Samson i Win Long Strong Bilong Jehova!
OL BIRUA i kalabusim em na kamautim tupela ai bilong em na ol i givim strongpela wok kalabus long em. Orait nau ol i kisim em i go ausait long haus kalabus na i go insait long wanpela haus lotu haiden na bai ol manmeri i ken lap long em. Ol i subim em long wokabaut long ai bilong planti tausen manmeri na ol i tok bilas na lap nogut long em. Dispela kalabusman em i no wanpela raskol o kepten bilong wanpela ami i birua long ol, nogat. Em i man bilong lotuim Jehova na em i bin mekim wok hetman long Israel inap 20 yia.
Samson em i strongpela man tru, winim olgeta man long graun, olsem na yumi laik save, olsem wanem na nau em i stap nogut olsem? Ating bikpela strong bilong em bai helpim em long abrusim bagarap? Wanem as bilong dispela bikpela strong bilong Samson? Yumi inap kisim wanem save long stori bilong em?
Em Bai Go Pas Long “Kisim Bek Ol Israel”
Planti taim ol Israel i bin lusim lotu i tru. Olsem na taim ol i “mekim sin gen long ai bilong Bikpela . . . em i larim ol Filistia i bosim ol inap long 40 yia olgeta.”—Hetman 13:1.
Stori bilong Samson i kirap taim ensel bilong Jehova i kamap long meri bilong wanpela man Israel, Manoa. Dispela meri i no inap karim pikinini. Ensel i toksave long em olsem em bai karim pikinini man. Ensel i tokim em: “Yu no ken katim gras bilong en. Taim em i stap yet long bel bilong yu, God bai i makim em olsem wokman bilong em yet. . . . Na bai em i stat long kisim bek ol Israel long han bilong ol Filistia.” (Hetman 13:2-5) Taim Samson i no kamap yet long bel bilong mama, Jehova i tingting pinis olsem Samson bai holim wanpela wok stret. Taim mama i karim em, em i mas kamap man God i bin makim bilong mekim wanpela wok holi bilong Em yet.
“Mi Laikim Dispela Meri”
Samson i wok long go bikpela, na Jehova “i mekim gut long em.” (Hetman 13:24) Wanpela taim Samson i kam tokim papamama: “Mi lukim wanpela yangpela meri bilong ol Filistia long Timna. Mi laik yu kisim em i kam na bai mi maritim em.” (Hetman 14:2) Ating tupela i kirap nogut long dispela tok! Pikinini bilong ol i gat wok long kisim bek ol Israel long han bilong ol lain i mekim nogut long ol, tasol nau em i laik maritim wanpela pikinini meri bilong ol. Lo Bilong God i tambuim pasin bilong maritim ol meri bilong ol lain i lotuim ol god haiden. (Kisim Bek 34:11-16) Olsem na papamama i tokim em: “Olsem wanem? I no gat wanpela yangpela meri namel long ol lain bilong yu, o namel long ol manmeri bilong yumi, a? Bilong wanem yu laik kisim wanpela meri bilong ol Filistia, em ol dispela lain i no save katim skin bilong ol?” Tasol Samson i strong na em i tok: “Yupela i mas kisim dispela meri bilong mi, long wanem, long ai bilong mi dispela meri i gutpela tru long mi.”—Hetman 14:3; NW.
Olsem wanem na dispela meri i “gutpela tru” long Samson? Olsem buk McClintock and Strong’s Cyclopedia i tok, dispela i no makim olsem em i gat “naispela skin, na gutpela pasin,” nogat. Em i gutpela long ai bilong Samson, long wanem, “em i gutpela bilong inapim wanpela wok Samson i tingting pinis long mekim.” Em wanem wok? Hetman 14:4 i tok, Samson “i painim rot bilong pait long ol Filistia.” Samson i tingim dispela samting na em i laik kisim dispela meri. Taim Samson i wok long kamap bikpela man, “spirit bilong Bikpela i stat long kirapim tingting bilong Samson.” (Hetman 13:25) Olsem na spirit bilong Jehova yet i mekim na Samson i askim papamama long kisim wanpela meri bilong em, na spirit bilong Jehova i stiaim em na em i mekim wok hetman long Israel inap planti yia. Olsem wanem? Samson i painim pinis rot bilong mekim olsem em i laikim? Orait pastaim yumi ken stori long olsem wanem Jehova i toksave olsem em bai sambai long Samson.
