Bihainim Bilip Bilong Ol

Em i Sambai Long Lotu i Tru

ELAIJA i lukluk long bikpela lain manmeri i wokabaut i kam antap long maunten Karmel. Tulait i wok long bruk na i no gat bikpela lait yet, tasol em inap lukim gut olsem ol dispela man i stap rabis na i no gat kaikai. Inap 3-pela yia na hap i gat taim nogut bilong bikpela san na dispela i bin bagarapim ol tru.

Namel long ol dispela man em ol 450 profet bilong Bal, ol i hambak tru na ol i nolaik tru long Elaija, em profet bilong Jehova. Kwin Jesebel i bin kilim i dai planti wokman bilong Jehova, tasol dispela man i sanap strong yet na i sakim pasin bilong lotu long Bal. Tasol em bai stap strong i go inap long wanem taim? Ating ol dispela pris i ting ol i planti, na dispela man wanpis i no inap sanap strong. (1 King 18:​3, 19, 20) King Ahap tu i kam. Em i sindaun long karis king bilong em. Em tu i no laikim Elaija.

Long dispela de ol narakain samting bai painim dispela profet, em wanpela tasol i sambai long lotu i tru. Taim Elaija i lukluk i stap, narapela kain pait i wok long kamap namel long ol gutpela man na ol man nogut, kain pait olsem i no bin kamap bipo. Em i pilim olsem wanem taim tulait i laik bruk? I no olsem em i no pret, nogat, em i wanpela “man wankain olsem yumi.” (Jems 5:17) Yumi ken save tru olsem: Ol man i bikhet na lusim bilip, apostet king bilong ol, na ol pris i laik kilim em i dai, ol i raunim Elaija, olsem na em i pilim tru olsem em i stap wanpis.​—⁠1 King 18:⁠22.

Tasol wanem samting i mekim na dispela bikpela hevi i painim ol Israel? Na dispela stori inap skulim yu long wanem samting long nau? Baibel i kirapim yumi long tingim gut ol gutpela wokman bilong God na “bihainim pasin bilong bilip bilong ol.” (Hibru 13:⁠7) Orait nau yumi ken tingim stori bilong Elaija.

Pait i Go Bikpela Tru

Klostu long laip olgeta bilong em, Elaija i no inap mekim wanpela samting taim em i lukim ol man i sakim na daunim pasin bilong lotuim Jehova. Pasin bilong lotuim Jehova em i nambawan gutpela samting i stap long ples bilong em na i nambawan gutpela samting lain bilong em i ken mekim. Inap longpela taim ol Israel i hatwok long makim olsem ol bai bihainim lotu i tru o lotu giaman, olsem ol bai lotuim God Jehova o lotuim ol god giaman bilong ol lain i stap klostu long ol. Long taim bilong Elaija dispela hatwok i go bikpela moa yet.

King Ahap i bin maritim Jesebel, em pikinini meri bilong king bilong Saidon. Jesebel i tingting strong long kirapim ol Israel long lotuim god Bal na pinisim pasin bilong lotuim Jehova. Kwiktaim Ahap i bihainim laik bilong em. Ahap i wokim wanpela tempel na alta bilong Bal, na i go pas long brukim skru long dispela god bilong ol haiden. Em i bagarapim tru bel bilong Jehova.​—⁠1 King 16:​30-​33.a

Wanem samting i mekim na pasin bilong lotuim Bal i nogut tru? Dispela i pulim ol Israel, na kirapim planti long lusim God tru. Na tu, em i wanpela lotu nogut tru na i bagarapim ol man. I gat ol pamukman na pamukmeri i save stap long tempel, na ol i mekim ol pasin pamuk nogut tru, na kilim i dai ol pikinini olsem ofa. Jehova i lukim dispela samting na em i salim Elaija i go long Ahap bilong toksave olsem ren na wara bilong nait i no ken kam daun long graun inap long profet bilong God bai tokaut olsem dispela hevi bai pinis. (1 King 17:⁠1) Sampela yia i lus inap long taim Elaija i kamap long Ahap na i tokim em long bungim ol manmeri na ol profet bilong Bal long maunten Karmel.

