Ol Yangpela i Laik Save . . .

Bilong Wanem Mi Mas Kisim Save Long Baibel?

“TAIM skul i pinis na mi kam bek long haus, mi les long stadi long narapela samting moa. Mi laik i go ausait na stap wantaim ol poroman bilong mi!” Wanpela yangpela man, nem bilong em Ken i tok olsem taim wanpela i askim em long tingting bilong em long em i mas lusim sampela hap taim bilong mekim stadi long Baibel.

Ating yu olsem planti yangpela​—yu no bin stadi tumas long Baibel. Ating yu bilip olsem Baibel em i Tok Bilong God. Na ating yu save kam long ol miting Kristen tu. Nau yu pilim olsem yu save pinis long ol samting Baibel i skulim man long en. O bai yu ting olsem: ‘Bilong wanem mi mas kisim save long Baibel? Wanem gutpela samting bai mi kisim long dispela?’

Inapim Ol Samting Bilong Spirit

I no gat rong sapos yu mekim kain askim olsem, na yu no ken ting olsem yu bikhet. Nogat. Taim yu mekim askim olsem, nau yu pilim long bel olsem yu stap “rabis tru long samting bilong God,” olsem Jisas i bin tok. (Matyu 5:3) I no olsem yu laik save nating long Baibel. Nogat. Yu mas kisim gut save long God na yu mas save tru long laik bilong em tu. Olsem taim yu liklik pikinini yet, papamama i bin skulim yu long sampela ol bikpela tok bilong Baibel. Ating yu harim na yu bihainim nating ol dispela tok na yu no bin mekim sampela askim samting bilong save gut. Tasol nau yu bikpela pinis na yu laik bai yu mas “skelim gut olgeta tok na pasin,” bambai yu ken save, olgeta samting yu kisim save long en pinis i tru o nogat.​—1 Tesalonaika 5:21.

Tasol ating yu bikpela insait long wanpela famili ol i no save tingting tumas long lotu samting. Olsem na yu ting yu no gat wok bilong kisim save long ol samting bilong God? Nogat tru! Skelim pasin bilong wanpela kantri em longpela taim pinis ol i no save bilip long God. Inap sampela yia i go pinis ol yangpela manmeri long dispela kantri ol i kirap long laikim samting bilong lotu. Wanpela man bilong dispela lain i no bin laikim tru ol samting bilong lotu, em i raitim tok long wanpela nius i sutim tok long ol man i no bilip long God, na em i tok, ‘ol i no inap painim bekim bilong sampela askim olsem long as bilong ol bel hevi na pen i save painim ol man.’ Ating yu tu yu mekim dispela ol askim long skin bilong yu yet​—dispela i soim olsem yu sot yet long samting bilong God na yu gat laik long kisim save long en.

I no olgeta lotu i givim gutpela bekim bilong ol dispela askim na man i amamas long en. Wanpela yangpela, nem bilong em Manis, em i bikpela long lotu Hindu, ol i save bilip long planti milion god. Em i tok: “Mi kirap long tingting planti, olsem: ‘God em i husat?’ ” Na planti yangpela man na meri moa ol i stap long ol lotu ol i kolim Kristen ol i tok ol i hatwok tru long painim bekim bilong ol askim bilong ol, tasol ol i no painim​—ol i hatwok nating. Orait ol i ken painim we bekim bilong ol askim bilong ol? Jisas i tok: “Tok bilong yu [God] i tru olgeta.”​—Jon 17:17.

Stretpela save long Baibel tasol em inap tru long helpim yu long inapim dispela nek drai bilong yu, olsem inapim laik bilong yu long kisim save long ol tok tru bilong Baibel. Em bai helpim yu long kisim save long God na as bilong ol hevi i stap nau, na wanem ol gutpela samting bai painim yu long bihain. Ating yu gat papamama Witnes, olsem na nogut yu ting olsem yu “save pinis long tok i tru” bilong Baibel. Olsem wanem? Yu pilim tru long bel ol tok i tru bilong Baibel “i bikpela tru, na i go longpela moa, na i go antap tru, na i go daun moa”? O dispela save bilong yu em i antap nating tasol, olsem long skin tasol? (Efesus 3:18) Sapos save bilong yu em i antap nating olsem long skin tasol, yu mas save long “ol pasin i gutpela na long ol pasin God i laikim tumas na long ol pasin inap tru na i stret olgeta.” Yu ken mekim olsem long taim yu stadi long Baibel.​—Rom 12:2.

