Buk Bilong Baibel Namba 60​—1 Pita

Man Bilong Raitim: Pita

Ples Em i Bin Raitim: Babilon

Raitim Pinis: 62–64 C.E. samting

OL KRISTEN bilong pastaim i wok long tokaut long ol gutpela pasin God i bin mekim, na wok bilong Kingdom i go bikpela long olgeta hap Rom i bosim. Tasol sampela man i gat tingting kranki long dispela lain i wok strong long autim tok. Lotu bilong ol i kirap long Jerusalem, namel long ol Juda, olsem na sampela man i ting ol i bilong lain Juda i tingim ol samting bilong politik na i bikhet long gavman bilong Rom na ol i save givim hevi long ol namba wan gavman em Rom i makim bilong bosim ol Juda. Na tu, ol Kristen i narapela kain, long wanem, ol i no save mekim ofa bilong litimapim king bilong Rom, na ol i no save insait long ol bung bilong lotu haiden ol i save mekim long dispela taim. Bilip bilong ol i mekim na ol man i toknogutim ol na kain kain hevi i kamap long ol. Tasol spirit bilong God i givim tingting long Pita na em i raitim namba wan pas bilong em na kirapim ol Kristen long sanap strong, na em i tokim ol long pasin ol i mas mekim bilong i stap aninit long Niro, em King bilong Rom long dispela taim. Pita i raitim pas long taim stret bilong helpim ol, long wanem, bihain liklik ol man i kirap mekim nogut tru long ol.

² Namba wan tok bilong pas i kamapim klia olsem Pita i bin raitim. Na Airenius na Klemen bilong Aleksandria na Origen na Tetulian, olgeta i kamapim sampela tok bilong dispela pas na ol i tok Pita i bin raitim.a I gat planti samting bilong makim olsem Namba Wan Pas Pita i Raitim em i hap tru bilong Baibel, wankain olsem ol narapela pas em spirit bilong God i bin kirapim ol man long raitim. Yusibius i tok, planti taim ol hetman bilong sios i bin kolim ol tok bilong dispela pas; long taim bilong em (260-​342 C.E. samting) olgeta i bilip olsem dispela pas em i hap tru bilong Buk Bilong God. Ignatius na Hermas na Barnabas, em ol i bin stap klostu olsem 100 yia bihain long taim bilong Krais, olgeta i stori long dispela pas.b Ol tok bilong Namba Wan Pita i stret tru wantaim ol narapela tok bilong Baibel, na i kamapim strongpela tok bilong helpim olgeta Kristen, bilong lain Juda na bilong ol narapela lain, em ol “i stap nabaut olsem tripman long provins Pontus na Galesia na Kapadosia na Esia na Bitinia” long Esia Maina.​—1 Pi. 1:1.

³ Pita i raitim dispela pas long wanem taim? Ol tok bilong pas i makim olsem ol Kristen i karim bikpela hevi long han bilong ol haiden na ol Juda i no Kristen, tasol wok nogut Niro i kirapim long yia 64 C.E. bilong mekim nogut long ol Kristen, em i no kirap yet. Ol samting i makim olsem Pita i bin raitim pas paslain liklik long dispela yia, olsem namel long yia 62 na 64 C.E. Yumi inap ting olsem, long wanem, Mak i stap yet wantaim Pita long dispela taim. Namba wan taim Pol i kalabus long Rom (59-​61 C.E. samting), Mak i stap wantaim Pol na em i laik i go long hap bilong Esia Maina; na namba 2 taim Pol i kalabus (65 C.E. samting), Mak i laik go bek long Rom na stap gen wantaim Pol. (1 Pi. 5:13; Kl. 4:10; 2 Ti. 4:11) Olsem na namel long taim em i lusim Rom na em i go bek gen, em inap i stap wantaim Pita long Babilon.

⁴ Pita i stap we na em i raitim namba wan pas bilong em? Ol saveman bilong Baibel i wanbel long tok Pita i bin raitim dispela pas, na pas em i hap tru bilong Baibel, na ol i wanbel tu long yia em i bin raitim, tasol ol i gat narapela narapela tingting long ples em i bin raitim. Olsem Pita yet i kamapim, em i stap long Babilon na em i raitim. (1 Pi. 5:13) Tasol sampela i tok, em i stap long Rom na em i raitim dispela pas, na em i tok bokis long Rom taim em i kolim nem “Babilon.” Tasol i no gat samting bilong helpim dispela tingting. I no gat wanpela tok long Baibel i tok Babilon i makim Rom. Pita i raitim pas long ol man i stap long ol ples tru, olsem Pontus, Galesia, Kapadosia, Esia na Bitinia, olsem na i stret yumi ken ting taim em i tok long Babilon, em i tok long ples tru i gat nem Babilon. (1:1) I gat gutpela as na Pita i stap long Babilon. Em i kisim wok bilong “autim gutnius long ol Juda,” na i gat bikpela lain Juda ol i stap long Babilon. (Ga. 2:​7-9) Wanpela buk (Encyclopaedia Judaica) i stori long buk lotu bilong ol Juda, olsem Talmut, ol i wokim long Babilon, na em i toktok long “ol bikpela skul” bilong ol Juda long Babilon long taim bilong ol Kristen.c

⁵ I no gat wanpela tok long Baibel o long tupela pas bilong Pita i stori long Pita i bin i go long Rom. Pol i stori long em yet i stap long Rom, tasol i no gat wanpela taim em i tok Pita i stap long Rom. Taim Pol i raitim pas long ol Kristen long Rom, em i kolim nem bilong 35 Kristen, na em i salim tok gude long 26 na kolim nem bilong ol, tasol em i no kolim nem bilong Pita. Bilong wanem em i no kolim? Long wanem, Pita i no stap long Rom! (Ro. 16:​3-​15) Dispela “Babilon” em Pita i stap long en na em i raitim namba wan pas, em taun Babilon tru i stap arere long wara Yufretis long Mesopotemia.