Tasol dispela i makim wanem samting long yumi long nau? Ating sampela bai ting olsem stori bilong pasin bilong lotuim Bal i no samting yumi mas tingim long nau, long wanem, yumi no save lukim ol tempel na alta bilong Bal. Tasol dispela stori i no samting bilong bipo tasol. (Rom 15:⁠4) Dispela tok “Bal” i makim “papa bilong wanpela samting” o “bosman.” Jehova i bin tokim lain bilong em olsem ol i mas makim em olsem “bal” bilong ol, o olsem man bilong ol. (Aisaia 54:⁠5) Ating yu wanbel long tok olsem ol man i save mekim yet wok bilong kain kain bosman na i no bilong God i Gat Olgeta Strong, a? Tru tumas, maski ol man i mekim wanem olsem ol i yusim laip bilong ol long kisim planti mani, bikpela namba, amamas, mekim maritpasin samting, o ol i mekim wok bilong kain kain narapela god na i no bilong Jehova, ol i makim wanpela bosman bilong ol. (Matyu 6:24; Rom 6:16) Olsem na yumi ken tok, ol bikpela samting ol man i bin mekim bilong lotuim Bal i stap strong yet long nau. Dispela resis bilong bipo namel long Jehova na Bal inap helpim yumi long bihainim savetingting taim yumi makim olsem yumi bai mekim wok bilong husat.

“Tupela Tingting”​—⁠Olsem Wanem?

Taim ol man i stap antap long het bilong maunten Karmel ol inap lukim gut Israel​—⁠kirap long ples daun bilong Kison i go inap long Biksolwara (solwara Mediterenian) na i go long ol maunten bilong Lebanon long hap not.b Tasol taim san i wok long kamap long dispela bikpela de, ol samting i luk nogut tru. Dispela gutpela graun Jehova i bin givim long ol pikinini bilong Abraham i stap nogut tru. San i mekim na graun i strong tru. Pasin longlong bilong ol lain bilong God yet i bin kamapim dispela samting! Taim ol dispela manmeri i bung wantaim, Elaija i kam long ol na i tokim ol: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.”​​—⁠1 King 18:⁠21.

Wanem mining bilong tok bilong Elaija olsem ol i “manmeri bilong tupela tingting”? Em olsem dispela lain i no luksave long ol i mas makim olsem ol bai lotuim Jehova o lotuim Bal. Ol i ting ol inap lotuim tupela wantaim​—⁠olsem ol i ken amamasim Bal long ol pasin nogut tru ol i mekim na ol i ken askim God Jehova long helpim ol. Ating ol i ting Bal bai mekim gut long ol gaden na animal bilong ol, na “God i bosim ol ami” i ken lukautim ol long pait. (1 Samuel 17:45) Ol i lusim tingting long wanpela bikpela tok tru​—⁠em samting planti man long nau tu i no tingim​—⁠olsem Jehova i no orait long ol man i lotuim em na ol narapela god wantaim. Em i tok ol man i mas lotuim em wanpela tasol na i stret ol i mekim olsem. Em i no orait liklik long ol man i lotuim em na ol narapela samting wantaim. Em i nolaik tru long dispela!​​—⁠Kisim Bek 20:⁠5.

Olsem na ol dispela Israel i gat “tupela tingting,” ol i olsem wanpela man i laik wokabaut long tupela rot long wankain taim. Long nau planti man i save mekim wankain rong, ol i larim ol narapela “bal,” olsem ol narapela bosman, i bosim laip bilong ol na isi isi ol i lusim pasin bilong lotuim God! Dispela strongpela tokaut bilong Elaija long lusim tupela tingting inap helpim yumi long skelim gen tingting bilong yumi long wanem samting i stap nambawan long laip bilong yumi na yumi lotuim husat.

Bikpela Traim

Orait nau Elaija i tokim ol long mekim wanpela traim. Em i isi tru long mekim. Ol pris bilong Bal i mas sanapim wanpela alta na wokim ofa long en, na bihain ol i mas beten long god bilong ol long salim paia i kam daun. Elaija bai mekim wankain. Em i tok: “Wanem god i harim prea na i salim paia i kam daun na i kukim dispela ofa, orait em tasol em i God tru.” Elaija i save husat i God tru. Em i gat strongpela bilip tru, olsem na em i larim ol profet bilong Bal i go pas long beten long god bilong ol. Em i helpim tru ol dispela birua, olsem em i larim ol i makim wanem bulmakau ol i laik givim olsem ofa na ol i ken go pas long singaut long Bal.c​​—⁠1 King 18:​24, 25.

