Bihainim Stretpela Pasin!

“Mi yet mi save mekim stretpela pasin.”​—SNG. 26:11.

1, 2. Jop i tok wanem long pasin bilong em? Jop sapta 31 i kamapim wanem pasin bilong em?

LONG bipo, ol i save skelim ol samting long wanpela kain skel. Long dispela skel ol i hangamapim tupela dis, wanpela long wanpela sait na wanpela long narapela sait. Long wanpela dis ol i putim hap ain bilong skelim hevi bilong samting, na long narapela dis ol i putim samting ol i laik skelim. Ol manmeri bilong God i mas bihainim stretpela pasin na skelim ol samting long mak stret.​—Snd. 11:1.

² Taim gutpela man Jop i kisim hevi long han bilong Satan, em i tok: “Sapos God i skelim stret ol pasin bilong mi, bai em i save gut olsem, mi no gat asua long wanpela samting.” (Jop 31:6) Jop i kolim sampela samting em inap traim pasin bilong man long stap gut long God. Tasol Jop i stap gut long God long ol dispela samting, olsem tok bilong em long Jop sapta 31 i kamapim. Gutpela pasin bilong Jop inap kirapim yumi long bihainim stretpela pasin na mekim wankain tok olsem Devit i bin mekim: “Mi yet mi save mekim stretpela pasin.”​—Sng. 26:11.

 3. Bilong wanem i bikpela samting long stap gut long God long ol bikpela samting na long ol liklik samting tu?

³ Maski bikpela traim i painim Jop, em i stap gut long God. Ating sampela man inap tok olsem ol hevi i painim Jop na pasin bilong em long stap gut long God em i narapela kain tru. Tru, yumi no kisim ol hevi i kain olsem Jop i bin kisim. Tasol bilong soim olsem yumi stap gut long God na sapotim wok bos bilong em, yumi mas bihainim stretpela pasin long ol bikpela samting na long ol liklik samting tu.​—Ritim Luk 16:10.

Bihainim Ol Stretpela Lo Bilong Marit

4, 5. Jop i laik stap gut long God, na em i abrusim wanem kain pasin?

⁴ Bilong stap gut long Jehova, yumi mas bihainim ol lo bilong em long ol samting bilong marit, olsem Jop i bin mekim. Em i tok: “Mi bin mekim strongpela promis pinis olsem, mi no ken aigris long ol meri. .  . . Sapos mi bin aigris long meri bilong wantok bilong mi, na sapos mi bin i go hait klostu long haus bilong en na wetim wantok i go pinis bai mi ken i go slip wantaim meri bilong en, orait meri bilong mi yet i ken kamap wokmeri bilong ol arapela man na wilwilim wit bilong ol. Na ol arapela man i ken slip wantaim em.”​—Jop 31:​1, 9, 10.

⁵ Jop i gat strongpela tingting long stap gut long God, olsem na em i no lukluk long wanpela meri na aigris long em. Em i wanpela man marit, olsem na em i no tok gris long ol singel meri o tingting long slip wantaim meri bilong narapela man. Long Bikpela Tok Long Maunten, Jisas i mekim wanpela strongpela tok, em i toktok long stretpela pasin em man i mas mekim long meri​—em samting ol man i laik stap gut long God i mas tingim.​—Ritim Matyu 5:​27, 28.

No Ken Mekim Ol Pasin Giaman

6, 7. (a) Olsem God i bin mekim long Jop, em i save mekim wok long wanem samting bilong skelim pasin bilong yumi long stap gut long em? (b) Bilong wanem yumi no ken bihainim ol pasin bilong giaman?

⁶ Bilong stap gut long God, yumi no ken mekim ol pasin bilong giaman. (Ritim Song 5:6.) Jop i tok: “Mi no bin mekim pasin bilong trik na mi no bin giamanim ol manmeri nabaut. Sapos God i skelim stret ol pasin bilong mi, bai em i save gut olsem, mi no gat asua long wanpela samting.” (Jop 31:​5, 6) Jehova i save “skelim stret” pasin bilong olgeta man. Olsem em i bin mekim long Jop, Jehova i save mekim wok long stretpela pasin bilong em bilong skelim yumi, yumi stap gut long em o nogat.

⁷ Yumi no stap gut long God sapos yumi kisim ol pasin bilong giaman. Ol man i stap gut long God ol i bin “givim baksait pinis long olkain pasin nogut ol man i save hait na mekim” na ol i “no save wokabaut long pasin bilong giaman.” (2 Ko. 4:​1, 2) Tasol olsem wanem sapos yumi mekim wanpela tok giaman o pasin giaman na dispela i putim hevi long wanpela wanbilip na nau em i mas beten askim God long helpim em? Sapos olsem, orait sori tumas long yumi! Man bilong raitim song i tok: “Taim hevi i kamap long mi, mi singaut long Bikpela, na em i harim beten bilong mi. Mi bin prea olsem, ‘Bikpela, helpim mi. Nogut ol man bilong giaman i paulim mi.’” (Sng. 120:​1, 2) Em i gutpela long yumi tingim olsem God inap “skelim tingting na bel” bilong yumi bilong save olsem yumi man bilong stap gut long em o nogat.​—Sng. 7:​8, 9.

