“Givim Bel Tru Long Mekim Ol Gutpela Wok”!

“[ Jisas] i bin givim em yet bilong kisim bek yumi long olgeta kain pasin bilong kalapim lo, na long mekim wanpela lain pipol i kamap klin na i stap lain pipol bilong em yet. Em wanpela lain pipol i givim bel tru long mekim ol gutpela wok.”​​—TA. 2:​14, NW.

 1. Taim Jisas i kam long hap bilong tempel long Nisan 10, 33 C.E., wanem samting i kamap?

EM Nisan 10, 33 C.E., sampela de paslain long bung bilong Pasova. Planti manmeri i stap long hap bilong tempel long Jerusalem na ol i wetim dispela bung i kamap. Wanem samting bai kamap taim Jisas i kam? Tripela man bilong raitim Gutnius​—em Matyu, Mak, na Luk​—ol i tok nau long namba tu taim Jisas i rausim ol man i baim na salim ol samting long dispela hap. Em i kapsaitim ol tebol bilong ol man i wok long senisim mani, wantaim ol sia bilong ol man i wok long salim ol pisin. (Mt. 21:12; Mk. 11:15; Lu. 19:45) Jisas i bin mekim wankain samting 3-pela yia bipo, tasol pasin bilong em long givim bel tru long mekim wok i stap strong yet.​​—Jo. 2:​13-​17.

2, 3. Olsem wanem yumi ken save olsem i gat sampela samting moa Jisas i bin givim bel tru long mekim, na i no long klinim tempel tasol?

² Gutnius Matyu i Raitim i soim olsem i gat sampela samting moa Jisas i bin givim bel tru long mekim long dispela taim, na i no long klinim tempel tasol. Em i bin givim bel tu long oraitim ol aipas na lek nogut i kam long em long tempel. (Mt. 21:14) Gutnius Luk i Raitim i stori long sampela wok moa Jisas i mekim. “Long olgeta de [Jisas] i wok long skulim ol manmeri insait long banis bilong tempel.” (Lu. 19:47; 20:1) Pasin bilong Jisas long givim bel tru, dispela i stap ples klia long wok autim tok bilong em.

³ Bihain, aposel Pol i raitim pas i go long Taitus na i tok Jisas “i bin givim em yet bilong kisim bek yumi long olgeta kain pasin bilong kalapim lo, na long mekim wanpela lain pipol i kamap klin na i stap lain pipol bilong em yet. Em wanpela lain pipol i givim bel tru long mekim ol gutpela wok.” (Ta. 2:​14, NW) Long wanem ol rot yumi long nau i ken “givim bel tru long mekim ol gutpela wok”? Na olsem wanem pasin bilong ol gutpela king bilong Juda inap strongim yumi long mekim olsem?

Givim Bel Tru Long Autim Tok na Skulim Ol Man

4, 5. Long wanem ol rot 4-pela king bilong Juda i bin givim bel tru long mekim ol gutpela wok?

⁴ Asa, Jehosafat, Hesekia, na Josaia, olgeta i bin mekim wok bilong rausim pasin bilong lotuim ol imis long Juda. Asa i “rausim ol alta ol man i bin wokim bilong lotuim ol giaman god bilong ol arapela kantri. Na tu em i bagarapim ol ples bilong lotu long ol giaman god.” (2 Sto. 14:3) Jehosafat i laikim tru lotu bilong Jehova na dispela i kirapim em na em i “go raun long olgeta hap bilong kantri Juda na i bagarapim olgeta ples bilong lotu long ol giaman god.”​​—2 Sto. 17:6; 19:3.

⁵ Hesekia i stretim rot bilong wokim bung bilong Pasova inap 7-pela de, na bihain long en, “olgeta manmeri i bin kam bung long Jerusalem, ol i go nabaut long ol taun bilong Juda na . . . long graun bilong lain Juda na lain Benjamin na lain Manase na lain Efraim na ol i bagarapim olgeta samting bilong ol giaman god, na ol i no larim wanpela samting i stap.” (2 Sto. 31:1) Yangpela Josaia i kamap king taim em i gat 8-pela krismas tasol. Baibel i tok: “Long namba 8 yia bilong Josaia i stap king, long taim em i gat 15 krismas tasol, em i stat long lotu long God bilong tumbuna bilong en, King Devit. Na long namba 12 yia bilong en i stap king, em i tokim ol wokman long raun long olgeta hap bilong Juda na Jerusalem na bagarapim ol ples bilong lotu long ol giaman god.” (2 Sto. 34:3) Olsem na olgeta dispela 4-pela king i bin givim bel tru long mekim ol gutpela wok.

