Em i Was, na Wet i Stap

1, 2. Elaija i mekim wanem wok em i no amamas long en? Olsem wanem Elaija na Ahap i no wankain?

ELAIJA i laik tru long stap wanpis na beten long Papa bilong em long heven. Tasol bikpela lain tru i raunim em i bin lukim dispela profet tru i singaut long paia i kam daun long heven, na ating planti i grisim em na bai em i ken orait long ol. Paslain long Elaija i go antap long Maunten Karmel, na stap wanpis na beten long Jehova God, em i mekim wanpela wok em i no amamas long en. Em i mas go toktok long King Ahap.

² Dispela tupela man i no wankain. Ahap, i werim ol gutpela bilas bilong king, em man bilong gridi, na isi long ol narapela i pulim em long kamap apostet. Elaija i werim klos bilong profet—em longpela saket, ating ol i wokim long skin bilong animal o long gras bilong kamel o meme ol i samapim. Em man bilong strongim bel, stap gut long God na bilip. Ol samting i bin kamap long dispela de i kamapim klia pasin na tingting bilong dispela tupela man.

3, 4. (a) Bilong wanem Ahap na ol narapela man bilong lotuim Bal i bin kisim bikpela sem tru long dispela de? (b) Bai yumi skelim wanem ol askim?

³ Ahap na ol narapela man bilong lotuim Bal i bin kisim bikpela sem tru long dispela de. Lotu haiden em Ahap na meri bilong em, Kwin Jesebel, i wok long kirapim 10-pela traib kingdom bilong Israel long bihainim i kisim taim stret. Ol samting i kamapim klia tru olsem Bal em i god giaman. Dispela god i no gat laip i no inap kirapim paia taim ol profet bilong em i singaut bikmaus na askim, danis, na bihainim kastam bilong katim nabaut skin na blut i ron. Bal i no inap protektim dispela 450 profet em ol i mas kilim ol i dai. Na dispela god giaman i lus long mekim narapela samting tu, na klostu nau dispela bai kamap ples klia. Winim 3-pela yia pinis, ol profet bilong Bal i bin singaut long god bilong ol long pinisim dispela taim bilong bikpela san i bin kamap long Israel, tasol Bal i no inap mekim. Klostu nau Jehova yet bai pinisim dispela taim bilong bikpela san na soim ol olsem em i God tru.​—1 Kin. 16:30–17:1; 18:1-40.

⁴ Tasol wanem taim Jehova bai mekim olsem? Elaija bai mekim wanem taim em i wet i stap? Yumi inap lainim wanem samting long dispela bilipman? Bai yumi kisim bekim taim yumi skelim dispela stori.​—Ritim 1 King 18:41-46.

 5. Elaija i tokim Ahap long mekim wanem? Yu ting Ahap i kisim skul long ol samting i kamap long dispela de?

⁵ Elaija i go long Ahap na tok: “Yu go antap na kaikai na dring, long wanem, pairap bilong bikpela ren i laik pundaun.” Yu ting dispela king nogut i lainim sampela samting long dispela de? Dispela stori i no kolim stret, tasol yumi no lukim sampela tok i kamapim olsem Ahap i tanim bel, na em i no askim profet long helpim em long beten askim Jehova long fogivim em, nogat. Ahap i kirap tasol na “i go antap na kaikai na dring.” (1 Kin. 18: 41, 42) Olsem wanem long Elaija?

6, 7. Elaija i beten long wanem samting, na bilong wanem?

⁶ “Na Elaija i go antap long het bilong Maunten Karmel na em i nildaun na putim pes bilong em namel long tupela skru bilong em.” Taim Ahap i go kaikai, rot i op long Elaija i beten long Papa bilong em long heven. Tingim pasin daun bilong Elaija em stori i kamapim—em i nildaun long graun na daunim het i go daun tru olsem na pes bilong em i stap klostu long tupela skru bilong em. Elaija i mekim wanem? Long Baibel, Jems 5:18, i tokim yumi olsem Elaija i beten long Jehova long salim ren i kam. Yumi ken ting em i mekim dispela kain beten antap long Maunten Karmel.

⁷ Paslain long dispela, Jehova i tok: “Bai mi salim ren i kam daun long graun.” (1 Kin. 18:1) So Elaija i beten long laik bilong Jehova i mas kamap olsem Em i bin tok, wankain olsem beten Jisas i skulim ol disaipel long mekim klostu 1,000 yia bihain.​—Mat. 6:9, 10.

 8. Eksampel bilong Elaija i givim wanem skul long yumi long beten?

⁸ Eksampel bilong Elaija i givim planti skul long yumi long pasin bilong beten. Bikpela tingting bilong Elaija, em laik bilong God i mas kamap. Taim yumi beten, i gutpela long tingim: “Maski wanem wanem samting yumi askim em long en na i stret wantaim laik bilong em, em bai harim yumi.” (1 Jon 5:14) I klia tru olsem, yumi mas save long laik bilong God bambai yumi ken mekim beten em i orait long en—em gutpela risen na yumi stadi long Baibel long olgeta de. Elaija i laik tru long lukim taim bilong bikpela san i pinis bikos ol manmeri i karim bikpela hevi long asples bilong em. Ating long bel, em i tenkyu tru long mirakel em i lukim Jehova i bin wokim long dispela de. Olsem tasol, yumi laik bai beten bilong yumi i kamapim olsem yumi tenkyu long God na yumi tingim ol narapela.​—Ritim 2 Korin 1:11; Filipai 4:6.