Nau yumi no stap long taim we i gat ol mirakel. Tasol Jehova i no senis. Yumi ken bilip tru long em olsem Elaija i bin mekim. Olsem: Taim sampela man i no wanbel long ol tok em Baibel i skulim yumi long en, yumi no ken pret, yumi ken larim ol i kamapim tingting bilong ol pastaim. Olsem Elaija, yumi ken lukluk i go long trupela God bilong stretim dispela samting. Yumi inap mekim olsem taim yumi bilip long Tok Bilong God, em “bilong stretim ol manmeri tingting bilong ol i no stret,” na yumi no bilip long yumi yet.​​—⁠2 Timoti 3:​16.

Ol profet bilong Bal i putim ofa bilong ol long alta na ol i singaut long god bilong ol. Ol i singaut planti taim olsem: “Bal, mipela i laik bai yu mas harim beten bilong mipela.” Ol i singaut olsem inap planti minit na aua i go i go. Baibel i tok: “Tasol i no gat bekim long beten bilong ol.” Long belo Elaija i kirap tok bilas long ol, na i tokim ol olsem Bal i mas tingting long wanpela samting i stap na em i no harim ol, o em i go kisim win, o em i slip i stap na wanpela i mas kirapim em. Em i kirapim ol dispela profet giaman: “Yupela i no ken slek.” Tru tumas, em i lukim olsem pasin bilong lotuim Bal i giaman stret, na em i laik ol manmeri bilong God i mas save olsem dispela kain lotu i giaman.​—⁠1 King 18:​26, 27.

Olsem na ol pris bilong Bal i strong moa, ol i “singaut strong moa na ol i kisim ol naip na ol sotpela bainat na ol i bihainim pasin bilong lotu bilong ol na katim nabaut skin bilong ol yet. Na blut i ran long bodi bilong ol.” Tasol ol dispela samting i no helpim ol! “I no gat bekim long beten bilong ol, na i no gat wanpela samting i kamap. Nogat tru.” (1 King 18:​28, 29) Tru tumas, i no gat Bal. Em wanpela god giaman em Satan i bin kamapim bilong pulim ol man long lusim Jehova. Long dispela taim bipo na long nau tu, sapos man i makim narapela bosman na i no makim Jehova, em bai kisim bikpela bel hevi na sem.​—⁠Song 25:3; 115:​4-8.

Ol i Kisim Bekim

Long apinun tru, Elaija i mekim ofa bilong em. Em i stretim wanpela alta bilong Jehova em ating bipo ol birua bilong lotu i tru i bin brukim. Em i kisim 12-pela ston, ating em i laik kirapim planti manmeri long 10-pela lain bilong Israel long tingim olsem Jehova i bin givim Lo long 12-pela lain na ol i mas bihainim yet ol dispela lo. Orait nau em i putim ofa na kapsaitim wara long olgeta samting. Ating em i kisim dispela wara long solwara Mediterenian i stap klostu. Em i wokim tu wanpela baret i raunim alta, na pulimapim wara long en. Bipo em i larim ol profet bilong Bal long mekim olgeta samting bilong helpim ol yet, tasol nau em i no mekim ol samting na bai isi long Jehova long kukim ofa​—⁠em i bilip strong tru long God.​​—⁠1 King 18:​30-​35.

Taim olgeta samting i redi, Elaija i mekim prea. Em i sotpela prea, tasol prea i kamapim ples klia ol samting i bikpela samting long Elaija. Namba wan bikpela samting, em i laik bai ol i mas save olsem Jehova, na i no Bal, em i “God bilong Israel.” Namba tu, em i laik olgeta i mas save olsem em yet i wokman bilong Jehova, na ol i mas litimapim nem bilong God tasol. Las tru, em i kamapim olsem em i tingim yet lain bilong em, long wanem, em i laik Jehova i “wok long tanim bel bilong ol i kam bek” long Em. (1 King 18:​36, 37) Maski pasin bilong ol long sakim bilip i kamapim planti hevi, Elaija i laikim tru ol. Olsem wanem? Long ol beten bilong yumi long God, yumi save soim olsem yumi tingim tru nem bilong God, na yumi gat pasin daun na tingim tru ol narapela em ol i mas i gat helpim?

