Em i Kisim Bel Isi Long God Bilong Em

1, 2. Wanem samting i kamap long dispela bikpela de long laip bilong Elaija?

ELAIJA i ran long taim ren i wok long pundaun na ples i go tudak. Longpela rot i stap yet long em bai kamap long Jesril, na em i no yangpela man. Tasol em i ran yet na i no stop bikos “strong bilong Jehova” i kam stap long em. Dispela strong i stap long bodi bilong em i narapela kain tru, em samting em i no bin pilim bipo. Man! Em i ran siksti tru i go abrusim lain hos i pulim karis bilong King Ahap!​—Ritim 1 King 18:46.

² Nau Elaija i ron wanpis long dispela longpela rot i stap yet. Piksaim long tingting olsem Elaija i ran na ren i paitim pes bilong em, na em i wok long tingim bek dispela bikpela de long laip bilong em we planti samting tru i bin kamap. I klia tru olsem ol samting i kamap i givim glori long God Bilong Elaija, Jehova, na long lotu i tru. Maunten Karmel i stap baksait tru na Elaija i no inap lukim moa, ren na klaut i karamapim dispela maunten we Jehova i bin yusim Elaija long wokim strongpela mirakel bilong daunim tru lotu bilong Bal. Pasin giaman bilong planti handret profet bilong Bal i kamap ples klia na i stret tru long ol i mas i dai. Orait nau Elaija i beten long Jehova long pinisim taim bilong bikpela san we i kamapim hevi long ol manmeri insait long 3 na hap yia. Nau ren i pundaun!​—1 Kin. 18:18-45.

3, 4. (a) Bilong wanem Elaija i tingting olsem ol samting bai senis taim em i ron i go long Jesril? (b) Bai yumi skelim wanem ol askim?

³ Taim Elaija i ron long ren inap 30 kilomita i go long Jesril, ating em i tingting olsem ol samting bai senis. Em i ting olsem bikos ol profet bilong Bal i dai pinis, nau ol bikpela senis bai kamap. Ahap i mas senis! Bihain long Ahap i witnesim ol samting i bin kamap, em i mas lusim lotu bilong Bal; stopim kwin bilong em, Jesebel; na stop long mekim nogut long ol wokboi bilong Jehova.

⁴ Taim yumi lukim olsem ol samting i kamap long wei yumi laikim, em nomol long ting laip bai kamap gutpela moa. Yumi inap ting ol samting long laip bai wok long kamap gutpela moa, na tu, yumi inap ting nau ol hevi bilong yumi i pinis olgeta. Yumi no kirap nogut sapos Elaija i kisim dispela tingting, bikos em “i wanpela man wankain olsem yumi.” (Jems 5:17) Tasol ol hevi bilong Elaija i no pinis. Sampela aua bihain, em bai pret nogut tru, na pilim bikpela bel hevi, em bai ting i gutpela em i dai. Wanem samting i kamap? Olsem wanem Jehova i helpim profet bilong em long strongim bilip na strongim bel gen? Yumi ken painimaut.

 5. Bihain long ol samting i kamap long Maunten Karmel, yu ting Ahap i lain long rispek moa long Jehova? Wai na yumi tok olsem?

⁵ Taim Ahap i kamap long haus king bilong em long Jesril, yu ting em i kamapim olsem em i senis? Baibel i tok: “Ahap i tokim Jesebel long olgeta samting Elaija i bin mekim na em i tokim em tu long Elaija i kilim i dai olgeta profet long bainat.” (1 Kin. 19:1) Yu ken lukim olsem taim Ahap i stori long ol samting i kamap long dispela de, em i no stori long God bilong Elaija, Jehova. Ahap em man bilong graun tasol, so taim em i lukim ol mirakel long dispela de—em i tok “Elaija i bin mekim.” I klia tru olsem em i no lain long rispek long Jehova God. Na dispela meri bilong em i save bekim rong i mekim wanem?