 6. Olsem wanem na wok autim tok bilong yumi i wankain olsem wok ol gutpela king bilong Juda i bin mekim bipo?

⁶ Long nau, yumi tu i insait long wanpela wok bilong helpim ol man long lusim ol bilip giaman na pasin bilong lotuim ol imis. Long rot bilong autim tok long ol haus, yumi save bungim kain kain man. (1 Ti. 2:4) Wanpela yangpela meri Esia i tingim ol pasin bilong lotu em mama bilong em i bin mekim long planti imis i stap insait long haus bilong ol. Em i luksave olsem ol dispela imis i no inap makim trupela God, olsem na planti taim em i beten askim God long em i ken save husat em i God tru. Bihain, tupela Witnes i kam long haus bilong em na ol i helpim em long save long nem bilong trupela God, Jehova. Em i amamas tru long kisim save long ol tok em Baibel i mekim long ol imis! Nau em i save givim bel tru long autim tok na skulim ol man long Jehova.​​—Sng. 83:​18, NW; 115:​4-8; 1 Jo. 5:21.

 7. Olsem wanem yumi inap bihainim pasin bilong ol tisa i bin go long olgeta taun long taim bilong Jehosafat?

⁷ Olsem wanem? Taim yumi autim tok long ol haus long teritori bilong yumi, yumi save mekim gut tru dispela wok? Long namba 3 yia bilong Jehosafat i wok king, em i singautim 5-pela bikman, 9-pela Livai, na 2-pela pris long kam long em. Em i tokim ol long go long olgeta taun na skulim ol man long ol lo bilong Jehova. Ol i mekim gut tru dispela wok na dispela i kirapim ol lain i stap klostu long lain Israel long pret long Jehova. (Ritim 2 Stori 17:​7-10.) Long rot bilong go long ol haus long ol narapela narapela de, ating bai yumi inap toktok wantaim ol narapela narapela long famili.

 8. Yumi ken mekim wanem na bai yumi inap autim tok long sampela man moa?

⁸ Planti wokboi bilong God long nau ol i bin orait long lusim ples na go long ol narapela hap we i no gat planti strongpela Witnes. Olsem wanem? Yu tu inap mekim olsem? Sampela bilong yumi em ol i no inap go long ol narapela hap, ol i save autim tok long ol man bilong narapela narapela tok ples i stap long hap bilong ol. Long teritori Ron i autim tok long en, em i save bungim ol man bilong ol narapela kantri, olsem na taim em i gat 81 krismas, em i kirap lain long tok gude long 32 tok ples! I no longtaim i go pinis, em i bungim tupela marit bilong Afrika long rot na em i tok gude long ol long tok ples bilong ol, em tok Yoruba. Ol i askim Ron long em i bin go long Afrika. Taim em i tok nogat, ol i askim em long olsem wanem em i save long tok ples bilong ol. Dispela i mekim na em i autim gut tok long ol. Ol i kisim sampela nius na ol i amamas long givim em atres bilong ol, na em i givim dispela atres long kongrigesen long hap bilong ol na bai ol i gat rot long mekim Baibel stadi.

 9. Taim yumi autim tok, bilong wanem pasin bilong ritim ol tok long Baibel i bikpela samting? Stori long wanpela ekspiriens.

⁹ Ol tisa em Jehosafat i salim i go long olgeta hap bilong Juda, ol i karim “buk i gat ol lo bilong Bikpela i stap long en” i go wantaim ol. Long olgeta hap bilong graun, yumi wok long skulim ol man long Baibel, long wanem, em Tok Bilong God. Taim yumi autim tok, yumi wok long opim Baibel na soim ol man ol tok bilong en. Wanpela meri i tokim Linda, em wanpela Witnes, olsem man bilong em i bin kisim sik strok na em i mas was long em. Dispela meri bilong haus i tok: “Mi no save mi bin mekim wanem na God i larim dispela samting i painim mi.” Linda i tok: “Mi laik tokim yu long wanpela gutpela samting.” Orait nau em i ritim tok bilong Jems 1:​13, na em i tok: “Olgeta pen na hevi em yumi na ol famili bilong yumi i kisim, dispela i no strafe i kam long God, nogat.” Orait nau meri i holimpas Linda. Linda i tok: “Long rot bilong yusim Baibel, mi bin mekim gut bel bilong em. Sampela taim ol ves yumi ritim long Baibel em ol ves ol man bilong haus i no bin harim bipo.” Dispela tok Linda i mekim i kirapim dispela meri long stadi long Baibel wantaim em.

