Winim Pasin Nogut

“KING, bilong wanem yu larim dispela rabis dok i tok nogut long yu? Larim mi i go katim nek bilong en.” Abisai, em wanpela ofisa bilong ami bilong Israel, em i mekim dispela tok long king. Em i kros na tok olsem taim em i harim wanpela man bilong lain Benjamin, nem bilong em Simei, em i tok nogut long bikpela bilong em, King Devit.​—⁠2 Samuel 16:​5-9.

Abisai i kisim wanpela tingting em planti man i save bihainim long nau​—⁠bilong pinisim kros yu mas bekim wankain pasin nogut long man i mekim pasin nogut long yu. Tru tumas, Abisai i laik bai Simei i mas kisim nogut long ol tok nogut em i bin mekim long Devit.

Tasol Devit i mekim wanem? Devit i pasim Abisai, em i tok: “Larim em.” Maski Devit i no gat asua long ol tok Simei i sutim long em, long pasin daun em i sakim dispela traim bilong bekim pasin nogut. Em i larim dispela hevi long han bilong Jehova.​—⁠2 Samuel 16:​10-​13.

Taim Devit i go bek long wok king bilong em, bihain long em i bin ranawe long pikinini man bilong em i bikhet na i laik daunim em, Simei em wanpela man namel long ol namba wan lain i kam pastaim bilong tok amamas long Devit na askim Devit long lusim rong bilong em. Long dispela taim tu Abisai i laik kilim em i dai, tasol Devit i pasim em gen long mekim olsem.​—⁠2 Samuel 19:​15-​23.

Long dispela pasin Devit i stap olsem gutpela piksa bilong Krais Jisas, em aposel Pita i raitim tok long em olsem: “Ol i bin tok nogut long em, tasol em i no bekim tok nogut bilong ol. . . . Em i putim em yet long han bilong God, em dispela Jas i save skelim stret olgeta samting.”​—⁠1 Pita 2:⁠23.

Long nau, ol Kristen i mas ‘lusim pasin bilong bikhet. Sapos ol man i mekim nogut long ol, orait ol i no ken bekim.’ (1 Pita 3:​8, 9) Taim yumi bihainim pasin bilong Devit na Krais Jisas, yumi tu inap “mekim gutpela pasin na bai [yumi] daunim pasin nogut.”​—⁠Rom 12:​17-21.