Bihainim Bilip Bilong Ol

Em i Bihainim Savetingting

ABIGEL i lukim olsem yangpela man i pret nogut tru. Na i gat as na em i pret. Bikpela bagarap i laik kamap. Long dispela taim stret i gat 400 strongpela paitman i wokabaut i kam, na ol i laik kilim i dai olgeta man long haus bilong Nabal, em man bilong Abigel. Bilong wanem ol i laik mekim olsem?

Nabal yet i kirapim dispela hevi. Em i bin mekim hatpela pasin na tok bilas, olsem em i save mekim oltaim. Tasol long dispela taim, em i tok bilas long kepten bilong wanpela lain paitman em ol i bin lain gut long pait, na ol i save laikim tumas dispela kepten na ol i stap gut long em. Orait nau wanpela wokman bilong Nabal, ating em i wasman bilong ol sipsip, em i kam long Abigel; em i bilip olsem Abigel bai tingim rot bilong helpim ol long abrusim bagarap. Tasol olsem wanem wanpela meri inap mekim samting bilong pasim wanpela lain ami?

Pastaim yumi ken stori long dispela meri i gat naispela pasin na kisim sampela save moa long em. Abigel em i husat? Dispela bikpela hevi i bin kamap olsem wanem? Na yumi inap kisim wanem skul long pasin bilong em long bilip?

‘Naispela Meri i Gat Gutpela Tingting’

Pasin bilong Abigel na Nabal i no wankain liklik. Nabal i bin makim wanpela gutpela meri tru na maritim, tasol Abigel i maritim wanpela man pasin bilong en i nogut tru. Nabal em i maniman, olsem na em i ting em i samting tru. Tasol ol narapela i ting olsem wanem long em? I no gat narapela man i gat nem nogut long Baibel olsem Nabal. Mining bilong nem bilong en, em “Krankiman.” Ating papamama i givim dispela nem long em taim em i bon, o ating bihain ol man i bin kolim em long dispela nem bilong makim pasin bilong em. Yumi no save, tasol pasin em i mekim i stret wantaim nem bilong em. Nabal em i “man bilong kros na pasin bilong en i no gutpela.” Em i man bilong pait na dring spak, na ol man i pret long em na i no laikim em.​—⁠1 Samuel 25:​2, 3, 17, 21, 25.

Tasol pasin bilong Abigel i narapela kain tru. Mining bilong nem bilong em i olsem “Papa Bilong Mi i Mekim Em Yet i Amamas.” Planti papa i save amamas taim ol i gat naispela pikinini meri, tasol papa i gat savetingting, em i save amamas moa yet sapos pikinini meri i gat gutpela pasin. Planti meri i gat naispela skin ol i no ting ol i mas kisim ol gutpela pasin olsem skelim gut ol samting, gutpela tingting na save, strongpela bel, o bilip. Tasol Abigel i no olsem. Baibel i tok em i “naispela meri tumas na i gat planti gutpela tingting na save.”​—⁠1 Samuel 25:​2, 3.

Sampela man long nau bai i laik save: Bilong wanem dispela yangpela meri i gat gutpela tingting em i bin maritim wanpela man nogut? Yumi mas save, long dispela taim bipo ol papamama yet i save makim poroman marit bilong ol pikinini bilong ol. Sapos ol yet i no makim, orait em i bikpela samting long ol i mas orait long dispela poroman marit. Ating papamama bilong Abigel i laik bai em i maritim Nabal, o ating ol yet i makim Nabal, long wanem, em i maniman na em i gat nem. O ating ol i stap rabis na ol i mas mekim olsem. Yumi no save, tasol planti mani bilong Nabal i no mekim em i kamap gutpela man bilong Abigel, nogat.

Ol papamama i gat gutpela tingting ol i save skulim gut ol pikinini long kisim stretpela tingting long marit. Ol i no kirapim ol pikinini long maritim wanpela i gat planti mani, o subim ol long painim wanpela poroman taim ol i yangpela yet na ol i no inap mekim gut ol wok bilong marit. (1 Korin 7:36) Tasol Abigel i marit pinis na em i no inap tingim ol kain samting olsem. Maski i gat wanem as, em i marit pinis long Nabal na em i strong long mekim gut wok bilong em na karim dispela hevi long sindaun bilong em.

