“Ol Man Ol i Givim,” Em Presen Bilong Jehova

“Ol man bilong ol arapela kantri bai i kam mekim wok bilong yupela. Bai ol i was long ol sipsip samting bilong yupela.”​—⁠AISAIA 61:⁠5.

 1. Dispela tok “man bilong givim samting,” olsem wanem em inap kirapim yumi long tingim Jehova?

GOD i save givim planti samting long yumi! Aposel Pol i tok: “[Jehova] yet i save givim laip na win na olgeta samting long olgeta manmeri.” (Aposel 17:25) Sapos yumi tingim ol planti ‘gutpela presen tru’ God i givim long yumi, dispela inap helpim yumi olgeta wan wan.​—⁠Jems 1:​5, 17; Buk Song 29:11; Matyu 7:7; 10:19; 13:12; 21:⁠43.

2, 3. (a) God i bin givim planti samting long yumi na dispela i mas kirapim yumi long mekim wanem? (b) Olsem wanem ol Livai i olsem “ol man ol i givim”?

² I gat gutpela as na wanpela man bilong raitim song long Baibel i tok, ‘Mi ken givim wanem samting long Jehova bilong bekim gutpela pasin em i bin mekim long mi?’ (Buk Song 116:⁠12) Man bilong wokim yumi em i no sot long wanpela samting ating yumi gat o yumi inap givim long em. (Buk Song 50:​10, 12) Tasol Jehova i kamapim klia olsem em i save amamas taim ol man i givim ol yet bilong mekim wok bilong Em. (Lukim Hibru 10:​5-7.) Olgeta manmeri i mas givim ol yet long Man bilong wokim ol, olsem dediket long em, na taim ol i mekim olsem, nau em inap givim sampela gutpela wok long ol, olsem em i bin mekim long lain Livai long bipo. Olgeta Israel i dediket long God, tasol em i makim famili bilong Aron bilong lain Livai long mekim wok pris na mekim ol ofa long haus lotu sel na long bikpela haus lotu. Orait, olsem wanem long ol narapela Livai?

³ Jehova i tokim Moses: “Bringim ol lain bilong Livai i kam klostu . . . Na ol i mas lukautim gut olgeta samting bilong haus sel bilong mi . . . Na yu mas givim ol Livai long Aron na long ol pikinini man bilong em. Em ol man ol i givim [tok Hibru, nethu·nimʹ], na yu mas kisim ol namel long ol lain bilong Israel na givim long [Aron].” (Namba 3:​6, 8, 9, 41, Baibel New World Translation) Ol i “givim” ol Livai long Aron bilong mekim sampela wok long haus lotu sel na i olsem ol i givim ol long God. Olsem na God inap tok: “Em ol man ol i givim, ol i kisim ol namel long ol lain bilong Israel na givim long mi.” (Namba 8:​16, 19, Baibel New World Translation; 18:⁠6) Sampela Livai ol i mekim ol liklik wok; tasol sampela i kisim bikpela wok, olsem wok bilong skulim ol Israel long ol lo bilong God. (Namba 1:​50, 51; 1 Stori 6:48; 23:​3, 4, 24-32; 2 Stori 35:​3-5) Orait, nau yumi ken stori long narapela lain “ol i givim” bilong mekim wok bilong God na ol i olsem piksa bilong wanpela lain long nau.

Ol Israel i Lusim Babilon

4, 5. (a) Wanem ol lain bilong Israel i bin lusim kalabus long Babilon na i go bek long as ples? (b) Wanem samting i bin kamap long taim bilong yumi na i wankain olsem ol Israel i lusim kalabus long Babilon long bipo?