HELPIM YUMI OLSEM WANEM?

¹¹ Namba wan pas bilong Pita i kamapim planti gutpela tok bilong helpim ol wasman. Jisas i givim tok long ol long Jon 21:​15-​17, na Pol i givim tok long ol long Aposel 20:​25-​35, na nau Pita i stori gen olsem ol elda i gat wok olsem ol wasman bilong sipsip, na ol i no ken tingting long helpim ol yet na mekim dispela wok. Nogat. Ol i mas amamas long mekim na i gat laik tru long mekim. Ol i namba 2 wasman na ol i wok aninit long “Namba Wan Wasman,” em Jisas Krais. Na ol i mas tokaut long Jisas long wok ol i mekim bilong lukautim lain sipsip bilong God. Ol i mas daunim ol yet na mekim gutpela pasin tasol, bai ol sipsip i ken lukim na bihainim.​—5:​2-4.

¹² Na pas bilong Pita i stori long ol narapela man ol Kristen i mas daun long ol, na em i kamapim planti gutpela tok long dispela bilong helpim ol. Long 1 Pita 2:​13-​17, Pita i tok yumi mas daun long ol gavman, em ol king na ol namba wan gavman. Tasol yumi no ken daun olgeta long ol, long wanem, yumi mas tingting long Bikpela, na yumi mas “pret long God na aninit long em,” long wanem, yumi ol Kristen i wokboi bilong em. Ol wokboi i mas aninit long bos bilong ol, na sapos wokboi i “larim God i stiaim tingting bilong [em]” na bos i givim nating hevi long em, em i mas karim tasol dispela hevi. Na Pita i givim gutpela tok long ol meri marit. Em i tok ol i mas daun long man bilong ol, maski man i no bilip. Ol i mas wokabaut stret na daun long man bilong ol, long wanem, “dispela kain pasin em i gutpela moa yet long ai bilong God,” na em inap kirapim man bilong ol long tanim bel. Bilong helpim dispela tok, Pita i stori long gutpela pasin bilong Sara, em i save daun long Abraham na bihainim tok bilong em. (1 Pi. 2:​17-​20; 3:​1-6; Stt. 18:12) Na man marit i mas mekim gut wok bos bilong ol; em i mas tingim gut meri bilong em, long wanem, “bodi bilong ol meri i no strong tumas.” Pita i stori moa olsem: “Yupela yangpela man i mas aninit long ol hetman.” Orait nau em i tok, em i bikpela samting long yumi olgeta i mas daunim yumi yet na stap aninit long ol narapela man. Long dispela pas, Pita i stori planti taim long dispela gutpela pasin Kristen.​—1 Pi. 3:​7-9; 5:​5-7; 2:​21-​25.

¹³ Long taim ol hevi na traim i wok long kamap gen, Pita i raitim dispela pas bilong strongim ol Kristen, na tok bilong em inap strongim ol Kristen long nau em wankain hevi na traim i kamap long ol. Pita i kolim tok bilong Ol Skripsa Hibru na em i kamapim tok bilong Jehova yet, em i tok: “Yupela i mas i stap holi na bihainim gutpela stretpela pasin, long wanem, mi God bilong yupela, mi stap holi.” (1 Pi. 1:16; Wkp. 11:44) Na long narapela hap bilong pas, Pita i kolim planti tok bilong Baibel bilong makim olsem lain Kristen ol i olsem ol ston i gat laip na God i mekim ol i kamap olsem haus bilong spirit i sanap antap long namba wan ston bilong strongim haus, em Krais. Ol i gat wanem wok? Pita i tok: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet.” (1 Pi. 2:​4-​10; Ais. 28:16; Sng. 118:22; Ais. 8:14; Kis. 19:​5, 6; Ais. 43:21; Hos. 1:10; 2:23) Pita i givim tok long “ol pris bilong lain bilong king,” em olgeta manmeri bilong lain holi bilong God, na Pita i kamapim tok promis bilong Kingdom olsem ol bai “kisim gutpela laip bilong heven. Dispela laip em i no inap bagarap. Em i klin olgeta long ai bilong God, na em bai i no inap pinis.” Ol bai kisim “nambawan prais tru, em prais i save stap gut oltaim, na i no save bagarap,” na bai ol i “stap wantaim [Krais] long gutpela lait bilong en i save stap oltaim.” Long dispela rot em i strongim ol na bai ol i ken amamas i stap, na “taim biknem bilong Krais i kamap ples klia, bai [ol] inap amamas moa yet na belgut tru.”​—1 Pi. 1:4; 5:​4, 10; 4:13.

[Ol Futnot]