Ol Yangpela Husat i Givim Bel Long Mekim Wok

10. Olsem wanem Josaia i stap gutpela piksa long ol yangpela Kristen long nau?

¹⁰ Orait nau yumi ken tingim gen Josaia. Taim em i yangpela, em i bihainim lotu i tru. Em i gat 20 krismas taim em i kirapim bikpela wok bilong rausim pasin bilong lotuim ol imis. (Ritim 2 Stori 34:​1-3.) Na olsem tasol, planti yangpela long nau ol i save givim bel tru long wok autim tok.

11-13. Yumi inap kisim wanem skul long ol yangpela long nau em ol i givim bel tru long mekim wok bilong Jehova?

¹¹  Hannah, em i stap long Inglan, taim em i gat 13 krismas na i lainim tok Frans long skul, em i harim tok olsem long wanpela taun klostu, wanpela grup i bin kamap i mekim tok Frans. Papa bilong Hannah i orait long go wantaim em long ol miting long dispela hap. Nau Hannah i gat 18 krismas na em i mekim wok painia na em i givim bel tru long autim tok long tok Frans. Olsem wanem? Yu tu inap lain long wanpela tok ples na helpim ol narapela long kisim save long Jehova?

¹² Rachel i laikim tru vidio Pursue Goals That Honor God. Em i stori long tingting bilong em taim em i kirap mekim wok bilong God long 1995, na em i tok: “Mi ting mi stap strong long tok i tru. Tasol taim mi lukim pinis dispela vidio, mi luksave olsem inap planti yia mi no bin givim bel tumas long tok i tru. Nau mi save olsem mi mas taitim bun tru na bai mi inap stap strong insait long tok i tru na mi mas wok strong long mekim wok autim tok na mekim stadi bilong mi yet.” Nau Rachel i luksave olsem taim em i mekim wok bilong Jehova em i givim bel tru long mekim. Dispela i mekim wanem long em? Em i tok: “Pasin bilong mi long pas gut wantaim Jehova i kamap strong moa. Ol beten bilong mi i gutpela moa. Mi stadi gut na kisim amamas long en, na mi pilim moa yet ol stori bilong Baibel. Olsem na nau mi amamas tru long mekim wok autim tok na mi belgut tru taim mi lukim ol tok bilong Jehova i mekim gut bel bilong ol narapela.”

¹³ Luke em i wanpela yangpela na vidio Young People Ask​​—What Will I Do With My Life? i bin strongim em. Taim em i lukim pinis, em i tok: “Vidio i kirapim mi long skelim ol samting mi mekim long laip bilong mi.” Em i tok: “Bipo, sampela i bin putim presa long mi long kisim bikpela skul bambai mi inap kisim gutpela wok mani bilong lukautim mi yet, na bihain mi ken tingim ol samting bilong lotu mi laik mekim. Kain presa olsem i no bin helpim mi long pas gut wantaim Jehova na mi no stap strong moa.” Sapos yu wanpela yangpela brata o sista, yu ting yu inap yusim save yu bin kisim long skul bilong helpim yu long mekim bikpela wok moa long autim tok olsem Hannah i bin mekim? Yu inap bihainim pasin bilong Rachel na mekim wok i givim biknem long God? Bihainim pasin bilong Luke na abrusim ol samting i bin pundaunim planti yangpela.

Givim Bel Tru Long Bihainim Ol Tok Lukaut

14. Jehova i orait long wanem kain lotu? Bilong wanem i hatwok long stap man o meri em Jehova i orait long en?

¹⁴ Ol manmeri bilong Jehova i mas i stap klin na bai em i ken orait long lotu bilong ol. Aisaia i tok: “Yupela olgeta i mas lusim Babilon na i kam. Na lukaut gut, nogut yupela i pas long ol samting i no klin long ai bilong God. Na yupela ol lain bai i karim ol dis na plet samting bilong haus bilong Bikpela, yupela i mas bihainim pasin bilong mekim yupela yet i kamap klin long ai bilong God.” (Ais. 52:11) Planti yia paslain long Aisaia i raitim dispela tok, gutpela King Asa i wok strong long rausim pasin pamuk long Juda. (Ritim 1 King 15:​11-​13.) Na sampela handet yia bihain, aposel Pol i tokim Taitus, Jisas i bin lusim laip bilong em yet bai ol disaipel bilong em i ken kamap klin na stap “wanpela lain pipol i givim bel tru long mekim ol gutpela wok.” (Ta. 2:​14, NW) Long nau, planti man i bihainim ol laik nogut bilong dispela graun, na sampela taim i hatwok long ol manmeri bilong God, na moa yet ol yangpela, long bihainim stretpela pasin. Olsem: Olgeta wokboi bilong God, maski ol i yangpela o lapun, ol i mas wok strong long stap longwe long ponografi, em i save kamap long TV, ol muvi, na Intenet.

