Wanpela “Gutpela Meri”

RUT i nildaun klostu long ol hip bali em i bin bungim long dispela de. Apinun na ples i wok long i go tudak long ol gaden i raunim Betlehem, planti wokman i wok long i go long geit bilong dispela liklik taun i stap antap long maunten. Rut i bin wok hat na ating em i taiet tru, long wanem, em i bin wok strong kirap long moning i go inap long apinun. Tasol em i wok yet, olsem em i wok long holim stik na apim ol bali bambai ol pikinini bali i pundaun i go daun long graun. Maski wok i givim hatwok tru long em, ol samting i kamap long dispela de i gutpela tru.

Olsem wanem? Ol samting long i stap bilong dispela yangpela wido i wok long kamap gutpela? Em i pas gut wantaim tambu mama bilong em Naomi na em i tok promis olsem em bai stap wantaim Naomi na God bilong Naomi, em Jehova, bai kamap God bilong em. Tupela meri wantaim i no gat man na ol i lusim Moap na i kam long Betlehem, na bihain Rut em dispela meri Moap i kisim save olsem Lo Bilong Jehova i save helpim tru ol rabisman long Israel na i helpim tu ol man bilong narapela lain i stap long Israel bambai olgeta i gat rot bilong kisim kaikai samting.a Nau em i luksave olsem sampela lain bilong Jehova em ol i stap aninit long dispela Lo na ol i bin kisim skul long en, ol i mekim gutpela pasin na pasin helpim long em na dispela i mekim gut bel bilong em.

Wanpela man olsem em Boas, em wanpela maniman i gat bikpela krismas na Rut i bin bungim ol kaikai long gaden bilong em. Em i luksave long hatwok bilong Rut, wankain olsem wanpela papa inap mekim long pikinini bilong em. Rut i belgut tru taim em i tingim ol gutpela tok Boas i mekim long pasin bilong em long lukautim Naomi, na long makim olsem em i laik stap aninit long lukaut bilong God tru, em Jehova.—Rut 2:11-13.

Maski i olsem, ating Rut i wok long tingting yet long laip bilong em long bihain. Em i meri bilong narapela ples na em i stap rabis na i no gat man o pikinini, olsem na olsem wanem em bai lukautim em yet na Naomi long ol yia i kam? Pasin bilong bungim tasol ol hap kaikai bai lukautim ol inap oltaim? Na husat bai lukautim em taim em i go lapun? Yumi ken tok i stret long em i tingting planti long ol kain samting olsem, a? Nau long dispela taim bilong bikpela hevi bilong mani, planti man i save wari na tingting planti long wankain samting olsem. Taim yumi lain long olsem wanem bilip bilong Rut i bin helpim em long karim ol kain hevi olsem, dispela bai helpim yumi long bihainim pasin bilong em.

Taim Rut i pinis long paitim ol het bali, em i luksave olsem em i kisim planti bali tru, hevi bilong en inap 14 kilogram. Em i pasim insait long wanpela laplap na em i apim na putim long het na karim i go long Betlehem taim ples i wok long i go tudak.—Rut 2:17.

Naomi i amamas tru long lukim tambu pikinini meri bilong em, na ating em i kirap nogut taim em i lukim Rut i karim planti bali i kam. Boas i bin redim kaikai bilong ol wokman bilong em na sampela hap kaikai i stap yet em Rut i bin bringim i go na kaikai wantaim Naomi. Naomi i askim: “Nau yu kisim bali we? Yu wok long gaden bilong wanem man? Bikpela i ken mekim gut long dispela man i bin lukim yu na i tingting long yu.” (Rut 2:19) Naomi i luksave long ol samting i kamap, em i lukim Rut i karim planti bali tru i kam na em i save olsem wanpela man i luksave long dispela yangpela wido na i mekim gutpela pasin long em.

Tupela i kirap long toktok na Rut i tokim Naomi long gutpela pasin helpim Boas i mekim. Naomi i pilim tru na i tok: “Bikpela i ken mekim gut long dispela man. Bikpela i no save lusim promis em i bin mekim long ol man i dai pinis na long ol man i stap yet.” (Rut 2:19, 20) Naomi i tingim gutpela pasin bilong Boas olsem samting i kam long Jehova, em Man bilong kirapim ol wokboi bilong em long givim ol samting na Em i promis long blesim ol long dispela gutpela pasin helpim ol i mekim.b—Sindaun 19:17.

