Taim Yu Givim Tok Long Narapela Yu Save Mekim Gut Long Em?
SAPOS long pasin sori ol i givim tok long yumi bilong stretim yumi, em gutpela tru! Edward i tok: “Sapos ol i tingim yu na givim tok long yu bilong stretim yu, bai yu stap wanbel wantaim ol.” Na Warren i tok: “Sapos brata i harim tok bilong yu taim em i stretim yu na em i no daunim yu, bai yu amamas long bihainim tok bilong em.” Na Norman i tok: “Sapos mi save elda i no ken daunim mi, bai mi amamas long askim em long helpim mi.”
No Ken Daunim Man
Sapos sampela i givim tok long yumi bilong stretim yumi, yumi laik bai ol i mekim long gutpela pasin pren. Sapos yu laik givim tok long narapela, yu mas mekim long pasin yu yet yu laik bai ol i mekim long yu bambai dispela tok i ken helpim yu. (Matyu 7:12) Yu mas harim gut tok bilong man yu laik stretim em, na yu mas save gut long tingting bilong em, em i gat wanem tingting na wanem nem na wanem kain sindaun—no ken sutim tok long em bilong daunim em na bagarapim bel bilong em.—Sindaun 18:13.
Ol elda, na sampela moa tu, i gat wok long givim tok long sampela man, na nogut ol i mekim long pasin i bagarapim bel bilong man, olsem sampela man i save mekim long nau. Pasin bilong planti man long nau, taim ol i mas givim tok long man ol i save daunim em na mekim olsem em i samting nating tasol. Ol man yumi ting ol bai mekim gut long yumi taim ol i givim tok long yumi, olsem ol pris pasto na bikman samting, ol i no save mekim olsem. Sapos bos i mas pinisim wanpela wokman long wok, dispela bai givim hevi long bos wantaim wokman. Na taim bos i tok long rausim man na em i mekim hatpela tok i daunim man, em bai ting em i man nogut tasol. Wanpela nius (The Vancouver Sun) i tok, taim bos i mas givim ‘hatpela tok long man, em i mas tok klia na tok stret na bihainim gutpela tingting na no ken daunim dispela man na mekim olsem em i samting nating.’ Tru tumas, maski man i husat, yumi mas givim gutnem long olgeta.
Jeneral Asembli bilong Yunaitet Nesen i tok: “Taim mama bilong ol man i karim ol, ol i kamap fri, na ol narapela i mas givim gutnem long ol na no ken daunim wanpela, long wanem, i no gat sampela i man nating tasol na sampela yumi mas litimapim nem bilong ol. Olgeta man i gat tingting na save, na yumi mas mekim pasin long narapela man olsem em i brata bilong yumi.” Long nau ol man i mekim nogut long ol narapela man, olsem na Sata bilong Yunaitet Nesen na tok i go pas long Yunivesal Dekleresen ov Yuman Raits i tok: “I gat sampela samting yumi no ken pasim wanpela man long mekim. Yumi mas givim gutnem long olgeta man.”
Jehova i Wokim Man na Bai Em i Gat Nem
God Jehova yet i gat nem. Baibel i tok: “Bikpela i stap long haus bilong en na em i gat biknem na i stap king.” Na Baibel i tok: “Long olgeta hap bilong graun nem bilong yu i nambawan tru. Biknem bilong yu i inapim olgeta hap bilong skai.”—1 Stori 16:27; Song 8:1.
Dispela bikpela King i mekim gut long olgeta samting em i bin wokim long heven na long graun, na em i givim biknem moa long Pikinini bilong em, em King Krais Jisas. Devit i tok profet olsem: “Nem na strong bilong em yu yet yu givim em.”—Song 21:5; Daniel 7:14.
Tasol sampela i no givim biknem long narapela. Wanpela strongpela ensel i bikhet na i kamap Satan na em i no laik tok, i stret Jehova tasol i bosim ol samting na i stap King. Satan i litimapim nem bilong em yet, olsem stilim biknem bilong Jehova. Sampela bikman tu i mekim olsem, kain olsem Nebukatnesar long bipo, em i bin tok, “Long strong bilong mi yet, mi bin kirapim dispela taun, bilong soim bikpela strong na biknem bilong mi.” Ol i no laik daun long Jehova. (Daniel 4:30) Satan i bosim ol man long hatpela pasin na dispela i daunim gutnem bilong ol.
Sampela man i bin mekim olsem long yu? Taim ol i stretim yu, ol i bin sutim strongpela tok long yu na mekim olsem yu gat bikpela asua na ol i semim yu? André i tok: “Taim ol i givim tok long mi, mi pilim ol i no sori long mi o tingim mi. Ol i daunim mi na bagarapim bel bilong mi na mi pilim olsem mi man nogut tasol.” Na Laura i tok: “Taim wanpela i givim tok long yu na yu pilim olsem em i no laik helpim yu tru, i hatwok long bihainim tok bilong em.”
