God i Save Tru Long Yu o Nogat?
“Bikpela, . . . yu save long olgeta pasin bilong mi.”—SONG 139:1, 3.
YU TING ol narapela man i save long ol hevi bilong yu? Long olgeta hap i gat planti milion manmeri ol i no gat wanpela bilong famili o wanblut i tingim ol. Sampela i yangpela, na sampela i lapun. Tarangu long ol! Na sampela marit tu, narapela i no tingim tumas narapela o tingim wanem hevi i stap long em. Sampela taim narapela i tokim narapela: “Yu no save long hevi bilong mi! Yu no tingim mi!” Na planti yangpela tu ol i pilim olsem i no gat wanpela i sori long ol o tingim ol. I gat planti manmeri bipo ol i laik bai sampela i ken sori long ol na tingim ol. Tasol i gat sampela namel long ol, nau ol i stap belgut na ol i no larim dispela hevi i daunim ol. Olsem wanem na nau ol i stap olsem?
2 Long wanem, ol i save God i tingim ol na em i save long ol hevi bilong ol, maski ol man i no save, na maski ol man i no tingim. Ol i mekim wok bilong God, na ol i save em bai helpim ol long karim hevi bilong ol. (Song 46:1) Na Baibel wantaim ol gutpela elda Kristen i helpim ol tu na bai ol i no ken tingting tasol long ol hevi bilong ol yet—ol i ken tingting long ol samting bilong bihain. Baibel i tok, God i tingim ol gutpela wok ol i bin mekim long bipo na long nau, na em i amamas long dispela, na sapos ol i bilip long em na long ol samting em i bin mekim bilong helpim ol long rot bilong Krais Jisas, bihain ol bai kisim gutpela samting.—Sindaun 27:11; 2 Korin 4:17, 18.
3 Song 100:2 i tok: “Mas belgut long Bikpela na lotu long em. Yupela singim song bilong amamas na go klostu long em.” I no planti man i mekim olsem, tasol i gat gutpela as na yumi mas mekim, long wanem, ves 3 i tok, Jehova “tasol i bin wokim yumi, olsem na yumi bilong em yet.” Long tok Hibru ol i kolim em ʼElo·himʹ, na dispela i makim em i Bikpela Man na em i gat bikpela namba na bikpela nem, na em i nambawan olgeta. Em wanpela tasol i God tru. (Lo 4:39; 7:9; Jon 17:3) Lain bilong em i save em i God tru. Tasol i no olsem sampela i bin skulim ol na long dispela as tasol ol i save olsem, nogat. Ol yet i bin lukim ol samting i makim olsem Jehova em i God tru, olsem na ol i daun long em na bilip long em na givim bel long em.—1 Stori 28:9; Rom 1:20.
4 Jehova i stap God tru na olgeta samting i stap ples klia long ai bilong em. Em inap save long ol laik na tingting i stap long bel bilong yumi, na em i save tu long ol samting i painim yumi. Em i save long as bilong ol hevi i bungim yumi na long bel hevi yumi kisim long dispela. Em yet i bin wokim yumi, olsem na em i moa save long tingting bilong yumi i wok olsem wanem, na em i save long pasin bilong helpim yumi long karim dispela hevi inap long em i pinis. Em bai mekim pasin sori long yumi na helpim gut yumi, olsem wasman bilong sipsip i holim na karim pikinini sipsip na mekim gut long en. Olsem na yumi ken bilip tru long Jehova. (Sindaun 3:5, 6; Aisaia 40:10, 11) Ol tok bilong Song 139 em bai strongim dispela bilip bilong yumi.
Em i Lukim Olgeta Pasin Bilong Yumi
5 Devit i tokim Jehova: “Bikpela, yu skelim pinis bel bilong mi, na yu save tru long mi.” (Song 139:1) Devit i save, pasin tru bilong em i no hait long ai bilong Jehova; Jehova i save long olgeta pasin na tingting bilong em, na Devit i amamas long dispela. Ol man inap lukim Devit long ai bilong ol na harim em i toktok na paitim gita, tasol ol i no inap save long tingting i stap long bel bilong em. (1 Samuel 16:7, 18) Tasol Jehova i “skelim pinis bel” bilong Devit, na em i mekim bilong helpim Devit bambai em i ken i stap strong long spirit. Sapos yu yet yu wanpela wokman bilong Jehova, em i save gut long yu tu olsem em i bin save long Devit, na taim yu tingim dispela samting ating yu amamas na yu givim bel moa yet long em, a?
