Stap Yet Olsem Pren Taim Hevi i Laik Kamap

GUTPELA pren i olsem gutpela blesing, na yu no inap kisim nating kain gutpela pren olsem. Sapos pasin pren bilong yu wantaim narapela i laik bagarap, yu ken mekim wanem bilong lukautim pasin pren bilong yupela? Yumi inap kisim skul long sampela em Baibel i tok ol i stap gutpela pren, na bihain sampela samting i kamap na i laik bagarapim pasin pren bilong ol.

Devit em wasman bilong sipsip na em i mekim wok king, na em i gat ol gutpela pren. Jonatan em wanpela pren bilong Devit. (1 Sml. 18:1) Devit i gat ol narapela pren tu, kain olsem profet Natan. Baibel i no kolim wanem taim stret Devit i kamap pren bilong Natan. Wanpela taim, Devit i toktok wantaim Natan long wanpela samting em i laik mekim, wankain olsem yu save toktok wantaim wanpela pren bilong yu long sampela samting yu laik mekim. Devit i laik wokim wanpela haus bilong Jehova. Em i laik harim tingting bilong Natan bikos em i tingim Natan olsem pren na man em spirit bilong Jehova i stap wantaim em.—2 Sml. 7:2, 3.

Tasol wanpela samting i kamap na i laik bagarapim pasin pren bilong tupela. King Devit i mekim pasin adaltri wantaim Batseba, na bihain em i stretim rot na ol i kilim i dai Uria, em man bilong Batseba. (2 Sml. 11:2-21) Inap planti yia, Devit i stap gut long Jehova na em i bihainim stretpela pasin. Tasol bihain em i mekim dispela bikpela sin! Wanem samting i kamap long dispela gutpela king? Yu ting em i no luksave long bikpela hevi em i kamapim? Yu ting em i pilim olsem em inap haitim dispela rong long ai bilong God?

Natan bai mekim wanem? Yu ting em bai larim narapela man i toktok wantaim king long dispela rong? Ol narapela i save long ol samting Devit i mekim bilong kilim i dai Uria. Bilong wanem Natan bai mekim samting we inap bagarapim pasin pren namel long em na Devit? Natan inap lusim laip bilong em sapos em i toktok long dispela samting, long wanem, Devit i bin stretim rot na kilim i dai Uria.

Natan i stap mausman bilong God. Em i save olsem sapos em i pasim maus, em bai stap yet olsem pren bilong Devit, tasol maus bilong bel bai kotim em. Devit i mekim samting Jehova i no orait long en. Ol narapela i mas helpim Devit long stretim bek pasin bilong em long pas gut wantaim God. Devit i nidim wanpela gutpela pren long helpim em. Natan i stap kain pren olsem. Natan i kirapim toktok bilong em wantaim wanpela tok piksa i sutim tru bel bilong Devit. Natan i kamapim tok God i givim long em, tasol em i mekim long pasin we Devit inap luksave long bikpela hevi em i kamapim, na tok sori, na tanim bel.—2 Sml. 12:1-14.

Yu bai mekim wanem sapos pren bilong yu i mekim bikpela rong? Yu inap pilim olsem sapos yu tokim em long rong em i mekim, dispela bai bagarapim pasin pren bilong yutupela. Ol elda bai helpim em, tasol yu inap pilim olsem yu no inap stap gut long pren bilong yu sapos yu tokim ol elda long rong em i mekim. Yu bai mekim wanem?

Gianni em yumi stori long em long pastaim, em i tok: “Mi luksave olsem sampela samting i no wankain olsem long bipo. Maurizio i no toktok gut moa wantaim mi olsem em i save mekim long pastaim. Olsem na mi toktok wantaim em, maski i hatwok tru long mi long mekim olsem. Mi tingting olsem: ‘Em i save pinis long olgeta samting, olsem na bai mi tok wanem? Ating em i no inap amamas long mi!’ Tasol mi tingim olgeta samting mipela i stadi long en, na dispela i strongim mi long toktok long em. Maurizio i bin helpim mi taim mi mekim rong. Mi laik bai mitupela i stap yet olsem ol pren, na mi laik helpim em bikos mi wari long em.”

Maurizio i tok: “Gianni i bihainim stretpela pasin—na ol tok bilong em i stret. Mi save olsem em asua bilong mi na ol hevi i painim mi, na em i no asua bilong Gianni na Jehova. Olsem na mi orait long kisim tok bilong stretim mi, na mi kamap strong gen long bilip.”

Devit i gat ol narapela pren em ol i stap gut long em long taim bilong hevi. Wanpela bilong ol em Husai, na Baibel i kolim em olsem “pren bilong Devit.” (2 Sml. 16:16; 1 Sto. 27:33) Ating em i wanpela ofisa long haus king, na em i stap gutpela pren bilong Devit, na Devit i save tokim em long sampela tok hait.

Taim Apsalom, pikinini bilong Devit, i mekim em yet i kamap king, planti manmeri long lain Israel i sapotim em, tasol Husai i no mekim olsem. Taim Devit i ranawe, Husai i go painim em. Devit i bel hevi tru bikos pikinini bilong em yet na sampela narapela em i trastim, ol i birua long em. Tasol Husai i stap gut long Devit, na em i redi long mekim wanpela wok we inap pinisim dispela hevi maski laip bilong em yet inap lus. I no olsem Husai i tingim tasol wok bilong em olsem ofisa long haus king, nogat. Em i mekim pasin em gutpela pren bai mekim.—2 Sml. 15:13-17, 32-37; 16:15–17:16.