 9. Elaija i tokim wokman bilong em long mekim wanem? Bai yumi stori long wanem tupela pasin?

⁹ Elaija i save Jehova bai salim ren i kam, tasol em i no save wanem taim Jehova bai mekim olsem. So dispela profet i mekim wanem taim em i wet i stap? Lukim tok Baibel i mekim: “Em i tokim wokman bilong em olsem: ‘Plis yu go antap na lukluk i go olsem long solwara.’ So wokman bilong em i go lukluk na i tok: ‘Mi no lukim wanpela samting.’ Na inap 7-pela taim, Elaija i tok, ‘Yu go bek na lukluk.’” (1 Kin. 18:43) Eksampel bilong Elaija i skulim yumi long tupela samting. Pastaim, luksave long pasin bilong em long bilip. Na bihain, skelim pasin bilong em long was i stap.

10, 11. (a) Hau Elaija i soim olsem em i bilip long tok promis bilong Jehova? (b) Wai na yumi mas i gat wankain bilip?

¹⁰ Elaija i bilip long tok promis bilong Jehova, olsem na em i laik lukim mak i soim olsem klostu nau Jehova bai salim ren. Olsem na em i salim wokman i go antap long maunten bilong lukluk i go longwe long skai na lukim sapos i gat mak bilong ren i laik i kam. Taim wokman i kam bek, em i tok: “Mi no lukim wanpela samting.” Skai i klia, na i no gat klaut. Orait, yu luksave long samting i narakain long dispela stori? Tingim, Elaija i bin tokim King Ahap: “Pairap bilong bikpela ren i laik pundaun.” Hau na Elaija inap tok olsem taim i no gat ol klaut bilong ren long skai?

¹¹ Elaija i save long tok promis bilong Jehova. Olsem profet na mausman bilong Jehova, em i save tru olsem God bilong em bai truim tok bilong Em. Elaija i bilip tru—i olsem em i harim pinis pairap bilong ren i kam daun. Dispela inap kirapim yumi long tingim tok Baibel i mekim long Moses: “Em i sanap strong i stap, na i olsem em i lukim dispela Man em ol man i no inap lukim long ai bilong ol.” Olsem wanem? Yu bilip olsem God em Man i stap tru? Em i kamapim planti risen long yumi gat kain bilip long em na ol tok promis bilong em.​—Hib. 11:1, 27.

12. Olsem wanem Elaija i soim olsem em i was i stap? Em i mekim wanem taim em i harim olsem i gat liklik klaut?

¹² Orait nau, skelim pasin bilong Elaija long was i stap. Em i salim wokman i go bek 7-pela taim—i no wanpela o tupela taim tasol! Ating wokman i taiet long i go i kam planti taim, tasol Elaija i laik tru long lukim wanpela mak na i no givap. Orait long namba 7 taim, wokman i kam bek na tok: “Lukim! I gat liklik hap klaut i olsem sais bilong han bilong man i kamap long solwara.” Long tingting piksaim wokman i putim han i go aut na makim sais bilong liklik klaut i kam antap longwe long Bikpela Solwara. Ating wokman i ting dispela liklik klaut i samting nating. Tasol long Elaija, dispela klaut i bikpela samting. Orait nau em i tokim wokman: “Yu go tokim Ahap olsem, ‘Redim karis bilong yu, na go daun hariap na bai dispela bikpela ren i no ken pasim yu!’”—1 Kin. 18:44.

13, 14. (a) Olsem wanem yumi inap bihainim pasin bilong Elaija long was i stap? (b) I gat wanem ol risen na yumi mas kirap kwik long mekim samting?

¹³ Tru tumas, Elaija i stap gutpela eksampel long yumi. Yumi tu i stap long wanpela taim we klostu nau God bai inapim samting em i tokaut pinis long mekim. Elaija i bin wetim pinis bilong taim bilong bikpela san; ol wokman bilong God long nau i wetim pinis bilong pasin nogut bilong dispela graun. (1 Jon 2:17) Yumi mas was i stap i go inap long taim Jehova God i kirap mekim dispela samting, olsem Elaija i bin mekim. Pikinini bilong God yet, Jisas, i bin tokim ol disaipel bilong em: “Olsem na yupela i mas was i stap, long wanem, yupela i no save long wanem de Bikpela bilong yupela bai i kam.” (Mat. 24:42) Yu ting Jisas i laik tok lain bilong em bai i no save liklik long wanem taim pinis bai kamap? Nogat, long wanem, em i bin stori gut long ol long ol samting bai kamap paslain long taim pasin nogut bilong dispela graun i laik pinis. Yumi olgeta inap lukim truim bilong mak bilong “pinis bilong dispela taim i kamap pinis.”​—Ritim Matyu 24:3-7.

