Gutpela Pe Bilong Jop i Strongim Bel Bilong Man
“Bikpela i mekim gut moa yet long Jop . . . i winim tru ol yia em i bin i stap bipo.”—JOP 42:12.
JEHOVA “i save mekim gut tru long ol man i wok long painim em.” (Hibru 11:6) Na em i save kirapim lain bilong em long strongim bel na autim tok, maski ol hevi i bin pinisim strong bilong ol na ol i kamap olsem man i dai pinis. (Jop 26:5; KTH 11:3, 7, 11) Dispela i kamap tru long Jop. Em i karim bikpela pen, tasol maski tripela pren giaman i toknogutim em, em i no pret long ol na pasim maus, nogat. Em i strong long autim tok long ol.
2 Planti Witnes Bilong Jehova long nau ol i bin kisim nogut tru long ol man na planti hevi i painim ol na klostu ol i dai. (2 Korin 11:23) Tasol ol i bihainim pasin bilong Jop—ol i givim bel long God na bihainim stretpela pasin. (Esekiel 14:14, 20) Ol i winim ol hevi na dispela i strongim ol na ol i strong long mekim ol samting Jehova i laikim na autim tok long ol man na no ken pret, na ol i bilip na wetim ol gutpela samting bai kamap bihain.
Jop i Strong Long Autim Tok
3 Long laspela tok bilong em, Jop i autim tok strong moa na ol pren giaman bilong em i pasim maus olgeta na i no inap mekim wanpela tok moa. Em i tokim ol: “Olaboi, ating yu hapman tru bilong helpim ol man i no gat strong.” (Jop 26:2) Jop i litimapim nem bilong Jehova, em bikpela strong bilong em i mekim na graun i hangamap nating, na sno bilong antap i gat wara i pulap long en na i hangamap tasol. (Jop 26:7-9) Tasol Jop i tok, ol dispela gutpela wok i soim yumi liklik hap tasol bilong bikpela strong bilong Jehova.—Jop 26:14.
4 Jop i pilim tru olsem em i no gat rong, na em i tokaut olsem: “Bai mi mekim wankain tok tasol i go inap taim mi dai.” (Jop 27:5) Em i no bin mekim sampela rong inap long ol dispela hevi i painim em. Em i save, Jehova i no save harim beten bilong ol man i lusim em na givim baksait long em, tasol em bai givim gutpela pe long ol man i stap gut long em. Dispela inap helpim yumi long tingim taim nogut bilong Armagedon liklik taim bai kamap, em bai rausim olgeta man nogut na pinisim strong na namba bilong ol, na ol i no inap abrusim strafe bilong God. Tasol inap long dispela taim lain bilong Jehova bai karim hevi na stap gut long em.—Jop 27:11-23.
5 Yumi ken tingim dispela tripela man ol i gat save bilong dispela graun na ol i putim yau long tok bilong Jop. Em i tok, ol man i kamapim save bilong ol long painim gol na silva na ol naispela ston insait long graun na pel bilong solwara, tasol “gutpela tingting na save i winim tru pe bilong ol . . . naispela pel bilong solwara.” (Jop 28:18) Ol dispela pren giaman bilong Jop i no inap baim gutpela tingting tru. As bilong dispela gutpela tingting em Man bilong wokim win, na ren, na klaut, na klaut i pairap. Tru tumas, “man i save aninit [olsem pret] long . . . Bikpela, na i save givim baksait long ol pasin nogut, dispela man i gat gutpela tingting na save.”—Jop 28:28.
6 Maski Jop i gat bikpela hevi na pen, dispela i no pasim em long mekim wok bilong Jehova. Em i no lusim God Antap Tru. Em i laik tumas long i stap yet olsem bipo, taim “God i bin i stap gutpela pren” bilong em. (Jop 29:4) Jop i no hambak taim em i tok, em i bin ‘kisim bek ol taranguman long han bilong ol man nogut, na bihainim stretpela pasin, na em i stap olsem papa bilong ol rabisman.’ (Jop 29:12-16) Em i tokaut long ol pasin em i bin mekim olsem gutpela wokboi bilong Jehova. Olsem wanem long yu? Yu bin mekim ol gutpela pasin na wok olsem? Na Jop i mekim dispela tok bilong kamapim giaman bilong tripela man ol i giaman tasol long bihainim stretpela pasin.