⁴ Esra tupela Nehemia i stori olsem i gat liklik hap lain Israel ol i bin lusim Babilon na i go bek long as ples bilong kirapim gen lotu i tru. Hetman Serubabel i go pas long ol. Stori bilong tupela wantaim i tok, i gat 42,360 ol i bin go bek. Planti tausen bilong ol em “ol lain bilong Israel.” Na i gat ol lain pris. Na ol lain bilong Livai, ol inap olsem 350, na ol Livai i wasman bilong haus bilong God na ol man bilong mekim musik long haus bilong God ol i insait long dispela lain. Esra tupela Nehemia i stori tu olsem i gat planti tausen moa ol i ting ol i bilong lain Israel, ating bilong lain pris, tasol ol i no save long nem bilong ol tumbuna bilong ol, olsem na i no gat rot bilong soim olsem ol i bilong lain Israel.​—⁠Esra 1:​1, 2; 2:​2-42, 59-64; Nehemia 7:​7-45, 61-66.

⁵ Dispela liklik hap lain Israel ol i bin kalabus longwe long as ples na bihain ol i go bek long Jerusalem na long Juda, ol i kamapim klia olsem ol i givim bel tru long God na long lotu i tru. Olsem yumi stori pinis, ol i olsem piksa na ol i makim liklik hap lain bilong ol Israel bilong spirit long taim bilong yumi, em lain remnan, ol i bin lusim kalabus long Bikpela Babilon long yia 1919.

 6. God i bin givim wanem wok long ol Israel bilong spirit long taim bilong yumi?

⁶ Ol i lusim pinis dispela kalabus na bihain dispela liklik hap lain brata bilong Jisas, em God i bin makim ol long spirit holi, ol i bin givim bel long mekim lotu i tru i kamap strong. Jehova i bin blesim wok bilong ol long bungim ol laspela manmeri bilong inapim lain 144,000, em “lain Israel tru bilong God.” (Galesia 6:16; Kamapim Tok Hait 7:​3, 4) Lain remnan long nau i stap olsem ‘gutpela wokboi’ na ol i gat wok long kamapim planti gutpela kaikai bilong spirit em inap helpim ol manmeri long kisim laip, na ol i bin wok strong long tilim dispela ‘kaikai’ long olgeta hap bilong graun.​—⁠Matyu 24:​45-47.

 7. Husat ol i bung wantaim lain remnan bilong mekim lotu i tru?

⁷ Stori i bin kamap paslain long dispela i tok, long nau i gat planti milion “arapela sipsip” ol i insait long lain bilong Jehova. Ol i wet long abrusim bagarap long taim bilong bikpela hevi tru, olsem God i promis pinis, em dispela taim i klostu nau. Ol i laik mekim wok bilong Jehova oltaim oltaim long graun, na bai ol i no ken hangre moa o i dai long wara, na ol i no ken bel hevi o krai moa. (Jon 10:16; Kamapim Tok Hait 7:​9-17; 21:​3-5) Olsem wanem? Long stori bilong ol lain i lusim Babilon na i go bek, i gat sampela lain ol i olsem piksa bilong lain “arapela sipsip”? I gat!

Ol Man i No Bilong Lain Israel Ol Tu i Go Bek

 8. Taim ol Israel i lusim Babilon na i go bek long as ples, husat ol i bin go wantaim ol?

⁸ Taim singaut i kamap bilong kirapim ol man i laikim tumas Jehova long lusim Babilon na i go bek long Graun Bilong Promis, planti tausen manmeri i no bilong lain Israel ol i kirap bihainim dispela singaut. Lista bilong Esra na Nehemia i tok, i gat “ol wokman bilong haus bilong God” (ol Netinim o ‘ol man ol i givim’ bilong mekim wok bilong God), na ‘ol lain tumbuna pikinini bilong ol wokman bilong Solomon,’ em olgeta ol inap olsem 392. Na stori i kolim tu 7,500 moa, em ol “wokboi na wokmeri,” na “ol man na meri i save mekim musik” ol i no bilong lain Livai. (Esra 2:​43-58, 65; Nehemia 7:​46-60, 67) Wanem samting i kirapim ol dispela narapela lain long i go bek?

