Yu Gat Bilip Wankain Olsem Bilong Elaija?

PLANTI man long nau i save bagarapim bilip bilong ol narapela. Ol saveman i save tok bilas long ol man i bilip olsem God em i stap. Ol man bilong lotu, em ol i man bilong tupela maus, ol i bagarapim nem bilong God. Na ol lain bilong dispela graun i wok long givim baksait moa yet long God. Dispela samting i mekim na sampela man i pret, o bel hevi, o les, na em nau, bilip bilong ol i bagarap. Planti man i sot long bilip na Pol i tok, dispela pasin i olsem “sin i save pas long yumi”!​—⁠Hibru 12:⁠1.

Olsem na em i stori long ol man na meri bilong bipo em ol i gat strongpela bilip​—⁠pasin bilong ol inap kirapim yumi long mekim wok na strongim bilip bilong yumi. (Hibru, sapta 11) Wanpela bilipman olsem em profet Elaija. Em i bin mekim wok profet inap planti yia, tasol yumi ken tingim ol samting i bin painim em taim em i kirap mekim wok profet long pastaim. Em i bin stap long taim bilong King Ahap wantaim meri bilong em, Kwin Jesebel, em meri haiden. Long dispela taim ol man i no bilip strong moa long God tru.

Pasin Bilong Tenpela Lain i Bagarap

Dispela king na kwin, tupela wantaim i nogut! Ahap em i namba 7 king bilong ol 10-pela lain bilong Israel. Ol 6-pela king paslain long em i man nogut, tasol Ahap i nogut moa yet. Em i strongim yet pasin bilong lotuim pikinini bulmakau, na tu, em i maritim pikinini meri bilong wanpela king bilong narapela lain, em Jesebel, na long dispela rot pasin bilong lotuim god giaman Bal i kamap strong moa long dispela kantri, winim olgeta taim bipo.​—⁠1 King 16:​30-33.

Jesebel i lain long bihainim lotu bilong god Bal long taim em i liklik yet. Papa bilong em, em King Etbal, em wanpela pris bilong god meri Astarte, ol i tok em meri bilong god Bal. Etbal i bin kilim i dai ol man bambai em inap kamap king bilong taun Saidon i stap klostu long kantri Israel long hap bilong not. Ahap i no strong long sakim ol pasin nogut, olsem na meri bilong em i pulim em long kirapim lotu bilong Bal long kantri Israel. I no longtaim na i gat 450 pris bilong dispela god giaman i stap, na 400 profet bilong god meri Asera, na olgeta i save kaikai long haus bilong king. Lotu bilong ol i nogut olgeta long ai bilong God tru, em Jehova! Ol i gat ol mak o piksa bilong sem bilong man, na ol i save mekim lotu bilong helpim ol long kamapim pikinini, na ol i gat ol pamukman na pamukmeri i save stap long haus lotu bilong ol, na ol i save kilim i dai pikinini bilong ol olsem ofa​—⁠em ol samting nogut bilong dispela stingpela lotu. Tasol Ahap i orait long en, olsem na dispela lotu i go kamap long olgeta hap bilong kantri Israel.

Planti milion Israel i lusim Jehova, em Man bilong wokim dispela graun na Man bilong givim wara long ol. Ol i ting god Bal i save mekim gut long ol na givim ren long ol. Long olgeta yia, taim bilong biksan i pinis na ol i wetim dispela ‘Man Bilong Bosim Ol Klaut’ i salim ren i kam. Na long olgeta yia ren i save kam, na long olgeta yia ol i tenkyu long god Bal long dispela samting.

Elaija i Tok Bai i No Gat Ren

Ating taim bilong biksan i stap longtaim na ol manmeri i wet long god Bal i salim ren i kam bilong helpim ol long i stap laip​—⁠na wantu, olsem klaut i pairap, Elaija i kamap long ol.a Wantu tasol Baibel i kirap long stori long Elaija. Baibel i no stori liklik long lain bilong em o papamama bilong em. Taim klaut i pairap, dispela i makim olsem ren bai kam, tasol taim Elaija i kamap long ol Israel i no bilong makim olsem ren bai kam. Nogat. Em i tokim Ahap: “Mi wokman bilong God, Bikpela bilong yumi Israel. Em i God i save stap oltaim na long nem bilong em, mi tokim yu stret, bai ren na wara bilong nait i no ken kam daun long graun inap long sampela yia. Na bai i stap olsem inap long taim mi tok.”​—⁠1 King 17:⁠1.

Orait, tingim dispela man Elaija em i pasim klos ol i wokim long gras bilong animal. Em i man bilong ples maunten bilong Gileat, na ating em i bin i go bikpela namel long ol wasman bilong sipsip, em ol man nating i no gat nem. Nau em i sanap long ai bilong strongpela king Ahap, ating insait long traipela haus king bilong Ahap, em hap bilong en ol i bin wokim long tit bilong elefan, na i gat ol bilas bilong en na ol traipela piksa bilong ol god giaman. Long dispela ples, insait long strongpela biktaun Samaria, namel long ol manmeri i no tingting moa long lotuim Jehova, Elaija i tokim Ahap, god bilong em Bal i no gat strong na i no gat nem. Elaija i tok, long dispela yia na inap sampela yia moa bai ren na wara bilong nait i no ken kam daun!