Olsem na ol wasman Kristen i mas mekim pasin isi long lain bilong God na mekim gut long ol. (1 Pita 5:2, 3) Sapos yu mas givim tok long wanpela man bilong stretim na helpim em, yu ken mekim wanem bilong abrusim pasin bilong ol man bilong graun long daunim man na mekim olsem em i pipia nating? Olsem wanem yu ken givim tok long narapela Kristen long gutpela pasin na dispela i mekim gut nem bilong em na nem bilong yu yet?—Sindaun 27:6; Galesia 6:1.
Bilong Mekim Gut Long Man
Baibel i gat sampela tok bilong dispela samting. Ol man i gat save long pasin bilong givim tok long man bilong helpim em, ol i save bihainim ol dispela tok bilong Baibel, na ol i no bihainim save bilong ol man bilong dispela graun. Baibel i gat ol gutpela tok na lo bilong dispela samting, na sapos yumi bihainim, bai yumi givim gutpela tok long man, na dispela bai mekim gut nem bilong yumi yet na mekim gut nem bilong dispela man yumi givim tok long em. Timoti em wanpela wasman Kristen, na Pol i tokim em: “Yu no ken krosim ol lapun man. Nogat. Yu mas stretim ol long tok isi, olsem yu stretim papa bilong yu. Na . . . ol yangpela man olsem yu save mekim long ol brata bilong yu yet. Na . . . ol lapun meri olsem . . . mama bilong yu. Na . . . ol yangpela meri olsem . . . susa bilong yu, em long pasin i klin tru long ai bilong God.” (1 Timoti 5:1, 2) Sapos yumi bihainim dispela tok, bai yumi no ken bagarapim bel bilong man o semim em.
Olsem na bilong mekim gut dispela wok bilong givim tok long man, yumi mas tingim em na mekim gut long em. Ol elda na wasman bilong raun i mas mekim dispela kain pasin long man na traim pilim tingting bilong em na bai ol i ken save bilong wanem em i mekim dispela pasin. Ol i mas harim gut tok bilong em, na taim ol i givim tok long em bilong helpim em, ol i no ken semim em o daunim em.
Yu mas mekim gut long brata bilong yu na bai em i ken save yu tingim em na yu gat laik long helpim em. Sapos yu gat sik na yu go lukim dokta, gutpela dokta i no save rausim olgeta klos bilong yu na larim yu i stap skin nating na bai em i ken painim sik bilong yu. Nogat. Em i karamapim laplap long yu na bai yu no sem samting. (KTH 2:13, 14, 19, 20) Olsem tasol taim elda i mas givim tok long man, elda i no ken mekim hatpela pasin long em na bai em i sem. Na elda i no ken daunim gutnem bilong em na bai em i pilim olsem em i man nogut o em i no gat tingting o save.
Wasman bilong Skul Bilong Wok Autim Tok i mas was gut long taim em i givim tok long ol sumatin bilong stretim tok bilong ol. Em i mas mekim long ol lapun olsem em i mekim long papamama bilong em, na mekim gutpela tok i stret long tingting na pasin bilong ol na bai ol i ken amamas long harim.
Taim elda i givim tok long man, em i ken tingim tok bilong Efesus 4:29 olsem: “Yupela i no ken larim ol kain kain tok nogut i kamap long maus bilong yupela. Nogat. Gutpela tok tasol i mas kamap, inap long strongim ol man i slek. Dispela kain tok i save bringim marimari bilong God i kam long ol man i harim.”
Maski hatim man long strongpela tok na bai em i no gat nem moa. Mekim toktok long em olsem em i man tru i gat nem, na em i no samting nating tasol. Nogut em i les na i no laik bihainim moa gutpela pasin. Givim ol tok long em bilong strongim bel bilong em. Tokim em long ol gutpela wok em i bin mekim na gutpela pasin bilong em. Tok bilong elda i mas “strongim bilip” bilong man; i no bilong “bagarapim” man.—2 Korin 10:8.
Taim wasman Kristen i givim tok long man bilong stretim em, dispela tok i mas gutpela bilong stretim tingting na stretim bel bilong em na givim strong long em. Nogut tok bilong wasman i daunim em na pretim em. (2 Korin 10:9) Na sapos man i bin mekim bikpela rong, wasman i no ken tok nogut long em. Em i mas mekim gut yet long em, na long pasin sori em i mas givim tok long em bilong stretim em na kirapim em long tanim bel.—Song 44:15; 1 Korin 15:34.
Lo em God i bin givim long ol Israel i tok olsem tu. Ol i ken givim tok long man na ol i ken paitim man bambai ol i ken stretim em, tasol ol i no ken daunim em tumas. “Ol i mas paitim em inap long mak bilong rong em i bin mekim,” na no ken go moa, “nogut ol i paitim em planti tumas na bai em i sem nogut long ai bilong ol manmeri.”—Lo 25:2, 3.