7 Ol yangpela man em ‘papa bilong ol i rabis tru long ai bilong ol manmeri,’ ol i tok bilas na lap nogut long Jop, na ol i spet long pes bilong em. Maski em i gat bikpela sik na pen, ol man i no sori long em na helpim em. (Jop 30:1, 10, 30) Tasol em i givim bel olgeta long Jehova, olsem na bel bilong em i no gat tok, na em inap tok olsem: “Sapos God i skelim stret ol pasin bilong mi, bai em i save gut olsem, mi no gat asua long wanpela samting.” (Jop 31:6) Jop i no man bilong pamuk o tingting long mekim nogut long man, na em i no surik long helpim ol rabisman. Em i bin i stap maniman, tasol em i no givim bel long mani. Na tu, Jop i no bin mekim sampela pasin bilong lotu long mun samting. (Jop 31:26-28) Em i bilip long God na i stap gutpela piksa tru olsem man i stap gut long God. Em i karim bikpela pen, na ol dispela pren giaman i stap, tasol em i strong long autim tok olsem man i gat save tru long mekim. Orait, tok bilong Jop i pinis na em i putim em yet long han bilong God, em Man bilong skelim em long kot na Man bilong givim gutpela pe long em.—Jop 31:35-40.
Elihu i Toktok
8 Yangpela man Elihu i sindaun klostu. Em i bilong lain famili bilong Bus, em pikinini man bilong Nahor, olsem na Elihu i bilong lain bilong Abraham, em pren bilong Jehova. (Aisaia 41:8) Elihu i bin putim gut yau long tok bilong tripela man na Jop tu, na dispela i makim olsem em i daun long ol man i bikpela long em. Tasol taim ol i mekim tok kranki, em i tokaut long dispela na em i no pret. Na em i kros long Jop, long wanem, Jop “i bin tok long em yet i mekim stretpela pasin na pasin bilong God i no stret.” Tasol em i kros moa yet long tripela pren giaman bilong Jop. Tok bilong ol i olsem i litimapim nem bilong God, tasol nogat. Ol i helpim tok bilong Satan, na long dispela pasin ol i tok nogut long God. Elihu i “gat planti tingting bilong bekim tok” bilong ol, na spirit holi i kirapim em na em i autim ol tok i tru tasol—em i no helpim nating tok kranki bilong wanpela. Olsem na em i wanpela gutpela witnes bilong Jehova.—Jop 32:2, 18, 21.
9 Jop i tingting tumas long kamapim stretpela pasin bilong em, na bilong God nogat. Long dispela pasin em i tok pait long God. Tasol taim em i laik i dai, spirit i kirapim Elihu long tokaut olsem Jehova i orait long Jop na i tok: “ ‘Yu no ken larim em i go long ples bilong ol man i dai pinis, long wanem, mi painim pinis rot bilong baim bek dispela man,’ orait bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.”—Jop 33:24, 25.
10 Elihu i stretim tok bilong Jop, em i bin tok, sapos man i stap gut long God, dispela i no inap helpim man liklik. Elihu i tok: “God I Gat Olgeta Strong i no inap mekim pasin nogut. Nogat tru. Em i save . . . bekim pe long yumi inap long pasin yumi bin mekim.” Jop i hariap long kamapim stretpela pasin bilong em, tasol em i sot long save na gutpela tingting. Na Elihu i tok: “Mi laik bai God i traim Jop moa yet inap Jop i lusim dispela kain tok.” (Jop 34:10, 11, 35, 36) Na yumi tu, God i mas ‘traim moa yet’ bilip bilong yumi—bai yumi stap gut long em o nogat. Tasol em i no ken larim wanpela traim i painim yumi em i winim strong bilong yumi.—1 Korin 10:13.
11 Nau Elihu i tok gen, Jop i strong tumas long kamapim stretpela pasin bilong em. Em i mas kamapim gutpela pasin bilong Man i bin wokim yumi. (Jop 35:2, 6, 10) Elihu i tok: “Ol man i mekim pasin nogut, [God] i no save larim ol i stap laip. Na em i save helpim ol rabisman na stretim hevi bilong ol.” (Jop 36:6) I no gat wanpela inap skelim pasin bilong God na tok, em i no bin mekim stretpela pasin. God i ‘nambawan na i antap tru, na yumi no inap painimaut hamas krismas bilong em.’ (Jop 36:22-26) Taim bikpela traim i painim yumi, yumi mas tingim dispela God bilong yumi i save stap oltaim, em i stretpela God na em bai givim gutpela pe long yumi sapos yumi mekim ol wok i litimapim nem bilong em.