Painim Rot i Stret

Olsem wanem? I bin i gat wanpela taim ol i soim kranki rot long yu long hap yu laik i go long en? Yu hatwok tru long painim dispela hap na yu lusim bikpela hap taim nating, na ating yu belhat. Tasol planti yangpela long nau ol i bihainim rot i no stret! Baibel i tok: “Man i bihainim stretpela pasin, em i save stap aninit long Bikpela. Tasol ol man i bihainim pasin giaman, ol i ting Bikpela i samting nating.”​—Sindaun 14:2.

Yumi ken skelim wanpela bikpela samting, em pasin bilong man na meri i slip wantaim. Wanpela yangpela meri i gat 14 krismas em i tok: “I no gat wanpela rot yumi ken tok i stret o i no stret. Em samting bilong tingting bilong man yet.” Dispela laik bilong slip wantaim wanpela poroman em i strong tumas taim yu yangpela. Sapos yu no was gut, dispela laik inap pulim yu long bihainim “rot bilong dai.” Long olgeta yia, winim 2 milion yangpela man na meri bilong Amerika i kisim sik nogut bilong pasin pamuk. Planti yangpela meri i kamap mama taim ol i no marit yet, na planti ol i rausim pikinini long bel na kilim i dai pikinini. Na maski ol i no kisim bel o ol i no kisim sik nogut long dispela pasin pamuk, Jehova i nolaik tru long pasin bilong ol yangpela i slip wantaim na ol i no marit yet.​—1 Tesalonaika 4:3.

Olsem wanem? Yu stap paul nabaut long “rot bilong lus”? Baibel i soim klia rot long yu bilong helpim yu long “givim baksait long olgeta kain laik nogut i save kamap long bel bilong ol yangpela man.” (2 Timoti 2:22) Tru yu mas “kilim i dai” ol laik nogut bilong bel long mekim pasin pamuk samting, tasol taim yu marit gut, orait yu no gat wok long daunim laik long mekim maritpasin. (Kolosi 3:5) Taim yu kisim save long Baibel dispela i ken helpim yu long bihainim gut ol tok bilong God. Bai em i givim strong long yu bilong ranawe long ol pasin nogut​—maski dispela samting i gutpela tumas long yu. Save bilong Baibel i givim “gutpela tingting . . . long ol yangpela man, [o meri] na soim ol long gutpela pasin bilong wokabaut,” na bai ol inap abrusim ol samting nogut em laik bilong bel i laik pulim ol long mekim, olsem pasin pamuk samting.​—Sindaun 1:4.

Wanpela yangpela man, nem bilong em Dan, pasin bilong stadi long Baibel i bin helpim em tru. Em i save planti yangpela manmeri ol i save paul nabaut na ol i kisim amamas long ol kain pasin nogut olsem; em i tok em i lukim “planti yangpela meri i no marit yet ol i karim nating pikinini na ol i gat sik nogut, na planti kain kain hevi moa i painim ol.” Em i tok: “Sapos mi no bin stadi na kisim save long Baibel, bai mi yet mi stap olsem wanem long nau?” Tru tumas, Baibel i ken kisim bek yu long “rot bilong lus.”

Helpim Bilong i Go Klostu long God

Long nau planti yangpela man na meri ol i tok ol i bilip long God, tasol taim ol i kamap bikpela man na meri dispela bilip bilong ol long God i pinis. Wanpela nius (Adolescence) i skelim dispela samting na i tok “long tingting bilong sampela yangpela manmeri, God i stap longwe tru, na em i no wanpela Man i stap tru.” Planti lotu long nau ol i mekim olsem i no gat God i stap, long wanem ol i save haitim nem bilong God. Na sapos yu no save long nem bilong wanpela man, olsem wanem bai yu go klostu long em?