6 Devit i save, olgeta pasin bilong em na olgeta samting em i mekim i stap ples klia long ai bilong Jehova, na em i tok: “Yu save long olgeta samting mi save mekim. Yu stap longwe, tasol yu save long olgeta tingting bilong mi. Yu save lukim mi long taim mi mekim wok na long taim mi slip. Yu save long olgeta pasin bilong mi.” (Song 139:2, 3) Maski Jehova i stap long heven, em i save long olgeta tingting na pasin bilong Devit, na em i skelim long san na long nait na bai em i ken save gut long en.
7 Taim Devit i yangpela, em i laikim tumas God na em i bilip tru olsem God i gat bikpela strong na em inap tru long lukautim em, na dispela tingting i strongim em long pait wantaim Goliat. (1 Samuel 17:32-37, 45-47) Wanpela taim ol birua i bin givim bikpela bel hevi tru long em, na em i krai long nait, tasol em i beten na nau em i stap bel isi, long wanem, em i save Jehova i harim beten bilong em. (Song 6:6, 9; 55:2-5, 22) Na wanpela taim long nait ai bilong em i no laik slip na em i wok long tingim ol gutpela samting Jehova i bin mekim long em, na Jehova i save long tingting bilong em. (Song 63:6; lukim Filipai 4:8, 9.) Long wanpela apinun Devit i lukluk long wanpela meri i waswas, na dispela i kirapim em long mekim bikpela rong. Jehova i lukim em i mekim ol dispela samting. (2 Samuel 11:2-4) Jehova i salim profet Natan i go bilong kamapim dispela rong long Devit, na Jehova i harim tok Devit i bin bekim long Natan, na Jehova i save tu long tingting i stap long bel bilong Devit, em i hevi tru long rong em i bin mekim, na em i tanim bel. (2 Samuel 12:1-14; Song 51:1, 17) Olsem na yumi mas tingting gut long yumi go we, na yumi mekim wanem, na wanem kain tingting i stap long bel bilong yumi, a?
8 God i save long olgeta samting yumi mekim, olsem na em i save tu long wok yumi mekim long maus bilong yumi. King Devit i save long dispela samting tu, na em i tokim God: “Sapos mi laik mekim wanpela tok, yu save pinis long dispela tok.” (Song 139:4) Devit i save Jehova i no amamas long ol man i toktok nabaut o tok baksait o mekim tok i bagarapim nem bilong pren bilong ol. Jehova i laikim man i save tok tru tasol na bel bilong em i gat stretpela tingting tasol. (Song 15:1-3; Sindaun 6:16-19) Yumi olgeta i no inap bosim tru maus bilong yumi, na sampela taim maus i save popaia, tasol Devit i no tok em i no inap lainim maus long mekim stretpela tok. Em i bin lusim bikpela taim long tingim na mekim ol gutpela singsing i save litimapim nem bilong Jehova. Na em i save em i sot long sampela samting, olsem na em i askim God long helpim em. (Song 19:12-14) Olsem wanem long maus bilong yu? Yu tu yu mas beten askim God long helpim yu long mekim gutpela wok long en?
9 Jehova i save lukim olgeta samting bilong yumi. I no gat wanpela samting i stap hait long ai bilong em. Ol samting i stap ples klia tasol. Devit i tok piksa long wanpela taun ol birua i laik kam insait long en, na em i tok: “Yu raunim mi long olgeta hap.” Tasol i no olsem Jehova i raunim Devit, nogat. Em i was tasol long em. Olsem na Devit i tok: “Yu save was long mi long strong bilong yu.” Dispela tok i makim olsem God i save bosim na lukautim ol man i laikim tumas em na bai ol i ken i stap gutpela na i no ken lus. Devit i tok: “Save bilong yu i antap tru long mi na i winim tingting bilong mi.” (Song 139:5, 6) God i save long olgeta samting bilong lain bilong em, na yumi kirap nogut long dispela. Tasol yumi save, em i pilim tru ol tingting na hevi bilong yumi, na em i mekim ol gutpela samting bilong helpim tru yumi.—Aisaia 48:17, 18.
