Wok Yet Long Mekim Gutpela Pasin Laikim Long Narapela Narapela

1-2. I gat wanem ol gutpela risen na yumi mas mekim gutpela pasin laikim long narapela narapela?

I GAT ol gutpela risen long yumi mekim gutpela pasin laikim long narapela narapela. Wanem sampela bilong ol dispela risen? Lukim hau ol tok long Buk Provep i bekim dispela askim: “No ken larim gutpela pasin laikim na pasin i tru i lusim yu. . . . Sapos yu mekim olsem, orait long ai bilong God na ol man, yu bai stap olsem man ol i laikim na olsem man i gat gutpela tingting.” “Man i gat gutpela pasin laikim dispela i save helpim em yet.” “Man i wok strong long bihainim stretpela pasin na gutpela pasin laikim, . . . em bai kisim laip.”—Prov. 3:3, 4; 11:17, ftn.; 21:21.

² Ol dispela tok long Buk Provep i kamapim 3-pela risen long as na yumi mas mekim gutpela pasin laikim. Namba 1, taim yumi mekim gutpela pasin laikim, dispela i mekim na yumi dia tumas long ai bilong God. Namba 2, taim yumi mekim gutpela pasin laikim, dispela i helpim yumi yet. Olsem, yumi strongim pasin pren namel long yumi yet na ol narapela. Namba 3, taim yumi mekim gutpela pasin laikim, dispela bai opim rot long yumi inap kisim ol blesing long bihain, na tu, bai yumi kisim laip oltaim. Tru tumas, yumi gat ol gutpela risen long bihainim tok bilong Jehova olsem: “Yupela i mas mekim gutpela pasin laikim na marimari long narapela narapela.”—Sek. 7:9.

 3. Bai yumi skelim wanem ol askim long dispela atikol?

³ Long dispela atikol, yumi bai kisim bekim bilong dispela 4-pela askim. Yumi mas mekim gutpela pasin laikim long husat? Yumi kisim wanem skul long Buk Rut long pasin bilong mekim gutpela pasin laikim? Olsem wanem yumi ken mekim gutpela pasin laikim long nau? Wanem gutpela samting inap kamap taim yumi mekim gutpela pasin laikim?

 4. Hau yumi ken bihainim pasin bilong Jehova long mekim gutpela pasin laikim? (Mak 10:29, 30)

⁴ Long atikol i kamap paslain, yumi bin lainim olsem Jehova i save mekim gutpela pasin laikim—em i save laikim na tingim ol—long ol lain em ol i laikim em na lotuim em. (Dan. 9:4) Yumi laik ‘bihainim pasin bilong God, em i laikim yumi tumas na yumi stap olsem ol pikinini bilong em.’ (Efe. 5:1) Olsem na yumi laik mekim gutpela pasin laikim, olsem laikim na tingim tru ol bratasista bilong yumi.—Ritim Mak 10:29, 30.

5-6. Dispela tok pasin bilong stap gut long narapela o long wanpela samting inap makim wanem samting?

⁵ Yu bai wanbel olsem taim yumi kliagut long gutpela pasin laikim i makim wanem samting, yumi bai save long hau yumi inap mekim dispela pasin long ol wanbilip bilong yumi. Bilong yumi ken kliagut moa long gutpela pasin laikim i makim wanem samting, yumi ken skelim dispela pasin wantaim pasin bilong stap gut long narapela o long wanpela samting, em tok we planti man i save yusim. Skelim wanpela eksampel.

⁶ Long nau, sapos wanpela man o meri i wok long wanpela kampani inap planti yia, yumi inap tingim em olsem em i stap gut long wok bilong em long kampani. Maski i olsem, long olgeta yia em i mekim wok bilong kampani, ating em i no bin bungim yet ol papa bilong kampani. Na ating i no olgeta taim em i save wanbel long ol lo bilong kampani. Em i no laikim dispela kampani, tasol em i amamas bikos em i kisim pe. Em bai wok yet long dispela kampani i go inap em i ritaia, tasol ating em bai lusim wok sapos em i kisim nupela wok long narapela hap.

7-8. (a) Wanem samting i save kirapim wanpela long mekim gutpela pasin laikim? (b) Bilong wanem yumi bai skelim sampela tok bilong Buk Rut?

⁷ Olsem yumi lainim long paragraf 6, pasin bilong stap gut long narapela o long wanpela samting, dispela i no wankain long gutpela pasin laikim. Em i no wankain bikos long risen na man i mekim dispela pasin. Long taim bilong ol man i raitim Baibel, wai na ol wokman bilong God i mekim gutpela pasin laikim? Ol man i mekim gutpela pasin laikim bikos bel i kirapim ol long mekim na i no bikos ol i mas mekim dispela pasin. Tingim eksampel bilong Devit. Bel bilong em i kirapim em long mekim gutpela pasin laikim long gutpela pren bilong em Jonatan, maski papa bilong Jonatan i laik kilim em i dai. Inap planti yia bihain long Jonatan i dai, Devit i wok yet long mekim gutpela pasin laikim long pikinini man bilong Jonatan, em Mefiboset.—1 Sml. 20:9, 14, 15; 2 Sml. 4:4; 8:15; 9:1, 6, 7.