Na Jisas tu i bin tingting long ol man i bin mekim rong na bihain ol i tanim bel. Em i laik helpim na strongim kain man olsem. Aisaia i tok profet long Jisas olsem: “Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut. Em bai i mekim stretpela pasin i kamap strong.”—Aisaia 42:3; Matyu 12:17, 20; Luk 7:37, 38, 44-50.
Jisas i laik bai yumi mekim pasin sori long man. Taim em i mekim bikpela tok bilong em long maunten, em i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Dispela i bikpela lo ol Kristen i mas bihainim. Ol elda i mas bihainim dispela tu long taim ol i stretim man na givim tok long em. Ol i mas mekim long pasin isi na long gutpela pasin. Sapos ol i mekim olsem, dispela bai helpim ol yet olsem wanem?
Jems i tok, yumi olgeta i save popaia “planti taim.” (Jems 3:2) Olsem na yumi mas tingim dispela na yumi isi long narapela man taim em i popaia na yumi laik stretim em. Em inap bel hevi sapos yumi givim strongpela tok tumas long em o toktok planti long ol liklik pasin kranki bilong em. Jisas i tok: “No ken skelim pasin bilong ol arapela na tok ol i man nogut. . . . God bai i skelim pasin bilong yupela long wankain pasin olsem yupela i save mekim long ol arapela man.”—Matyu 7:1, 2.
Givim Biknem Long Ol Narapela
Satan i laik bai yu no gat nem na yu sem na yu pilim olsem yu man nogut na bel bilong yu i bagarap. Em i kirapim Elifas long mekim tok i bagarapim bel bilong Jop olsem: “Ol ensel . . . i no save mekim gut wok bilong ol. God i save lukim sampela pasin bilong ol ensel i no stret. Tasol ol man i samting bilong graun tasol, na yu ting ol inap winim ol ensel na i stap stret long ai bilong God, a? . . . Ol i save dai kwiktaim tru olsem ol bataplai.” (Jop 4:18, 19) I olsem em i tok, Jop em i samting nating olsem bataplai na God i no tingim em. Kain tok olsem inap bagarapim bel bilong Jop, maski bipo em i bin stap gut na mekim gutpela wok na lukautim gut famili bilong em na helpim gut ol man.
Sapos sinman i tanim bel, i mas i gat sampela man bilong strongim em, na sapos nogat, bel hevi inap daunim em. Sapos ol elda i givim tok long em, em i mas inap long pilim olsem ol i sori long em na ol i laik helpim em. Ol i mas mekim olsem em i gat nem yet. (2 Korin 2:7, 8) William i tok: “Sapos ol i daunim tumas man, em bai hatwok long bihainim tok bilong ol.” Yumi mas helpim man na bai em i ken save God i laikim em. Helpim em na bai em i ken save, “God em i no man nogut, na bai em i lusim tingting long ol gutpela wok” dispela man i bin mekim, olsem givim bel long God, na mekim wok bilong God inap planti yia.—Hibru 6:10.
Taim elda i givim tok long man, em i ken tingim wanem ol narapela samting na bai em i ken mekim gut long dispela man? Em i mas givim gutnem long olgeta man, long wanem, God i bin wokim ol i kain olsem em yet. Long ai bilong God Jehova na Krais Jisas olgeta man i olsem gutpela samting, olsem na God i bin baim ol long blut bilong Jisas, na tupela bai kirapim bek ol man i dai pinis. Na Jehova i givim gutpela wok long ol Kristen, na dispela i givim biknem long ol tu. Ol i gat wok long tokim ol man nogut long tanim bel na kam long God.—1 Timoti 1:12.
Ol elda i mas save, klostu olgeta Kristen i bilong i stap long nupela taim bai kamap long graun, olsem na taim ol elda i stretim ol, ol i mas givim gutnem long ol, olsem Jehova na Jisas i save mekim, na strongim bel bilong ol na bai ol i ken sanap strong na sakim Satan.—2 Pita 3:13; lukim 1 Pita 3:7.
[Blok long pes 29]
Tok i Givim Gutnem Long Man
(1) Tokim em long gutpela wok em i bin mekim. (KTH 2:2, 3)
(2) Harim gut ol tok bilong em na bai yu ken save wanem hevi bilong em, na nau yu inap givim gutpela tok long em. (2 Samuel 12:1-14; Sindaun 18:13; KTH 2:4)
(3) Baibel i mas i stap olsem as bilong tok yu givim long man. Yu mas sori long em na strongim bel bilong em. (2 Timoti 3:16; Taitus 3:2; KTH 2:5, 6)
(4) Helpim em na bai em i ken save, taim em i bihainim tok dispela bai helpim em na em bai kisim gutpela samting long en. (Hibru 12:7, 11; KTH 2:7)
[Piksa long pes 26]
Elda Kristen i mas givim gutnem long ol man em i laik stretim ol