 9. Spirit bilong God i bin mekim wanem wok long taim ol i laik lusim Babilon?

⁹ Esra 1:5 i tok, “God i kirapim tingting” bilong ol hetman bilong lain Juda na ol pris na Livai na ol narapela tu “na ol i redim ol samting bilong i go long Jerusalem na wokim gen haus bilong Bikpela.” Em nau, Jehova i kirapim tingting bilong olgeta dispela lain na ol i go bek. God Jehova i stap long heven, tasol em inap mekim dispela samting long rot bilong spirit holi bilong em, em strong bilong em long mekim wok. Olsem na “strong bilong spirit bilong [God]” i mekim na olgeta dispela lain i kirap i go “wokim gen haus bilong Bikpela.”​—⁠Sekaraia 4:​1, 6; Hagai 1:⁠14.

Wankain Samting i Kamap Long Nau

10, 11. Ol manmeri i no bilong lain Israel na ol i bin lusim Babilon, ol i olsem piksa bilong wanem lain?

¹⁰ Ol dispela manmeri i no bilong lain Israel na ol i go bek, ol i olsem piksa. Ol i makim wanem lain long nau? Ating planti Kristen bai bekim tok olsem: “Ol wokman bilong haus bilong God (ol Netinim) i makim ol ‘arapela sipsip’ long nau.” Em i stret, tasol i no dispela lain tasol i makim ol “arapela sipsip.” Nogat. Olgeta narapela lain i no bilong lain Israel na ol i go bek ol i makim ol Kristen long nau i no bilong lain Israel bilong spirit.

¹¹ Wanpela buk bilong Sosaiti Was Taua (You May Survive Armageddon Into God’s New World)a i bin tok: “Liklik hap lain Israel, inap olsem 42,360, em ol i lusim Babilon na hetman Serubabel i go pas long ol, i no ol dispela Israel tasol i go bek. Nogat. . . . Planti tausen manmeri i no bilong lain Israel ol i go wantaim ol. . . . I gat ol wokman bilong haus bilong God na i gat ol narapela manmeri tu i no bilong lain Israel, olsem ol wokboi na wokmeri, na ol man na meri i mekim musik long haus bilong God, na ol lain tumbuna pikinini bilong ol wokman bilong King Solomon.” Dispela buk i stori olsem: “Ol wokman bilong haus bilong God, na ol wokboi na wokmeri, na ol lain bilong mekim musik, na ol lain tumbuna pikinini bilong ol wokman bilong Solomon, olgeta i no bilong lain Israel, tasol ol tu i lusim ples ol i stap kalabus long en na ol i go bek wantaim liklik hap lain Israel . . . Olsem wanem? I stret yumi ken ting long nau tu bai i gat ol manmeri bilong kain kain lain, em ol i no Israel bilong spirit, ol bai kam bung wantaim liklik hap lain Israel bilong spirit, em lain remnan, na wok wantaim ol long helpim lotu bilong God Jehova? I stret yumi ken ting olsem.” Ol ‘wokman bilong haus bilong God (ol Netinim), na ol lain bilong mekim musik, na ol lain tumbuna pikinini bilong ol wokman bilong Solomon’ ol i piksa bilong ol dispela manmeri i kam bung wantaim lain remnan long nau.

12. God i mekim wanem wok long spirit bilong em long ol Israel bilong spirit tasol? Tasol olsem wanem yumi ken save, olgeta manmeri i lotu long Jehova ol inap kisim spirit bilong em?

¹² Olsem long bipo, long nau tu God i givim spirit bilong em long ol dispela manmeri i wet long kisim laip i stap oltaim long graun. Spirit i no mekim ol i kamap nupela gen. Dispela samting i save painim lain 144,000 tasol. Dispela i save painim olgeta wan wan wanpela taim tasol na ol i kamap nupela gen olsem ol pikinini spirit bilong God, na God i makim ol long spirit holi. (Jon 3:​3, 5; Rom 8:16; Efesus 1:​13, 14) God i kapsaitim spirit bilong em long “liklik lain” tasol bilong makim ol; em i no mekim wok olsem long spirit bilong em long ol narapela. Tasol yumi olgeta i mas kisim spirit bilong God bambai yumi inap mekim wok bilong em. Olsem na Jisas i tok: “Papa bilong yupela i stap long heven em bai i amamas long givim Holi Spirit long ol man i askim em.” (Luk 11:13) Man i askim, maski em i bilong liklik lain ol i bilong kisim laip long heven o em i bilong lain “arapela sipsip,” em inap kisim spirit bilong Jehova inap tru na moa yet bilong helpim em long mekim wok bilong Jehova.