⁸ Yumi ken lainim planti samting long gutpela pasin laikim taim yumi skelim sampela tok bilong Buk Rut long Baibel. Yumi inap lainim wanem samting long gutpela pasin laikim bilong ol manmeri em dispela buk i stori long ol? Hau yumi ken bihainim ol skul yumi kisim insait long kongrigesen bilong yumi?b

 9. Wai na Naomi i ting olsem Jehova i birua long em?

⁹ Long Buk Rut, yumi ritim stori bilong Naomi, tambu pikinini meri bilong em Rut, na Boas em man i save pret long God, na em i wanblut bilong man bilong Naomi. Bikpela hangre i kamap long Israel, olsem na Naomi, man bilong em, na tupela pikinini man bilong em ol i muv i go stap long Moap. Taim ol i stap long dispela hap, man bilong Naomi i dai. Tupela pikinini man bilong em i marit, tasol sori tru ol tu i dai. (Rut 1:3-5; 2:1) Ol dispela hevi i mekim Naomi i bel hevi tru. Em i bel hevi tru na em i ting olsem Jehova i birua long em. Lukim hau em i kamapim bel hevi bilong em long God, em i tok: “Jehova i bin mekim nogut long mi.” “God i Gat Olgeta Strong i larim planti pen na hevi i painim mi.” Na em i tok tu olsem: “Jehova i birua long mi na God i Gat Olgeta Strong i mekim ol hevi i kamap long mi.”—Rut 1:13, 20, 21.

10. Jehova i mekim wanem taim Naomi i autim ol bel hevi bilong em?

¹⁰ Jehova i mekim wanem taim Naomi i autim ol bel hevi bilong em? Em i no lusim gutpela wokmeri bilong em husat i bel hevi tru, nogat. Em i pilim tru hevi bilong em. Jehova i save olsem “pasin bilong daunim man inap kirapim saveman long mekim olkain longlong pasin.” (Ekl. 7:7) Tasol Naomi i nidim helpim bilong save olsem Jehova i stap bilong helpim em. God i mekim wanem samting bilong helpim em? (1 Sml. 2:8) Em i kirapim Rut long helpim Naomi na mekim gutpela pasin laikim long em. Long pasin isi, Rut i redi long helpim tambu mama bilong em long strongim bel na helpim em long save olsem Jehova i laikim em. Yumi kisim wanem skul long eksampel bilong Rut?

11. Wai na ol bratasista i gat gutpela bel i redi long helpim ol narapela em ol i bel hevi?

¹¹ Gutpela pasin laikim i kirapim yumi long helpim ol lain i bel hevi. Wankain olsem Rut i stap gut long Naomi, long nau pasin laikim i kirapim ol bratasista i gat gutpela bel long redi long pas gut wantaim ol narapela long kongrigesen em ol i tingting planti o bel hevi. Ol i laikim ol bratasista bilong ol, na ol i amamas long mekim olgeta samting ol inap mekim bilong helpim ol. (Prov. 12:25, ftn.; 24:10) Dispela i stret long samting Pol i kirapim yumi long mekim, em i tok: “Mekim gut bel bilong ol man i bel hevi, na helpim ol man i no gat strong, na yupela i mas kamapim pasin bilong i no les kwik long olgeta man.”—1 Tes. 5:14.

12. Wanem wanpela gutpela rot tru bilong helpim wanpela brata o sista husat i bel hevi?

¹² Planti taim, gutpela rot tru yu ken bihainim bilong helpim wanpela brata o sista husat i bel hevi em taim yu putim gut yau long em na tokim em olsem yu laikim em. Jehova i luksave long gutpela pasin yu mekim bilong helpim wanpela sipsip bilong em husat i dia tumas long em. (Sng. 41:1) Provep 19:17 i tok: “Man i mekim gutpela pasin long ol taranguman, em i larim Jehova i dinau long em, na em bai bekim gutpela pe long samting dispela man i mekim.”

13. (a) Olsem wanem Rut na Orpa i no wankain? (b) Wai na disisen bilong Rut i soim olsem em i gat gutpela pasin laikim? (Lukim fran pes piksa.)

