Bihainim Bilip Bilong Ol

Ol Popaia Bilong Em i Skulim Em

JONA i laik bai em i ken pasim yau na em i no inap harim ol bikpela pairap nogut. Traipela win i meknaisim ol sel na rigin bilong sip na ol i pairap strong, na ol traipela si i bruk long sip na olgeta plang samting bilong sip i seksek na pairap. Tasol samting i nogut moa long yau bilong Jona em bikpela singaut bilong kepten wantaim ol boskru bilong em taim ol i wok strong long stiaim sip na bai em i no ken i go daun insait long solwara. Jona i bilip tru olsem ol dispela man bai i dai​—na asua bilong em tasol na bagarap bai painim ol!

Wanem samting i kamap na dispela bikpela hevi i painim Jona? Em i bin mekim wanpela bikpela popaia long wok bilong God bilong em, Jehova. Em i bin mekim wanem? Na em inap stretim dispela samting o nogat? Bekim bilong ol dispela askim inap skulim gut yumi. Olsem: Stori bilong Jona i helpim yumi long save olsem, maski ol man i bilip tru, ol tu inap mekim sampela popaia​—na ol inap stretim pasin bilong ol.

Wanpela Profet Bilong Galili

Taim ol man i tingting long Jona, planti ol i save tingim ol popaia o pasin kranki bilong em, olsem sampela taim em i bikhet long God na het bilong em i strong. Tasol i gat planti samting moa long Jona em yumi mas save long en. Tingim: God Jehova i bin makim Jona long mekim wok olsem profet bilong em. Jehova i no inap makim em long mekim kain bikpela wok olsem sapos em i no bin stap gut long God o em i no bihainim stretpela pasin.

Long 2 King 14:​25, yumi kisim sampela save long Jona. Em i bilong Gathefer, em i stap olsem 4-pela kilomita longwe long Nasaret, em taun we Jisas Krais bai i go bikpela long en inap 800 yia samting bihain.a Jona i mekim wok profet long taim King Jeroboam Namba 2 i bosim tenpela lain bilong Israel. Elaija i bin stap paslain tru long dispela taim, na senis bilong em, Elisa, i bin i dai long taim papa bilong Jeroboam i stap king. Jehova i bin mekim wok long Elaija na Elisa long rausim lotu bilong Bal long Israel, tasol ol Israel i bikhet na i laik lusim gen rot. Long dispela taim, Israel i stap aninit long wanpela king em i wok long “mekim pasin nogut long ai bilong Bikpela.” (2 King 14:24) Olsem na wok bilong Jona i gat hatwok long en na i no samting bilong amamas. Tasol em i stap gut long dispela wok.

Tasol wanpela taim, bikpela senis i painim Jona. Em i kisim wanpela wok long Jehova na em i pilim hatwok tru long mekim. Jehova i tokim em long mekim wanem?

‘Kirap na Go Long Ninive’

Jehova i tokim Jona: “Yu kirap na yu go long dispela bikpela taun Ninive, na yu givim strongpela tok long ol manmeri. Mi lukim pinis planti pasin nogut ol i mekim.” (Jona 1:2) I no hatwok long save long as na Jona i tingting planti long mekim dispela wok. Ninive i stap longwe olsem 800 kilomita i go long hap is, na em i mas wokabaut long lek inap wanpela mun samting bilong kamap long dispela ples. Tasol ating Jona i no tingting tumas long hatwok bilong wokabaut long dispela longwe rot. Long Ninive, em i mas autim strongpela tok bilong Jehova long bagarap bai painim ol Asiria, em ol i save mekim ol pasin nogut tru long bagarapim ol man. Taim Jona i bin autim tok profet long lain bilong God yet, ol i no harim; orait olsem wanem ol dispela haiden bai harim tok bilong em? Olsem wanem wanpela wokman tasol bilong Jehova em inap mekim gut wok bilong em long dispela bikpela taun Ninive, bihain ol bai kolim olsem taun bilong “kilim ol man i dai”?​—Nahum 3:​1, 7.