“Em i Givim Tok Nogut Long Ol”

Nabal i mekim samting i givim bikpela hevi moa long Abigel. Dispela man em Nabal i bin tok nogut long en, em Devit. Em dispela gutpela wokman bilong Jehova em profet Samuel i bin welim het bilong em, bilong soim olsem God i bin makim Devit long senisim Sol na kamap king. (1 Samuel 16:​1, 2, 11-13) King Sol i bel nogut tru long Devit na i laik kilim em i dai, olsem na Devit i ranawe i go hait nabaut long ples drai nating wantaim 600 strongpela paitman bilong em.

Nabal i sindaun long Maon, tasol em i save go wok long Karmel, em ples i stap klostu long Maon; ating em i gat hap graun tu long dispela hap.a Klostu long ol dispela taun i gat ol ples maunten we i save kamapim planti gras na i gutpela bilong lukautim ol sipsip, na Nabal i gat 3,000 sipsip. Tasol arere bilong dispela hap em bus tasol. Long hap saut em traipela ples drai nating bilong Paran. Long hap is, rot i go long solwara Detsi i katim i go olsem long ol ples drai nating i gat planti baret i daun tru na ol traipela hul bilong ston. Long ol dispela hap, Devit wantaim lain bilong em ol i sot tru long kaikai, na ating ol i mas painim ol abus bilong kaikai, na i stap bilong ol i gat planti hatwok. Planti taim ol i save bungim ol yangpela man husat i save lukautim ol sipsip bilong maniman Nabal.

Ol soldia bilong Devit ol i save mekim wanem kain pasin long ol wasman bilong sipsip? Ating sampela taim i no hatwok long ol i stilim wanpela sipsip bilong kaikai, tasol ol i no mekim olsem. Ol i lukautim gut ol sipsip na wokman bilong Nabal na bai i no gat samting i ken bagarapim ol. (1 Samuel 25:​15, 16) I gat planti samting inap bagarapim ol sipsip na ol wasman bilong ol. Planti wel dok nogut na laion samting i raun na painim abus bilong ol. Na boda bilong Israel long hap saut i stap klostu, olsem na i gat ol lain bilong ol narapela kantri olsem ol raskol i save kam pait na stilim nabaut ol sipsip samting.b

Yumi save, em i no isi long Devit i painim kaikai bilong bikpela lain bilong em long ples drai nating. Olsem na wanpela taim Devit i salim 10-pela man i go long Nabal bilong askim em long givim helpim. Long savetingting Devit i makim wanpela taim i stret bilong singaut long kisim helpim. Em taim bilong katim gras bilong ol sipsip na ol i save amamas na mekim gut long ol man na mekim ol bikpela kaikai. Na Devit i skelim gut ol tok em i mekim, olsem gutpela tok i soim rispek. Na em i kolim Nabal olsem “papa,” ating bilong makim olsem em i rispek long Nabal, em i gat bikpela krismas moa long Devit. Orait Nabal i mekim wanem?​—⁠1 Samuel 25:​5-8.

Em i belhat nogut tru! Olsem yangpela man i bin kamapim long Abigel, “[Nabal] i givim tok nogut long ol.” Nabal i bikmaus na komplein, long wanem, em i no laik givim gutpela bret, wara, na abus long ol. Em i tok bilas long Devit olsem em i pipia nating na i kolim em olsem wanpela wokboi i ranawe long bos bilong em. Ating tingting bilong Nabal i wankain olsem bilong Sol, em i bel nogut tru long Devit. Tupela wantaim i no gat tingting olsem bilong Jehova. God i laikim tumas Devit na em i no tingim Devit olsem wanpela wokboi nating i bikhet na ranawe​—⁠em i tingim Devit olsem man bihain bai kamap king bilong Israel.​—⁠1 Samuel 25:​10, 11, 14.

Taim ol yangpela man i kam bek na tokim Devit long olgeta tok bilong Nabal, Devit i belhat nogut tru. Em i tokim lain bilong em: “Yupela olgeta kisim bainat na redi long pait.” Em i pasim bainat na em wantaim 400 man bilong em ol i go bilong mekim pait. Em i tok tru antap long kilim i dai olgeta man long haus bilong Nabal. (1 Samuel 25:​12, 13, 21, 22) Kros bilong Devit i gat as bilong en, tasol pasin bilong em long kamapim dispela kros i no stret. Baibel i tok: “Belhat bilong man em i no save kamapim stretpela pasin bilong God.” (Jems 1:20) Tasol Abigel inap mekim wanem bilong helpim ol wanhaus bilong em long abrusim bagarap?

