Yemen—I Gat Planti Samting i Narapela Kain

POIN Bilong Arebia! Taim ol manmeri i tingim dispela hap ol i save tingim ol liklik maunten wesan, na ol kamel em planti man i raun long en na mekim wok bisnis. Tru, ol maunten wesan na bikpela san i makim dispela hap, tasol i gat ol narapela samting na ating bai yu kirap nogut long en.

Olsem: Tingim kantri Yemen, em i stap long poin stret bilong Arebia, na i gat solwara Retsi na Galf Bilong Eden i stap long arere arere. Yemen i no ples wesan tasol, nogat; i gat ol maunten na ol traipela baret, na pikinini bilong rop wain, na eprikot, na ol narapela switpela prut. Na stail bilong ol haus i narapela kain. Hat bilong san i strong tru long ol hap bilong nambis, tasol ating bai yu kirap nogut long save olsem, long ol ples maunten i no kol o hat tumas. Tasol bikpela samting moa long ol Kristen em ol samting i bin kamap bipo long dispela hap long taim bilong Baibel.

Wok Bisnis Long Sanda

Long bipo tru, bikpela mani i bin kam long dispela hap long dispela rot: Ol win i gat wara long en i kirap long solwara India na i kam long nambis bilong hap saut bilong Arebia. Dispela i mekim na ol diwai sanda inap kamap gutpela tru, em skin bilong ol i kamapim wanpela kain paura bilong wokim smok smel ol i kolim frankinsens.a Taim ol i kukim frankinsens em i kamapim gutpela smel, olsem na planti i laik kisim bilong mekim wok long en taim ol i mekim ol bilaspasin bilong lotu. Dispela kantri nau ol i kolim Yemen i bin kisim biknem long wok bisnis bilong frankinsens.

Ofir bilong bipo em ples bilong kamapim nambawan gol, na ol i ting Ofir em Yemen bilong nau. (Jop 22:24; 28:​15, 16; Song 45:9) Maski i tru o nogat, tasol bipo Yemen i ples bilong ol kamel i go i kam na karim gol, frankinsens, ol kari samting, na ol i go long ol longwe hap olsem Palestain na Tair bilong bipo. (Esekiel 27:​2, 22-25) Olsem na ol man bilong wok bisnis i kisim bikpela mani long dispela rot; na ol kantri i stap long rot ol i raun long en, ol tu i kisim planti mani, long wanem, ol i singautim takis.

Ol i ting kantri Seba i bin stap long dispela hap nau em hap is bilong Yemen. Bihain Seba i bosim wok bisnis bilong ol man i raun long kamel. Seba i kisim nem long baim i go frankinsens, gol, ol ston i dia tumas, tit bilong elefan. (Aisaia 60:6) Long taim bilong Solomon, kwin bilong Seba i lusim “arere tru bilong graun” na i kam bilong harim dispela king i autim gutpela save bilong em. (Matyu 12:42) Olsem Baibel i tok, em i bin go long Jerusalem wantaim “planti wokman bilong en na bikpela lain kamel. Ol dispela kamel i karim planti gol tru na olkain paura samting i gat gutpela smel na olkain ston i dia tumas.” (1 King 10:​1, 2) Ol Yemen i tingim yet dispela kwin bilong bipo. Buk Koran i no kolim nem bilong em, tasol ol stori tumbuna bilong Islam i kolim em Bilkis, na dispela nem i stap long planti samting ol i putim long ol stua long Yemen.

Isi Isi Biknem i Pinis

Inap planti handet yia Yemen em ples mani, olsem na ol Rom i givim nem long en long tok ples bilong ol, Arabia felix, o “Amamas Arebia.” Tasol taim ol Rom i tok olgeta man i mas bihainim lotu Kristen, em lotu i lusim pinis bilip tru, planti man i no moa baim frankinsens. Narapela samting tu i mekim na Yemen i lusim biknem, em wanpela bikpela banis bilong pasim wara long Marip i bruk olgeta; em nambawan rot bilong givim wara long olgeta hap graun bilong kantri kirap long yia 750 samting paslain long Krais.