Ating Jona i bin kisim ol dispela kain tingting. Yumi no save. Tasol yumi save olsem em i bin ranawe. Jehova i bin tokim em long go long hap is, tasol Jona i ranawe i go long hap wes. Em i go kamap long taun Jopa i stap long nambis, na em i kalap long wanpela sip i laik i go long Tarsis. Sampela saveman i tok Tarsis i stap long Spen. Sapos olsem, orait Jona i laik i go long hap i stap longwe long Ninive inap 3,500 kilomita. Bilong mekim dispela kain raun i go inap long arere tru bilong solwara Mediterenian, ating sip bai raun inap wanpela yia olgeta! Man! Jona i gat strongpela tingting tru long ranawe long dispela wok Jehova i bin givim long em!

Orait yu ting yumi ken tok Jona em man bilong pret na i no gat bun? Yumi no ken hariap long tok olsem. Sampela samting em i bin mekim i soim olsem em i gat strongpela bel tru. Tasol olsem yumi olgeta, Jona em i man bilong graun tasol na em i gat planti pasin kranki em i hatwok tru long daunim. (Song 51:5) Sampela taim yumi olgeta i save pret na yumi hatwok long daunim, a?

Sampela taim i luk olsem God i tokim yumi long mekim wanpela samting yumi ting i hatwok long mekim, o yumi no inap tru long mekim. Na ating yumi pret liklik long autim gutnius bilong Kingdom Bilong God long ol man, em wok ol Kristen i mas mekim. (Matyu 24:14) Yumi inap lusim tingting long wanpela tok tru Jisas i bin mekim, olsem: “God em inap mekim olgeta samting.” (Mak 10:27) Sapos sampela taim yumi lusim tingting long dispela tok i tru, ating yumi inap pilim dispela hatwok bilong Jona. Tasol taim Jona i ranawe, wanem ol samting i kamap long em?

Jehova i Stretim Bikhet Profet Bilong Em

Long tingting yumi ken lukim Jona i painim ples bilong sindaun long sip, ating em kago sip bilong ol Fonisia. Em i lukluk i stap taim kepten na ol boskru i hariap hariap long mekim ol samting bambai ol i ken luslain na i go. Isi isi sip i wok long go ausait long solwara na Jona i no inap lukim moa dispela ples, na ating em i tingting olsem em i abrusim pinis dispela taim nogut em i bin tingting planti long en. Tasol wantu win i senis.

Strongpela win i kirapim si na traipela si nogut tru i kirap; si i bruk i go antap tru, ating em i winim ol sip bilong nau. Em nau, ating i no longtaim na i olsem dispela liklik sip ol i wokim long plang em i lus namel long ol traipela si i go antap tru na i go daunbilo gen. Olsem wanem? Ating long dispela taim stret Jona i kisim save long samting bihain em i raitim​—olsem “Bikpela i mekim strongpela win i kamap long solwara”? Yumi no save. Tasol em i lukim ol boskru i singaut long ol god bilong ol, na em i save olsem ol dispela god i no inap helpim ol. Stori em i raitim i tok olsem: “Win wantaim ren i strong tumas, na sip i laik bagarap.” (Jona 1:4; Wok Pris 19:4) Na olsem wanem Jona inap beten long dispela God em i bin ranawe long en?

Jona i pilim olsem em i no inap helpim ol liklik, olsem na em i go daun aninit long dek bilong sip na i painim ples bilong slip, na em i slip indai olgeta.b Kepten i painim Jona na i kirapim em na tokim em long beten long god bilong em olsem ol narapela i mekim. Ol boskru i pilim olsem strong bilong wanpela god i mekim na dispela traipela si i kirap, olsem na ol i putim nem bilong olgeta wan wan long bek bilong lukim olsem husat namel long ol i gat asua na dispela hevi i kamap. Ating lewa bilong Jona i sut taim em i lukim dispela samting. I no longtaim na as bilong hevi i kamap ples klia. Jehova i stiaim dispela bikpela win na ren, na nem ol i kisim long bek, i go stret long wanpela man​—em Jona yet!​—Jona 1:​5-7.