Long nau, ol bratasista i no larim asainmen bilong narapela narapela insait long kongrigesen i pasim rot bilong ol long i stap wanbel. I olsem ol i tok, “Mi stap pren bilong yu bikos mi laikim yu tru.”

Kain samting olsem i bin painim wanpela brata, nem bilong em Federico. Antonio i stap gutpela pren na i helpim Federico long stretim hevi. Federico i tok: “Taim Antonio i kam long kongrigesen bilong mipela, mitupela i kamap gutpela pren. Mitupela i mekim wok olsem kongrigesen sevan, na mitupela i amamas long wok wantaim. Bihain liklik, em i kamap elda. Em i gutpela pren, na em i soim gutpela eksampel mi inap bihainim.” Bihain, Federico i mekim rong. Kwiktaim em i askim ol elda long helpim em, tasol em i lusim wok bilong em olsem painia na kongrigesen sevan. Antonio i mekim wanem?

Federico i tok: “Mi luksave olsem Antonio i pilim hevi bilong mi. Em i mekim olgeta samting bilong strongim bel bilong mi. Em i laik tru bai mi mas pas gut gen wantaim God, na em i no givim baksait long mi. Em i helpim mi long kamap strong gen long bilip, na mi no ken givap.” Antonio i tok: “Mi lusim bikpela haptaim long stap wantaim Federico. Mi laik bai em i amamas long toktok wantaim mi long olgeta kain samting, na em i ken stori tu long hevi bilong em.” Bihain, Federico i kamap strong gen long bilip, na em i mekim wok gen olsem painia na kongrigesen sevan. Antonio i tok: “Long nau mitupela i stap long narapela narapela kongrigesen, tasol pasin pren bilong mitupela i strong moa winim long pastaim.”

Yu bai pilim olsem wanem taim wanpela pren i givim baksait long yu taim yu nidim tru helpim bilong em? Ating dispela bai bagarapim bel bilong yu. Yu ting yu inap fogivim em? Yu ting pasin pren bilong yupela bai i strong wankain olsem long pastaim?

Tingim samting i painim Jisas klostu long taim em i dai. Em i lusim bikpela haptaim long stap wantaim ol aposel, na olgeta i bung wantaim na i stap wanbel. Olsem na i stret long Jisas i kolim ol olsem ol pren bilong em. (Jon 15:15) Tasol wanem samting i kamap taim ol birua i arestim em? Ol aposel i ranawe. Pita i bin tokaut long ai bilong ol arapela disaipel olsem em i no inap tru long lusim bosman bilong em, tasol long nait ol birua i arestim Jisas, Pita i giaman olsem em i no save long em!—Mat. 26:31-33, 56, 69-75.

Jisas i save olsem em bai stap wanpis na karim laspela hevi. I stret long em i kros na bel hevi long pasin ol aposel i mekim long em. Tasol taim em i toktok wantaim ol sampela de bihain long em i kirap bek, em i no mekim wanpela tok i soim olsem em i kros o bel hevi long ol. Jisas i no kolim gen ol popaia bilong ol disaipel, na tu, em i no tokim ol long samting ol i mekim long nait ol birua i arestim em.

Jisas i strongim gen Pita na ol arapela aposel. Em i soim olsem em i trastim ol, na em i givim instraksen long bikpela wok tru ol bai mekim bilong skulim ol man, na dispela wok i winim olgeta narapela wok i kamap long graun. Jisas i tingim yet ol aposel olsem ol pren bilong em. Ol i pilim tru pasin laikim bilong Jisas. Ol i tingting strong olsem ol i no inap givim baksait gen long Bosman bilong ol. Tru tumas, ol i mekim gut wok em Jisas i tokim ol long mekim.—Apo. 1:8; Kol. 1:23.

Wanpela sista nem bilong em Elvira, em i tingim wanpela hevi i kamap namel long em na pren bilong em Giuliana, na em i tok: “Mi pilim nogut tru taim Giuliana i tokim mi olsem em i bel hevi long pasin mi bin mekim. I stret long em i kros long mi. Tasol mi pilim tru pasin bilong em long tingim mi. Em i no tingim rong mi mekim, nogat, em i tingim hevi inap kamap long pasin mi mekim. Mi tok tenkyu long Jehova olsem mi gat gutpela pren husat i tingim mi tru na em i no tingim laik bilong em yet.”

Gutpela pren bai mekim wanem taim hevi i laik bagarapim pasin pren? Em bai redi oltaim long toktok gut long hevi i kamap na em i no inap haitim wanpela samting, na em bai mekim long taim i stret. Em bai mekim wankain pasin olsem Natan na Husai, em ol man husat i stap gut long pren bilong ol long taim bilong hevi. Na tu, em bai bihainim pasin bilong Jisas, em man husat i redi long fogivim rong bilong ol pren. Olsem wanem? Yu stap kain pren olsem?