15. Wanem samting inap helpim yumi long kisim pasin bilong heitim pasin nogut?

¹⁵ Pasin bilong givim bel tru long bihainim ol tok lukaut bilong God inap helpim yumi long kisim pasin bilong heitim pasin nogut. (Sng. 97:10; Ro. 12:9) Yumi mas heitim tru ponografi na bai “yumi inap sakim bikpela strong bilong en long pulim man,” olsem wanpela Kristen i tok. Yumi ken tok piksa olsem: Bilong brukim tupela hap ain magnet i pas strong wantaim, man i mas i gat samting i strongpela moa long dispela strong i pasim tupela magnet wantaim. Na olsem tasol, bilong sakim bikpela strong bilong ponografi long pulim man, yumi mas wok strong tru long sakim. Na taim yumi kliagut long ol samting nogut ponografi inap mekim long yumi, dispela bai helpim yumi long heitim tru dispela pasin. Wanpela brata i bin wok strong tru long lusim pasin bilong lukim ponografi long Intenet. Em i putim kompiuta bilong em yet long wanpela hap we olgeta arapela long famili inap lukim. Na tu, em i tingting strong long em i mas i stap klin tru na givim bel long mekim ol gutpela wok. Em i mekim narapela samting tu. Long wok bisnis bilong em, em i mas mekim wok long Intenet, olsem na em i pasim tok long bel olsem, taim em i mas mekim wok long Intenet, meri bilong em i mas i stap wantaim em.

Gutpela Pasin i Helpim Yumi

16, 17. Gutpela pasin Kristen bilong yumi inap mekim wanem long ol man i lukim yumi? Kamapim wanpela ekspiriens.

¹⁶ Gutpela pasin na tingting i save stap namel long ol yangpela man na meri i mekim wok bilong Jehova, na ol narapela i lukim dispela samting ol i pilim tru! (Ritim 1 Pita 2:​12.) Wanpela man i senisim tingting bilong em long ol Witnes Bilong Jehova taim em i go long London Betel na long de olgeta em i stretim wanpela masin bilong prinim buk. Meri bilong em i stadi wantaim wanpela Witnes, na em i lukim dispela senis long man bilong em. Pastaim dispela man i no laik bai ol Witnes i kam long haus bilong em. Tasol taim em i lusim Betel na kam bek long haus, em i tok amamas long gutpela pasin ol i bin mekim long em. Em i tok i no gat wanpela bilong ol i tok swea. Narapela i no les kwik long narapela, na bel isi i stap. Em i pilim tru pasin bilong ol yangpela brata na sista em ol i wok strong na ol i no kisim pe, ol i givim nating taim na strong bilong ol long helpim wok bilong prinim gutnius.

¹⁷ Ol brata na sista i wok skin bilong lukautim famili bilong ol, ol tu i gutpela wokman. (Kl. 3:​23, 24) Planti bos i laikim kain wokman olsem na ol i no tingting long pinisim ol long wok.

18. Olsem wanem yumi inap “givim bel tru long mekim ol gutpela wok”?

¹⁸ Pasin bilong bilip strong long Jehova, na bihainim ol tok bilong em, na lukautim gut ol ples bilong miting bilong yumi, em sampela rot we yumi soim olsem yumi laikim tru haus bilong Jehova. Na tu, yumi laik insait tru long wok bilong autim tok bilong Kingdom na kamapim ol disaipel. Maski yumi yangpela o lapun, taim yumi wok strong long bihainim ol klinpela pasin bilong lotu, dispela i save helpim tru yumi. Na yumi bai stap yet olsem wanpela lain pipol i gat nem long “givim bel tru long mekim ol gutpela wok.”​​—Ta. 2:14, NW.

Long stori bilong sampela man long Baibel na long sampela man long nau, yu kisim wanem save long

• olsem wanem yu inap givim bel tru long wok autim tok na skulim ol man?

• olsem wanem ol yangpela Kristen inap “givim bel tru long mekim ol gutpela wok”?

• rot bilong lusim ol pasin nogut?

[Piksa long pes 13]

Yu save mekim wok long Baibel taim yu autim tok?

[Piksa long pes 15]

Sapos yu lainim narapela tok ples taim yu stap long skul, dispela inap helpim yu long mekim bikpela wok moa long autim tok