‘Mi Tenkyu Long Gutpela Tingting Bilong Yu’

Yumi lukim pinis olsem Abigel i go pas long stretim dispela bikpela rong. Em i no olsem Nabal​—⁠Abigel i redi long harim tok. Yangpela wokman i tok long Nabal olsem: “Nabal em i hambakman na em i no save harim tok bilong mipela.”c (1 Samuel 25:17) Sori tru, Nabal i ting em yet i samting tru, olsem na em i no laik harim tok. Long nau planti man i mekim pasin hambak olsem. Tasol yangpela wokman i save olsem pasin bilong Abigel i narapela kain, na ating dispela i mekim na em i no pret long i go tokim Abigel long dispela hevi.

Kwiktaim Abigel i tingting na i kirap mekim sampela samting. Baibel i mekim dispela tok, “kwiktaim,” inap 4-pela taim long stori bilong Abigel. Em i redim planti samting olsem presen bilong Devit na lain bilong em. Sampela bilong ol em bret, wain, sipsip, wit ol i kukim long paia, na ol liklik mekpas pikinini wain ol i bin draim, na ol fik ol i bin draim. I luk olsem Abigel i save gut long olgeta kaikai em i gat long haus na em i bin mekim stret olgeta wok bilong em long haus, wankain olsem dispela gutpela meri marit em Buk Sindaun i stori long en. (Sindaun 31:​10-31) Em i salim ol dispela kaikai i go pas wantaim sampela wokboi bilong em, na em yet i kam bihain long ol. Baibel i tok: “Tasol em i no tokim man bilong en long dispela samting em i mekim.”​—⁠1 Samuel 25:​18, 19.

Orait yu ting Abigel i mekim pasin bikhet long man bilong em, em het bilong famili? Nogat. Nabal i bin mekim pasin nogut tru long wokman em Jehova i bin makim bilong kamap king, na planti man long haus bilong Nabal em ol i no gat asua, ol bai kisim bagarap long dispela. Sapos Abigel i no kirap long mekim wanpela samting, ating em bai i gat asua wantaim man bilong em, a? Olsem na em i mas putim pasin bilong daun long God i stap namba wan, winim pasin bilong stap daun long man bilong em.

I no longtaim na Abigel i bungim Devit wantaim lain bilong em. Kwiktaim em i lusim donki na em i brukim skru long Devit. (1 Samuel 25:​20, 23, 24) Orait nau em i autim olgeta tingting i stap long bel bilong em, na em i krai na askim Devit long marimari long man bilong em na ol wanhaus bilong em. Wanem samting i mekim na Devit i pilim tru tok bilong em?

Abigel i putim asua bilong dispela hevi i go long em yet, na em i askim Devit long lusim tingting long rong bilong em. Em i tokaut olsem man bilong em Nabal em i krankiman olsem nem bilong em i makim, na ating em i kamapim olsem Devit i bikman tumas long krosim kain krankiman olsem. Em i tok em i bilip olsem Devit em i mausman bilong Jehova, na em i save olsem Devit i mekim ol pait bilong Jehova. Na Abigel i soim olsem em i save long tok promis bilong Jehova long Devit bai kamap king, long wanem, em i tok: “Bikpela bai i mekim yu i kamap king . . . bilong Israel.” Na em i tokim Devit long em i no ken mekim wanpela samting na bai em i gat asua long kilim man i dai o i ‘mekim em i bel hevi o mekim em i sem’​—⁠olsem bel bilong Devit bai i kotim em. (1 Samuel 25:​24-31) Em i mekim ol gutpela tok stret!

Orait Devit i mekim wanem? Em i kisim ol samting Abigel i bringim i kam na i tok: “God, Bikpela bilong yumi Israel, i bin salim yu i kam nau, na yu bungim mi. Olsem na mi amamas na litimapim nem bilong en. Mi tenkyu long God long gutpela tingting na tok bilong yu, na em i ken mekim gut tru long yu. Long wanem, nau yu bin pasim mi na mi no kilim i dai sampela man.” Devit i litimapim nem bilong Abigel, long wanem, em i bin strongim bel na kam hariap long bungim Devit, na em i bin pasim Devit long kisim asua long kapsaitim blut. Em i tokim Abigel: “Nau yu ken i go bek long haus, na bel bilong yu i ken i stap isi.” Na long pasin daun Devit i tok: “Bai mi mekim olsem yu bin tok.”​—⁠1 Samuel 25:​32-35.