Jona i tokim ol boskru long olgeta samting em i bin mekim. Em i wokman bilong Jehova, em God i Gat Olgeta Strong. Em dispela God em Jona i ranawe long en na i mekim nogut bel bilong Em, olsem na nau dispela bikpela bagarap i laik painim ol. Ol man i kirap nogut. Jona i lukim pinis olsem ol i pret nogut tru. Ol i askim em long ol i mas mekim wanem na bai ol yet wantaim sip i no ken lus. Orait Jona i tok wanem? Ating em i guria stret taim em i tingting long ol i mas tromoi em i go daun long solwara i gat traipela si na i kol nogut tru na em bai i dai. Tasol olsem wanem em i ken larim ol dispela man i bagarap taim em i save pinis long samting em inap mekim bilong helpim ol long abrusim bagarap? Olsem na em i tok: “Yupela kisim mi na tromoi mi i go long solwara, na bai si i dai. Mi save, mi yet mi as bilong dispela biksi i kamap long yupela.”​—Jona 1:12.

Em nau, wanpela man bilong pret na i no gat bun em i no inap tok olsem, a? Olsem na ating bel bilong Jehova i bin pilim amamas tru taim em i lukim strongpela bel bilong Jona na pasin bilong em long redi long i dai bilong helpim ol arapela long dispela taim nogut. Nau yumi lukim strongpela bilip bilong Jona. Yumi inap bihainim pasin bilong em sapos yumi putim wok bilong helpim ol narapela man i go pas long ol samting bilong helpim yumi yet. (Jon 13:​34, 35) Taim yumi lukim wanpela man i sot long helpim long ol samting bilong skin, o long ol samting bilong lotu, o tingting na bel bilong em i bagarap, orait yumi save daunim laik bilong yumi yet bambai yumi inap helpim em? Jehova i save amamas tru taim yumi mekim olsem!

Ating ol boskru tu i pilim tru gutpela pasin bilong Jona, long wanem, pastaim ol i no laik bihainim tok bilong em. Ol i wok strong long mekim olgeta samting bambai sip i no ken bagarap. Tasol hatwok bilong ol i lus nating. Bikpela win na ren na biksi i go nogut tru. Bihain ol i lukim olsem ol i no gat narapela rot. Ol i singaut long God bilong Jona, em Jehova, long marimari long ol, na ol i apim Jona na tromoi em i go daun long solwara.​—Jona 1:​13-15.

Jehova i Marimari na Kisim Bek Jona

Jona i pundaun i go insait long biksi. Ating biksi i mekim na Jona i wok strong bambai si i no ken daunim em olgeta, na em i lukim sip i lusim em hariap na i go. Tasol biksi i kam bruk antap long em na i subim em i go daun insait long solwara. Em i wok long i go daun moa, na em i pilim olsem i no gat rot moa long em i ken abrusim bagarap.

Bihain Jona i stori long tingting bilong em long dispela taim. Em i bel hevi na i tingting olsem em i no inap lukim moa dispela naispela tempel bilong Jehova long Jerusalem. Em i pilim olsem em i go daun insait tru long solwara, long as bilong ol maunten, na gras bilong solwara i raunim het bilong em. I luk olsem dispela ples bai kamap matmat bilong em.​—Jona 2:​2-6.

Tasol wet pastaim! Wanpela samting i wok long i kam klostu​—em wanpela traipela blakpela samting i gat laip. Nau em i sut i kam long Jona. Wanpela traipela maus i op na i daunim Jona i go insait long bel bilong en!

Ating Jona i ting, nau em bai i dai. Tasol em i kirap nogut tru! Em i stap laip yet! Ol bun bilong em i no brukbruk, na skin bilong em i no meme. Em i pulim win yet, maski i luk olsem i stret tru long dispela ples i kamap olsem matmat bilong em. Isi isi bel na tingting bilong Jona i kirap tru. Em i save, God bilong em Jehova i bin “salim wanpela traipela pis, na dispela pis i daunim Jona.”c​—Jona 1:17.

Sampela minit i lus, na bihain sampela aua i lus. Long dispela ples tudak nogut tru, Jona i stretim tingting bilong em na i beten long God Jehova. Dispela beten olgeta i stap long sapta 2 bilong Buk Jona na i kamapim klia olsem Jona i gat bikpela save long ol Skripsa, long wanem, planti taim em i kamapim tok bilong Buk Song. Na beten bilong Jona i soim tu gutpela pasin bilong em, em pasin bilong mekim tok tenkyu. Long pinis bilong beten em i tok: “Mi laik mekim song bilong litimapim nem bilong yu, na mi laik givim ofa long yu. Olgeta samting mi promis pinis long yu, em bai mi mekim. Bikpela, yu wanpela tasol yu save kisim bek mipela, na mipela i stap laip.”​—Jona 2:9.

