Bihainim Bilip Bilong Ol

Em i Was na Wet i Stap

ELAIJA i laik tru long i stap wanpis na bai em i ken beten long Papa bilong em long heven. Tasol bikpela lain tru i bung bung long em, em nau tasol ol i bin lukim dispela profet tru i singaut long God na God i salim paia i kam daun long heven, na ating planti ol i wok long grisim em bilong em i ken orait long ol. Elaija i laik go antap long maunten Karmel na bai em wanpela i stap na i ken beten long God Jehova, tasol pastaim em i gat wanpela wok em i no amamas long mekim. Em i mas i go toktok wantaim King Ahap.

Tupela man hia i narapela narapela kain tru. Ahap, em i pasim ol gutpela bilas bilong king, em i man bilong mangal na i no gat strongpela bel, na em i bin lusim Jehova na lotuim ol god giaman. Elaija i pasim klos bilong profet, em laplap ol i wokim long skin bilong animal o long gras bilong kamel o meme. Elaija em man i gat strongpela bel tru na em i gat strongpela bilip. Ol samting i bin kamap long dispela de i kamapim klia ol pasin na tingting bilong dispela tupela man.a

Ahap wantaim ol narapela man bilong lotuim Bal ol i bin kisim bikpela sem tru. Lotu haiden em Ahap na meri bilong em Kwin Jesebel i wok long kirapim ol tenpela lain bilong Israel long bihainim, dispela lotu i bin kisim taim stret. Ol samting i kamapim klia tru olsem Bal em i wanpela god giaman tasol. Dispela god i no gat laip em i no inap kirapim wanpela paia nating, maski ol profet bilong em i mekim save long singaut bikmaus na krai long em, na kalap kalap na katim nabaut skin bilong ol na blut i ron. Bal i no inap lukautim ol dispela 450 profet bilong en, em ol i gat asua na lain bilong Elaija i bin kilim ol i dai. Na dispela god giaman i lus long mekim narapela samting tu, na klostu nau dispela bai kamap ples klia tru. Winim 3-pela yia pinis, ol profet bilong Bal i bin singaut long god bilong ol long pinisim dispela taim nogut bilong bikpela san i bin kamap long Israel, tasol Bal i no inap mekim olsem. Orait klostu nau Jehova yet bai pinisim dispela taim nogut bilong bikpela san na soim ol olsem em yet i God tru.​—⁠1 King 16:30–17:1; 18:​1-​40.

Tasol wanem taim Jehova bai mekim olsem? Inap long dispela taim, Elaija bai bihainim wanem kain pasin? Na dispela man i gat strongpela bilip em inap lainim yumi long wanem samting? Orait nau yumi ken skelim stori i stap long 1 King 18:​41-​46 na bai yumi ken save long ol dispela samting.

Man Bilong Beten

Elaija i tokim Ahap olsem: “Yu go hariap na kaikai. Mi harim bikpela ren i pairap i kam.” (1 King sapta 18 Ves 41) Yu ting ol samting i bin kamap long dispela de i skulim dispela king nogut? Stori i stap long Baibel i no tokaut long dispela, tasol yumi no lukim sampela tok bilong Ahap i makim olsem em i tanim bel, na em i no askim profet long helpim em long i go klostu long Jehova na askim em long lusim ol rong bilong em, nogat. Ahap i kirap tasol na em “i go na kaikai.” (1 King sapta 18 Ves 42) Orait olsem wanem long Elaija?

“Elaija wantaim wokman bilong en i go antap long het bilong maunten Karmel. Na Elaija i nildaun na putim het bilong en namel long tupela skru bilong en.” Taim Ahap i go kaikai, Elaija i gat rot long beten long Papa bilong em. Tingim pasin daun Elaija i mekim​—⁠em i brukim skru i go daun long graun na em i putim het i go daun tru na pes i stap klostu long tupela skru bilong lek. Elaija i mekim wanem? Long Jems 5:​18, Baibel i tokim yumi olsem Elaija i beten askim Jehova long salim ren i kam. Yumi ken ting em i mekim dispela kain beten antap long maunten Karmel.

