Bilip Long Spirit Bilong God Taim Ol Senis i Kamap Long Laip Bilong Yu
“Yu mas wok strong long kamap wokman tru, na bai God i laikim wok bilong yu.”—2 TIMOTI 2:15.
1. Wanem ol senis inap traim pasin bilong yumi long i stap gut long samting bilong spirit?
LONG olgeta taim ol samting bilong graun i save senis. Yumi lukim ol nupela save bilong saiens na ol nupela masin samting na tu pasin bilong i no bihainim stretpela pasin i wok long go bikpela tru. Olsem yumi bin skelim long stori i kamap paslain long dispela, ol Kristen i mas sakim dispela spirit bilong graun i no laikim God. Tasol taim ol samting bilong graun i senis, yumi tu i save senis long planti samting. Ol pikinini i kamap yangpela man o meri. Yumi kisim o lusim mani, gutpela helt, na ol manmeri yumi laikim tumas. Planti ol kain senis olsem yumi no inap bosim, na ol i nupela samting long yumi na ol inap traim pasin bilong yumi long i stap gut long samting bilong spirit.
2. Wanem ol senis i bin kamap long laip bilong Devit?
2 Wan wan man tasol i gat planti bikpela senis i kamap long laip bilong ol olsem i bin kamap long Devit, pikinini bilong Jesi. Devit em i mangi nating i was long ol sipsip na kwiktaim tumas em i kisim biknem long kantri Israel. Bihain Devit i mas ranawe, long wanem, wanpela king i jeles long em na i wok long painim em olsem man i painim abus. Bihain, Devit i kamap king na man bilong daunim ol birua. Em i karim pen na hevi long bikpela sin em i bin mekim. Ol samting nogut i kamap insait long famili na tu famili i bruk. Em i kisim planti mani kago samting, go lapun, na pilim pen na hevi bilong ol lapun. Tasol maski i gat planti senis insait long laip bilong em, long laip olgeta em i bilip na trastim Jehova na spirit bilong Em. Em i traim bes long mekim ol samting bai “God i laikim wok” bilong em, na God i bin blesim em. (2 Timoti 2:15) Sindaun bilong yumi i no wankain olsem bilong Devit, tasol ol samting em i bin mekim taim ol senis i painim em inap skulim yumi. Pasin bilong em inap helpim yumi long save olsem wanem yumi ken kisim helpim bilong spirit bilong God taim ol senis i kamap long laip bilong yumi.
Pasin Daun Bilong Devit—Gutpela Piksa
3, 4. Olsem wanem Devit i bin stap mangi nating i was long ol sipsip na bihain em i kisim biknem long kantri Israel?
3 Taim Devit i stap mangi, em i no gat nem insait long famili bilong em yet. Papa bilong Devit i gat 8-pela pikinini man na taim profet Samuel i kam long Betlehem, papa bilong Devit i singautim 7-pela bilong ol. Em i larim Devit, em laspela pikinini man, i stap bilong lukautim ol sipsip. Tasol Jehova i bin makim Devit long kamap nupela king bilong Israel. Ol i singautim Devit i kam. Bihain, olsem Baibel i tok: “Samuel i kisim dispela wel bilong oliv em i bin bringim i kam, na em i kapsaitim liklik wel long het bilong Devit long ai bilong ol brata bilong en. Na long dispela de spirit bilong Bikpela i kam i stap strong long em na spirit i stap long em oltaim bihain.” (1 Samuel 16:12, 13) Devit i kisim strong long dispela spirit inap long taim em i dai.
4 I no longtaim na dispela mangi bilong was long ol sipsip bai kamap man i gat biknem. Ol i singautim em long kam na stap olsem boi bilong king na bilong mekim musik king i ken harim. Em i kilim i dai soldia Goliat, wanpela traipela man bilong pait strong tru, em ol strongpela soldia bilong Israel ol i pret long pait wantaim em. Ol i makim Devit long go pas long ol soldia, na em i winim ol Filistia long pait. Ol manmeri i laikim em. Ol i kamapim ol singsing i givim biknem long em. Pastaim, wanpela wokman bilong King Sol i tok Devit “i save tumas long paitim musik. Na em i gutpela strongpela man bilong pait. Na em i man bilong mekim gutpela tok na i luk naispela tru.”—1 Samuel 16:18; 17:23, 24, 45-51; 18:5-7.