Samson i wokabaut i go long taun bilong dispela meri em i laik maritim, em taun Timna. Baibel i tok: “Samson i kamap long ol gaden wain bilong Timna, na wanpela yangpela laion i kam singaut na i laik kaikaim em. Tasol spirit bilong God i givim strong long em na em i holim laion na brukim laion long han tasol.” Samson i kamapim dispela bikpela strong bilong em taim em wanpela tasol i stap. I no gat sampela man i lukim. Olsem wanem? Ating dispela em i rot bilong Jehova long toksave long Samson olsem Em yet i bin makim Samson bilong mekim wok bilong em, olsem na em inap tru long mekim wok God i bin givim long em? Baibel i no tok, tasol yumi ken ting Samson i save olsem dispela narapela kain strong i no strong bilong em yet. Em i mas i kam long God. Em nau, Samson inap bilip na wetim Jehova i helpim em long wok em i mas mekim. Samting Samson i bin mekim long laion i strongim em, na em “i go toktok wantaim dispela yangpela meri. Na em i laikim em tru [“gutpela tru long ai bilong em,” NW ].”—Hetman 14:5-7.
Bihain Samson i go bek bilong kisim dispela meri, na long rot em i “lukim laion bipo em i bin kilim, na i lukim bikpela lain binatang i putim hani i stap insait long bodi bilong laion.” Samson i tingim dispela samting na long bung bilong marit bilong em, em i mekim wanpela tok bokis long 30 poroman bilong em bilong lain Filistia, olsem: “Samting bilong kaikai i kamap long wanpela samting i save kaikai. Switpela samting i kamap long wanpela samting i gat strong.” Sapos ol i kisim save long as bilong tok bokis, Samson bai givim 30 gutpela laplap na 30 gutpela klos long ol. Sapos nogat, orait ol yet i mas givim ol dispela samting long em. Inap 3-pela de ol dispela Filistia i tingting planti tru long dispela tok bokis. Long de namba 4 ol i tok strong long meri olsem: “Yu grisim man bilong yu bai em i tokim mipela long as bilong dispela tok bokis. Sapos nogat, bai mipela i kukim yu wantaim ol lain bilong yu long paia.” Em pasin nogut tru ol i laik mekim! Sapos ol Filistia i mekim olsem long ol lain bilong ol yet, ating ol i mekim nogut moa yet long lain Israel husat i stap aninit long ol!—Hetman 14:8-15.
Meri i pret nogut tru na em i strong long Samson i kamapim as bilong tok bokis long em. Orait Samson i mekim olsem na kwiktaim meri i go tokim ol dispela poroman bilong Samson, na dispela i kamapim klia olsem em i no laikim tru Samson na bel tru long em. Ol dispela man i kamapim stret as bilong tok bokis na Samson i save pinis long olsem wanem ol inap mekim olsem. Em i tokim ol: “Yupela i kisim bulmakau meri bilong mi bilong wokim gaden bilong yupela. Sapos nogat, yupela i no inap painimaut long as bilong tok bokis bilong mi.” Orait nau rot i op long Samson i ken mekim samting em i bin wet long mekim. “Spirit bilong Bikpela i givim strong long Samson na em i go daun long taun Askelon. Em i kilim 30 man bilong taun na i kisim ol samting bilong ol. Na em i kisim 30 gutpela klos bilong ol na givim long ol man i bin autim as bilong tok bokis bilong en.”—Hetman 14:18, 19.
Olsem wanem? Samson i laik bekim nogut long ol na em i mekim dispela samting long Askelon? Nogat. Em wok God yet i mekim long rot bilong man em i bin makim bilong kisim bek ol Israel. Long rot bilong Samson, Jehova i kirapim pait long ol lain i mekim nogut tru long ol manmeri bilong em. Dispela pait i mas i go yet. Narapela rot i op taim Samson i go lukim meri bilong em.