Paslain long dispela, Jehova i bin tok: “Bai mi salim ren i kam daun gen.” (1 King 18:⁠1) Olsem na Elaija i beten long laik bilong Papa bilong em i mas kamap olsem Em i bin tok, em kain beten Jisas i bin skulim ol disaipel long mekim inap 1,000 yia bihain long dispela.​—⁠Matyu 6:​9, 10.

Pasin bilong Elaija i skulim yumi gut long ol samting bilong beten. Namba wan tingting bilong Elaija, em laik bilong Papa bilong em i mas kamap. Taim yumi beten, yumi mas tingim dispela samting: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” (1 Jon 5:14) Em nau, i klia tru olsem, yumi mas save long laik bilong God bambai em i ken harim beten bilong yumi​—⁠em wanpela as na yumi mas stadi long Baibel long olgeta de. Yumi save, Elaija i laik tru bai taim nogut bilong bikpela san i ken pinis, long wanem, dispela i bin givim bikpela hevi tru long ol wanples bilong em. Na ating long bel em i tenkyu tru long mirakel em i bin lukim Jehova i wokim long dispela de. Na yumi tu, taim yumi beten yumi mas askim Jehova long helpim ol narapela na givim bikpela tenkyu long em.​—⁠2 Korin 1:11; Filipai 4:⁠6.

Em i Bilip Strong na Was i Stap

Elaija i save tru olsem Jehova bai salim ren i kam, tasol em i no save wanem taim Jehova bai mekim olsem. Olsem na profet hia i mekim wanem? 1 King sapta 18 Ves 43 i tok: “Em i tokim wokman bilong en olsem, ‘Yu go long hap na lukluk i go long solwara.’ Orait wokman i go lukluk na i kam bek na i tok, ‘Mi no lukim wanpela samting.’ Na Elaija i tokim wokman, ‘Yu go lukluk gen.’ Na wokman i mekim olsem. Elaija i mekim wankain tok inap 7-pela taim.” Pasin bilong Elaija i skulim yumi long tupela samting. Namba wan, dispela profet i bilip strong olsem Jehova bai salim ren i kam. Na tu, em i was i stap.

Elaija i strong long lukim wanpela mak i soim olsem liklik taim Jehova bai kirap salim ren i kam. Olsem na em i salim wokman i go antap long maunten bilong lukluk raun long skai na lukim mak bilong ren i laik i kam. Taim wokman i kam bek em i tokim Elaija: “Mi no lukim wanpela samting.” Skai i klin tru na i no gat wanpela klaut i stap. Orait yu pilim wanem samting i narakain long dispela stori? Tingim dispela: Nau tasol Elaija i bin tokim King Ahap, “Mi harim bikpela ren i pairap i kam.” Tasol olsem wanem Elaija inap tok olsem sapos wokman bilong em i no bin lukim wanpela klaut bilong ren long skai?

Elaija i save long tok promis bilong Jehova. Em i profet na mausman bilong Jehova, olsem na em i save tru olsem God bilong em bai truim tok bilong Em. Elaija i bilip strong long dispela tok​—⁠i olsem em i harim pinis pairap bilong ren i kam daun. Dispela i kirapim yumi long tingim wanpela tok Baibel i mekim long Moses: “Yumi man i no inap lukim God long ai, tasol Moses i mekim wankain pasin olsem man i bin lukim God, na em i stap strong tru.” Long tingting bilong yu, God i stap tru olsem? Em i bin mekim planti samting i kamapim as tru na yumi ken bilip long em na ol tok promis bilong em.​—⁠Hibru 11:​1, 27.

Orait nau lukim pasin bilong Elaija long was i stap. Em i salim wokman i go bek 7-pela taim​—⁠i no wanpela o tupela taim tasol! Ating wokman i les long go bek planti taim, tasol Elaija i strong long lukim wanpela mak na em i no les. Orait long namba 7 taim, wokman i kam bek na tokim Elaija: “Mi lukim wanpela klaut i kamap long solwara. Em i liklik tasol inap olsem han bilong man.” (1 King sapta 18 Ves 44) Long tingting yumi ken lukim wokman i taitim han i go na long han em i makim sais bilong wanpela liklik klaut i kamap long skai long hap bilong Biksolwara.b Ating wokman i ting dispela liklik klaut i samting nating. Tasol long tingting bilong Elaija dispela klaut em i bikpela samting. Orait nau em i tokim wokman: “Yu go kwik na tokim King Ahap long redim karis bilong en na hariap i go daun. Nogut ren i pasim em.”