Naomi i tokim Rut long bihainim tok bilong Boas na wok yet long kisim ol hap kaikai long gaden bilong Boas na wok wantaim ol wokmeri bilong Boas bambai ol wokman i no ken mekim nogut long em. Rut i bihainim dispela tok. Na tu, em i “stap yet wantaim tambu mama bilong en.” (Rut 2:22, 23) Long ol dispela tok, yumi lukim gen nambawan gutpela pasin bilong Rut em pasin bilong laikim tru na stap gut long narapela. Gutpela pasin bilong em i kirapim yumi long askim yumi yet olsem yumi save tingim tru pasin pren i stap namel long famili na laikim na stap gut long wanfamili bilong yumi na helpim ol? Oltaim Jehova i save tingim dispela pasin bilong stap gut na laikim tru narapela.

Yu ting Naomi na Rut ol i no famili tru tru? Long sampela kalsa, ol man i ting olsem insait long famili tru tru i mas i gat man marit, meri marit, pikinini man, pikinini meri, na ol tumbuna papamama. Tasol Naomi na Rut i kirapim yumi long tingim olsem ol wokman bilong Jehova i ken laikim tru narapela na maski i no gat olgeta long famili, ol inap stap amamas long rot bilong tingim tru, mekim gutpela pasin, na laikim tru narapela. Yu amamas long wanem famili yu gat? Jisas i kirapim ol disaipel bilong em long tingim olsem kongrigesen Kristen i ken stap olsem famili long lain husat i no gat famili bilong ol yet.—Mak 10:29, 30.

Kirap long taim bilong kisim bali long mun Epril i go inap long taim bilong kisim wit long mun Jun, Rut i wok yet long kisim kaikai long gaden bilong Boas. Planti wik i lus na Naomi i tingting yet long samting em bai mekim bilong helpim gutpela tambu pikinini bilong em. Long Moap, Naomi i bin ting olsem em i no inap helpim Rut long painim wanpela man bilong marit. (Rut 1:11-13) Tasol nau em i senisim tingting bilong em. Em i go lukim Rut na i tok: “Tambu, harim. Mi mas painim wanpela man bilong maritim yu na lukautim yu bai yu ken i stap gut.” (Rut 3:1) Em pasin bilong ol manmeri long dispela taim bipo long painim poroman bilong maritim pikinini bilong ol, na Rut i stap olsem pikinini tru bilong Naomi. Naomi i laik painim wanpela man bilong maritim Rut na lukautim Rut na bai em “i stap gut.” Tasol Naomi bai mekim wanem?

Taim Rut i bin stori long Boas, Naomi i tok: “Dispela man em i wanblut tru bilong yumi. Yumi wanlain tru.” (Rut 2:20) Wanem mining bilong dispela tok? Lo em God i givim long lain Israel i kolim tu samting ol man i mas mekim bilong helpim famili i stap rabis o taim nogut i painim ol. Sapos wanpela meri i kamap wido taim em i no gat pikinini yet, em bai bel hevi tru, long wanem, nem bilong man na lain pikinini bilong man bilong em bai pinis, na ol bai i no gat lain tumbuna i kamap bihain. Tasol Lo Bilong God i orait long brata bilong man long maritim dispela wido bambai em i ken karim pikinini na bai nem bilong dispela man i dai pinis i ken i stap yet na bai pikinini i ken kisim graun samting bilong famili.c—Lo 25:5-7.

Naomi i stori long olsem wanem em bai stretim rot bilong kain marit olsem. Yumi ken tingim olsem dispela yangpela meri i kirap nogut taim tambu mama bilong em i toktok. Rut i wok long lain yet long Lo bilong lain Israel na planti bilong ol pasin em Lo i kolim ol i nupela samting long em. Maski i olsem, em i rispek tru long Naomi, olsem na em i putim gut yau long olgeta tok bilong em. Ating Rut i pilim hatwok o em i sem liklik long mekim samting em Naomi i tokim em long en, na tru yet em samting bilong sem long en, tasol Rut i orait long mekim olsem. Long pasin daun Rut i tok: “Gutpela. Bai mi bihainim olgeta tok bilong yu.”—Rut 3:5.

Sampela taim i hatwok long ol yangpela long harim ol skultok bilong ol man i bikpela pinis na i gat planti ekspiriens long ol samting. Em i isi long kisim tingting olsem ol man i bikpela pinis ol i no kliagut long ol traim na ol hevi i save painim ol yangpela. Gutpela pasin daun bilong Rut i kirapim yumi long tingim olsem pasin bilong putim gut yau long gutpela tingting bilong ol lapun husat i laikim yumi na i laik helpim yumi long stap gut, dispela inap helpim yumi tru. Tasol Naomi i bin kamapim wanem ol skultok? Na olsem wanem? Rut i bin kisim ol gutpela blesing long bihainim ol dispela skultok?