13. Spirit bilong God inap mekim wanem wok bilong helpim olgeta wokboi bilong God?

¹³ Spirit bilong God i bin kirapim tingting bilong ol Israel wantaim ol manmeri i no bilong lain Israel na ol i go bek long Jerusalem. Na spirit bilong God i save strongim na helpim olgeta gutpela wokboi bilong God long nau. Maski Kristen i bilong kisim laip long heven o long graun, em i mas autim tok bilong Kingdom, na spirit holi i helpim em long stap gut long dispela wok. Yumi olgeta wan wan​—⁠maski yumi wet long kisim laip long heven o long graun​—⁠yumi mas wok long kisim ol gutpela pasin em spirit holi i save kamapim long ol man, na yumi mas bihainim tru ol dispela pasin.​—⁠Galesia 5:​22-26.

Givim Bilong Mekim Wanpela Wok

14, 15. (a) Namel long ol narapela lain i bin lusim Babilon, Baibel i stori long wanem tupela lain? (b) Ol wokman bilong haus bilong God (ol Netinim) ol i husat? Ol i bin mekim wanem wok?

¹⁴ Spirit bilong God i bin kirapim planti tausen manmeri bilong ol narapela lain long i go bek, na namel long ol i gat tupela liklik lain em Baibel i stori long ol​—⁠em ol wokman bilong haus bilong God na ol tumbuna pikinini bilong ol wokman bilong Solomon. Dispela tupela lain i husat? Ol i bin mekim wanem wok? Na ating dispela i makim wanem samting long nau?

¹⁵ Ol wokman bilong haus bilong God ol i no bilong lain Israel, tasol ol i kisim gutpela wok long helpim ol Livai. Yu tingim ol Kenan bilong Gibeon ol i bin kamap “wokboi bilong katim paiawut na karim wara bilong ol Israel na bilong mekim wok bilong alta i stap long haus lotu bilong Bikpela”? (Josua 9:27) Ating sampela tumbuna pikinini bilong ol dispela Gibeon i insait long lain wokman bilong haus bilong God em ol i bin lusim Babilon na i go bek long Jerusalem. Na sampela moa insait long dispela lain em ol man i bin kamap wokman bilong haus bilong God long taim Devit i stap king na long ol narapela taim. (Esra 8:⁠20) Ol dispela wokman bilong haus bilong God i save mekim wanem wok? Ol Israel i bin givim ol Livai bilong helpim ol pris, na ol i givim ol dispela wokman (ol Netinim) bilong helpim ol Livai. Ol i man bilong narapela lain i bin katim skin, tasol ol i kisim gutpela wok tru.

16. Bihain wanem senis i bin kamap long ol dispela wokman bilong haus bilong God?

¹⁶ I gat wan wan Livai tasol namel long ol manmeri i bin lusim Babilon na i go bek long Jerusalem, tasol i gat planti pris na ol wokman bilong haus bilong God na ‘ol tumbuna pikinini bilong ol wokman bilong Solomon.’ (Esra 8:​15-20) Wanpela buk (Dictionary of the Bible, bilong Dr. James Hastings) i tok: “Bihain [ol Netinim] i kamap wanpela lain tru bilong mekim wok long haus bilong God, na ol i bin kisim planti gutpela wok.” Na wanpela nius bilong ol saveman (Vetus Testamentum) i tok: “Senis i bin kamap. Bihain long taim ol Israel i Go Bek . . . ol i no tingting moa olsem [ol man bilong narapela lain] i wokboi nating long Tempel; nau ol i tingim ol i olsem ol man bilong helpim wok lotu, na ol dispela man i kisim nem wankain olsem bilong ol lain i save bosim ol wok long Tempel.”​—⁠Lukim blok “Senis i Painim Ol.”

17. I gat wanem as na ol dispela wokman bilong haus bilong God i bin kisim sampela wok moa? Wanem ol tok long Baibel i kamapim klia dispela samting?