Elaija i kisim we strongpela bilip bilong mekim olsem? Yu ting em i no pret long sanap long ai bilong dispela king i bikhet na i lusim pinis Jehova? Ating em i pret liklik, long wanem, “em i man wankain olsem yumi,” olsem Jems, brata bilong Jisas, i tok inap 1,000 yia bihain. (Jems 5:17) Tasol tingim tok bilong Elaija yet, em i tok: “Mi wokman bilong God, Bikpela bilong yumi Israel.” Tru Elaija i sanap long ai bilong King Ahap, tasol Elaija em i wokman bilong Jehova, olsem na em i save, em i sanap long ai bilong wanpela King i winim tru Ahap​—⁠em Nambawan Bikpela King bilong heven na graun! Elaija i stap olsem maus bilong dispela King​—⁠em dispela King i bin salim em i kam. Olsem na em i no ken pret, a? Ahap em i wanpela king nating bilong graun na em i no gat blesing bilong God.

Elaija i bilip tru long Jehova na i gat as bilong bilip bilong em. Em i wanpela profet na yumi save, em i bin lainim gut ol tok bilong buk bilong God i stori long ol samting God i bin mekim long lain bilong Em. God Jehova i bin toksave long ol Israel olsem sapos ol i kirap lotuim ol god giaman, orait bai em i givim strafe long ol​—⁠bai em i pasim ren na bai graun i no gat wara na ol kaikai samting i no inap kamap. (Lo 11:​16, 17) Elaija i bilip olsem oltaim Jehova i save truim tok bilong em, olsem na Elaija i ‘beten strong long God i no ken larim ren i kam daun.’​—⁠Jems 5:⁠17.

Em i Kamapim Bilip Long Rot Bilong Bihainim Tok

Elaija i tokaut olsem bai i no gat ren, olsem na ol i laik kilim em i dai. Nau em i mas mekim narapela samting bilong kamapim bilip bilong em. Em i mas bihainim tok bilong Jehova bambai em i ken abrusim bagarap, em Jehova i tokim em: “Yu mas lusim dispela ples na go long hap sankamap bilong wara Jordan na yu mas hait i stap klostu long liklik wara Kerit. Yu ken dring dispela wara. Na mi bin tokim ol kotkot long bringim kaikai i kam long yu.”​—⁠1 King 17:​3, 4.

Wantu tasol Elaija i kirap bihainim dispela tok. Nau bai i no gat ren, na bikpela hangre i laik kamap long Israel, na sapos Elaija i laik abrusim bagarap em i mas wetim Jehova i lukautim em long kaikai samting. Em hatwok​—⁠inap planti mun Elaija i mas hait i stap em wanpela tasol. Na em i mas kaikai mit na bret ol kotkot i kisim i kam, tasol Lo bilong Moses i tok, ol dispela pisin i no klin long ai bilong God na ol i save kaikai mit bilong samting i dai pinis. Olsem na Elaija i mas bilip olsem Jehova bai was gut, na bai mit ol kotkot i kisim i kam i no mit bilong samting i dai pinis, em mit i no gat blut long en. Sampela man bilong skelim tok bilong Baibel ol i no bilipim dispela mirakel, olsem na ol i tok, long Baibel bilong pastaim i no gat dispela tok “ol kotkot,” i gat tok olsem “ol Arap.” Tasol gutpela tru Jehova i makim ol kotkot bilong givim kaikai long Elaija​—⁠dispela i giamanim ol Israel na taim ol i lukim ol dispela pisin nating i no klin long ai bilong God ol i kisim ol liklik hap kaikai na flai i go long ples i no gat man, ol i no ting ol i go givim kaikai long dispela man em Ahap tupela Jesebel i wok long painim em long olgeta kantri i stap klostu long kantri Israel!​—⁠1 King 18:​3, 4, 10.

Taim bilong biksan i stap longpela taim na ating Elaija i bin tingting planti, bai liklik wara Kerit i drai o nogat. Long taim bilong biksan, planti liklik wara long kantri Israel i save drai, olsem na “sampela taim bihain,” wara Kerit tu i drai. Tarangu, Elaija! Em i lukim dispela wara i no ran strong moa, na long olgeta de ol liklik hap wara i stap yet i wok long drai. Ating em i tingting planti long samting bai painim em taim wara i drai olgeta. Tasol maski. Elaija i no ranawe. Wara i drai pinis, orait nau tasol Jehova i givim sampela tok moa long Elaija. Em i tokim Elaija long i go long taun Sarefat, long haus bilong wanpela meri wanpis em God i bin makim em bilong lukautim Elaija long kaikai samting.​—⁠1 King 17:​7-9.

Taun Sarefat! Olaman, em wanpela taun bilong biktaun Saidon, em as ples bilong Jesebel, na papa bilong Jesebel i bin stap king long en! Ating Elaija i tingting planti​—⁠sapos em i go long dispela taun, bai bagarap i painim em o nogat? Tasol maski. Em i bihainim tok. Em i “kirap i go long Sarefat.”​—⁠1 King 17:⁠10.

