Samting Bilong Helpim Ol Man i Hangre!
YU INAP askim olsem, ‘Hangre long wanem samting?’ Hangre long kisim ol kaikai bilong spirit! Wanpela profet Hibru bilong bipo i tok profet long dispela hangre: “God, Bikpela i tok moa olsem, ‘Bihain bai mi mekim bikpela hangre i kamap long kantri bilong yupela. Na bai olgeta manmeri i hangre tru, tasol bai ol i no hangre bilong kaikai. Na bai nek bilong ol i drai, tasol bai ol i no laik dring wara. Long wanem, dispela hangre i no bilong kaikai na wara. Ol bai i hangre tumas long harim tok bilong mi tasol.’ ” (Amos 8:11) Bilong helpim ol man i hangre long kisim ol kaikai bilong spirit, 48 memba bilong klas namba 112 bilong Wastaua Baibel Skul Bilong Gileat, long Patterson, New York, ol bai go long 19 narapela narapela kantri i stap long 5-pela bikpela hap graun na ol ailan bilong solwara.
Taim ol i go, ol bai i no kisim abus na wit samting i go wantaim ol, nogat; ol bai kisim save na skul ol i bin kisim. Inap 5-pela mun ol i bin stadi gut long Baibel bilong strongim bilip bilong ol na bai ol inap mekim wok misineri long ol narapela kantri. Long Mas 9, 2002, inap 5,554 manmeri ol i amamas long harim program bilong gretiuesen.
Stephen Lett, em i wanpela memba bilong Gavening Bodi Bilong Ol Witnes Bilong Jehova, em i kirapim program wantaim amamas. Em i tok welkam long planti man i kam long narapela narapela hap bilong graun. Em i kamapim tok bilong Jisas, “Yupela i olsem lait bilong graun” na em i tok dispela i makim wok ol sumatin bai mekim bihain olsem ol misineri. (Matyu 5:14) Em i tok: ‘Long ol ples yupela bai wok long en, yupela bai kamapim klia ol gutpela wok bilong Jehova, na helpim ol man i gat gutpela bel long save long ol gutpela pasin bilong Jehova na ol samting em i tingting pinis long mekim.’ Brata Lett i strongim ol misineri long mekim wok long lait i kam long Baibel bilong kamapim klia olsem ol bilip giaman i samting bilong tudak, na tu, bilong stiaim ol man i painim tok i tru.
Stretpela Tingting i Mekim Wok i Ken Kamap Gutpela
Bihain long tok bilong siaman, Baltasar Perla, em memba bilong Komiti Bilong Brens Bilong Yunaitet Stets, em i mekim namba wan tok bilong ol tok i helpim ol sumatin i winim skul long mekim gut wok misineri. Em i toktok long “Strongim Bel na Sanap Strong na Mekim Wok.” (1 Stori 28:20) King Solomon bilong Israel i kisim wanpela wok i hatwok tru long mekim, em samting em i no bin mekim bipo—sanapim tempel long Jerusalem. Solomon i mekim wok, na Jehova i helpim em na Solomon i pinisim wok. Brata Perla i stori long olsem wanem dispela tok i stret long ol sumatin. Em i tok: ‘Yupela i bin kisim nupela wok, em wok misineri, na yupela i mas strongim bel na sanap strong.’ Brata i tok Jehova bai i no inap givim baksait long ol o lusim ol, sapos ol i stap klostu long em. Dispela tok i mekim gut bel bilong ol sumatin. Odiens i pilim tru tok Brata Perla i mekim long pinis bilong tok, em i stori long ol samting long i stap bilong em yet: ‘Yupela inap mekim planti gutpela samting olsem ol misineri. Mi na famili bilong mi i bin kisim tok i tru long rot bilong ol misineri!’
Nem bilong tok bilong narapela memba bilong Gavening Bodi, Samuel Herd, em “Wetim Jehova i Mekim Wok i Kamap Gutpela.” Ol sumatin i laik kirap mekim wok misineri na wok bilong ol bai kamap gutpela sapos ol i pas gut wantaim Jehova. Brata Herd i tokim ol: ‘Yupela i bin kisim bikpela save long Baibel taim yupela i stadi long Skul Gileat. Yupela i bin amamas long kisim dispela save. Tasol nau yupela i mas kirap givim ol samting yupela i bin lainim na bai wok bilong yupela i ken kamap gutpela.’ (Aposel 20:35) Ol misineri bai i gat planti rot long mekim olsem taim ol i ‘givim ol yet’ bilong helpim ol man.—Filipai 2:17.
Ol tisa bai givim wanem gutpela tok bilong helpim ol sumatin? Rut 3:18 i as bilong tok bilong Mark Noumair, nem bilong tok em “Stap Isi i Go Inap Long Taim Ol i Stretim Ol Samting.” Em i stori long Naomi na Rut. Em i kirapim ol sumatin i winim skul long bilip tru long pasin bilong oganaisesen bilong God long graun long stretim ol wok samting, na long rispek long ol brata God i givim namba long ol bilong bosim ol samting. Brata Noumair i mekim tok ol sumatin i pilim tru long bel: ‘Ating sampela taim bai yupela i no save long as na ol i pasim tok long wanpela samting em dispela samting i mekim sampela samting long i stap bilong yupela, o yupela i strong long ol i mas mekim sampela samting long narapela kain pasin. Bai yupela i mekim wanem? Bai yupela yet i kirap na stretim ol samting o bai yupela i “stap isi,” na bilip long God bai stiaim ol samting na kamapim ol gutpela samting long bihain.’ (Rom 8:28) Gutpela tok long ‘tingim wok bilong Kingdom, na putim tingting i go long ol samting oganaisesen bilong Jehova i mekim na no ken tingim ol samting wan wan man i mekim,’ ating dispela tok bai helpim tru ol misineri taim ol i wok long ol narapela kantri.