¹⁷ Tru, ol dispela wokman bilong haus bilong God (ol Netinim) i no kisim bikpela wok wankain olsem bilong lain pris na lain Livai. Nogat. Ol pris na ol Livai i bilong lain Israel, na Jehova yet i bin makim ol long wok long haus bilong Em, na ol man bilong ol narapela lain i no inap senisim ol na kisim dispela wok. Tasol Baibel i makim olsem lain Livai i go liklik, olsem na ol dispela wokman bilong haus bilong God (ol Netinim) i kisim bikpela wok moa bilong helpim ol long wok bilong God. Ol i givim haus long ol klostu long haus bilong God. Na long taim bilong Nehemia ol i bin wok wantaim ol pris na wokim gen ol banis klostu long haus bilong God. (Nehemia 3:​22-26) Na King bilong Persia i putim lo i tok, ol dispela wokman bilong haus bilong God i no ken baim takis, olsem ol Livai i no save baim takis, long wanem, ol i mekim wok long haus bilong God. (Esra 7:24) Dispela i kamapim klia olsem ol dispela “man ol i givim” bilong helpim wok (ol Livai na ol Netinim) ol i pas tru wantaim long mekim ol wok bilong God, na taim ol Israel i sot long ol Livai bilong mekim wok, ol dispela wokman bilong haus bilong God i bin kisim bikpela wok moa, tasol ol Israel i no bin tingim ol i hap lain bilong ol Livai. Bihain, taim Esra i bungim sampela manmeri bilong i go bek long as ples, pastaim i no gat sampela Livai long lain bilong ol. Esra i wok strong long painim sampela bilong i go bek wantaim ol. Olsem na i gat 38 Livai na 220 wokman (ol Netinim) i go bek wantaim ol “bilong mekim wok long haus bilong God.”​—⁠Esra 8:​15-20.

18. Ol tumbuna pikinini bilong ol wokman bilong Solomon, ating ol i bin mekim wanem wok?

¹⁸ Namba 2 lain em Baibel i stori long ol, em ol tumbuna pikinini bilong ol wokman bilong Solomon. Baibel i mekim liklik stori tasol long ol. Sampela ol i bilong lain “Soferet.” Esra i kolim dispela lain olsem “Hasoferet,” na wanpela insait bilong dispela tok i olsem “kuskus.” (Esra 2:55; Nehemia 7:57) Olsem na ating dispela lain ol i mekim wok kuskus o ol i gat wok long raitim raitim planti taim ol tok bilong buk bilong God, o ating ol i lukautim wok long haus lotu na ol i save raitim ol pas na pepa samting bilong haus lotu. Ol dispela tumbuna pikinini bilong ol wokman bilong Solomon ol i no bilong lain Israel, tasol ol i kamapim klia olsem ol i givim bel tru long Jehova​—⁠ol i lusim Babilon na i go bek bilong kirapim gen lotu bilong Jehova.

Givim Yumi Yet Long Nau

19. Lain remnan na ol arapela sipsip i wok wantaim olsem wanem long nau?

¹⁹ Long taim bilong yumi, God i bin givim bikpela wok long lain remnan bilong i go pas long wok bilong lotu i tru na bilong autim tok bilong Kingdom. (Mak 13:10) Dispela liklik lain i amamas tru taim ol i lukim ol planti tausen, na bihain ol planti handet tausen, na bihain moa ol planti milion arapela sipsip i kam bung wantaim ol bilong lotuim Jehova! Na lain remnan wantaim ol arapela sipsip ol i wok gut tru wantaim!​—⁠Jon 10:⁠16.