5. Wanem samting inap mekim na Devit inap kisim pasin antap? Olsem wanem yumi save em i no bin kisim pasin antap?
5 Biknem, gutpela skin, yangpela, man bilong mekim gutpela tok, save tumas long paitim musik, man bilong pait, na God i orait long em—i luk olsem Devit i gat olgeta gutpela pasin. Ol dispela samting inap mekim na em inap kisim pasin antap, tasol nogat. Tingim tok Devit i mekim taim King Sol i tok long givim pikinini meri bilong em long Devit bilong maritim. Long pasin daun Devit i tok: “Mi man nating tasol. Na tu ol lain famili bilong mi i no gat nem. Olsem na mi no inap maritim pikinini meri bilong yu.” (1 Samuel 18:18) Wanpela saveman i stori long dispela ves olsem: “Devit i pilim olsem em yet i no gat nem, na famili bilong em i no gat nem o namba, olsem na i no stret long em i maritim pikinini meri bilong king na kisim biknem long dispela.”
6. Bilong wanem yumi mas kisim pasin daun?
6 Devit i gat pasin daun, long wanem, em i luksave olsem long olgeta samting Jehova i winim tru ol man i no gutpela olgeta. Devit i bin kirap nogut olsem Jehova i save tingim ol man. (Song 144:3) Na tu, Devit i save olsem biknem samting em i holim em i kisim, long wanem, Jehova i soim pasin daun taim Em i was long em na lukautim em. (Song 18:35) Dispela i givim gutpela skul tru long yumi! Ol samting yumi save gut long mekim, ol wok yumi mekim pinis, na ol gutpela wok yumi holim i no ken mekim yumi kisim pasin antap. Aposel Pol i tok: “Yu gat wanpela gutpela samting yu no bin kisim long God, a? Na sapos i tru yu bin kisim olgeta samting long han bilong God, orait bilong wanem yu litimapim nem bilong yu yet, olsem yu yet yu bin kamapim ol dispela samting?” (1 Korin 4:7) Bilong holi spirit bilong God i ken stap long yumi na God i ken orait long yumi, yumi mas kisim na holimpas pasin daun.—Jems 4:6.
“No Ken Bekim Rong”
7. Olsem wanem rot i op long Devit i ken kilim i dai King Sol?
7 Devit i no kisim pasin antap long biknem em i kisim, tasol biknem bilong Devit i kirapim King Sol—em spirit bilong God i lusim em pinis—long jeles na laik kilim Devit i dai. Maski Devit i no bin mekim rong, em i ranawe na i stap long ples nating. King Sol i wok long ranim Devit, na wanpela taim King Sol i go insait long wanpela bikpela hul long maunten, em i no save olsem Devit na ol poroman bilong em i hait i stap insait long dispela hul. Ol poroman bilong Devit i tok i luk olsem God i givim rot long Devit long kilim i dai Sol na ol i laik kirapim em long mekim olsem. Long ai bilong tingting yumi inap lukim ol i hait i stap long tudak bilong dispela hul, na ol i tok isi long Devit olsem: “Goan. Nau em i gutpela taim bilong yu. Bikpela i tokim yu pinis bai em i putim dispela birua long han bilong yu, na yu laik mekim wanem samting long em, orait yu ken mekim. Nau em i taim bilong mekim dispela samting. Goan, yu go.”—1 Samuel 24:2-6.
8. Bilong wanem Devit i no bin bekim rong long narapela?
8 Devit i tok nogat long mekim nogut long Sol. Em i bihainim pasin bilong bilip na pasin bilong isi na no ken les kwik, em i orait long larim ol dispela samting i stap long han bilong Jehova. Taim king i lusim pinis dispela bikpela hul, Devit i singaut long em olsem: “Bikpela yet i ken skelim pasin bilong mitupela na makim husat i mekim rong. Em i ken mekim save long yu bilong bekim dispela pasin nogut yu bin mekim long mi. Tasol mi yet mi no inap mekim nogut long yu.” (1 Samuel 24:12) Devit i save pinis olsem Sol i no mekim stretpela pasin long em, tasol em yet i no bekim rong long Sol; na tu em i no toknogutim em o tok baksait long em. Long sampela narapela taim Devit i no kirap na bekim rong long ol narapela. Nogat. Em i larim Jehova long stretim ol dispela samting.—1 Samuel 25:32-34; 26:10, 11.