 6. Jesebel i salim wanem tok long Elaija? Dispela tok i makim wanem samting?

⁶ Jesebel i belhat nogut tru! Em i salim dispela tok long Elaija: “Long wankain taim tumora sapos mi no kilim yu i dai olsem yu bin kilim ol profet, orait ol god i ken mekim save moa yet long mi!” (1 Kin. 19:2) Dispela em narakain tok bilong kilim man. Na Jesebel i tok tru antap olsem em yet i mas i dai sapos em i no kilim i dai Elaija insait long wanpela de bilong bekim bek indai bilong ol profet bilong Bal. Tingim, Elaija i kirap long slip long haus pasindia long Jesril long dispela nait i gat bikpela ren—wokboi bilong kwin i bringim dispela nius nogut long em. Em i pilim olsem wanem?

 7. Tok bilong Jesebel long pretim Elaija i mekim wanem long em? Elaija i mekim wanem?

⁷ Sapos Elaija i bin ting olsem dispela pait em i bin mekim long lotu bilong Bal i pinis, long dispela taim stret em i luksave olsem dispela tingting bilong em i no stret. Jesebel i no senis. Kwin i tok na ol i kilim i dai planti gutpela wanwok bilong Elaija, na i luk olsem nau ol bai kilim em tu. Tok bilong Jesebel long pretim Elaija i mekim wanem long em? Baibel i tok: “Em i pret.” Yu ting Elaija i piksaim long tingting samting nogut Jesebel bai mekim bilong kilim em i dai? Sapos em i bin tingim tingim dispela samting, ating em risen na em i no strongim bel. Maski wanem samting i kamap, Elaija i “tingim laip bilong em olsem na em i ranawe.”​—1 Kin. 18:4; 19:3.

 8. (a) Olsem wanem hevi bilong Pita i wankain long Elaija? (b) Yumi kisim wanem skul long Elaija na Pita?

⁸ I no Elaija wanpela tasol em man i gat bilip we pret i daunim em, nogat. Bihain aposel Pita tu i gat wankain hevi. Olsem, taim Jisas i tokim Pita long wokabaut wantaim Em antap long wara, dispela aposel i kirap lukluk long “traipela win.” Em i no strongim bel na i stat long sink. (Ritim Matyu 14:30.) Eksampel bilong Elaija na Pita i givim gutpela skul long yumi. Sapos yumi laik holimpas strongpela bel, yumi no ken tingim tingim ol samting nogut bilong pretim yumi. Yumi mas putim tingting i go long Man i As bilong strong bilong yumi na ol samting yumi bilip na wet long en.

 9. Stori long wokabaut bilong Elaija, na filings bilong em taim em i ranawe.

⁹ Elaija i pret na em i ranawe klostu 150 kilomita i go long saut-wes long Berseba, em taun i stap klostu long boda bilong Juda long hap saut. Long dispela hap, em i lusim wokman bilong em na em wanpela i go long ples nating. Baibel i tok em i “wokabaut i go inap wanpela de,” olsem na yumi inap piksaim long tingting olsem em i kirap wokabaut long moningtaim, em i no kisim kaikai samting i go wantaim em. Em i bel hevi tru na pret, na em i no tingim ol hevi bai painim em long rot nogut em i wokabaut long en long traipela san. Isi isi san i kamap ret na i go daun na nait i wok long kam, na strong bilong Elaija i pinis olgeta. Em i taiet tru, na sindaun aninit long diwai brum—em dispela samting tasol long dispela ples nating we em i ken hait long en.​—1 Kin. 19:4.

10, 11. (a) Beten em Elaija i mekim long Jehova i makim wanem samting? (b) Kamapim ol skripsa long paragraf, na stori long filings bilong ol manmeri bilong God em bikpela bel hevi i daunim ol.

¹⁰ Elaija i beten strong tru. Em i askim God long larim em i dai. Em i tok: “Mi wankain tasol olsem ol tumbuna papa bilong mi.” Em i save olsem ol tumbuna papa bilong em i kamap das na bun tasol long matmat, na ol i no inap mekim wanpela gutpela samting long helpim man. (Ekl. 9:10) Elaija i pilim olsem em i wankain olsem ol. Olsem na em i singaut: “Mi inap nau!” I no gat risen long mi stap laip.

¹¹ Yu ting yumi mas kirap nogut long save olsem bikpela bel hevi inap daunim wanpela wokman bilong God? I no stret long ting olsem. Baibel i stori long sampela bilipman na meri em ol i bel hevi tru na pilim olsem ol i laik dai—namel long ol em Rebeka, Jekop, Moses, na Jop.​—Stt. 25:22; 37:35; Nam. 11:13-15; Jop 14:13.

