Askim

Olsem wanem Samson i ken holim bodi bilong ol man em i bin kilim ol i dai na em inap i stap yet olsem Promisman?

Long Israel bilong bipo, long laik bilong man yet em i ken mekim strongpela promis long givim em yet long God na i stap olsem wanpela Promisman inap long wanpela haptaim.a I gat sampela tambu i stap long man i mekim dispela promis, olsem: “Olgeta taim em i givim em yet long mi, em i no ken i go klostu long bodi bilong man o meri i dai pinis, maski em i papa o mama o brata o susa bilong en. Nogut em i kamap doti long ai bilong mi.” Olsem wanem sapos “wantu tasol wanpela man i dai klostu long em” na em i popaia na holim bodi bilong dispela man? Dispela bai i nogutim promis bilong em. Olsem na Baibel i tok: “Em i no ken tingim dispela hap taim bilong pastaim.” Em i mas mekim gen ol samting bilong kamap klin na kirapim gen dispela taim bilong givim em yet long God.​—Namba 6:​6-12.

Tasol Samson em i narapela kain. Taim mama i no karim em yet, ensel bilong Jehova i tokim mama bilong em: “Bai yu gat bel na bai yu karim wanpela pikinini man. Na yu no ken katim gras bilong en. Taim em i stap yet long bel bilong yu, God bai i makim em olsem wokman bilong em yet. Na taim yu karim em pinis, em i no ken dring wain na ol bia na em i no ken kaikai samting God i tambuim ol man long kaikai. Na bai em i stat long kisim bek ol Israel long han bilong ol Filistia.” (Hetman 13:5) Samson i no bin mekim strongpela promis bilong Promisman, long wanem, God yet i bin makim em, na em i mas i stap olsem inap long taim em i dai. Dispela lo, olsem i tambu long holim bodi bilong man i dai pinis, Samson i no gat wok long bihainim. Sapos em i mas bihainim na em i popaia na holim bodi bilong man i dai pinis, em i no inap kirap nupela gen long givim em yet long God, long wanem, em samting i bin kirap taim mama i karim em na i mas i stap inap long taim em i dai. Olsem na yumi ken ting ol lo i stap long ol man i stap Promisman long laip olgeta bilong ol i narapela kain long lo i stap long ol man i kamap Promisman long laik bilong ol yet.

Yumi ken tingim lo Jehova i givim long 3-pela man em i bin makim ol long i stap Promisman long laip olgeta bilong ol​—Samson, Samuel, na Jon Bilong Baptais​—em Baibel i stori long ol. Olsem yumi lukim pinis, God i tok Samson i no ken katim gras bilong het bilong em. Na taim Samuel i no kamap yet long bel, mama bilong em Hana i bin mekim strongpela tok promis long Jehova olsem: “Bai mi givim em long yu na bai em i ken i stap wokman bilong yu inap em i dai. Na bilong makim dispela, ol i no ken katim gras bilong en.” (1 Samuel 1:11) Na ensel bilong Jehova i bin tok long Jon Bilong Baptais olsem: “Em bai i no ken dring wain na bia samting.” (Luk 1:15) Na tu, “Jon i save putim klos ol i wokim long gras bilong kamel, na em i save pasim let long bel bilong en. Na em i save kaikai ol grasopa wantaim hani bilong bus.” (Matyu 3:4) Jehova i no bin tokim dispela 3-pela man olsem ol i no ken holim bodi bilong man i dai pinis.

Maski Samson em i wanpela Promisman, em i wanpela bilong ol hetman Jehova i bin makim bilong kisim bek ol Israel long han bilong ol man bilong pait na stil. (Hetman 2:16) Na taim Samson i mekim dispela wok, em i bin holim bodi bilong planti man i dai pinis. Wanpela taim Samson i bin kilim i dai 30 man Filistia na rausim ol klos bilong ol. Bihain em i go pait na mekim save tru long ol birua na “kilim planti man i dai.” Na em i kisim wanpela bun bilong wasket bilong wanpela donki i dai nupela na em i kilim i dai wan tausen man long en. (Hetman 14:19; 15:​8, 15) Jehova i orait long Samson i mekim ol dispela samting na em i helpim Samson long mekim. Baibel i tok long Samson olsem em i man i gat strongpela bilip.​—Hibru 11:32; 12:1.

Dispela tok long Samson i bin holim wanpela laion na long han tasol em i brukim i go tupela hap “olsem man i brukim wanpela pikinini meme,” dispela i makim olsem long taim bilong Samson ol man i save brukim ol pikinini meme olsem?

I no gat wanpela samting i makim olsem long taim ol Hetman i bosim Israel ol man i save brukim ol pikinini meme i go tupela hap. Hetman 14:6 i tok: “Spirit bilong God i givim strong long [Samson] na em i holim laion na brukim laion long han tasol, olsem man i brukim wanpela pikinini meme.” Ating dispela hap tok i olsem tok piksa tasol.

Dispela tok olsem em i “brukim laion long han tasol,” ating i gat tupela mining bilong en. Yumi ken ting Samson i bin brukim wasket bilong laion o em i brukim bodi bilong laion i go tupela hap. Sapos namba wan mining i stret, orait i no hatwok long man i mekim olsem long pikinini meme. Sapos olsem, dispela tok piksa i makim olsem Samson i no gat hatwok long kilim wanpela laion, wankain olsem em i no gat hatwok long kilim wanpela pikinini meme. Tasol olsem wanem sapos Samson i bin brukim laion long han tasol i go tupela hap? Yumi ken ting dispela tok em i olsem tok piksa tasol. Bikpela samting bilong dispela tok piksa i olsem, spirit bilong Jehova i bin strongim Samson long mekim wanpela wok em i mas i gat bikpela strong tru long mekim. Dispela tok long laion na pikinini meme long Hetman 14:6 i soim yumi olsem Jehova i helpim Samson, olsem na long Samson dispela strongpela laion i no samting bilong pret long en, wankain olsem ol man i no save pret long wanpela pikinini meme.

[Futnot]