Paslain long Elaija i mekim beten, ating ol manmeri long dispela hap i tingting planti, Jehova bai wankain olsem giaman god Bal o nogat. Tasol taim em i beten pinis i no gat taim bilong tingting planti. Baibel i tok: “Bikpela i salim paia i kam daun. Na paia i kukim tru dispela ofa na ol paiawut na ol ston bilong alta na graun long arere bilong alta. Na wara long baret tu i drai olgeta.” (1 King 18:38) Man! Em i narapela kain bekim tru, a? Na ol manmeri i mekim wanem?

Olgeta bilong ol i singaut olsem: “Bikpela tasol em i God tru. Bikpela tasol em i God tru.” (1 King 18:39) Em nau, nau ol i lukim husat em i God tru. Tasol ol i no bin kamapim yet bilip bilong ol. Tru tumas, pasin bilong tokaut olsem Jehova em i God tru bihain long ol i lukim paia i kam daun long heven taim Elaija i mekim wanpela beten pinis, dispela i no kamapim klia olsem ol i gat strongpela bilip. Olsem na Elaija i askim ol long mekim sampela samting moa. Em i askim ol long mekim samting ol i mas mekim inap planti yia i go pinis​—⁠bihainim Lo Bilong Jehova. Lo Bilong God i tok ol i mas kilim i dai ol profet giaman na ol man i lotuim ol narapela god. (Lo 13:​5-9) Ol dispela pris bilong Bal ol i strongpela birua bilong God Jehova, na long laik bilong ol yet ol i sakim samting Jehova i tingting pinis long mekim. Yu ting God i mas marimari long ol? Ol dispela pris i no bin marimari long ol pikinini i no gat asua na ol i kukim ol olsem ofa bilong Bal taim ol i stap laip yet, olsem na i no gat as na God i ken marimari long ol, a? (Sindaun 21:13; Jeremaia 19:⁠5) Tru tumas, i no stret God i marimari long ol. Olsem na Elaija i tokaut long kilim ol i dai, na tru tumas, ol i mekim olsem.​​—⁠1 King 18:⁠40.

Sampela saveman long nau i toktok planti long dispela samting i bin kamap long maunten Karmel. Sampela i tingting planti, nogut sampela man em ol i strong long lotu ol i kisim dispela olsem eskius na ting i stret long pait na bagarapim man bilong ol narapela lotu em ol i no orait long ol. Na tru tumas, long nau i gat planti man i strong tumas long lotu bilong ol na ol i redi long pait na bagarapim narapela. Tasol Elaija i no kain man olsem. Em i bihainim laik bilong Jehova na mekim stretpela kot. Na tu, ol Kristen tru i save olsem ol i no ken bihainim pasin bilong Elaija na kilim i dai ol man nogut. Taim Mesaia i kamap pinis, tok Krais i mekim long Pita i kamapim pasin ol disaipel bilong Jisas i mas bihainim. Em i tok: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Matyu 26:52) Jehova bai mekim wok long Pikinini bilong em bilong kamapim stretpela kot bilong Em long bihain.

Ol Kristen tru i gat wok long kamapim bilip long laip bilong ol. (Jon 3:16) Wanpela rot long mekim olsem em long rot bilong bihainim pasin bilong ol gutpela man olsem Elaija. Em i bin lotuim Jehova wanpela tasol na em i bin kirapim strong ol narapela long mekim olsem. Long strongpela bel em i kamapim klia lotu giaman bilong Satan olsem em i samting i save pulim ol man long lusim Jehova. Na em i bilip na wet long Jehova long stretim ol samting, em i no bilip long save na tingting bilong em yet. Tru tumas, Elaija i sambai long lotu i tru. Em i gutpela olsem yumi olgeta wan wan i bihainim pasin bilong bilip bilong em, a?

[Ol Futnot]

[Rait long pes 20]

Sapos man i makim narapela bosman na i no makim Jehova, em bai kisim bel hevi

[Piksa long pes 21]

“Bikpela em i God tru”