Mekim Ol Gutpela Pasin Long Ol Narapela

 8. Jop i mekim wanem kain pasin long ol arapela?

⁸ Bilong holimpas pasin bilong stap gut long God, yumi mas bihainim pasin bilong Jop, em i gat pasin daun, em i tingim ol arapela, na i no save mekim wansait pasin. Em i tok: “Bipo, sapos wanpela wokboi o wokmeri bilong mi i bin i gat tok long mi long wanpela samting, na sapos mi no bin putim yau long tok bilong ol, orait taim God i kam bilong kotim mi long dispela pasin nogut, bai mi bekim wanem tok long em? God yet i mekim mi i kamap long bel bilong mama, na em tasol i mekim ol wokboi na wokmeri i kamap long bel bilong mama bilong ol. Dispela wanpela God tasol i bin wokim yumi olgeta na yumi olgeta i stap wankain long ai bilong God.”​—Jop 31:​13-15.

 9. Jop i save mekim wanem ol pasin long ol wokboi bilong em, na yumi tu i mas mekim wanem?

⁹ Long taim bilong Jop, rot bilong mekim kot i no gat hatwok long en. Ol samting i save ron gut na ol wokboi nating tu inap kisim narapela i go long kot. Jop i save mekim stretpela pasin na pasin marimari long ol wokboi bilong em. Yumi tu i mas bihainim ol dispela pasin, na moa yet sapos yu wanpela elda long kongrigesen Kristen.

Givim Samting, No Ken Mangal

10, 11. (a) Olsem wanem yumi save olsem Jop i gat pasin bilong givim samting na helpim narapela? (b) Tok bilong Jop 31:​16-​25 inap kirapim yumi long tingim wanem ol narapela skripsa?

¹⁰ Jop i gat pasin bilong givim samting na helpim narapela, em i no tingim em yet na mangal. Em i tok: “Taim mi lukim ol meri, man bilong ol i dai pinis, mi no larim ol i stap nating. Nogat. Mi bin helpim ol tu. Mi no bin pasim ol kaikai bilong mi na mi wanpela tasol i kaikai. Nogat. Mi bin givim sampela long ol pikinini, papa bilong ol i dai pinis. . . . Sapos mi bin ting ol arapela hetman inap bilipim tok bilong mi, na mi bin sanap long kot na mekim tok giaman bilong pulim ol samting bilong ol pikinini, papa bilong ol i dai pinis, orait mobeta tupela han bilong mi i ken lus na pundaun long graun.” Na sapos Jop i bin bilip olsem gol na mani ‘inap helpim em long stap gut,’ bai i olsem em i lusim pasin bilong stap gut long God.​—Jop 31:​16-25.

¹¹ Dispela tok bilong Jop inap kirapim yumi long tingim dispela tok bilong disaipel Jems: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol.” (Jem. 1:27) Na ating yumi tingim dispela tok bilong Jisas: “Yupela lukaut na was gut. Nogut yupela i mangal long kisim ol kain kain samting. Maski yu yet yu gat planti samting moa, tasol yu no inap kisim laip long ol dispela samting bilong yu.” Orait nau Jisas i mekim wanpela tok piksa bilong wanpela maniman “i stap rabis long ai bilong God.” (Lu. 12:​15-21) Bilong stap gut long God, yumi no ken gridi o mangal. Pasin bilong mangal i wankain olsem pasin bilong lotu long giaman god, long wanem, nau man i no givim bel olgeta long Jehova, em i tingim tumas samting em i mangal long en na dispela i kamap olsem wanpela god long em. (Kl. 3:5) Yumi no inap stap gut long God na long wankain taim bihainim pasin mangal, nogat.

Holimpas Lotu i Tru

12, 13. Olsem wanem Jop i bin stap gutpela piksa long pasin bilong stap longwe long olgeta giaman god?

¹² Ol man i stap gut long God ol i holimpas lotu i tru. Jop i bin mekim olsem, em i tok: “San i save lait moa yet na mun tu i gat gutpela lait. Tasol bel bilong mi i no bin grisim mi long mekim olkain pasin bilong lotu long dispela tupela samting. Na mi no bin kis long han bilong mi bilong givim biknem long tupela. Sapos mi bin mekim ol dispela pasin, em i olsem mi givim baksait long God Antap Tru, na long dispela as tu ol inap kotim mi na mekim save moa yet long mi.”​—Jop 31:​26-28.