12. Sapos bel hevi i daunim yu tru, hau bai yu bihainim eksampel bilong Elaija?

¹² Long nau, yumi stap long “taim nogut . . . na dispela bai givim hatwok long ol man,” olsem na yumi no kirap nogut long planti manmeri, na ol wokman bilong God tu, i bel hevi sampela taim. (2 Tim. 3:1) Sapos yu yet i pilim bikpela bel hevi olsem, orait bihainim pasin bilong Elaija: Kamapim olgeta hevi bilong yu long Jehova, long wanem, em i “God bilong mekim isi bel bilong ol man.” (Ritim 2 Korin 1:3, 4.) Yu ting God i bin mekim isi bel bilong Elaija?

13, 14. (a) Long rot bilong wanpela ensel, olsem wanem Jehova i soim olsem em i tingim tru profet bilong em husat i gat bikpela bel hevi? (b) Jehova i save long yumi wan wan na skel bilong yumi, olsem wanem dispela i mekim gut bel bilong yumi?

¹³ Yu ting Jehova i pilim olsem wanem taim em i stap long heven na lukluk i kam daun na lukim dispela profet em i laikim tru, i slip aninit long diwai long ples nating na askim God long em i laik dai? Yumi save pinis long bekim bilong dispela askim. Taim Elaija i slip indai, Jehova i salim wanpela ensel i kam long em. Ensel i tatsim Elaija na kirapim em isi tasol na tok: “Yu kirap na kaikai.” Elaija i mekim olsem, long wanem, ensel i redim simpol kaikai bilong em—nupela bret i hat yet na wara. Yu ting em i tok tenkyu long ensel? Baibel i tok tasol olsem dispela profet i kaikai na dring, na slip gen. Yu ting em i bel hevi tru na i no laik toktok? Yumi no save, tasol ensel i kirapim em namba 2 taim, ating taim tulait i bruk. Em i tokim gen Elaija, “Yu kirap na kaikai,” na em i mekim dispela gutpela tok, “long wanem, yu bai mekim longpela wokabaut.”​—1 Kin. 19:5-7.

¹⁴ God i givim gutpela save long dispela ensel, olsem na em i save long hap Elaija i laik i go long en. Em i save tu olsem rot i longpela tru, na Elaija i no inap wokabaut long strong bilong em yet. Em i gutpela samting tru long mekim wok bilong God husat i save long ol mak yumi laik inapim na skel bilong yumi long mekim ol samting, winim yumi yet! (Ritim Buk Song 103:13, 14.) Olsem wanem dispela kaikai i helpim Elaija?

15, 16. (a) Kaikai Jehova i givim long Elaija i helpim em long mekim wanem? (b) Wai na yumi mas amamas long rot em Jehova i yusim bilong strongim lain bilong em long nau?

¹⁵ Baibel i tok: “Em i kirap na kaikai na dring, na dispela kaikai i strongim em na em i wokabaut inap 40 de na 40 nait i go inap long em i kamap long Horep, em maunten bilong God tru.” (1 Kin. 19:8) Olsem Moses husat i stap 600 yia samting paslain long em, na Jisas husat i stap klostu 1000 yia bihain long em—Elaija i no kaikai inap 40 de na 40 nait. (Kis. 34:28; Luk 4:1, 2) Dispela kaikai i no pinisim olgeta hevi bilong em, tasol i strongim em long narapela kain rot. Piksaim long tingting, dispela lapun man i taitim bun long wokabaut long ples nating we i no gat rot, planti de na wik, klostu wan na hap mun!

¹⁶ Jehova i save lukautim ol wokboi bilong em long nau tu, em i no wokim mirakel na givim kaikai long ol, tasol em i mekim olsem long narapela rot i gutpela moa. Em i save givim gutpela tok long ol wokboi bilong em. (Mat. 4:4) Taim yumi kisim save long God long rot bilong Baibel na ol pablikesen em Baibel i as bilong en, dispela i strongim yumi long sait bilong bilip. Ol gutpela tok yumi kisim bilong strongim yumi i no pinisim olgeta hevi bilong yumi, tasol ol inap helpim yumi long sanap strong na karim ol hevi i hatwok long karim. Na tu, dispela save i bringim yumi i go long “laip oltaim.”​—Jon 17:3.