Long dispela apinun, Rut i go long ples bilong paitim bali, em wanpela hap we ol man i mekim graun i kamap strong na ol fama i save rausim skin bilong bali na wit samting long en. Dispela hap i stap antap long wanpela maunten we win i save ron strong long apinun tru na klostu long nait. Bilong rausim pikinini bali long skin na bun bilong en, ol wokman i save yusim ol bikpela fok na savol long apim na tromoi ol bali long win na win i save karim skin bilong bali i go na ol sid i save pundaun i go daun long graun.

Rut i lukluk gut i stap taim wok i laik pinis long apinun. Boas i lukim ol man i paitim bali na sakim long win na planti pikinini bali i pundaun na i kamapim wanpela bikpela hip. Bihain long em i kaikai pulap tru, em i slip long sait bilong dispela hip bali. Dispela em pasin ol i save mekim olgeta taim, na ating em bilong was long bali samting bambai ol stilman i no ken stilim. Rut i lukim olsem Boas i slip. Nau taim i kamap bilong Rut i mas mekim samting Naomi i tokim em long en.

Taim Rut i muv i go klostu long Boas, bel bilong em i sut. Em i luksave olsem Boas i slip i dai tru. Olsem Naomi i tok, em i go klostu long lek bilong Boas, rausim laplap i karamapim lek na slip klostu long en. Na em i wet. Taim i wok long i go pinis. Ating Rut i pilim olsem bikpela haptaim i lus. Orait long biknait tru, Boas i tanim long slip. Ating em i pilim kol na em i tromoi han bilong kisim laplap bilong karamapim gen lek bilong em. Tasol em i pilim olsem i gat wanpela i stap. Baibel i tok: “Em i lukim meri i slip klostu long lek bilong en na em i kirap nogut.”—Rut 3:8.

Boas i askim: “Yu husat?” Ating Rut i pret wantaim na i tok: “Mi Rut, wanpela wokmeri bilong yu. Yu wanblut bilong Elimelek, olsem na yu mas lukautim mi na helpim mi.” (Rut 3:9) Sampela ol man bilong skelim ol tok bilong Baibel long nau i tok pasin na toktok bilong Rut i gat sampela tok gris long en, tasol ol i no tingim tupela samting. Namba 1, Rut i bihainim pasin ol man i save mekim long dispela taim bipo, planti bilong ol dispela pasin i no stap moa long nau. Olsem na i no stret long skelim pasin bilong Rut wantaim olkain pasin nogut em ol man i save mekim long nau. Namba 2, tok bilong Boas i soim klia olsem Rut i bihainim stretpela pasin na Boas i tok amamas long em.

Boas i mekim gutpela tok long pasin isi na dispela i mekim gut bel bilong Rut. Em i tok: “Bikpela i ken mekim gut long yu, pikinini. Dispela pasin nau yu mekim, em i winim gutpela pasin yu bin mekim long tambu mama bilong yu. Planti yangpela man i stap. Sampela i gat planti samting na sampela i no gat, tasol yu no tingting long maritim wanpela.” (Rut 3:10) Dispela tok “pasin yu bin mekim” i makim pasin Rut i bin mekim bilong laikim na stap gut long Naomi na poromanim em i kam bek long Israel na lukautim em. Dispela tok “pasin nau yu mekim” i makim samting Rut i mekim long nau. Boas i luksave olsem kain yangpela meri olsem Rut inap painim wanpela yangpela man long maritim em, maski em i maniman o man i no gat planti samting. Tasol Rut i laik mekim gut long Naomi, na tu, long man bilong Naomi husat i dai pinis bambai nem bilong man bilong Naomi i ken stap yet long ples bilong em. Boas i pilim tru pasin bilong dispela yangpela meri long daunim laik bilong em yet na tingim tru ol narapela.

Boas i tok moa olsem: “Olgeta manmeri long ples, ol i save olsem yu gutpela meri. Olsem na yu no ken pret. Bai mi mekim olgeta samting yu tokim mi long en.” (Rut 3:11) Em i amamas tru long dispela tingting olsem em bai maritim Rut, na ating em bai i no inap kirap nogut sapos ol man i askim em long maritim Rut. Tasol, Boas em stretpela man na em i no laik mekim ol samting long tingting bilong em yet. Em i tokim Rut olsem i gat narapela man bilong maritim em na dispela man em i klostu moa long famili bilong man bilong Naomi i dai pinis, Boas bai go lukim dispela man pastaim na givim rot long em long kamap man bilong Rut.