Tasol wanpela samting i bin mekim na ol man i tingim gen Yemen, em kopi; planti man moa i kirap baim. Long yia 1610 ol Yurop i kirap dring kopi bilong Yemen, na ol i laikim swit na smel bilong en. Biktaun Moka, em i stap long hap saut long nambis bilong solwara Retsi, i kamap nambawan taun bilong baim kopi i go long ol narapela hap. Olsem na bihain, taim ol man long Yurop samting i harim dispela nem “Moka” ol i save tingim kopi bilong Arebia​—em i gat biknem tru.

Tasol i no longtaim na ol i salim ol liklik diwai kopi i go long ol narapela kantri bilong planim, na ol i kamap gutpela long ol dispela hap. Long dispela as tasol na biktaun Moka i no gat nem moa. Yemen i wok yet long baim planti kopi i go long ol narapela hap, tasol long nau Moka em wanpela liklik taun tasol bilong ol man i kisim pis.

Nambawan Biktaun

Biknem bilong Yemen bilong bipo i pinis, tasol Yemen i gat planti nambawan samting bilong en bai yu kirap nogut long en. Nambawan biktaun, Sana, em i stap antap tru inap 2,000 mita long wanpela ples stret, na ples i no kol o hat tumas. Inap 12 milion manmeri i stap long Yemen; em olsem long olgeta 3-pela 3-pela man i stap long Arebia olgeta, wanpela i stap long Yemen. Klostu olgeta manmeri i stap long dispela ples stret o long ol maunten​—ol i no stap long ples wesan.

Biktaun Sana i winim planti tausen yia pinis na yu inap save long dispela taim yu lukim stail bilong ol haus. Ol i bilasim ol windo bilong ol haus ston long waitpela pen, na ol bogen bilong haus i gat bilas, na i gat ol piksa ol i wokim long glas i gat kala kala. Long sampela hap bilong taun ol olpela na nupela haus i sanap wantaim na i hatwok long luksave wanem haus i nupela na wanem haus i olpela. Tasol long olpela hap bilong Sana yu inap save; sampela haus i gat 8-pela plua samting na ol i bin stap inap planti handet yia pinis.

Taim ol man i lusim olpela hap bilong Sana ol i save go ausait long wanpela traipela olpela dua na go raun long ol ples maunten. Ol i wokim ol liklik ples long arere bilong maunten na olgeta wan wan i luk olsem ol strongpela haus ston bilong bipo, long wanem, ol i gat ol raunpela taua i gat 4-pela plua samting na ol banis bilong lukautim ples; ol i no bin mekim wok long simen taim ol i wokim banis. Sapos yu sanap longwe liklik, sampela liklik ples i olsem hap bilong maunten yet na i hatwok long luksave long en​—yu mas go klostu pastaim.

Ating yu kirap nogut long ol man i save sindaun long kain ples i antap tru olsem. Tasol sapos yu lukluk i go antap moa yet bai yu lukim sampela liklik ples i stap, ol i gat ol strongpela banis. Long arere bilong ol dispela liklik ples ol man i katim graun long arere bilong maunten na wokim olsem lata lata na ol i banisim.

Ol Manmeri Bilong Yemen

Taim ol man bilong Wes i go raun long Yemen, ol i ting ol bai bungim ol manmeri i narapela kain. Tasol taim ol i lukim ol, ol i save kirap nogut moa yet. Namba wan taim yu lukim ol man bilong maunten, bilas bilong ol inap pretim yu. Ol i save pasim laplap (fuuta), na long braitpela let bilong ol, ol i pasim wanpela liklik bainat. Na planti man long ol liklik ples i save karim ol bikpela masin-gan.