¹⁴ Olgeta wan wan hap bilong dispela mak i helpim yumi long tingim haptaim yumi stap long en. Olsem wanem? Ol dispela mak i helpim yumi long kirap kwik long mekim wok bilong Jehova? Liklik klaut i kamap longwe i strongim Elaija long bilip olsem klostu nau Jehova bai mekim samting. Yu ting dispela gutpela profet i bel hevi?

15, 16. Wanem ol samting i wok long kamap kwiktaim tru? Elaija i laik Ahap i mas mekim wanem?

¹⁵ Baibel i tok: “I no longtaim na ol blakpela klaut i kamap na karamapim skai olgeta na win i kirap na bikpela ren i pundaun; na Ahap i wok long ron long karis i go olgeta long Jesril.” (1 Kin. 18:45) Ol samting i wok long kamap kwiktaim tru. Taim dispela wokman i givim tok bilong Elaija long Ahap, dispela liklik klaut i kamap planti na inapim skai olgeta na skai i kamap tudak. Bikpela win i blo. Em nau, bihain long 3 na hap yia, ren i pundaun long graun bilong Israel. Dispela drai graun i dringim wara bilong ren. Taim ren i pundaun bikpela tru, Wara Kison i tait, na ating em i wasim blut bilong ol profet bilong Bal em ol i bin kilim ol i dai. Na bikhetlain Israel tu i gat rot long wasim, olsem rausim, ol doti bilong lotu Bal long graun bilong Israel.

¹⁶ Yumi ken save, Elaija i laik tru bai dispela samting i kamap! Ating em i laik save, Ahap bai mekim wanem taim em i lukim ol samting i kamap ples klia. Olsem wanem? Ahap bai tanim bel na givim baksait long ol pasin doti bilong lotu Bal? Ol samting i kamap long dispela de i kamapim klia risen na em i mas senisim pasin bilong em. Tru, yumi no save Ahap i wok long tingim wanem samting long dispela taim. Baibel i tok tasol olsem king “i wok long ron long karis i go olgeta long Jesril.” Yu ting em i bin lainim sampela samting? Em i tingting strong long senisim pasin bilong em? Ol samting i kamap bihain i soim olsem em i no senis. Tasol dispela de i no pinis yet, sampela samting moa i mas painim Ahap—na Elaija.

17, 18. (a) Wanem samting i kamap long Elaija long rot i go long Jesril? (b) Wanem samting i narapela kain long ron bilong Elaija long Kamel i go long Jesril? (Lukim tu futnot.)

¹⁷ Profet bilong Jehova i kirap bihainim dispela rot Ahap i go long en. Em longwe rot, graun i malumalum, na ples i tudak. Tasol wanpela narapela kain samting i kamap.

¹⁸ “Strong bilong Jehova i kam stap long Elaija na Elaija i raunim laplap bilong em long hips bilong em na i ran i go abrusim Ahap na i go olgeta long Jesril.” (1 Kin. 18:46) Em i klia tru olsem, “strong bilong Jehova” i mekim narakain samting long Elaija. Jesril i stap longwe inap 30 kilomita, na Elaija i no yangpela man.a Piksaim long tingting profet i raunim longpela laplap, em i pasim olsem malo long hip na bai lek bilong em i fri long ran, na em i ran long rot i pulap long graun malumalum—em i ran siksti stret na kamap long karis bilong king na abrusim i go, na spit bilong em i winim spit bilong karis!

19. (a) Strong God i givim long Elaija i helpim yumi long tingim wanem ol tok profet? (b) Taim Elaija i ron i go long Jesril, em i save tru long wanem samting?

¹⁹ Elaija i kisim narakain blesing! Em i pilim bikpela strong—ating dispela strong i winim strong bilong em long taim em i yangpela—na dispela i kamapim narakain filings. Yumi inap tingim ol tok profet i kamapim olsem taim Paradais i kamap long graun, ol manmeri i stap gut long God ol bai i gat gutpela helt na bikpela strong. (Ritim Aisaia 35:6; Luk 23:43) Taim Elaija i ron long dispela rot i wet, em i save tru olsem Papa bilong em, dispela wanpela God tru, Jehova, i orait long em!

20. Yumi mas mekim wanem bilong kisim blesing i kam long Jehova?

²⁰ Jehova i gat bikpela laik tru long blesim yumi. Yumi mas wok strong long kisim ol dispela blesing; ol i gutpela samting tru na i stret yumi mekim olgeta samting bilong kisim. Olsem Elaija, yumi mas was i stap, skelim gut ol bikpela mak bilong soim olsem klostu nau Jehova bai mekim sampela samting long dispela taim nogut yumi stap long en. Olsem Elaija, i gat risen na yumi ken bilip tru long ol tok promis bilong Jehova, em “God bilong mekim pasin tru tasol.”​—Sng. 31:5.