¹³ Yumi kisim sampela save moa long gutpela pasin laikim taim yumi skelim samting i kamap bihain long man bilong Naomi na tupela pikinini man bilong em i dai. Taim Naomi i harim olsem “Jehova i mekim gut gen long ol manmeri bilong em na ol i gat kaikai,” em i tingting long i go bek long ples bilong em. (Rut 1:6) Tupela tambu pikinini meri bilong em i go wantaim em. Tasol namel long rot, 3-pela taim Naomi i kirapim tupela long go bek long Moap. Wanem samting i kamap? Baibel i tok: “Orpa i givim kis long tambu mama bilong em na em i go bek. Tasol Rut i no laik lusim em.” (Rut 1:7-14) Taim Orpa i mekim disisen long go bek long ples bilong em, em i bihainim tok bilong Naomi, na em i mekim samting i stret. Tasol Rut i no laik go bek. Em tu i stap fri long go bek, tasol em i mekim gutpela pasin laikim long tambu mama bilong em, olsem na em i tingting long stap bek na helpim dispela wanpis meri. (Rut 1:16, 17) Rut i pas gut wantaim Naomi, i no bikos em i mas mekim olsem, nogat, em i mekim olsem bikos em i gat laik long mekim olsem. Disisen bilong Rut i soim olsem em i gat gutpela pasin laikim tru. Dispela stori i lainim yumi long wanem samting?

14. (a) Long nau ol bratasista i ken mekim wanem samting? (b) Olsem Hibru 13:16 i kamapim, God i amamas long wanem ol samting em ol bratasista i mekim?

¹⁴ Gutpela pasin laikim i kirapim yumi long mekim sampela samting moa. Long nau, wankain olsem long bipo, planti bratasista bilong yumi i mekim gutpela pasin laikim long ol wanbilip bilong ol—ol i mekim olsem tu long ol wanbilip em ol i no save gut long ol. Olsem, taim ol i kisim save olsem wanpela disasta i kamap, hariap tru ol i laik save long wanem rot ol i ken givim helpim. Taim wanpela long kongrigesen i sot long ol samting em i nidim, ol i save redi long helpim em na givim ol samting em i nidim. Olsem ol Masedonia long taim bilong ol aposel, long nau ol bratasista i save redi long mekim ol samting bilong helpim ol narapela em ol i sot long ol samting. Ol i daunim laik bilong ol yet na givim ol samting i “bikpela moa winim ol samting ol inap givim” bilong helpim ol bratasista bilong ol em ol i sot tru long ol samting. (2 Kor. 8:3) Jehova i amamas tru taim em i lukim ol i mekim dispela gutpela pasin laikim!—Ritim Hibru 13:16.

15-16. Olsem wanem Rut i soim olsem em i strong yet long helpim Naomi?

¹⁵ Yumi inap lainim planti samting long hau Rut i helpim Naomi. Yumi ken skelim sampela.

¹⁶ Strong yet long helpim na no ken les kwik. Taim Rut i askim tambu mama bilong em olsem em i laik i go wantaim em long Juda, pastaim Naomi i tok nogat. Tasol Rut i no givap. Wanem samting i kamap? “Naomi i lukim olsem Rut i strong yet long i go wantaim em, olsem na em i no pasim em moa.”—Rut 1:15-18.

17. Wanem samting bai helpim yumi na yumi no givap hariap?

¹⁷ Samting yumi ken mekim: Yumi no ken les kwik long helpim ol lain em ol i bel hevi, na yumi no ken givap long helpim ol. Wanpela sista husat i nidim helpim, ating pastaim em bai no laik kisim helpim long yumi.c Maski i olsem, gutpela pasin laikim bai kirapim yumi long strong yet long helpim em. (Gal. 6:2) Na yumi hop olsem isi isi em bai orait long yumi stap olsem pren bilong em na larim yumi helpim em na mekim gut bel bilong em.

18. Wanem samting i mekim Rut i bel hevi tru?

¹⁸ No ken bel hevi. Taim Naomi na Rut i kamap long Betlehem, Naomi i bungim ol neiba bilong em long pastaim. Em i tok: “Mi bin i gat planti samting taim mi lusim dispela ples, tasol nau taim mi kam bek, Jehova i mekim na mi no gat wanpela samting.” (Rut 1:21) Tingim hau Rut i pilim taim em i harim ol dispela tok Naomi i mekim! Rut i traim bes bilong em long helpim Naomi. Rut i krai wantaim em, mekim gut bel bilong em, na wokabaut wantaim em inap planti de. Maski em i mekim olgeta dispela samting, Naomi i tok: “Taim mi kam bek, Jehova i mekim na mi no gat wanpela samting.” Taim Naomi i mekim ol dispela tok, em i no tingim helpim Rut i givim em, em meri husat i sanap i stap klostu long em. Ating Rut i bel hevi tru taim em i harim ol dispela tok! Maski i olsem, em i pas gut yet wantaim Naomi.