Boas i tokim Rut long slip gen na malolo inap long bikmoning tru na bai em i ken hait na i go. Em i laik lukautim gutnem bilong Rut na gutnem bilong em yet, long wanem, nogut ol man i ting olsem tupela i bin slip wantaim. Rut i slip klostu long lek bilong Boas na ating tingting bilong em i stap isi bihain long em i harim Boas i mekim gutpela tok long em. Orait long bikmoning, taim ples i tudak yet, Boas i pulapim tru bali long laplap bilong Rut na Rut i go bek long Betlehem.

Rut i belgut tru taim em i tingim gen tok Boas i mekim long em olsem olgeta manmeri long ples i save olsem em i “gutpela meri”! Em i bin wok strong long save long Jehova na mekim wok bilong em na dispela i mekim na em i kisim dispela gutnem. Em i bin mekim bikpela pasin helpim long Naomi na long lain bilong em, na em i redi long bihainim ol pasin na ol kastam em bipo em i no save long en, na em i no laik mekim wanpela samting bilong bagarapim bel bilong ol. Sapos yumi bihainim bilip bilong Rut, orait bai yumi wok strong long rispektim ol narapela manmeri na rispektim tu ol pasin na ol kastam bilong ol. Sapos yumi mekim olsem, yumi tu bai kisim gutnem.

Taim Rut i go kamap long haus, Naomi i askim olsem: “Tambu, em yu tasol, a?” Ating ples i tudak na em i no inap lukluk gut, olsem na em i mekim dispela askim, tasol Naomi i laik save tu olsem Rut i stap yet olsem wanpis wido o em i stap olsem meri i gat tingting long marit. Wantu tasol Rut i tokim tambu mama long olgeta samting i kamap namel long em na Boas. Em i givim tu bali em Boas i bin tokim em long givim long Naomi olsem presen.d—Rut 3:16, 17.

Naomi i bihainim savetingting na em i tokim Rut long stap long haus na malolo long dispela de, na em i no ken go long gaden bilong bungim ol hap kaikai. Em i tokim Rut olsem: “Boas bai i no inap sindaun nating. Nogat. Em bai i stretim dispela pastaim.”—Rut 3:18.

Naomi i tok long samting Boas bai mekim, dispela tok bilong em i stret. Boas i go long ples bung bilong taun we ol hetman i save bung na em i wet inap long man wanblut tru bilong man bilong Naomi i kam. I gat ol aiwitnes i stap na Boas i tokim man husat i gat rait long maritim Rut long kisim Rut. Tasol dispela man i no orait long mekim olsem, long wanem, em i tok sapos em i mekim olsem em bai lus long kisim graun samting bilong em yet. Long ai bilong ol aiwitnes long ples bung, Boas i tokaut olsem em bai baim bek graun bilong man bilong Naomi, em Elimelek, na em bai maritim Rut em meri bilong pikinini man bilong Elimelek, em Malon. Boas i kamapim klia tingting bilong em olsem sapos em i mekim olsem orait “hap graun bilong Malon bai i stap long lain bilong en.” (Rut 4:1-10) Boas em wanpela stretpela man na man bilong tingim tru ol narapela.

Boas i maritim Rut. Bihain, Baibel i tok, ‘Bikpela i mekim gut long tupela na Rut i gat bel na bihain em i karim wanpela pikinini man.’ Ol meri bilong Betlehem i tok amamas long Naomi na litimapim nem bilong Rut long em i bin mekim gut long Naomi, winim pasin em 7-pela pikinini man inap mekim long em. Bihain yumi kisim save olsem pikinini man bilong Rut i kamap tumbuna bilong King Devit. (Rut 4:11-22) Bihain Devit i kamap tumbuna bilong Jisas Krais.—Matyu 1:1.e

Rut i kisim gutpela blesing tru, na Naomi tu i pilim olsem, em i helpim Rut long mekim bikpela long pikinini i olsem bilong em yet. Laip bilong dispela tupela meri i kirapim yumi long tingim olsem God Jehova i luksave long olgeta man husat i karim hevi long lukautim ol famili bilong ol na ol i mekim wok bilong em wantaim lain bilong Em. Em i save blesim ol gutpela man husat i kisim gutnem long ai bilong em, olsem Rut i bin mekim.