Jona i kisim save olsem Jehova inap kisim bek ol man maski ol i stap we o long wanem taim. Maski Jona i stap insait “long bel bilong pis,” Jehova i painim na kisim bek dispela wokman bilong em i stap nogut. (Jona 1:​17) Jehova wanpela tasol inap mekim na man i stap laip inap 3-pela san na 3-pela nait insait long bel bilong bikpela pis. Long nau i gutpela long yumi mas tingim olsem Jehova em dispela God em “wanpela tasol i save bosim laip bilong [yumi].” (Daniel 5:23) Jehova yet i as bilong laip bilong yumi na yumi stap laip. Yumi save tenkyu long em? Olsem na yumi gat dinau long Jehova long bihainim ol tok bilong em, a?

Olsem wanem long Jona? Em i bin lain long soim tenkyu bilong em long Jehova long rot bilong bihainim tok bilong Em? Yes, em i bin mekim olsem. Tripela san na tripela nait i go pinis na pis i bringim Jona i go sua na i “trautim Jona long nambis.” (Jona 2:10) Tingim​—Jona i no gat wok long swim na kamap long nambis! Tasol i no longtaim na samting i kamap bilong traim pasin bilong em long amamas long gutpela samting God i bin mekim long em. Jona 3:​1, 2 i tok: “Bikpela i tokim Jona gen olsem, ‘Yu kirap na yu go long dispela bikpela taun Ninive. Na tok mi givim yu pinis, em yu mas autim long ol manmeri bilong dispela taun.’ ” Orait Jona bai mekim wanem?

Jona i no wet. Baibel i tok: “Orait Jona i bihainim tok bilong Bikpela na em i kirap i go long Ninive.” (Jona 3:3) Em nau, Jona i bihainim tok. Ol popaia bilong em i bin skulim em. Long dispela samting tu yumi mas bihainim strongpela bilip bilong Jona. Yumi olgeta i save mekim sin, na yumi olgeta i save popaia. (Rom 3:23) Tasol olsem wanem? Yumi save les na lusim wok bilong God, o yumi larim ol popaia i skulim yumi na yumi baut na bihainim tok bilong God na mekim wok bilong em?

Yu ting Jehova i bin praisim Jona long pasin bilong em long bihainim tok? Tru tumas. I luk olsem bihain Jona i kisim save olsem ol dispela boskru i bin abrusim bagarap. Taim Jona i tok na ol i tromoi em i go long solwara, wantu bikpela win na si i dai, na ol boskru i “pret tru long Bikpela” na ol i kirap mekim ofa long Jehova, na ol i no mekim ofa long ol god giaman bilong ol.​—Jona 1:​15, 16.

Na bihain tru Jona i kisim gutpela prais moa. Dispela stori bilong Jona i bin stap insait long bel bilong bikpela pis inap 3-pela de, Jisas i kolim dispela stori olsem tok profet bilong makim taim em yet bai stap long matmat. (Matyu 12:​38-40) Jona bai amamas tru long kisim save long dispela samting taim em i kirap bek long matmat na stap laip gen long graun! (Jon 5:​28, 29) Jehova i laik mekim gut long yu tu. Olsem Jona i bin mekim, bai yu larim ol popaia bilong yu i skulim yu na yu bihainim tok bilong Jehova na redi long daunim laik bilong yu yet bilong helpim ol narapela?