19. Wanem samting bai helpim yumi long pas gut wantaim wanpela husat i bel hevi?

¹⁹ Samting yumi ken mekim: Long nau, wanpela sista husat i bel hevi, ating pastaim em inap mekim ol tok i bagarapim bel bilong yumi—maski yumi mekim olgeta samting bilong helpim em. Tasol yumi no laik bel hevi long ol tok bilong em, nogat. Yumi laik pas gut wantaim sista bilong yumi husat i nidim helpim na yumi laik askim Jehova long helpim yumi long painim rot bilong mekim isi bel bilong em.—Prov. 17:17.

20. Wanem samting i givim strong long Rut long wok yet long helpim Naomi?

²⁰ Mekim ol tok bilong strongim man long taim stret. Rut i mekim gutpela pasin laikim long Naomi, tasol nau Rut yet i nidim ol tok bilong strongim em. Na Jehova i kirapim Boas long strongim em. Boas i tokim Rut olsem: “Yu bin kam long Jehova, God bilong Israel, bai yu ken hait aninit long wing bilong em. Na mi laik bai Jehova i bekim bek ol samting yu bin mekim na em i ken givim gutpela pe long yu.” Dispela ol gutpela tok i strongim tru bel bilong Rut. Na Rut i bekim tok long Boas olsem: “Yu bin mekim tok isi long mi, na dispela i strongim bel bilong mi.” (Rut 2:12, 13) Ol dispela tok em Boas i mekim long taim stret i givim strong long Rut long wok yet long helpim Naomi.

21. Olsem Aisaia 31:1, 2 i kamapim, ol gutpela elda i ken mekim wanem?

²¹ Samting yumi ken mekim: Ol bratasista em ol i save mekim gutpela pasin laikim long ol narapela, sampela taim ol yet i nidim ol tok bilong strongim ol. Wankain olsem Boas i mekim ol tok bilong strongim Rut olsem ol narapela i luksave long ol gutpela pasin bilong em, ol gutpela elda long nau i ken luksave na tok amamas long gutpela pasin bilong ol bratasista long helpim ol narapela. Kain ol gutpela tok em yumi mekim long taim stret inap givim strong long ol bratasista long wok yet long mekim ol gutpela wok.—Ritim Aisaia 32:1, 2.

22-23. Olsem wanem tingting bilong Naomi i senis, na bilong wanem? (Buk Song 136:23, 26)

²² Inap sampela haptaim i go pinis, Boas i givim planti kaikai long Rut na Naomi. (Rut 2:14-18) Naomi i mekim wanem long gutpela pasin bilong Boas? Em i tok: “Jehova i ken mekim gut long dispela man. God i save mekim gutpela pasin laikim long ol man i stap laip na long ol man i dai pinis.” (Rut 2:20a) Gutpela pasin bilong Boas i senisim tru tingting bilong Naomi! Pastaim, Naomi i bin krai na bel hevi tru na em i tok: “Jehova i birua long mi,” tasol nau em i amamas na singaut olsem: “Jehova . . . i save mekim gutpela pasin laikim.” Wanem samting i mekim na Naomi i senisim tingting bilong em?

²³ Naomi i lukim olsem Jehova i wok long helpim em. Jehova i yusim Rut long givim sapot em Naomi i nidim long dispela longpela wokabaut i kam bek long Juda. Na tu, Naomi i lukim olsem Jehova i helpim em taim Boas—“em wanpela bilong ol man i ken baim bek” tupela—i givim planti kaikai long tupela.d (Rut 2:19, 20b) Ating Naomi i ting olsem, ‘Nau mi luksave, Jehova i no bin lusim mi. Long olgeta dispela taim em i stap wantaim mi!’ (Ritim Buk Song 136:23, 26.) Naomi i amamas tru olsem Rut na Boas i no givap long em! Yumi ken piksaim long tingting amamas em dispela 3-pela lain i kisim long gutpela samting i kamap.

24. Wai na yumi laik wok yet long mekim gutpela pasin laikim long ol wanbilip bilong yumi?

²⁴ Yumi kisim wanem skul long Buk Rut long gutpela pasin laikim? Gutpela pasin laikim i kirapim yumi na yumi no givap hariap long ol bratasista bilong yumi husat i bel hevi. Na dispela pasin i kirapim yumi tu long givim taim na strong bilong yumi long helpim ol. Long taim stret, ol elda i mas mekim gutpela tok bilong helpim ol bratasista em ol i mekim gutpela pasin laikim long ol narapela. Taim yumi lukim ol narapela em bipo ol i bel hevi, ol i kisim bek strong long mekim wok bilong Jehova, dispela i givim bikpela amamas tru long yumi. (Apo. 20:35) Tasol wanem nambawan risen na yumi laik wok yet long mekim gutpela pasin laikim? Nambawan risen em, yumi laik bihainim pasin bilong Jehova na amamasim em, em Man husat i “pulap tru long gutpela pasin laikim.”—Kis. 34:6; Sng. 33:22.