17. Elaija i go long wanem hap? Wai na dispela hap i gat bikpela histori?

¹⁷ Elaija i wokabaut klostu 320 kilomita na i kamap long Maunten Horep. Dispela hap i gat bikpela histori, bikos long rot bilong wanpela ensel, Jehova God i bin toktok wantaim Moses long wanpela liklik diwai i paia, na long hap Jehova i bin mekim kontrak bilong Lo wantaim lain Israel. Elaija i hait insait long keiv.

18, 19. (a) Ensel bilong Jehova i givim wanem askim? Elaija i bekim olsem wanem? (b) Elaija i kamapim wanem 3-pela risen na bel hevi i daunim em?

¹⁸ Long Horep, Jehova i “toktok”—long rot bilong ensel—na givim dispela askim: “Elaija, yu mekim wanem long hia?” Ating ensel i givim dispela askim long pasin isi, so Elaija i pilim olsem em inap kamapim bel na tingting bilong em. Na em i autim olgeta tingting bilong em! Em i tok: “Mi bin givim bel tru long mekim wok bilong Jehova God, bosman bilong bikpela lain ami, tasol ol manmeri bilong Israel i givim baksait long kontrak bilong yu na ol i brukim ol alta bilong yu na ol i kilim ol profet bilong yu long bainat, na mi wanpela tasol i stap. Na nau ol i painim rot bilong tekewe laip bilong mi.” (1 Kin. 19:9, 10) Tok bilong Elaija i kamapim 3-pela risen na bel hevi i daunim em.

¹⁹ Namba 1, Elaija i pilim olsem wok bilong em i lus nating. Maski inap planti yia Elaija i bin “givim bel tru” long mekim wok bilong Jehova, putim nem holi na lotu bilong God i go pas long ol narapela samting, em i lukim olsem ol hevi i wok long i go bikpela moa. Ol manmeri i no bilip na bikhet yet, na pasin bilong lotuim ol god giaman i wok long i go bikpela. Namba 2, Elaija i pilim olsem em i stap wanpis. Em i tok: “Mi wanpela tasol i stap,” i olsem em i laspela man long Israel long mekim yet wok bilong Jehova. Namba 3, Elaija i pret. Ol man i bin kilim i dai planti wanwok bilong em, na em i save olsem nau ol bai kilim em tu. Ating em hatwok long Elaija i kamapim ol dispela filings, tasol em i no larim pasin antap o pasin bilong sem i pasim em, nogat. Em i beten na kamapim bel bilong em long God, olsem na em i gutpela eksampel long olgeta manmeri i stap gut long God.​—Sng. 62:8.

20, 21. (a) Stori long samting Elaija i bin lukim long maus bilong keiv long Maunten Horep. (b) Jehova i soim bikpela strong bilong em na dispela i skulim Elaija long wanem samting?

²⁰ Jehova i mekim wanem bilong daunim pret na bel hevi bilong Elaija? Ensel i tokim Elaija long sanap long maus bilong keiv. Elaija i bihainim tok, maski em i no save long samting bai kamap. Wantu wanpela bikpela win i kirap! Ating win i kamapim bikpela nois, bikos em strong tru na brukim ol maunten na ol bikpela ston. Piksaim long tingting olsem Elaija i traim long karamapim ai bilong em, na long wankain taim em i holim strong klos bilong em ol i wokim long gras bilong animal taim win i sakim nabaut. Na tu, em i mas balensim gut em yet bambai em i ken sanap strong bikos graun i wok long muv—guria i kamap long dispela hap! Pret bilong em i no pinis yet taim bikpela paia i kamap, na em i mas surik i go bek insait long keiv na hait long strongpela hat bilong paia.​—1 Kin. 19:11, 12.

²¹ Dispela stori i kirapim yumi long tingim olsem Jehova i no stap insait long dispela tripela narakain strong i stap long ol samting long graun. Elaija i save olsem Jehova i no wanpela god bilong ol samting bilong graun, olsem Bal, em ol man i lotuim em i bilip olsem em i “man bilong sindaun antap long ol klaut,” o man bilong bringim ren. Jehova i As bilong olgeta narakain bikpela strong i stap long ol samting bilong graun, tasol strong bilong em i bikpela moa winim ol samting em i bin wokim. Na tu, ples antap i no bikpela inap long em i stap long en! (1 Kin. 8:27) Olsem wanem olgeta dispela samting i helpim Elaija? Tingim pret bilong em. Dispela God em Jehova i stap long sait bilong em, em God husat i gat olgeta bikpela strong tru we Em inap long yusim, olsem na Elaija i no gat wok long pret long Ahap na Jesebel!​—Ritim Buk Song 118:6.