12 Taim Elihu i toktok, klaut i pairap na em i guria na lewa bilong em i sut. Em i tokim Jop: “Putim yau gut na kisim tingting long ol kain kain strongpela wok God i save mekim.” Yumi tu i mas tingim ol strongpela wok bilong God na bikpela namba bilong em. Elihu i tok: “God I Gat Olgeta Strong, em i antap tru na yumi no inap i go klostu long em. Em i . . . save mekim stretpela pasin tasol, na em i no inap daunim yumi nating. Olsem na ol manmeri i [mas] pret long em.” (Jop 37:1, 14, 23, 24) Laspela tok bilong Elihu i kirapim yumi long tingim taim i klostu nau na God bai bagarapim ol man nogut, tasol em bai mekim stretpela kot na lukautim ol man i daun na pret long em na lotu long em. Yumi amamas tru long i stap insait long dispela lain i tokaut olsem Jehova em i Nambawan King Bilong Heven na Graun! Stap strong na karim hevi olsem Jop i bin mekim, na yu no ken larim Satan i pulim yu i go na yu lusim dispela gutpela ples yu stap long en namel long bikpela lain ol i stap amamas.
Jehova i Bekim Tok Bilong Jop
13 Ating Jop i kirap nogut taim em i harim Jehova i toktok insait long bikpela win na ren! God yet i kamapim dispela win na ren—i no olsem dispela bikpela win Satan i mekim wok long en bilong bagarapim haus na olgeta pikinini bilong Jop. God i tokim Jop: “Taim mi wokim na strongim as bilong dispela graun, yu stap we? . . . Ol sta i bin lukim na ol i amamas na singim song, na ol ensel i amamas na singaut.” Em nau, Jop i no gat toktok—em i pasim maus. (Jop 38:4, 6, 7) Jehova i givim planti askim long em long solwara, na sno i karamapim olsem klos, na tulait, na dua bilong ples bilong ol man i dai pinis, na lait na tudak, na ol lain sta. Na God i askim Jop: “Yu save long ol lo em ol sta bilong skai i save bihainim, laka?” Tasol Jop i no inap bekim wanpela tok long God.—Jop 38:33.
14 Sampela askim moa bilong God i makim olsem taim em i no bin wokim yet man na tokim em long bosim ol pis, pisin, animal, God i bin lukautim ol dispela samting long kaikai, na i no gat wanpela man bilong graun i helpim em o tokim em long mekim olsem wanem. Nau Jehova i givim askim long Jop long ol wel bulmakau na muruk na hos: “Ating yu yet yu save tok na ol tarangau i save flai i go antap long maunten na wokim ol haus bilong ol, laka?” (Jop 39:27) Nogat tru! Ating Jop i sem tru taim God i tokim em: “Yu bin tok pait long mi, God I Gat Olgeta Strong, na yu bin kotim mi. Orait nau mi givim taim long yu long bekim ol askim bilong mi. Yu inap bekim, o nogat?” Jop i tok: “Mi rabis na samting nating tasol. Olsem wanem na mi inap bekim tok bilong yu? Mi bai pasim maus tasol.” (Jop 40:2, 4) Olgeta tok bilong Jehova i stret, olsem na sapos wanpela taim yumi laik toktok planti long tok bilong em, yumi mas “pasim maus tasol.” Ol askim bilong God i litimapim bikpela strong na namba bilong em, em i antap tru, na dispela i kamap ples klia long olgeta samting em i bin wokim.
Hipopotamus na Pukpuk
15 Orait nau Jehova i stori long animal hipopotamus. (Jop 40:15-24) Em i traipela animal tru na i hevi nogut tru, tasol ‘em i save kaikai gras’ tasol. Bikpela strong tru i stap long lek bilong baksait na long ol rop bilong masol long bel. Ol bun bilong lek i strong tru olsem “paip ol i bin wokim long strongpela bras.” Taim wara i tait, hipopotamus i no save pret. Maski wara i ran strong, em i save subim wara i go.
16 Na God i askim Jop: “Yu inap tromoi huk na hukim traipela pukpuk . . . , a? Na yu inap pasim tang bilong en long baklain?” Dispela stori i makim stret pukpuk, a? (Jop 41:1-34) Pukpuk i no inap wokim wanpela kontrak bilong i stap isi wantaim man, na man i gat gutpela tingting em i no inap kirapim pukpuk long pait. Na maski man i sutim spia long en, em i no ken ranawe, na “taim em i harim ol longpela spia i pairap, em i no wari long ol.” Taim em i kros, em i save mekim wara i boil olsem wara i boil long sospen. Strong bilong hipopotamus na pukpuk i winim tru strong bilong Jop, na em i pilim na i mekim pasin daun. Yumi tu i mas mekim pasin daun na tokaut olsem yumi yet i no gat strong—God yet i mas givim gutpela tingting na strong long yumi bilong abrusim ol tit bilong dispela snek, em Satan, na bilong inapim tru ol wok bilong Jehova yumi mas mekim.—Filipai 4:13; KTH 12:9.