20. I stret yumi ken kisim wanem nupela tingting long samting ol wokman bilong haus bilong God na ol tumbuna pikinini bilong ol wokman bilong Solomon i piksa bilong en? (Sindaun 4:18)

²⁰ Ol manmeri bilong ol narapela lain ol i bin lusim Babilon bilong bipo na i go bek long Jerusalem, olgeta i olsem piksa na i makim ol arapela sipsip long nau em ol i wok wantaim liklik hap lain Israel bilong spirit ol i stap yet long graun, em lain remnan. Tasol namel long ol dispela planti narapela lain i go bek, Baibel i stori long tupela lain, em ol wokman bilong haus lotu (ol Netinim) na ol tumbuna pikinini bilong ol wokman bilong Solomon. Bilong wanem Baibel i stori long dispela tupela lain? Dispela tupela lain bilong bipo i bin kisim sampela bikpela wok em ol narapela lain i no bilong lain Israel ol i no bin kisim. Long dispela as yumi inap kisim tingting olsem: Dispela inap makim olsem long nau God i bin givim sampela wok moa long sampela arapela sipsip ol i strongpela Kristen na ol i laik mekim wok, na rot i op long ol bilong mekim sampela gutpela wok.

21. Sampela brata i wet long kisim laip oltaim long graun, olsem wanem ol i bin kisim sampela wok moa na rot i op long ol bilong mekim sampela gutpela wok?

²¹ Ol wokman bilong haus bilong God (ol Netinim) ol i bin kisim sampela wok moa long wok bilong God. Ol tumbuna pikinini bilong ol wokman bilong Solomon ol i bin kisim wok bilong bosim sampela wok. Na i olsem tasol long nau. Jehova i bin mekim gut long lain bilong em na em i givim sampela man long ol olsem “presen” bilong helpim ol. (Efesus 4:​8, 11, 12) Insait long dispela lain em ol planti handet strongpela brata ol i mekim wok olsem ‘ol wasman bilong lukautim ol sipsip,’ em ol i mekim wok sekit o wok distrik o ol i holim wok long ol Komiti Bilong Brens long ol 98 brens-ofis bilong Sosaiti Was Taua. (Aisaia 61:⁠5) Long namba wan ofis bilong Sosaiti, sampela brata ol inap tru long mekim wok ol i wok aninit long lain ‘gutpela wokboi’ wantaim Lain Bilong Bosim ‘gutpela wokboi,’ na ol i lain long helpim wok bilong redim ol kaikai bilong spirit. (Luk 12:42) Sampela brata moa, em ol i dediket na ol i bin mekim wok bilong Jehova longtaim, ol yet i laik na ol i go wok long ol brens-ofis na ol i lain long bosim ol haus Betel, na ol haus faktori, na lukautim wok bilong sanapim ol nupela haus brens na ol Haus Kingdom samting bilong mekim lotu Kristen. Ol i mekim gutpela wok tru na ol i wok gut wantaim lain remnan, em hap lain bilong kisim wok king na wok pris long heven.​—⁠Lukim 1 Korin 4:17; 14:40; 1 Pita 2:⁠9.

22. Bilong wanem i stret ol i givim sampela bikpela wok long sampela bilong lain arapela sipsip long nau? Na yumi mas ting olsem wanem long dispela samting?

²² Long bipo ol pris na Livai i bin wok i go namel long ol Juda. (Jon 1:19) Tasol long nau, hap lain Israel bilong spirit i stap yet long graun i mas wok long i go liklik, na bai ol i pinis long graun. (Lukim Jon 3:30.) Taim Bikpela Babilon i bagarap pinis, bihain olgeta 144,000 i “kisim mak” bai ol i stap long heven long marit bilong Pikinini Sipsip. (Kamapim Tok Hait 7:​1-3; 19:​1-8) Tasol nau lain arapela sipsip i mas wok long i go bikpela. Long nau sampela arapela sipsip ol i kisim bikpela wok, olsem ol wokman bilong haus bilong God na ol tumbuna pikinini bilong ol wokman bilong Solomon long bipo i bin kisim. Tasol lain remnan yet i bosim wok na ol dispela arapela sipsip i no hambak o ting olsem ol yet i gat biknem. (Rom 12:⁠3) Dispela i strongim yumi long bilip olsem, taim lain bilong God i winim pinis taim bilong “bikpela hevi,” bai i gat sampela man i stap, em ol i gat save pinis​—⁠olsem ‘ol hetman’​—⁠na bai ol inap i go pas na soim rot long ol arapela sipsip.​—⁠Kamapim Tok Hait 7:14; Aisaia 32:1; lukim tu Aposel 6:​2-7.