Jehova i Givim Kaikai na Laip

Em i bihainim tok na em i kisim gutpela pe. Em i bungim dispela meri, olsem God i tok pinis, em man bilong em i dai pinis, na dispela meri i gat kain strongpela bilip em ol wanples bilong Elaija i sot long en. Dispela rabismeri i gat liklik hap plaua na wel inap tasol long wokim bret bilong em wantaim pikinini man bilong em, na taim tupela i kaikai pinis, bai ol i no gat kaikai moa. Tasol maski em i sot tru, em i amamas long kukim bret bilong Elaija pastaim; em i bilip tru long tok promis bilong Elaija olsem Jehova bai mekim na bai plaua na wel bilong em i no ken pinis inap long taim ol i no sot moa. Olaman! Dispela meri i gat strongpela bilip tru! Olsem na Krais Jisas i stori long dispela gutpela pasin bilong em bilong kamapim pasin nogut bilong ol Israel long taim bilong em, em ol i no bilip.​—⁠1 King 17:​13-16; Luk 4:​25, 26.

Dispela mirakel i strongim bilip bilong dispela meri wanpis na Elaija, tasol nau wanpela samting i laik kamap em bai traim tru bilip bilong tupela. Wantu pikinini man bilong dispela meri i dai. Meri i bel hevi tru na em i ting olsem Elaija, em “man i save mekim wok bilong God,” em i as bilong dispela hevi. Em i tingting planti, nogut God i tingim wanpela rong bilong em bilong bipo na em i givim dispela strafe long em. Tasol Elaija i karim pikinini i go long wanpela rum antap. Em i save, Jehova inap givim kaikai na em inap givim laip tu. Jehova em i as bilong laip! Olsem na Elaija i beten strong planti taim na pikinini i kisim laip gen.

Elaija i bilip olsem ol man i dai pinis bai ol i kirap bek, tasol em i no namba wan man i bilip olsem. Tasol long stori bilong Baibel em i namba wan man God i givim strong long em bilong wokim mirakel na kirapim bek man i dai pinis. Pikinini i “kirap gen”! Yumi save, mama i amamas nogut tru taim Elaija i kisim pikinini i kam givim long mama, na em i tok: “Lukim. Pikinini bilong yu i stap gut.” Ating aiwara bilong mama i kam daun na em i tok: “Tru tumas, nau mi save, yu man bilong mekim wok bilong God. Na tru tumas, Bikpela yet i save givim tok long yu na yu save autim.”​—⁠1 King 17:​17-24.

“God Bilong Mi Em Jehova”

Insait bilong nem bilong Elaija i olsem “God Bilong Mi Em Jehova.” Dispela nem i stret tru long em! Taim i no gat ren na i no gat kaikai, Jehova i bin givim kaikai na wara long em; taim ol narapela man i mekim pasin nogut, Jehova i soim stretpela rot long em; taim manki i dai, Jehova i givim laip gen long em long rot bilong Elaija. Long olgeta taim Elaija i save wetim Jehova i lukautim em long kaikai samting, na em i bihainim tok bilong Jehova, na wetim Jehova i mekim holi nem bilong Em. Long ol dispela rot em i kamapim bilip bilong em, na em i kisim gutpela pe​—⁠i gat sampela as moa na em i ken bilip long Jehova. Na em i kisim gutpela pe olsem taim em i mekim ol narapela wok God bilong em, Jehova, i givim long em, em ol wok i hatwok moa na em inap pret long mekim, na em i wokim sampela bikpela mirakel moa yet.​—⁠Lukim 1 King, sapta 18.

Ol wokboi bilong Jehova long nau tu ol i save kisim kain gutpela pe olsem. Tru, ating Jehova i no ken wokim mirakel na givim kaikai long yumi, o givim strong long yumi bilong kirapim bek man i dai pinis; nau em i no taim bilong ol kain mirakel olsem. Tasol Jehova yet i no senis​—⁠em i mekim yet wankain pasin olsem long taim bilong Elaija.​—⁠1 Korin 13:8; Jems 1:⁠17.

Olsem na long nau tu Jehova inap givim bikpela wok long yumi na ating bai yumi tingting planti long en, na ating yumi mas autim tok bilong Em long ol hap i hatwok long autim tok long en, o i gat planti birua long en na yumi inap pret. O ating bai ol man i mekim nogut long yumi. O ating bai yumi sot long kaikai. Tasol Jehova i save lukautim yet ol wokboi bilong em i stap gut long em, na em i soim rot long ol​—⁠em i mekim olsem long olgeta wokboi wan wan na long lain bilong Em olgeta. Em i bihainim yet pasin bilong em long bipo​—⁠em i givim strong long ol wokboi bilong em inap long ol i mekim ol wok em i makim bilong ol. Na em i save helpim ol long sanap strong, maski wanem kain hevi i painim ol nau long dispela taim nogut.​—⁠Buk Song 55:⁠22.

[Ol Futnot]

[Piksa long pes 18]

Olsem Elaija, yu bilip tru olsem Jehova bai lukautim ol wokboi bilong em?