Go Klostu Long God

Taim Man “i Pilim Hevi Long Sin” na i Askim God Long Fogivim Em

2 SAMUEL 12:​1-14

YUMI olgeta i save mekim sin planti taim. Tasol maski yumi pilim hevi long rong bilong yumi, ating yumi laik save olsem: ‘Taim mi tanim bel na askim God long lusim rong bilong mi, em i save harim mi? Em bai fogivim mi?’ Baibel i skulim yumi olsem: Maski Jehova i no save orait long sin, em i redi long fogivim man i tanim bel. Ol samting i bin painim Devit, em king bilong Israel bilong bipo, i kamapim klia dispela samting. Namba 2 Samuel sapta 12 i stori long dispela.

Piksaim long tingting samting i bin kamap. Devit i gat asua long ol bikpela rong. Em i slip wantaim Batseba, na taim em i no inap haitim rong bilong em, em i stretim rot bilong kilim i dai man bilong Batseba. Devit i no tokaut long rong bilong em, na inap sampela mun, em i mekim olsem em i no gat asua. Tasol Jehova i wok long lukluk i stap. Em i lukim Devit i mekim ol dispela sin. Tasol em i lukim tu olsem Devit i gat gutpela bel na em inap tanim bel. (Sindaun 17:3) Jehova bai mekim wanem?

Jehova i salim profet Natan i go long Devit. (Ves 1) Holi spirit i stiaim Natan na em i bihainim savepasin taim em i toktok long king, em i save em i mas skelim gut ol tok em i givim long king. Olsem wanem em inap kamapim long Devit olsem Devit i giamanim em yet, na helpim Devit long save olsem em i bin mekim bikpela rong tru?

Bambai Devit i no givim ol eskius long rong bilong em, Natan i mekim wanpela stori em Devit inap pilim tru long bel, long wanem, bipo em i bin stap wasman bilong ol sipsip. Em i stori long tupela man, wanpela em i maniman na narapela em i rabisman. Maniman i gat “planti bulmakau na sipsip,” tasol rabisman i gat “wanpela liklik sipsip meri tasol.” Maniman i gat wanpela visita na em i laik wokim kaikai bilong em. Tasol em i no laik kisim wanpela bilong ol sipsip bilong em yet na kilim, nogat, em i kisim dispela wanpela sipsip bilong rabisman. Devit i ting dispela stori em i tru, olsem na em i belhat na i tok strong olsem: “Man i mekim dispela kain pasin . . . i moa gut long ol i kilim em i dai.” Bilong wanem? Devit i tok: “Long wanem, em . . . i no sori liklik long dispela man.”a​—Ves 2-6.

Tok piksa bilong Natan i inapim wok bilong en. Devit i kotim em yet. Nau Natan i tokaut klia long em: “Dispela maniman em yu tasol.” (Ves 7) Natan i makim maus bilong God, olsem na em i klia stret olsem Jehova yet i no bin amamas long samting Devit i bin mekim. Taim Devit i brukim lo bilong God, em i soim olsem em i no rispektim Man Bilong Givim Lo. God i tok: “Yu bin sakim tok bilong mi.” (Ves 10) Tok bilong stretim Devit i sutim tru bel bilong em, na em i tokaut: “Mi mekim sin long ai bilong Bikpela.” Natan i tokim Devit olsem Jehova i fogivim em, tasol Devit i mas karim hevi bilong ol rong em i bin mekim.​—Ves 13, 14.

Bihain long sin bilong Devit i kamap ples klia, em i raitim ol tok nau i stap long Song 51. Long dispela song, Devit i autim tru tingting i stap long bel bilong em we i soim olsem em i tanim bel tru. Taim Devit i mekim sin, em i givim baksait long Jehova. Tasol taim king i tanim bel, em i pilim tru gutpela pasin bilong Jehova long fogivim em, na em inap tok long Jehova: “Mi save, yu no givim baksait long man i pilim hevi long sin na i daunim em yet.” (Song 51:17) Dispela tok bai mekim gut tru bel bilong man i bin mekim sin na i tanim bel na askim Jehova long marimari long em.

[Futnot]