[Ol Futnot]

[Blok/​Piksa long pes 29]

Ol Man i Sutim Tok Long Jona

▪ Ol samting Buk Jona long Baibel i stori long en, ol i bin kamap tru o nogat? Kirap long bipo tru sampela man i bin sutim tok long Buk Jona. Nau long taim bilong yumi sampela man i strong long sakim dispela buk​—ol i tok em i wanpela stori nating tasol, olsem tumbuna stori. Wanpela man bilong raitim buk husat i bin i stap olsem 100 yia i go pinis, em i kamapim tok bilong wanpela pris. Dispela pris i tok stori bilong Jona na bikpela pis em i wanpela kain tok piksa tasol: Jona i bin stap long wanpela haus pasindia long Jopa, ol i kolim “Mak Bilong Weil.” Tasol em i no gat mani bilong baim rum, olsem na papa bilong haus pasindia i rausim em. Long dispela pasin i olsem wanpela bikpela weil i “daunim” em na bihain weil i “trautim” em gen! Em nau, ol man bilong sutim tok long Jona ol i strong tumas long daunim Jona, winim dispela bikpela pis!

Olsem wanem na planti man i sutim tok long Buk Jona long Baibel? Em i stori long sampela mirakel i bin kamap. I luk olsem planti man i no bilip long ol mirakel. Ol i tok ol mirakel i no inap tru long kamap. Tasol yu ting dispela em i stretpela tingting? Askim yu yet, ‘Mi bilip long namba wan tok bilong Baibel?’ Em i tok: “Bipo bipo tru God i mekim kamap skai na graun na olgeta samting i stap long en.” (Stat 1:1) Planti milion manmeri long olgeta hap ol i bihainim savetingting na ol i bilip long dispela tok. Tasol dispela namba wan tok i karamapim planti mirakel moa yet, winim ol mirakel em bihain Baibel i stori long en.

Tingim dispela: Dispela Man i bin wokim ples antap ol sta i pulap long en, na olgeta samting i stap laip long graun, yu ting em i no inap mekim ol samting em Buk Jona i stori long en? Ating em i no inap kamapim bikpela win na ren na biksi? O kirapim traipela pis long daunim wanpela man? O kirapim pis long trautim gen dispela man? Man i gat olgeta strong, em i no gat hatwok long mekim ol dispela samting.​—Aisaia 40:26.

Na sampela taim ol narapela kain samting tru i save kamap em God i no as bilong en. Olsem: Ol man i tok, long 1758, wanpela boskru bilong sip i pundaun i go insait long solwara Mediterenian na wanpela sak i daunim em. Tasol ol i sutim sak long gan na sak i trautim boskru na ol i pulim em i kam antap long sip na em i no kisim bagarap. Sapos dispela stori i tru, orait yumi bai ting em i narapela kain stret​—tasol em i no wanpela mirakel. Orait God inap mekim wok long strong bilong em long mekim ol bikpela samting moa yet, a?

Na ol man i no bilip long Baibel ol i tok i no gat wanpela man inap i stap laip insait long bel bilong pis inap 3-pela de olgeta na i no sot long win. Tasol ol man bilong graun i bin kisim save long pulimapim win long ol tang bilong helpim ol long pulim win inap longpela taim insait long wara. Orait yu ting God inap mekim wok long bikpela strong na savetingting bilong em bilong helpim Jona long i stap laip na pulim win inap long 3-pela de? Wanpela ensel i bin tokim Maria, mama bilong Jisas: “I no gat wanpela samting God i no inap mekim.”​—Luk 1:37.

Wanem samting moa i makim olsem stori bilong Buk Jona long ol samting i bin kamap bipo em i stret tru? Jona i stori klia tru long ol samting bilong sip na ol boskru. Long Jona 1:​5, ol boskru i wok long tromoi ol kago samting bilong sip na bai sip i no hevi tumas. Ol saveman bilong bipo i raitim stori bilong ol samting i bin kamap, na ol lo bilong ol tisa bilong lotu, i soim olsem ol boskru i save mekim olsem long taim bilong bikpela win na ren na biksi. Stori bilong Jona long ol samting bilong Ninive, dispela tu i stret wantaim ol samting bilong bipo em ol saveman i bin painim long dispela hap. Tasol bikpela samting moa, Jisas Krais i bin stori long Jona i stap 3-pela de long bel bilong bikpela pis bilong makim olsem em yet bai stap 3-pela de insait long matmat. (Matyu 12:​38-40) Dispela tok Jisas i mekim i strongim tok olsem stori bilong Jona i tru olgeta.

“I no gat wanpela samting God i no inap mekim.”​—LUK 1:37

[Piksa long pes 26]

Jona i tok na ol boskru i apim em na tromoi em i go daun long solwara