wan long famili bilong yu i senis senis long kaunim dispela stori long ol narapela, na ol i wok strong long kisim gut ol dispela tok. Yupela i lukim meri Moap, em Rut, em i wokabaut i go long Betlehem wantaim tambu bilong em, Naomi, em man bilong em i dai pinis, na yupela i harim Rut i tok: “God bilong yu bai i kamap God bilong mi.” (Rut 1:16) Rut em i meri bilong wok, na yupela i lukim em i wok long bungim het bali i pundaun taim ol man i katim rais bali long gaden bilong Boas na ol i lusim i stap. Yupela i harim Boas i mekim gutpela tok long em, olsem: “Olgeta manmeri long ples, ol i save olsem yu gutpela meri.” (Rut 3:11) Bihain liklik, Boas i maritim Rut, na em i karim wanpela pikinini man i olsem ‘bilong Naomi.’ Dispela i stret wantaim pasin bilong ol Israel taim man i maritim meri bilong brata bilong em i dai pinis. Rut i kamap tumbuna bilong Devit, na bihain Krais Jisas. Olsem na Rut i kisim “gutpela pe.” Na tu, taim yu kaunim dispela stori bilong Baibel bai yu lain long wanpela bikpela samting, olsem: Yu mas i stap gut long Jehova na bai em i mekim gut tru long yu.—Rut 2:12; 4:17-22; Sindaun 10:22; Matyu 1:1, 5, 6.
16 Stori bilong 3-pela Hibru, em Satrak na Mesak na Abetnego, em inap helpim yumi long i stap gut long God taim ol hevi na traim i painim yumi. Orait, long tingting bilong yu, lukim ol samting i kamap taim yupela i wok long kaunim Daniel sapta 3. Long wanpela ples stret ol i kolim Dura i gat wanpela traipela imis gol i go antap tru, na ol ofisa bilong Babilon ol i kam bung long dispela hap. Taim ol i harim krai bilong musik, kwiktaim ol i brukim skru na lotuim dispela imis em King Nebukatnesar i bin sanapim. Tasol Satrak na Mesak na Abetnego i no mekim olsem. Long pasin daun, tasol long pasin bilong strongpela bel, ol i tokim king long ol i no ken lotuim ol god bilong em na brukim skru long dispela imis gol. Orait, ol i tromoi 3-pela yangpela Hibru i go insait long paia ol i bin mekim i kamap hat nogut tru. Tasol wanem samting i kamap? King i lukluk insait long paia na em i lukim 4-pela man i stap, na wanpela i kain olsem “wanpela god.” (Daniel 3:25) Ol i kisim 3-pela Hibru i kam ausait, na Nebukatnesar i givim biknem long God bilong ol. Taim yu lukim dispela stori long tingting bilong yu, dispela i bin helpim yu tru, a? Na em i skulim yumi long wanpela bikpela samting, olsem: Taim hevi na traim i painim yumi, yumi mas i stap gut long Jehova!
Famili i Bung Wantaim na Kaunim Baibel
17 Sapos long olgeta taim famili bilong yu i bung wantaim na kaunim Baibel, dispela bai helpim gut yupela. Kirap long Buk Stat, long tingting bilong yu i olsem yu inap lukim God i wokim olgeta samting, na yu inap lukim dispela ples Paradais bilong pastaim tru, em God i bin putim namba wan man na meri long en. Na yu ken insait long ol samting i bin painim ol bilipman bilong bipo wantaim famili bilong ol, na bihainim ol Israel taim ol i brukim solwara Retsi na lek bilong ol i krungutim graun i drai. Yu inap lukim dispela manki bilong lukautim sipsip, em Devit, taim em i kilim i dai traipela man Filistia, nem bilong em Goliat. Famili bilong yu inap lukim ol i wokim haus bilong Jehova long Jerusalem, na lukim ol ami bilong Babilon i bagarapim, na yu inap lukim ol i wok aninit long Hetman Serubabel long sanapim gen haus bilong Jehova. Na yu wantaim ol wasman bilong sipsip i stap klostu long Betlehem, yupela inap harim ol ensel i tokaut olsem wanpela meri i karim pinis Jisas. Yu inap kisim save long ol samting i kamap taim Jisas i kisim baptais na taim em i mekim wok bilong autim tok, na yu inap lukim em i givim skin bilong em bilong graun olsem ofa bilong baim bek ol man, na yu ken amamas wantaim ol disaipel bilong em taim yupela i lukim em i kirap bek pinis. Orait, bihain long en yu inap raun wantaim aposel Pol na lukim ol kongrigesen Kristen i kamap taim lotu Kristen i wok long i go kamap long ol narapela narapela hap. Orait, long Buk Kamapim Tok Hait, famili bilong yu inap amamas long gutpela piksa aposel Jon i lukim long ol samting bai kamap bihain, em dispela Taim Bilong Wan Tausen Yia Bilong Krais i Stap King i insait long dispela piksa.
18 Sapos yu na famili bilong yu i bung wantaim na kaunim Baibel, yupela i mas kaunim gut na givim bel long kaunim. Taim yupela i kaunim sampela hap bilong Baibel, wanpela long famili—ating papa—i ken kaunim stori, na yupela ol narapela i ken kamap olsem ol man i stap insait long dispela stori, na taim yupela i kaunim tok bilong ol, kaunim gut olsem yupela i pilim tru ol dispela tok.