23. Bilong wanem yumi olgeta i mas redi long givim yumi yet bilong mekim wok bilong God?

²³ Ol manmeri i bin lusim Babilon na i go bek, olgeta i redi long wok strong bambai ol i ken kamapim klia olsem lotu bilong Jehova i nambawan bikpela samting long bel na long tingting bilong ol. Na i wankain long nau. I gat “ol man bilong ol arapela kantri” ol i wok wantaim lain remnan long “was long ol sipsip.” (Aisaia 61:⁠5) Olsem na maski yumi bilong kisim laip long heven o long graun, na maski ol elda i kisim wanem ol gutpela wok paslain long taim Jehova i stretim bek nem bilong em long Armagedon, yumi olgeta yumi mas wok long kisim gutpela pasin bilong givim yumi yet bilong helpim wok. Tru, yumi no inap givim sampela samting long Jehova bilong bekim ol planti gutpela pasin em i bin mekim bilong helpim yumi. Tasol yumi olgeta inap givim bel olgeta long mekim ol wok yumi mekim insait long lain bilong em. (Buk Song 116:​12-14; Kolosi 3:23) Tru tumas, yumi olgeta inap givim strong samting bilong yumi long mekim lotu i tru. Ol arapela sipsip wantaim lain God i makim long spirit holi, em ol bai “stap king na bosim ol manmeri bilong graun,” olgeta i wok gut wantaim long mekim wok bilong God.​—⁠Kamapim Tok Hait 5:​9, 10.

[Ol Futnot]

Sampela Tok Bilong Tingim

◻ Long Israel bipo, olsem wanem ol Livai i olsem “ol man ol i givim”?

◻ Wanem ol narapela lain i bin go bek wantaim ol Israel? Ol i piksa bilong wanem lain?

◻ I olsem wanem ol senis i bin painim ol wokman bilong haus bilong God (ol Netinim)?

◻ Nau yumi kisim wanem tingting long samting ol wokman bilong haus bilong God na ol tumbuna pikinini bilong ol wokman bilong Solomon i piksa bilong en?

◻ Lain remnan na ol arapela sipsip i wok gut wantaim, olsem na yumi ken bilip long wanem samting?

[Blok long pes 14]

SENIS I PAINIM OL

Planti bikpela buk bilong Baibel ol i stori long ol senis i bin painim sampela man bilong ol narapela lain ol i bin go bek wantaim ol Israel. Wanpela bikpela buk i tok: “Olsem na sindaun bilong ol [Netinim] . . . i kamap gutpela. Ol [Israel] i no tingting moa olsem ol i wokboi nating tasol.” (Buk Encyclopædia Biblica em Cheyne na Black i bin stretim, Volyum 3, pes 3399) Na narapela bikpela buk i tok: “Yumi no ken ting planti bilong ol [Netinim] bai go bek na i stap wokboi nating gen long Palestain . . . Ol i givim bel long God na long laik bilong ol yet ol i go bek, olsem na nau ol i gat nem.” (Buk The Cyclopædia of Biblical Literature, bilong John Kitto, Volyum 2, pes 417) Na narapela buk i tok: “Yumi ken tingim lain ol i bung wantaim ol na ol samting ol i bin mekim long taim bilong Solomon na yumi ken save, ol wokboi bilong Solomon i bin kisim ol bikpela wok long namba 2 tempel.”​—⁠Buk The International Standard Bible Encyclopedia, em G. W. Bromiley i bin stretim, Volyum 4, pes 570.

[Piksa long pes 15]

Taim ol Israel i go bek bilong wokim gen Jerusalem, planti tausen manmeri i no bilong lain Israel ol i bin go wantaim ol

[Kredit Lain]

Pictorial Archive (Near Eastern History) Est.

[Piksa long pes 17]

Em Komiti Bilong Brens long Korea. Ol man long lain arapela sipsip i kisim ol bikpela wok long lotu i tru long nau, olsem ol Netinim i bin kisim long bipo