22. (a) Olsem wanem dispela “nek i toktok isi tru” i strongim Elaija olsem em i gutpela wokman? (b) Dispela “nek i toktok isi tru” em nek bilong husat? (Lukim futnot.)

²² Taim paia i pinis, ples i no gat pairap na Elaija i harim “wanpela nek i toktok isi tru.” Dispela nek i kirapim Elaija long kamapim gen tingting bilong em, na em i mekim olsem namba 2 taim.a Ating dispela i mekim gut moa bel bilong em. Tasol ating Elaija i bel isi tru long samting dispela “nek i toktok isi tru,” bai tokim em. Jehova i strongim Elaija olsem em i gutpela wokman bilong em. God i mekim olsem wanem? God i kamapim klia ol samting em i tingting pinis long mekim bilong pinisim tru lotu bilong Bal long Israel. I klia tru, hatwok bilong Elaija i no lus nating, long wanem, laik bilong God i wok long kamap yet. Na tu, Elaija i insait long dispela laik bilong God, long wanem, Jehova i salim em i go bek long wok na kolim stret ol samting em i mas mekim.​—1 Kin. 19:12-17.

23. Long wanem 2-pela rot Jehova i tokim Elaija olsem em i no stap wanpis?

²³ Olsem wanem long filings bilong Elaija long stap wanpis? Jehova i mekim tupela samting long helpim em. Fes, Jehova i tokim Elaija long makim Elisa olsem profet husat bai kisim ples bilong em. Dispela yangpela man bai kamap poroman na helpim bilong Elaija inap sampela yia. Man! Dispela tok i mekim isi bel bilong Elaija! Namba 2, Jehova i tokim Elaija long gutpela nius olsem: “Mi gat 7,000 man i stap yet long Israel, em ol i no bin brukim skru long Bal na ol i no givim kis long imis bilong en.” (1 Kin. 19:18) Elaija i no stap wanpis. Ating em i belgut tru long harim olsem dispela 7,000 gutpela manmeri i no laik lotu long Bal. Ol i laik Elaija i mas mekim yet gutpela wok bilong em, na stap eksampel long pasin bilong stap gut long Jehova long dispela taim nogut. Ating Elaija i pilim tru ol dispela tok em i harim long man bilong bringim tok bilong Jehova, dispela “nek i toktok isi tru” em nek bilong God bilong em.

24, 25. (a) Olsem wanem yumi inap putim yau long nek bilong Jehova, em “nek i toktok isi tru” long nau? (b) Hau na yumi save Elaija i amamas long tok bilong mekim isi bel em Jehova i givim long em?

²⁴ Olsem Elaija, ating yumi kirap nogut tru long bikpela strong bilong ol samting God i wokim, na i stret yumi pilim olsem. Olgeta samting God i wokim i kamapim klia bikpela strong bilong Krieta. (Rom 1:20) Jehova i amamas long yusim bikpela strong bilong em long helpim ol wokman bilong em. (2 Sto. 16:9) Tasol God i save toktok long yumi long rot bilong Baibel. (Ritim Aisaia 30:21.) Baibel i olsem dispela “nek i toktok isi tru” sapos yumi larim em i stiaim yumi long nau. Long rot bilong ol tok bilong en, Jehova i stretim, strongim, na tokim yumi olsem em i laikim yumi.

²⁵ Yu ting Elaija i amamas long ol tok bilong mekim isi bel em Jehova i givim long em long Maunten Horep? Yes! I no longtaim na dispela gutpela profet i gat strongpela bel, na i bin sanap strong na sakim ol pasin nogut bilong lotu giaman, em i kirap gen long mekim wok. Sapos yumi pilim long bel ol tok bilong God, em ol tok i “mekim isi bel bilong yumi long rot bilong Rait Holi,” yumi inap long bihainim bilip bilong Elaija.​—Rom 15:4.