Long ol man Yemen ol gan na bainat i bikpela samting. Long maket, ol i makim sampela bikpela hap bilong salim jambiyya, em wanpela liklik bainat i raunpela liklik. Kirap long taim ol manki i gat 14 krismas ol i save pasim dispela bainat bilong makim olsem ol i laik kamap man. Tasol yu inap lukim ol liklik manki tu i pasim. Ol i save wokim han bilong bainat long plastik, diwai, o kom bilong rainoseros i gat bikpela pe, na planti taim ol i bilasim paus bilong bainat long naispela bilas silva. Bainat i sap tru. Tasol ol i no save mekim wok tumas long en​—em samting bilong bilas tasol. Ol man Yemen i save mekim gutpela pasin long ol man i kam raun long hap bilong ol na ol i save amamas long toktok wantaim ol.

Ol lain bilong Wes i ting ol meri Yemen tu i luk narapela kain. Ol i save putim ol blakpela klos na karamapim pes olgeta. Sindaun bilong ol i no isi. Long ol liklik ples long maunten, ol meri i save wok strong inap planti aua na ol i hatwok long karim wara, na kaikai bilong ol animal, na paiawut. Na pasin bilong dispela lain, em ol meri i mas karim planti pikinini.

Narapela rot bilong kisim save long sindaun bilong dispela lain em taim yu go raun long ol maket. Bai yu harim ol gutpela smel i kam long ol stua i salim ol marasin olsem kari samting. Na maus i wara taim yu lukim ol pomigranet, eprikot, pikinini wain, galip samting. Ol man bilong wokim ol samting long skin bilong bulmakau, gol, silva samting, ol i wok i stap.

Long ples maket yu inap lukim planti hap ol i salim lip kat. Taim ol i kaikai kat o daunim wara bilong en em i save kirapim skin bilong man; sampela i tok, dispela i save pulim man na em i mas kaikai oltaim. Tasol em pasin bilong ol Yemen long kaikai kat. Ol i makim ol bikpela hap long ol maunten bilong planim kat. Ol man i save bung bung na stori na kaikai lip kat inap planti aua. Na sampela i save kaikai taim ol i wok​—o taim ol i draivim ka tu.

Tasol pasin bilong kaikai kat i save pulim bikpela mani, inap olsem 33 pesen bilong pe bilong papa. Na sampela i tok em inap mekim nogut skin bilong man, olsem: bagarapim wasket, man i no slip o kaikai gut, givim sik long bel. Olsem na sampela bikman bilong gavman i bin tokaut strong long dispela drak. Tasol inap long nau ol Yemen i strong yet long kaikai kat.

Tasol sampela samting i kamapim klia olsem sindaun bilong ol bilong bipo i wok long senis na ol i bihainim ol pasin bilong Wes. Planti man i lusim kantri bilong go wok mani long narapela hap. Na sampela famili i go sindaun long ol biktaun, na nau ol pikinini bilong ol inap harim ol musik bilong ol narapela kantri na lukim ol video, na dispela i wok long senisim tingting bilong ol. Tasol sampela i no amamas long ol dispela senis long kantri bilong ol.

Olsem na yumi laik save wanem samting bai kamap bihain long dispela kantri. Ol i no bin mekim bikpela wok tumas long digim graun bilong glasim ol pipia ston samting bilong bipo, na ating taim ol i digim graun long bihain, bai ol i painim sampela nambawan samting bilong ol Yemen bilong bipo na ol dispela samting i bin stap hait. Tasol long nau, i gat as tru na ol man i ken amamas long raun na lukim dispela kantri i gat planti samting i narapela kain.​—Wanpela man i salim dispela stori i kam.

[Ol Futnot]

[Piksa long pes 24, 25]

Bab-el-Yemen, dua bilong go insait long olpela hap bilong taun Sana

[Piksa long pes 26]

Han Sut: Maket bilong baim bainat long Sana

[Piksa long pes 26]

Daunbilo: Ol liklik taun i luk olsem hap bilong maunten yet