9. Bilong wanem yumi no ken bekim rong taim ol man i birua o mekim nogut long yumi?
9 Olsem Devit, sampela samting inap kamap i traim yumi. Ating ol wanskul, wanwok, wanblut, o sampela narapela husat i no wanbilip ol i birua long yu o mekim nogut long yu. Yu no ken bekim rong long ol. Wetim Jehova, askim em long givim holi spirit bilong em long helpim yu. Ol dispela man i no bilip inap kirap nogut long gutpela pasin bilong yu na ol bai kamap ol bilipman. (1 Pita 3:1) Tasol maski wanem samting i kamap, yu ken save tru olsem Jehova i lukim ol samting i painim yu na em bai mekim sampela samting long taim em yet i makim. Aposel Pol i bin tok: “Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ”—Rom 12:19.
“Larim Mi i Skulim Yupela”
10. Olsem wanem Devit i pundaun long mekim sin? Em i mekim wanem bilong haitim dispela?
10 Planti yia i go pinis. Devit i kamap bikpela king ol man i save laikim tru. Long olgeta samting em i stap gut long God na em i raitim ol naispela song i litimapim nem bilong Jehova. Yumi inap kisim tingting olsem kain man olsem i no inap mekim bikpela sin. Tasol dispela samting i bin kamap long em. Wanpela taim em i sanap antap long rup bilong haus bilong em na em i lukim wanpela meri i gat naispela skin tru i waswas i stap. Em i wok long painimaut em i husat. Em i kisim save olsem nem bilong em Batseba na man bilong em, Uria, i stap long woa. Orait Devit i singautim Batseba i kam na em i slip wantaim em. Bihain em i kisim save olsem Batseba i gat bel. Sapos ol man i save long dispela, em bai nogutim tru nem bilong Devit! Lo Bilong Moses i tok, man i slip wantaim meri bilong narapela man i mas i dai. Devit i ting em inap haitim dispela sin. Olsem na em i salim tok i go long ami long tokim Uria long kam bek long Jerusalem. Devit i laik bai Uria i slip wantaim Batseba, tasol dispela samting i no bin kamap. Orait nau Devit i tingting planti, olsem na em i salim Uria i go bek long woa na em i salim pas wantaim em, em pas i go long Joap, komanda bilong ami. Pas i tok long putim Uria long wanpela hap bilong pait we ol birua bai kilim em i dai. Joap i bihainim dispela tok, na ol birua i kilim i dai Uria. Batseba i bihainim pasin bilong ol Israel long krai sori long man bilong em i dai pinis na bihain Devit i maritim em.—2 Samuel 11:1-27.
11. Natan i kamapim wanem stori long Devit? Devit i mekim wanem tok long dispela samting?
11 I luk olsem samting Devit i mekim bilong haitim rong i wok gut, tasol Devit i mas save olsem Jehova i lukim pinis olgeta samting em i bin mekim. (Hibru 4:13) Sampela mun i kam i go pinis na Batseba i karim pikinini. Orait nau God i tokim profet Natan long go lukim Devit. Profet i stori long king long wanpela maniman i gat planti sipsip, tasol em i kisim na kilim i dai sipsip bilong man i no gat planti samting. Dispela man i gat dispela wanpela sipsip tasol na em i laikim em tru. Dispela stori i kirapim Devit long tingim stretpela pasin, tasol em i no tingting long mining bilong en i stap hait. Kwiktaim Devit i tokaut long strafe maniman i mas kisim. Devit i belhat nogut tru na em i tokim Natan: “Man i mekim dispela kain pasin . . . i moa gut long ol i kilim em i dai.”—2 Samuel 12:1-6.
12. Jehova i givim wanem strafe long Devit?
12 Profet i bekim tok olsem: “Dispela maniman em yu tasol.” Devit i bin skelim pinis em yet. Kwiktaim belhat bilong Devit i pinis na em i pilim bikpela sem na bikpela bel hevi. Devit i kirap nogut, em i putim yau taim Natan i tokaut long strafe bilong Jehova Devit i no inap abrusim. I no gat sampela tok bilong mekim isi bel bilong em. Devit i bin givim baksait long tok bilong Jehova taim em i mekim pasin nogut. Long rot bilong ol birua em i bin kilim i dai Uria. Olsem na long olgeta taim bihain ol man bai kilim i dai sampela bilong ol lain tumbuna bilong Devit. Em i bin hait na kisim meri bilong Uria. Olsem na wankain samting bai painim em, tasol em bai kamap long ai bilong ol man.—2 Samuel 12:7-12.