19 Taim famili i bung wantaim na kaunim Baibel, ating kaunim bilong yupela wan wan bai kamap gutpela. Na bai yupela i kisim planti save moa long God, na dispela bai helpim yupela long i go klostu moa long em. Asap i mekim song olsem: “Tasol mi, mi stap klostu long yu na dispela i gutpela tru. God, Bikpela, yu banis tru bilong mi, na mi laik tokaut long olgeta samting yu bin mekim.” (Song 73:28) Dispela bai helpim famili bilong yu long bihainim pasin bilong Moses, em i “mekim wankain pasin olsem man i bin lukim God, na em i stap strong tru.”—Hibru 11:27.
Kaunim Gut Tok na Wok Kristen
20 Yumi gat laik long lotuim God, na dispela i mas kirapim yumi long lain long kaunim gut tok. Pasin bilong kaunim gut tok em bai helpim yumi long autim tok bilong Baibel long ol man. Em i save helpim yumi tru long mekim wok bilong autim tok bilong Kingdom, em Jisas i bin tokim lain bilong em long mekim taim em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20; Aposel 1:8) Wok bilong autim tok em i nambawan bikpela wok bilong lain bilong Jehova, na pasin bilong kaunim gut tok em i save helpim yumi long mekim dispela wok.
21 Yumi mas wok strong bambai yumi ken kamap man bilong kaunim gut tok na man bilong skulim gut ol man long Baibel. (Efesus 6:17) Olsem na “yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God.” (2 Timoti 2:15) Wok strong long kaunim Baibel bambai yu ken kisim sampela save moa bilong tok i tru bilong Baibel na mekim gutpela wok olsem wanpela Witnes Bilong Jehova.
Wanem Ol Bekim Bilong Yu?
◻ Olsem wanem yumi mas kaunim Baibel na bai yumi ken amamas?
◻ Bilong wanem yumi mas tingim tingim long bel ol tok yumi kaunim long Baibel?
◻ Taim yumi kaunim Baibel, bilong wanem yumi mas bungim nupela save yumi kisim wantaim save yumi kisim pinis, na lukim long tingting ol samting i kamap long ol dispela stori?
◻ Taim yumi kaunim Baibel, dispela i skulim yumi long wanem ol samting?
◻ Bilong wanem i gutpela sapos famili i bung wantaim na kaunim Baibel? Na olsem wanem pasin bilong kaunim gut tok i bikpela samting long wok Kristen bilong autim tok?
[Askim Bilong Stadi]
1. Taim yumi kaunim Baibel, dispela inap helpim yumi olsem wanem?
2. Olsem wanem yumi save, Jisas wantaim ol aposel ol i save gut long kaunim tok?
3. Bilong wanem em i bikpela samting long yumi mas kaunim Baibel na ol buk na nius Kristen?
4. (a) Olsem wanem yumi save amamas taim yumi kaunim na stadi na bihainim Tok Bilong God? (b) Pol i tok wanem long Timoti long kaunim buk bilong God?
5. Olsem wanem Kamapim Tok Hait 1:3 i bungim amamas wantaim wok bilong kaunim buk bilong God?
6. God i tokim Josua long kaunim wanem samting? Dispela i bin helpim em olsem wanem?
7. Taim yumi kaunim Baibel, bilong wanem yumi no ken ting yumi mas kaunim hariap hariap?
8. Taim yumi kaunim Baibel, olsem wanem dispela bai helpim yumi sapos yumi tingim tingim long bel?
9, 10. Taim yu kaunim Baibel na yu bungim ol nupela save yu lainim long Baibel wantaim ol save yu kisim pinis, dispela inap helpim yu olsem wanem?
11. Taim yu kaunim sampela tok bilong Baibel long pasin yumi mas bihainim, yu ken mekim wanem na bai dispela tok inap helpim yu? Stori long dispela samting.
12. Taim yu kaunim ol stori bilong Baibel, bilong wanem yu mas tingim olsem yu lukim tru ol dispela samting?
13. Bai yu stori olsem wanem long ol tok i stap long Hetman 7:19-22?
14. Olsem wanem yu ken mekim wok long Hetman sapta 9 sapos yu laik skulim pikinini long em i mas mekim pasin daun?
15. Olsem wanem Buk Rut i kamapim klia olsem yumi mas i stap gut long narapela?
16. Wanem bikpela traim i painim 3-pela Hibru? Dispela stori inap helpim yumi olsem wanem?
17. Mekim sotpela tok long ol samting famili bilong yu inap lainim bilong helpim ol sapos ol i kaunim Baibel wantaim.
18, 19. Taim famili i kaunim Baibel, ol i ken mekim wanem bilong helpim ol?
20, 21. Olsem wanem pasin bilong kaunim gut tok i bikpela samting long wok bilong yumi long autim tok?
[Ol Piksa long pes 13]
Taim yu wantaim famili i kaunim Baibel, lukim long tingting ol samting i kamap na tingim gut long bel ol bikpela samting ol dispela stori i makim