¹³ Jop i no lotu long ol samting i no gat laip. Sapos bel i bin grisim em long lotuim san na mun na em i ‘bin kis long han bilong em,’ olsem bilong givim biknem long ol, bai i olsem em i givim baksait long God. (Lo 4:​15, 19) Bilong i stap gut long God, yumi mas stap longwe long olkain pasin bilong lotu long god giaman.​—Ritim 1 Jon 5:​21.

No Ken Amamas Long Hevi i Painim Narapela o Stap Man Bilong Tupela Maus

14. Olsem wanem yumi ken save olsem Jop i no tingting long mekim nogut long narapela?

¹⁴ Jop i no mekim pasin bilong nogutim narapela na em i no tingting long mekim olsem. Em i save ol dispela pasin bai kamapim olsem em i no stap gut long God, em i tok: “Taim mi lukim ol birua bilong mi i painim taim nogut, mi no bin amamas na belgut long lukim ol i kisim bagarap. Na i no gat wanpela taim mi bin askim God long bagarapim ol birua bilong mi na kilim ol i dai. Sapos mi bin mekim olsem, orait mi bin mekim sin.”​—Jop 31:​29, 30.

15. Taim hevi i painim man i birua long yumi, bilong wanem i no stret sapos yumi amamas long dispela?

¹⁵ Stretpela man Jop i no amamas long lukim hevi i painim birua bilong em. Wanpela savetok i tok: “Yu no ken amamas long taim yu lukim birua bilong yu i painim taim nogut. Na sapos em i sutim lek long wanpela samting na i laik pundaun, orait yu no ken lap. Nogut Bikpela i lukim yu i amamas na bai em i bel nogut long yu na em i no kros moa long dispela birua.” (Snd. 24:​17, 18) Jehova inap lukim bel bilong man, olsem na sapos insait long bel yumi amamas long lukim taim nogut i painim narapela, orait Em i save long dispela na em i no orait long en. (Snd. 17:5) God inap bekim pe i stret long yumi. Em i tok: “Bikpela bai i bekim rong bilong ol na mekim save long ol.”​—Lo 32:35.

16. Maski yumi no gat mani, olsem wanem yumi ken bihainim pasin bilong mekim gut long narapela?

¹⁶ Jop i man bilong kisim ol narapela i go long haus bilong em na em i mekim gut long ol. (Jop 31:​31, 32) Maski yumi no gat mani, ‘sapos ol man bilong narapela ples i kamap long yumi, yumi mas lukautim ol gut.’ (Ro. 12:13) I no olsem yumi mas mekim bikpela kaikai, liklik kaikai tasol em inap. “Pasin bilong laikim man, em i nambawan pasin. Olsem na sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim, na yupela i kaikai mit bilong bulmakau.” (Snd. 15:17) Taim yumi kaikai wantaim wanpela wanbilip we i gat pasin laikim i stap, orait maski em liklik kaikai tasol, bai yumi amamas na kisim strong.

17. Bilong wanem yumi no ken traim long haitim bikpela rong?

¹⁷ Ating ol man i bin amamas na kisim strong long go long haus bilong Jop, long wanem, em i no man bilong tupela maus. Em i no wankain long ol man i bin hait i kam insait pinis long kongrigesen na “grisim ol man, bilong mekim ol i bihainim laik bilong ol.” (Ju. 3, 4, 16) Na tu, Jop i no ‘haitim sin bilong em’​—em i no pret olsem ol narapela bai painimaut sin bilong em na tok bilas long em, nogat. Sapos em i bin mekim sin, em i redi long tokaut long God long rong bilong em na larim God i skelim em. (Jop 31:​33-37) Sapos yumi mekim bikpela rong, nogut yumi traim long haitim rong bilong yumi bilong lukautim gutnem bilong yumi, nogat. Yumi ken mekim wanem bilong soim olsem yumi laik stap gut long God? Yumi mas tokaut long rong bilong yumi, tanim bel, askim ol elda long helpim yumi, na mekim olgeta samting yumi inap mekim bilong stretim dispela rong.​—Snd. 28:13; Jem. 5:​13-15.

Jop i Larim God i Skelim Em

18, 19. Olsem wanem yumi ken tok Jop i no bin mekim nogut long wanpela man? (b) Jop i redi long mekim wanem sapos em i bin mekim rong?

¹⁸ Jop i save mekim stretpela pasin long ol narapela. Olsem na em inap tok: “Sapos mi bin mekim nogut long narapela man na stilim graun bilong en na mi planim kaikai long dispela graun mi no bin baim, na graun yet i kros long mi na i krai moa yet, orait taim mi planim ol pikinini wit na bali, ol rop i gat nil na ol gras nogut tasol i ken kamap long dispela graun.” (Jop 31:​38-40) Jop i no kisim nating graun bilong ol narapela, na em i no mekim nogut long ol wokman. Olsem Jop, yumi tu i mas stap gut long Jehova long ol bikpela samting na ol liklik samting tu.