13. Devit i pilim olsem wanem long strafe Jehova i givim em?
13 Em i gutpela olsem Devit i no tok em i no bin mekim rong. Em i no belhat na tok kros long profet Natan. Em i no tok olsem em asua bilong narapela o kamapim sampela eskius long samting em i bin mekim. Taim Natan i kotim em long ol rong em i bin mekim, Devit i save em i asua bilong em yet, na em i tok: “Mi mekim sin long ai bilong Bikpela.” (2 Samuel 12:13) Song 51 i kamapim klia olsem em i pilim tru asua bilong em na i soim olsem em i pilim hevi tru long sin na em i tanim bel. Em i krai na askim Jehova: “Nogut yu rausim mi na mi stap longwe long yu. Spirit bilong yu yet i stap long mi, na yu no ken rausim long mi.” Em i bilip olsem Jehova bai marimari na em i no inap “givim baksait long man i pilim hevi long sin na i daunim em yet.” (Song 51:11, 17) Devit i wok long bilip yet long spirit bilong God. Jehova i no lukautim Devit na ol hevi i kamap long rong em i bin mekim i no ken painim em, nogat, tasol Jehova i bin fogivim em.
14. Taim Jehova i stretim yumi, yumi mas mekim wanem?
14 Yumi no gutpela olgeta, na yumi olgeta i save mekim sin. (Rom 3:23) Sampela taim yumi inap pundaun na mekim bikpela sin, olsem Devit i bin mekim. Olsem wanpela gutpela papa i save stretim ol pikinini, Jehova tu i save stretim ol man husat i laik mekim wok bilong em. Pasin bilong kisim stretim em i gutpela, tasol i hatwok long kisim. Sampela taim yumi “pilim hevi tasol.” (Hibru 12:6, 11) Tasol sapos yumi ‘larim God i skulim yumi,’ yumi inap kamap wanbel wantaim Jehova. (Sindaun 8:33) Bilong kisim yet blesing bilong spirit bilong Jehova, yumi mas kisim gut ol tok bilong stretim yumi na mekim ol samting bai God i ken orait long yumi.
No Ken Bilip Long Mani Samting
15. (a) Sampela man i save mekim wanem long bikpela mani bilong ol? (b) Devit i laik mekim wanem long bikpela mani bilong em?
15 I no gat wanpela samting i soim olsem famili bilong Devit i gat biknem o planti mani kago samting. Tasol taim em i stap king em i bungim planti mani tru. Yu save, planti man i laik holim i stap bikpela mani bilong ol, o mangal long kisim planti mani moa, o tromoi long baim ol samting bilong ol yet tasol. Sampela i yusim mani bilong litimapim nem bilong ol yet. (Matyu 6:2) Tasol Devit i bin mekim narapela wok long mani bilong em. Em i gat strongpela laik long givim biknem long Jehova. Devit i tokim Natan olsem em i laik wokim wanpela tempel bilong Jehova bilong putim Bokis Kontrak long en. Long dispela taim Bokis Kontrak “i stap long haus sel” long Jerusalem. Jehova i amamas long tingting bilong Devit tasol long rot bilong Natan em i tokim Devit olsem pikinini bilong em Solomon bai wokim tempel.—2 Samuel 7:1, 2, 12, 13.
16. Devit i bin mekim wanem bilong helpim wok bilong wokim tempel?
16 Devit i bungim ol samting bilong mekim dispela bikpela wok bilong wokim tempel. Devit i tokim Solomon olsem: “Mi bin wok hat tru na bungim samting olsem 3,500 ton gol na 35,000 ton silva, bilong wokim haus bilong Bikpela. Na tu mi bungim pinis planti bras na ain moa, na ol man i no inap skelim hevi bilong en. Na tu, mi redim pinis ol diwai na ston, tasol yu mas kisim moa yet.” Long mani bilong em yet em i bin givim 100,000 kilogram gol na 240,000 kilogram silva.a (1 Stori 22:14; 29:3, 4) Devit i no givim ol dispela samting bilong ol man i ken lukim na litimapim nem bilong em, nogat. Samting em i mekim i kamapim bilip bilong em na pasin bilong em long givim bel bilong em long God Jehova. Em i luksave long As bilong ol mani kago bilong em, na em i tok long Jehova: “Olgeta dispela samting i bilong yu tasol. Pastaim yu bin givim long mipela na nau mipela i givim i go bek long yu.” (1 Stori 29:14) Bel bilong Devit i kirapim em long mekim olgeta samting em inap mekim bilong helpim lotu i tru.