Em Wanpela i Mekim Pait
Taim Samson i kam bek long Timna, em i lukim olsem papa bilong meri i bin givim em long narapela man, long wanem, em i ting Samson i bel nogut long meri. I luk olsem Samson i kros long dispela. Em i go holimpasim 300 weldok na em i pasim tel bilong tupela tupela na bihain em i pasim wan wan bombom long tupela tupela tel. Em i laitim ol bombom na lusim ol na ol i ran i go insait long ol gaden wit na gaden wain na ol diwai oliv, na olgeta samting i paia. Em nau, 3-pela bikpela kaikai ol Filistia i save kisim long gaden insait long yia i bagarap olgeta. Ol i bel nogut tru na ol i kirap mekim pasin i nogut tru. Ol i ting em asua bilong meri bilong Samson na papa bilong en, na ol i kukim tupela long paia. Em nau, pasin nogut ol i mekim i opim rot long Samson long mekim samting em i tingting pinis long mekim. Em i kirap mekim pait na i kilim i dai planti man.—Hetman 15:1-8.
Yu ting ol Israel i luksave olsem God Jehova i mekim gut long Samson na ol i kirap helpim Samson long rausim ol Filistia na ol i no ken bosim ol moa? Nogat. Ol man Juda i laik abrusim hevi bilong dispela na ol i salim 3,000 man i go holimpas dispela lida God i bin makim na ol i putim em long han bilong ol birua. Tasol dispela pasin ol Israel i mekim i givim rot long Samson long bagarapim sampela birua moa. Taim ol i laik givim em long ol Filistia, “spirit bilong God i givim Samson bikpela strong na ol dispela nupela baklain i pasim em, em Samson i brukim olsem tret nating.” Orait nau em i kisim bun bilong wasket bilong wanpela donki na em i kilim i dai wan tausen birua long en.—Hetman 15:10-15.
Samson i singaut long Jehova na em i tok: “Yu bin helpim mi, wokman bilong yu, na mi winim dispela pait. Tasol olsem wanem, bai yu lusim mi nau? Mi no gat wara na nogut bai mi dai na ol dispela haiden man i kisim mi.” Jehova i harim beten bilong Samson. “God i brukim wanpela hul long Lehi na wara i kamap. Orait Samson i dringim dispela wara na em i kisim strong gen.”—Hetman 15:18, 19.
Samson i gat wanpela tingting tasol, em bilong mekim pait long ol Filistia. As na em i go stap long haus bilong wanpela pamukmeri long Gasa em bilong givim rot long em long mekim pait long ol birua bilong God. Em i mas painim ples slip insait long taun bilong ol birua, na em inap painim long haus bilong wanpela pamukmeri. Samson i no gat tingting long mekim pasin pamuk, nogat. Em i lusim haus bilong meri long biknait na em i holimpas tupela bikpela dua bilong taun wantaim tupela pos bilong en, na em i karim i go antap long wanpela maunten klostu long Hebron, em i longwe inap 60 kilomita. God i orait long dispela samting na em i givim strong long Samson long mekim olsem.—Hetman 16:1-3.
Holi spirit i mekim narakain wok tru long Samson, long wanem, em i gat wanpela wok i narapela kain. Ol wokman bilong God long nau ol tu inap bilip olsem God bai givim dispela spirit long ol bilong strongim ol. Jisas i bin tokim lain bilong em olsem Jehova bai “givim Holi Spirit long ol man i askim em.”—Luk 11:13.
Bilong Wanem Jehova i ‘Lusim Samson’?
Orait bihain Samson i laikim tru wanpela meri nem bilong em Delaila. I gat 5-pela king bilong ol Filistia ol i laik tru long bagarapim Samson, na ol i askim Delaila long helpim ol. Ol i tokim em: “Yu mas grisim Samson na painimaut wanem samting i givim bikpela strong long em, na olsem wanem yumi inap winim em.” Bilong grisim meri, 5-pela king wan wan i tok long givim “1,100 mani silva” long em.—Hetman 16:4, 5.