‘Mi Wokmeri Nating Bilong En’

Taim Abigel i go pinis, em i tingting long ol samting i kamap, na em i tingting tu long gutpela pasin bilong Devit husat i narapela kain tru long man nogut em i maritim. Tasol Abigel i no tingim tingim dispela samting. Baibel i tok: “Abigel i go bek long Nabal.” Em i strong yet long mekim gut wok bilong em olsem meri bilong Nabal. Em i tokim Nabal long presen em i bin givim long Devit na lain bilong em, long wanem, i stret Nabal i mas save long dispela. Na em i tokim man bilong em long bikpela bagarap em klostu i laik painim em, nogut em i harim dispela tok long sampela man na em bai kisim bikpela sem tru. Tasol Abigel i no inap tokim Nabal long dispela taim stret, long wanem, Nabal i mekim bikpela pati tru olsem pati bilong king na em i dring spak nogut tru.​—⁠1 Samuel 25:⁠36.

Abigel i strongim bel na bihainim gutpela tingting na em i wet inap long moning, taim spak bilong Nabal i pinis. Ating long dispela taim tingting bilong Nabal bai i klia na em inap kisimgut tok bilong Abigel, tasol em bai belhat moa yet na em inap mekim save long Abigel. Abigel i go long Nabal na tokim em long olgeta samting i bin kamap. Em i ting Nabal bai belhat na singaut bikmaus na paitim em tu. Tasol Nabal i sindaun tasol i stap, na i no meknais liklik.​—⁠1 Samuel 25:⁠37.

Wanem samting i painim Nabal? “Wantu klok bilong en i bagarap liklik na skin bilong en i dai. Na em i pundaun na i slip i stap olsem ston.” Ating sik strok i bin kisim em. Tasol 10-pela de bihain em i dai​—⁠na i no sik tasol i mekim. “Bikpela i kilim Nabal i dai.” (1 Samuel 25:38) Jehova i mekim stretpela pasin na kilim i dai Nabal, na nau bikpela hevi bilong marit bilong Abigel i pinis. Tru, long nau Jehova i no save kilim man i dai bilong pinisim sampela hevi, tasol dispela stori i soim yumi olsem Jehova i save lukim olgeta pasin nogut ol man i mekim long meri bilong ol. Long taim em yet i makim, em bai mekim stretpela kot na pinisim dispela hevi.

Nau Abigel i no pas moa long marit nogut bilong em, na i gat narapela gutpela samting tu bai painim em. Taim Devit i harim olsem Nabal i dai pinis, em i salim sampela wokman i go tokim Abigel olsem em i laik maritim em. Abigel i tok: “Mi olsem wokmeri nating tasol bilong en. Na mi ken wasim lek bilong ol wokman bilong dispela bikman bilong mi.” Maski em bai kamap meri bilong Devit, pasin bilong em i no senis. Em i tok em i laik kamap wokmeri bilong ol wokman bilong Devit! Na Baibel i tok kwiktaim em i kirap redim ol samting na em i go long Devit.​—⁠1 Samuel 25:​39-42.

Tasol yumi no ken ting Abigel bai stap amamas tasol na i no gat sampela hevi inap painim em. Nogat. Sampela taim laip bilong em wantaim Devit bai i gat sampela hevi long en. Devit i marit pinis long Ahinoam, na taim man i gat tupela meri, dispela i bin givim sampela hatwok long ol bilipmeri bilong dispela taim bipo.d Na Devit i no kamap king yet, olsem na i gat sampela hatwok na hevi em i mas winim pastaim na bihain em i ken mekim wok bilong Jehova olsem king. Tasol oltaim Abigel i bin helpim gut Devit, na bihain em i karim wanpela pikinini man bilong Devit, na insait long dispela taim em i lukim olsem em i gat wanpela gutpela man husat i save tingim em na lukautim em gut. Wanpela taim Devit i kisim bek Abigel long han bilong ol birua! (1 Samuel 30:​1-19) Olsem na Devit i bihainim pasin bilong God Jehova husat i save laikim tumas na tingim tru ol meri olsem Abigel, ol i bihainim savetingting na ol i gat strongpela bel na i stap gut long God.

[Ol Futnot]

[Piksa long pes 19]

Abigel i bin harim gut tok, tasol man bilong em i no mekim olsem

[Piksa long pes 20]

Abigel i kamapim pasin daun, strongpela bel, na gutpela tingting taim em i toktok wantaim Devit