17. Olsem wanem tok bilong 1 Timoti 6:17-19 i stret long ol maniman na ol man i no gat planti samting?
17 Long wankain pasin yumi tu ken yusim ol mani kago bilong yumi long mekim gutpela wok. Yumi no laik bihainim pasin bilong bungim planti samting bilong skin, mobeta yumi mekim ol samting bai God i ken orait long yumi—yumi mekim olsem yumi bihainim savetingting na em i rot bilong amamas tru. Pol i tok: ‘Tokim ol man i gat planti mani samting long ol i no ken bikhet na litimapim nem bilong ol yet na bilip long ol dispela kain samting i save bagarap kwik. Nogat. Ol i mas bilip tru long God, em i save givim yumi planti gutpela samting bilong mekim yumi amamas; mekim planti gutpela pasin bilong helpim ol arapela manmeri, givim planti samting long ol manmeri i sot, mekim gut long ol arapela. Sapos ol i mekim olsem, orait ol bai i bungim planti samting bilong helpim ol bihain, na ol bai i kisim dispela laip em i laip tru.’ (1 Timoti 6:17-19) Maski yumi gat planti samting o nogat, yumi mas bilip long spirit bilong God na bihainim rot i save mekim yumi gat planti samting long ai bilong God. (Luk 12:21) Yumi laik i stap gut long ai bilong Papa bilong yumi long heven, dispela i winim olgeta narapela samting.
Wok Strong na Bai God i Laikim Wok Bilong Yu
18. Olsem wanem Devit i makim gutpela pasin ol Kristen i ken bihainim?
18 Long olgeta taim Devit i wok long i stap gut long ai bilong Jehova. Long singsing em i singaut: “God, yu mas marimari long mi. Mi go long yu na mi laik bai yu lukautim mi.” (Song 57:1) Bilip bilong em long Jehova i no lus nating. Devit i kamap lapun pinis na “em i amamas long laip bilong em.” (1 Stori 23:1, NW ) Maski Devit i bin mekim sampela bikpela rong, ol man i save tingim em olsem wanpela bilong ol witnes bilong God husat i bin kamapim tru bilip bilong em.—Hibru 11:32.
19. Yumi ken mekim wanem bilong i stap gut long ai bilong God?
19 Taim ol senis i traim yu i kamap, tingim Jehova i bin lukautim, strongim, na stretim Devit, na Em inap mekim wankain samting long yu tu. Wankain olsem Devit, planti senis i bin kamap long laip bilong aposel Pol. Tasol em tu i bin stap gut long God taim em i bilip long spirit bilong God. Em i tok: “Em i givim pawa long mi, na long dispela as mi gat strong long mekim olgeta samting.” (Filipai 4:12; 4:13, NW ) Sapos yumi bilip long Jehova, em bai helpim yumi long win. Em i laik bai yumi win. Sapos yumi bihainim tok bilong em na go klostu long em, em bai givim strong long yumi bilong mekim laik bilong em. Na sapos yumi wok long bilip long spirit bilong God, bai yumi inap ‘wok strong na bai God i laikim wok bilong yumi’ long nau na long olgeta taim bihain.—2 Timoti 2:15.
[Futnot]
a Long nau, pe bilong ol samting Devit i bin givim i winim 4,800,000,000 kina.
Bai Yu Bekim Olsem Wanem?
• Yumi ken mekim wanem bilong sakim pasin antap?
• Bilong wanem yumi no ken bekim rong long ol man i rongim yumi?
• Yumi mas i gat wanem tingting long ol tok bilong stretim yumi?
• Bilong wanem yumi mas bilip long God, ol mani kago samting nogat?
[Piksa long pes 16, 17]
Devit i bilip long spirit bilong God na em i wok long mekim ol samting bilong i stap gut long ai bilong em. Yu save mekim olsem?
[Piksa long pes 18]
“Olgeta dispela samting i bilong yu tasol. Pastaim yu bin givim long mipela na nau mipela i givim i go bek long yu.”