¹⁹ Long ai bilong tripela poroman bilong em, na tu long ai bilong yangpela man Elihu, Jop i bin tokaut long pasin em i bin bihainim long i stap bilong em. Jop i bin “putim mak” bilong em bilong strongim dispela tok, na em i singautim ol man olsem sapos ol i gat tok long pasin bilong em, orait ol i mas tokaut long dispela. Sapos em i gat rong, orait em i redi long kisim strafe long rong bilong em. Orait nau em i wet long God i skelim em. Na “tok bilong Jop i pinis long hia.”​—Jop 31:​35, 40.

Yu Inap Stap Gut Long God

20, 21. (a) Olsem wanem na Jop inap stap gut long God? (b) Long wanem rot yumi inap kisim pasin bilong laikim God?

²⁰ Jop i bin stap gut long God, long wanem, em i laikim God, na Jehova i laikim em na helpim em. Jop i tok: “Yu bin givim laip long mi na yu bin laikim mi tru. Yu bin lukautim mi gut na mi stap laip yet.” (Jop 10:12) Na tu, Jop i bin mekim pasin laikim long ol narapela, em i save olsem sapos man i no mekim pasin laikim long ol narapela, em bai lusim pasin bilong stap aninit long God i Gat Olgeta Strong. (Jop 6:14) Ol man i stap gut long God, ol i save laikim God na ol narapela.​—Mt. 22:​37-40.

²¹ Yumi ken kisim pasin bilong laikim God long rot bilong ritim Tok bilong em long olgeta de na tingim tingim long bel ol tok em Baibel i kamapim long God. Long rot bilong beten, yumi ken litimapim nem bilong Jehova na tok tenkyu long em long ol gutpela pasin em i bin mekim long yumi. (Fl. 4:​6, 7) Yumi ken mekim singsing long Jehova na kisim helpim long rot bilong bung olgeta taim wantaim lain bilong em. (Hi. 10:​23-25) Na tu, pasin bilong yumi long laikim God bai go bikpela taim yumi insait long wok autim tok na tokaut olsem, “Bikpela i save kisim bek ol manmeri.” (Sng. 96:​1-3) Long ol dispela rot, yumi inap holimpas pasin bilong stap gut long God, wankain long man bilong raitim song, em i tok: “Mi stap klostu long yu na dispela i gutpela tru. God, Bikpela, yu banis tru bilong mi.”​—Sng. 73:28.

22, 23. Yumi lain i sapotim wok bos bilong Jehova, na olsem wanem ol samting yumi mekim i wankain long ol samting ol man i stap gut long God i bin mekim long bipo?

²² Insait long planti tausen yia i kam inap nau, Jehova i bin givim ol narapela narapela wok long ol man i stap gut long em. Noa i bin wokim sip na em i “man bilong tokaut long stretpela pasin.” (2 Pi. 2:5) Josua i bin kisim lain Israel i go insait long Graun Bilong Promis, na em i mekim gut dispela wok, long wanem, em i save ritim “buk bilong lo . . . long san na long nait” na em i bihainim ol tok bilong en. (Jos. 1:​7, 8) Ol Kristen long taim bilong ol aposel ol i save kamapim ol disaipel na bung olgeta taim bilong stadi long Baibel.​—Mt. 28:​19, 20.

²³ Yumi sapotim wok bos bilong Jehova na stap gut long em long rot bilong autim tok, kamapim ol disaipel, bihainim ol tok bilong Baibel, na bung wantaim ol wanbilip long ol miting na kibung. Ol dispela wok bai helpim yumi long sanap strong na no ken pret, na yumi inap mekim gut laik bilong God. I no hatwok tumas long mekim, long wanem, Papa bilong yumi long heven na Pikinini bilong em bai helpim yumi. (Lo 30:​11-14; 1 Kin. 8:57) Na tu, yumi kisim helpim long “ol arapela manmeri bilong God,” em ol tu i save wokabaut long stretpela pasin na tingim Jehova olsem Bikpela King bilong ol.​—1 Pi. 2:17.

Bai Yu Bekim Olsem Wanem?

• Yumi mas i gat wanem tingting long ol lo bilong Jehova long stretpela pasin?

• Wanem ol pasin bilong Jop em yu yet i laikim?

• Olsem Jop 31:​29-​37 i kamapim, Jop i bihainim wanem kain pasin?

• Olsem wanem na yumi inap stap gut long God?

[Piksa long pes 29]

Jop i stap gut long Jehova.

Yumi tu inap!

[Piksa long pes 32]

Yumi inap stap gut long God!