Long dispela samting tu, Elaija i stap olsem gutpela piksa bilong yumi. Yumi tu i stap long wanpela taim em klostu bai God i kirap mekim wanpela wok bilong kamapim tru samting em i tokaut pinis long mekim. Elaija i wetim taim nogut bilong bikpela san i pinis; ol wokman bilong God long nau i wetim ol pasin nogut bilong dispela graun i pinis. (1 Jon 2:17) Tasol i go inap long taim Jehova i kirap mekim dispela samting, yumi mas was i stap, olsem Elaija i bin mekim. Pikinini bilong God yet, em Jisas, em i bin tokim ol disaipel bilong em: “Yupela i mas was gut. Yupela i no save wanem de Bikpela bilong yupela bai i kam.” (Matyu 24:42) Yu ting Jisas i laik tok olsem lain bilong em bai i no save liklik long wanem taim pinis bai kamap? Nogat, long wanem, em i bin tokim ol gut long ol samting bai kamap klostu long taim ol pasin nogut bilong graun i pinis. Yumi olgeta wan wan inap kisim save long ol samting bai stap olsem mak bilong taim pasin “bilong dispela graun i laik pinis.”​—⁠Matyu 24:​3-7.c

Olgeta wan wan samting bilong dispela mak i kamapim klia dispela taim yumi stap long en na yumi inap bilip tru long en. Orait, ol samting yumi lukim olsem mak, em inap kirapim yumi long kirap kwik na mekim sampela samting? Wanpela liklik klaut i stap longwe antap long skai em i bin kirapim Elaija long bilip tru olsem Jehova i laik kirap mekim wanpela samting. Yu ting dispela gutpela profet i wet nating tasol?

Jehova i Salim Ren i Kam

Orait stori i go moa: “Kwiktaim ol blakpela klaut i kamap na i karamapim skai olgeta. Na win i kirap na bikpela ren i stat long pundaun. Na Ahap i go antap long karis bilong en na i bihainim rot i go long taun Jesril.” (1 King sapta 18 Ves 45) Ol samting i wok long kamap hariap hariap. Taim wokman bilong Elaija i wok long givim tok bilong dispela profet long Ahap, dispela liklik klaut i kamap planti na inapim skai olgeta na skai i kamap tudak. Bikpela win i kirap. Em nau, long namba wan taim insait long 3 na hap yia, ren i pundaun long graun bilong Israel.d Graun i drai olgeta na wara bilong ren i go daun na i olsem i pinis nating. Ren i kam daun bikpela tru na wara Kison i tait na ol lain bilong lotuim Bal em ol i bin kisim bagarap, ating wara i wasim blut bilong ol na tait i karim i go. Na ol bikhetlain Israel tu i gat rot long tanim bel na wasim, olsem rausim, ol doti bilong lotu Bal long graun bilong Israel.

Na yumi ken save, Elaija i laik tru bai dispela samting i kamap! Olsem wanem? Ahap bai tanim bel na lusim ol doti nogut bilong lotu Bal? Ol samting i bin kamap long dispela de ol inap tru long kirapim em long senisim pasin bilong em. Tru, yumi no save long tingting bilong Ahap long dispela taim. Baibel i tok tasol olsem king “i go antap long karis bilong en na i bihainim rot i go long taun Jesril.” Yu ting em i bin lainim sampela samting? Em i tingting strong long senisim pasin bilong em? Sapos yumi skelim ol samting i kamap bihain long dispela de, yumi ken tok, nogat. Tasol dispela de i no pinis yet​—⁠i gat sampela samting moa i mas painim Ahap, na Elaija tu.

Profet bilong Jehova i kirap bihainim dispela rot Ahap i bihainim. Em longwe rot na graun i malumalum na ples i tudak. Tasol nau i gat narapela kain samting i kamap.

“Strong bilong Bikpela i kamap long Elaija. Na Elaija i taitim gut laplap bilong en na i ran i go paslain long karis bilong Ahap. Em i ran olsem tasol i go inap tupela i kamap long Jesril.” (1 King sapta 18 Ves 46) Em i klia tru olsem “strong bilong Bikpela” i mekim narakain samting long Elaija. Jesril i stap longwe inap 30 kilomita, na Elaija i no yangpela man.e Tingim dispela profet, em i taitim gut longpela laplap na pasim olsem malo na bai laplap i no pas long lek, na em inap ran i go long rot em ren i mekim na graun malumalum i pulap long en​—⁠em i ran siksti stret na em i kamap long karis bilong king na abrusim i go, na spit bilong em i winim spit bilong karis!