17 Jop i mekim pasin daun na i tokaut olsem tingting bilong em i kranki, na em i no gat save na em i bin mekim tok. Tasol em i kamapim bilip bilong em olsem em bai “lukim God.” (Jop 19:25-27) Tasol i no gat wanpela man inap lukim God na i stap laip. Orait, olsem wanem Jop inap mekim olsem? (Kisim Bek 33:20) Jop i bin lukim strong bilong God na harim tok bilong God, na em i bin kisim stretpela save long pasin bilong Jehova. Olsem na Jop i sem tru na em i sindaun long das na long sit bilong paia, bilong soim Jehova olsem em i tanim bel pinis. (Jop 42:1-6) Ol planti askim Jop i no inap bekim ol i bin kamapim klia olsem God i nambawan, na ol man i samting nating tasol—na Jop tu i samting nating, maski em i givim bel tru long Jehova. Dispela inap helpim yumi long pilim tru olsem yumi no ken putim ol laik bilong yumi i go pas long wok bilong mekim nem bilong Jehova i stap holi na bilong kamapim klia olsem i stret Jehova i stap King tru. (Matyu 6:9, 10) Nambawan tingting bilong yumi, em yumi mas i stap gut long Jehova na litimapim nem bilong em.
18 Orait, olsem wanem long ol pren giaman bilong Jop? Jehova inap kilim i dai Elifas na Bildat na Sofar, long wanem, ol i no bin autim tok tru long pasin bilong Jehova olsem Jop i bin mekim. Orait God i tokim ol: “Yupela go nau na kisim 7-pela bulmakau man na 7-pela sipsip man na bringim ol i go long Jop, wokman bilong mi. Na yupela i mas kilim ol i dai na mekim ol ofa bilong paia i kukim olgeta. Na bai Jop i beten na askim mi long marimari long yupela.” Bilong mekim olsem, tripela i mas mekim pasin daun tru. Jop i mas beten bilong helpim ol, na Jehova i orait long beten bilong Jop. (Jop 42:7-9) Tasol olsem wanem long meri bilong Jop, em i bin tokim Jop long tok nogut long God na bai em i dai? Ating Jehova i marimari long em na em i kamap wanbel gen wantaim Jop.
Tingim Gutpela Pe God Bai Givim
19 Taim Jop i no tingim moa hevi bilong em na em i kirap mekim gen wok bilong God, Jehova i senisim ol samting long sindaun bilong Jop. Jop i beten bilong helpim tripela na bihain God i “givim em gutpela sindaun gen.” Em i “givim Jop planti samting tru, i dabolim olgeta samting em i bin i gat bipo.” Jehova i pasim Satan na em i no inap bagarapim moa skin bilong Jop, na Jehova i oraitim sik bilong Jop. Long dispela rot Jehova i kamapim klia olsem Em i nambawan na em i gat bikpela strong moa, winim Satan. Na Jehova i salim ol ensel bilong em i kam lukautim Jop na ol ensel nogut i no inap mekim nogut long em.—Jop 42:10; Song 34:7.
20 Ol brata susa na ol pren bilong bipo ol i kam na kaikai wantaim Jop na sori long em na mekim gut bel bilong em, long wanem, Jehova i bin larim ol dispela hevi i painim em. Olgeta wan wan i givim mani na wanpela ring gol long Jop. Na laspela hap bilong laip bilong em i winim tru ol yia em i bin i stap bipo, na em i kisim 14,000 sipsip, 6,000 kamel, 2,000 bulmakau, 1,000 donki meri. Na Jop i kamapim 7-pela pikinini man na 3-pela pikinini meri, wankain olsem bilong pastaim. Ol pikinini meri, em Jemima na Kesia na Kerenhapuk, ol i naispela meri tru, winim olgeta meri long dispela kantri. Na Jop i givim hap graun long ol tu, olsem em i mekim long ol brata bilong ol. (Jop 42:11-15) Na Jop i stap inap 140 yia moa na em i lukim ol tumbuna pikinini na ol pikinini na tumbuna pikinini bilong ol. Orait, “Jop i stap gut tru, na em i kamap lapun tru, na em i dai.” (Jop 42:16, 17) Jehova i bin wokim mirakel na em i skruim planti yia moa long laip bilong Jop.