Baibel i soim yumi olsem nem bilong God em Jehova, na dispela nem i kamap 7,000 taim long Baibel ol i bin raitim pastaim long tok Hibru! Taim yu kisim save long nem bilong God, rot i op nau bilong yu ken pas gut wantaim God I Gat Olgeta Strong. I gat planti samting moa yu mas mekim bilong inapim dispela laik bilong yu long kisim save long tok bilong Baibel. Baibel i tok: “Sapos yu wok strong long kisim save long laik bilong em, orait bai em i larim yu i save gut long em.” Olsem na yu mas wok long painim insait tru bilong ol tok bilong Baibel na wok strong long save gut long Jehova.

Yu mekim olsem pinis? Yu inap stori olsem wanem Baibel i tok Jehova em i gat “ai” na “pes” na “yau” na “han”? (1 Pita 3:12; Esekiel 20:33) Na tu, Baibel i tok “God em i Spirit.” Yu inap kamapim as bilong dispela tok? (Jon 4:24) Na yu save tu olsem God em i save skelim pasin bilong yu na em i save pinis long toktok yu laik mekim taim yu no autim yet? (Buk Song 139:4) Yu inap kolim wanpela bikpela rot long olsem wanem God i bin kamapim long ples klia sori bilong em? (Jon 3:16) Yu save tu spirit bilong God em i narapela samting na strong bilong em i narapela samting? (Maika 3:8) Yu ken lukim long Baibel olsem God em i save pilim ol samting tu. Olsem na yu save ol samting yu mekim inap mekim em i bel hevi?​—Buk Song 78:40.

I gat wanpela rot tasol na yu inap kisim bekim bilong ol dispela askim​—long rot bilong stadi long Baibel. Yangpela man Luta i tok, taim em i “stadi long Tok bilong God, em inap kisim save long pasin bilong Jehova na em i wanem kain Man.” (Skelim Jop 42:5.) Yangpela meri Jakilin i gat wankain tingting long save gut long God. Long rot bilong stadi long Baibel, em i pilim tru “Jehova i save truim ol tok bilong em. Taim em i tok promis long wanpela samting, em i no save lusim tingting long tok bilong em; em i no save giaman.”​—Taitus 1:2.

Gutpela Samting Yu Kisim long Hatwok Bilong Yu

Yu mas givim bel tru long mekim Baibel-stadi bilong yu, na tu yu mas sotim taim bilong yu long mekim ol samting yu save laik mekim na bai yu inap lusim bikpela hap taim long stadi. Taim yu kirap long mekim bai i hatwok tru na ating ol narapela insait long famili o ol pren bilong yu bai ol i tok bilas long yu. Tasol yu mas tingim ol gutpela samting yu inap kisim. Olsem na pasin bilong stadi long Baibel long olgeta taim i bin helpim yangpela meri Pola. Em i tok, “nau mi kam klostu long Jehova, na ol brata sista Kristen bilong mi, na famili bilong mi tu.” Wanpela meri, nem bilong em Sandi, i tok dispela samting i helpim em long lainim gut “maus bilong bel,” na nau i save tokaut long ol bikpela na liklik samting tu wantaim. Em i tok moa, “mi inap tingim ol tok na lo bilong Baibel na dispela i helpim mi taim mi mas skelim long tingting wanpela piksa mi laik lukim.” Na tingim Ken, em yumi stori pinis long em. Em i save kaunim Baibel long olgeta taim na em i tok: “Taim mi wok long kaunim moa i go, dispela i kirapim mi moa yet, na ol tok i kamap klia moa.” Dispela i kirapim Ken inap long em i kamap wanpela wokboi bilong God i dediket pinis.

Olsem wanem? Yu tingting strong long mekim stadi long Baibel? Em i hatwok. Tasol toktok wantaim papamama bilong yu na askim ol long helpim yu; na i gat ol brata o sista long kongrigesen bilong ol Witnes Bilong Jehova bilong helpim yu. Tingting strong long mekim olsem, na no ken les. Ol samting yu kisim save long en, yu mas wok long bihainim. Na tingim: “Sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru.”​—Jems 1:25.

[Rait long pes 19]

Yu save pilim tru long bel ol tok i tru bilong Baibel “i bikpela tru, na i go longpela moa, na i go antap tru, na i go daun moa”? O save bilong yu i olsem long skin tasol?

[Piksa long pes 20]

Papa o mama bilong yu o wanpela brata o sista long kongrigesen Kristen i ken helpim yu long kirapim dispela pasin bilong kaunim Baibel