Jehova i mekim gutpela samting tru long Elaija! Em i pilim bikpela strong i stap long skin bilong em na em i no sotwin samting​—⁠ating dispela strong i winim strong bilong em taim em i yangpela yet, na yumi ken ting em i amamas tru long dispela samting. Dispela inap kirapim yumi long tingim ol tok profet i tok, long Paradais bai kamap long graun, ol manmeri i stap gut long God ol bai i gat strongpela skin na no gat sik. (Aisaia 35:6; Luk 23:​43, NW ) Yumi ken ting, taim Elaija i ron long dispela rot em ren i pundaun long en, em i save Papa bilong em Jehova, em wanpela tasol i God tru, Em i orait long em!

Jehova i gat bikpela laik tru long givim gutpela samting long ol man. Yumi mas wok strong long kisim ol dispela gutpela blesing. Olsem Elaija i bin mekim, yumi mas was i stap, na skelim gut ol bikpela mak i kamap na i soim olsem Jehova i redi long kirap na mekim sampela samting nau long dispela taim nogut yumi stap long en. Olsem Elaija, i gat as na yumi ken bilip tru long ol tok promis bilong Jehova, em “God bilong mekim pasin tru tasol.”​—⁠Song 31:⁠5.

[Ol Futnot]

[Blok/Piksa long pes 19]

Bikpela San Long Taim Bilong Elaija i Bin Stap Hamas Yia?

Elaija, em profet bilong Jehova, em i tokaut long King Ahap olsem dispela longpela taim bilong bikpela san klostu i laik pinis. Dispela samting i kamap long “namba 3 yia”​—⁠ating kirap long de Elaija i bin tokaut pastaim long taim nogut bilong bikpela san bai kamap. (1 King 18:⁠1) Jehova i salim ren kwiktaim bihain long taim Elaija i tok Em bai mekim. Olsem na ating sampela bai ting dispela taim bilong bikpela san i pinis namel long namba 3 yia, na em i no stap 3-pela yia olgeta. Tasol Jisas na Jems wantaim i tok dispela bikpela san i bin stap “3 yia na 6 mun.” (Luk 4:25; Jems 5:17) Yu ting tupela tok i pait wantaim?

Nogat tru. Taim bilong san long Israel bilong bipo i bin stap longpela taim liklik, inap olsem 6-pela mun. Yumi ken ting taim dispela bikpela san i kalapim pinis 6-pela mun na i stap longpela taim pinis, long dispela taim Elaija i tokaut long Ahap long taim nogut bilong bikpela san bai kamap. Yumi ken tok, dispela taim nogut i bin kirap klostu 6-pela mun paslain. Olsem na taim Elaija i tokaut olsem taim bilong bikpela san bai pinis long “namba 3 yia” kirap long taim bilong namba wan tokaut bilong em, bikpela san i bin stap klostu olsem 3-pela yia na 6-pela mun. Dispela “3 yia na 6 mun” olgeta i pinis long taim olgeta manmeri i bung bilong lukim bikpela samting i kamap long maunten Karmel.

Olsem na yumi mas tingim dispela namba wan taim Elaija i bin go lukim Ahap. Ol manmeri i bilip olsem Bal i save “sindaun antap long ol klaut,” em dispela god bai salim ren i kam bilong pinisim taim bilong bikpela san. Sapos dispela taim nogut i stap longpela taim tumas, ating ol manmeri bai tingting, “Bal i stap we? Wanem taim bai em i salim ren i kam?” Olsem na taim Elaija i tokaut olsem ren na wara bilong nait i no ken kam daun long graun inap long taim em i tok, ating dispela i bagarapim stret bel bilong ol lain i lotuim Bal.​—⁠1 King 17:⁠1.

[Kredit Lain]

Pictorial Archive (Near Eastern History) Est.

[Piksa long pes 18]

Beten bilong Elaija i kamapim klia olsem em i gat bikpela laik tru long lukim laik bilong God i kamap