21 Stori bilong Jop long Baibel i kirapim yumi long tingim ol pasin hait bilong Satan, na yumi ken save tu, pasin bilong i stap gut long Jehova i insait long dispela bikpela tok long husat i mas i stap King bilong heven na graun. Traim bai painim olgeta man i laikim tru Jehova, olsem i bin painim Jop. Tasol yumi inap i stap strong olsem Jop. Em i winim ol hevi na holimpas bilip, na em i kisim planti blesing. Yumi ol wokboi bilong Jehova long nau tu, yumi gat trupela bilip na yumi wetim gutpela samting bai kamap bihain. Na Man bilong givim gutpela pe long ol man, em i givim gutpela promis tru long yumi! Ol manmeri God i bin makim ol, ol i mas tingim gutpela pe ol bai kisim, olsem laip long heven, na dispela bai strongim ol long i stap gut long mekim wok bilong God i go inap long taim ol i dai. Planti manmeri i gat tingting long i stap oltaim long graun, ol i no ken i dai; tasol sapos sampela i dai ol bai kisim gutpela pe—ol bai kirap bek na i stap long Paradais long graun, olsem Jop bai mekim. Dispela bilip i stap strong long bel bilong yumi olgeta man i laikim tru God, olsem na yumi mas kamapim long ples klia olsem Satan i giaman—yumi mas sanap strong na stap gut long Jehova na kamapim bel bilong yumi, yumi amamas long i stap aninit long em, em i King bilong heven na graun.
Bai Yu Bekim Olsem Wanem?
◻ Long laspela tok Jop i givim long tripela pren giaman, wanem sampela bikpela tok em i kamapim?
◻ Olsem wanem Elihu i kamapim klia olsem em i wanpela gutpela witnes bilong Jehova?
◻ Wanem sampela askim God i givim long Jop? Ol i mekim wanem long Jop?
◻ Stori bilong Jop long Baibel i bin helpim yu olsem wanem?
[Askim Bilong Stadi]
1. Jehova i save mekim wanem long lain bilong em, maski ol hevi i pinisim strong bilong ol?
2. Maski ol man i mekim nogut long ol Witnes Bilong Jehova na planti hevi i painim ol, ol i winim ol hevi na dispela i mekim wanem long ol?
3. Long laspela tok bilong em, Jop i autim tok olsem wanem?
4. Jop i tok wanem long i stap gut long God? Olsem wanem na em inap tok olsem?
5. Jop i tok wanem long gutpela tingting na save?
6. Bilong wanem Jop i stori long i stap bilong em bilong bipo?
7. Bipo Jop i stap wanem kain man?
8. Elihu em i husat? Olsem wanem em i kamapim klia olsem em i daun long ol man i bikpela long em tasol em i gat strongpela bel tu?
9. Elihu i tok wanem na i makim olsem Jop bai orait gen?
10. Ol traim i mas painim Jop i go inap long wanem mak? Tasol yumi tingim 1 Korin 10:13 na yumi save tru long wanem samting?
11. Taim bikpela traim i painim yumi, yumi mas tingim wanem samting?
12. Laspela tok bilong Elihu i givim wanem tingting long yumi long taim God i kirap bagarapim ol man nogut?
13, 14. (a) God i kirap na givim askim long Jop long wanem samting? (b) Yumi inap kisim wanem save long ol narapela askim God i givim long Jop?
15. Wanem sampela pasin bilong animal hipopotamus?
16. (a) Dispela narapela askim God i givim long Jop, olsem wanem em i makim pukpuk tru? Wanem sampela pasin bilong pukpuk? (b) Strong bilong hipopotamus na pukpuk inap givim wanem tingting long yumi long inapim tru ol wok bilong Jehova yumi mas mekim?
17. (a) Olsem wanem Jop i “lukim God”? (b) Ol askim Jop i no inap bekim i kamapim klia wanem samting? Dispela inap helpim yumi olsem wanem?
18. Ol pren giaman bilong Jop i mas mekim wanem?
19. Long ol samting i bin painim Jop, olsem wanem Jehova i kamapim klia olsem em i gat bikpela strong moa, winim Satan?
20. Wanem gutpela pe na blesing Jehova i givim long Jop?
21. Stori bilong Jop long Baibel i helpim yumi olsem wanem? Yumi mas tingting strong long mekim wanem?
[Ol Piksa long pes 18]
Ol tok bilong Jehova long hipopotamus na pukpuk i helpim Jop long mekim pasin daun