Dispela 5,500 mani silva ol i tok long givim long meri em i bikpela mani tru. Abraham i bin tromoi mani olsem 50 kilo silva (400 mani silva) bilong baim graun bilong planim meri bilong em, na ol man i save baim wanpela wokboi nating long 300 kina (30 mani silva) tasol. (Stat 23:14-20; Kisim Bek 21:32) Ol dispela king bilong Filistia i grisim Delaila long bikpela mani, long wanem, ol i save em i laikim tumas mani, tasol ol i no tokim em olsem em i wanlain bilong ol na long dispela as em i mas helpim ol. Olsem na ating Delaila em i wanpela meri Israel. Tasol maski em i husat, em i kisim dispela grismani.
Taim Delaila i askim Samson long strong bilong em, 3-pela taim Samson i giamanim em, na 3-pela taim Delaila i laik putim em long han bilong ol birua. Tasol “long olgeta de meri i toktok planti na i wok long askim em. Olsem na Samson i les nogut tru long dispela tok.” Bihain Samson i kamapim as tru bilong strong bilong em—i no gat wanpela taim ol i bin katim gras bilong em. Sapos ol i katim, bai strong bilong em i pinis na em bai kamap wankain olsem ol narapela man.—Hetman 16:6-17.
Em nau, dispela samting i pundaunim Samson. Delaila i wokim rot bilong em i ken katim gras bilong Samson. Tru, strong bilong em i no stap tru long gras bilong em. Tasol gras bilong em i makim olsem em i man God i bin makim bilong mekim wok bilong em. Taim Samson i opim rot long ol i ken katim gras bilong em na nogutim dispela tambu i stap long em olsem man God i bin makim bilong em yet, em nau, Jehova ‘i lusim em.’ Orait nau ol Filistia i holimpasim em na kamautim tupela ai bilong em, na putim em long kalabus.—Hetman 16:18-21.
Dispela inap skulim yumi long wanpela bikpela samting! Yumi mas tingim pasin bilong yumi long pas gut wantaim Jehova em i wanpela gutpela samting tru. Yumi dediket pinis long God olsem Kristen na sapos yumi mekim wanpela samting i no stret long dispela, olsem wanem yumi ken ting God bai wok yet long mekim gut long yumi?
‘Mi Ken i Dai Wantaim Ol Filistia’
Ol Filistia i amamas nogut tru na ol i tok tenkyu long god bilong ol Dagon long ol i bin daunim Samson. Bilong makim dispela samting, ol i kisim em i go long bikpela haus lotu bilong Dagon. Tasol Samson i save long as tru na em i lus long pait. Em i save long as na Jehova i bin lusim em, na em i bel hevi stret long em i bin pundaun, na em i tanim bel. Taim Samson i stap long haus kalabus, gras bilong em i wok long go longpela gen. Orait nau em i stap long ai bilong planti tausen Filistia, so em bai mekim wanem?
Samson i beten long Jehova: “God, Bikpela, yu ken tingim mi nau. God, givim mi strong long dispela wanpela taim moa. Olsem na bai mi ken bekim long ol Filistia long ol i bin kamautim tupela ai bilong mi.” Orait nau em i holimpas tupela pos i stap namel na i save strongim haus. “Long olgeta strong bilong en em i subim dispela tupela pos.” Orait wanem samting i kamap? “Haus i bruk na i pundaun antap long ol king wantaim ol arapela manmeri i stap insait. Namba bilong ol man Samson i kilim i dai long taim em yet i dai, em i winim namba bilong ol man em i bin kilim long taim em i stap yet.”—Hetman 16:22-30.
Samson i gat bikpela strong tru, winim olgeta narapela man. Em i bin mekim ol strongpela wok tru i gat nem. Tasol bikpela samting moa, em Baibel i bungim nem bilong Samson wantaim ol man i gat strongpela bilip.—Hibru 11:32-34.
[Piksa long pes 26]
Wanem as bilong strong bilong Samson?