Wallace Liverance, em yet i bin mekim wok misineri na nau em i wanpela tisa bilong Skul Gileat, em i mekim laspela tok bilong dispela hap bilong program. Nem bilong tok em “Bosim Tingting, Mekim Wok Bilong God.” Em i soim olsem taim profet Daniel i lukim Babilon i pundaun na em i tingim tok profet bilong Jeremaia, dispela i bin helpim em long save olsem klostu nau lain Israel bai lusim kalabus. (Jeremaia 25:11; Daniel 9:2) Daniel i save olsem Jehova i gat taim bilong mekim ol samting, na dispela i bin helpim em long putim tingting i go long ol samting God i tingting pinis long mekim. Tasol long taim bilong profet Hagai ol Israel i tok: ‘Taim i no kamap yet.’ (Hagai 1:2) Ol i no tingim taim ol i stap long en, ol i tingting long kisim ol gutpela samting bilong skin na inapim laik bilong ol yet. Ol i bin lusim kalabus bilong ol i ken wokim gen tempel, tasol ol i lusim dispela wok. Brata Liverance i tok: “Olsem na oltaim putim tingting i go long ol samting Jehova i tingting pinis long mekim.”
Tisa bilong Skul Gileat, Lawrence Bowen, i lukautim wanpela hap bilong program, as tok bilong en “Jehova i Blesim Ol Man i Mekim Wok Long Baibel.” (Hibru 4:12) Dispela hap i kamapim ol ekspiriens ol sumatin i bin kisim long wok autim tok, na i kamapim klia pasin bilong Jehova long blesim ol man i mekim wok long Baibel taim ol i autim tok na skulim ol man. Brata Bowen i tok, Jisas Krais i stap olsem gutpela piksa bilong olgeta wokman bilong God i ken bihainim. Em i tok: ‘Jisas inap tok tru olsem ol samting em i skulim ol man long en i no tok bilong em yet, nogat; em i kamapim Tok Bilong God.’ Ol man i gat gutpela bel ol i bin luksave long tok i tru na ol i kirap bihainim. (Jon 7:16, 17) Wankain samting i save kamap long nau tu.
Skul Gileat i Redim Man Long Mekim Gutpela Wok
Bihain, Richard Abrahamson na Patrick LaFranca, em ol brata i stap longtaim pinis long Betel, ol i toktok wantaim 6-pela em ol i bin winim Skul Gileat na nau ol i mekim narapela narapela wok bilong God fultaim. Ol sumatin bilong klas namba 112 ol i amamas long harim olsem dispela 6-pela misineri i mekim yet wok long save ol i bin kisim long Skul Gileat bilong mekim ol Baibel-stadi, na stadi bilong ol yet, na bilong stap gut wantaim ol narapela. Ol i bin mekim olsem inap planti yia pinis, maski ol i mekim wanem kain wok.
Theodore Jaracz, em wanpela memba bilong Gavening Bodi, em i mekim bikpela tok bilong program. Nem bilong en “Ol Samting i Kamap Long Pasin Bilong Sanap Strong Taim Satan i Birua.” Insait long 5-pela mun i go pinis, ol sumatin i bin stap long ples i gat gutpela pasin tiokratik long en. Tasol olsem ol i bin lainim long skul, yumi stap long graun i gat ol birua long en. Long olgeta hap ol i birua long lain bilong Jehova. (Matyu 24:9) Brata Jaracz i kamapim sampela stori bilong Baibel na em i soim olsem ‘Satan i strong tru long birua long yumi. Yumi mas pas gut moa wantaim Jehova na strongim yumi yet long karim hevi bilong ol traim.’ (Jop 1:8; Daniel 6:4; Jon 15:20; KTH 12:12, 17) Brata Jaracz i tok, maski ol i birua yet long lain bilong God, ‘i no gat wanpela samting bilong pait inap bagarapim yumi, olsem Aisaia 54:17 i tok. Jehova bai kisim bek yumi long taim na long rot em yet i makim.’
Ol sumatin bilong klas namba 112 bilong Skul Gileat ol i ‘redi long mekim wok,’ na ol bai helpim tru ol man i hangre long kaikai bilong spirit long ol dispela kantri ol bai go long en. (2 Timoti 3:16, 17) Yumi wet long kisim ol ripot i stori long olsem wanem ol i autim gutpela tok long ol manmeri long ol dispela kantri.
[Blok long pes 23]
OL SAMTING BILONG OL SUMATIN
Hamas kantri ol i kam long en: 6
Hamas kantri ol bai go long en: 19
Hamas sumatin: 48
Krismas bilong ol, averes: 33.2
Hamas yia long tok i tru, averes: 15.7
Hamas yia long wok painia, averes: 12.2
[Piksa long pes 24]
Klas Namba 112 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.