God Inap Helpim Yumi, Maski Yumi Stap We
10 Na Devit i tingim gutpela pasin sori Jehova i mekim long lain bilong em, na Devit i tok moa olsem: “Bai mi go we na mi ken lusim spirit bilong yu? Na bai mi ranawe i go long wanem hap na mi ken hait long yu?” I no olsem Devit i laik hait long Jehova, nogat. Tasol em i save, maski em i go we, Jehova bai save, na spirit holi bilong Jehova bai stap wantaim em na helpim em. Na Devit i tok moa olsem: “Sapos mi go antap na mi stap long heven, yu stap long heven. Sapos mi go i stap long ples bilong ol man i dai pinis, yu stap long dispela ples tu. Sapos mi flai i go longwe long hap bilong sankamap, o sapos mi go i stap long wanpela ples i stap longwe tumas long hap bilong san i go daun, bai yu stap long dispela ples tu bilong stiaim lek bilong mi na bilong helpim mi.” (Song 139:7-12) Maski yumi go we, o yumi stap we, o wanem samting i painim yumi, o yumi stap olsem wanem, Jehova inap lukim yumi, na spirit bilong em inap i stap wantaim yumi na helpim yumi.
11 Wanpela taim Jona i lusim tingting long dispela samting. Jehova i bin tokim em long i go autim tok long ol man bilong taun Ninive, tasol em i ting em i no inap mekim dispela wok. Ating em i pret long ol Asiria, em ol i gat nem olsem man bilong pait. Olsem na Jona i laik hait na abrusim dispela wok Jehova i tok em i mas mekim, na em i ranawe i go long Jopa na kisim wanpela sip i laik i go long Tarsis, em i stap long hap wes bilong Ninive inap 3,500 kilomita. Tasol Jehova i lukim em i kalap long dispela sip na i go insait na slip i stap. Bihain ol boskru i tromoi em i go daun insait long solwara, na bikpela pis i kam na i daunim em, na taim em i stap insait long bel bilong pis em i beten na tok promis long Jehova long em bai mekim dispela wok Jehova i bin makim bilong em. Jehova i lukim ol dispela samting i bin painim Jona na em i harim tok promis bilong Jona, olsem na em i mekim na bai pis i trautim Jona long nambis, na nau rot i op na bai Jona i ken truim tok promis em i bin mekim.—Jona 1:3, 17; 2:1 –3:4.
12 I gutpela sapos pastaim Jona i bin larim spirit bilong Jehova i helpim em long mekim dispela wok, maski ranawe long en, a? Tasol bihain Jona i mekim pasin daun na em i raitim stori bilong ol dispela samting i bin painim em, na dispela stori i bin helpim planti man long bilip olsem Jehova bai helpim na strongim ol, na bai ol i no ken mekim pasin olsem Jona i bin mekim long pastaim.—Rom 15:4.
13 I gat narapela kain samting i bin painim Elaija. Ol Israel i bin mekim ol rong na Jehova i laik strafim ol, na em i salim Elaija i go toksave long ol, na Elaija i mekim dispela wok. (1 King 16:30-33; 17:1) Em i strong long bihainim lotu i tru long taim Jehova i resis wantaim god Bal long Maunten Karmel bilong kamapim klia husat i God tru. Na long arere bilong Wara Kison Elaija i kilim i dai 450 profet bilong god Bal. Tasol taim Kwin Jesebel i kros na i laik kilim i dai Elaija, em i ranawe i go long narapela kantri. (1 King 18:18-40; 19:1-4) Tasol sapos em i no bin ranawe, Jehova i stap na em inap helpim em. Sapos em i go antap long maunten, o em i hait long hul insait tru long graun, o em i ranawe i go hait long wanpela ailan i stap longwe, han bilong Jehova i stap long ol dispela hap tu na em inap helpim na lukautim em na stiaim lek bilong em. (Lukim Rom 8:38, 39.) Jehova i bin helpim Elaija long kaikai long taim em i wokabaut, na Jehova i kamapim bikpela strong bilong em long Elaija na em i mekim strongpela win na guria samting i kamap, na dispela i strongim Elaija long mekim sampela wok profet moa Jehova i givim long em.—1 King 19:5-18.
14 Tasol dispela tok profet hia long Song 139:7-12 i no makim olsem Jehova yet i stap long ol narapela narapela hap long wanpela taim tasol, nogat. Baibel i no tok olsem. (Lo 26:15; Hibru 9:24) Tasol ol wokman bilong em ol inap kamap long em, na em inap i kam klostu long ol tu, maski ol i stap we. Sapos ol i go long wanpela longwe hap bilong mekim wok bilong em, em i stap wantaim ol long spirit. Taim ol Natsi long Jemani i bin kalabusim ol Witnes long taim bilong Namba 2 Pait, spirit bilong Jehova i bin stap wantaim ol na em i strongim ol. Na taim gavman bilong Saina i bin kalabusim ol misineri long 1958 i go inap long 1965, spirit bilong Jehova i bin stap wantaim ol tu na strongim ol. Na ol gutpela brata sista bilong yumi long wanpela kantri long Sentral Afrika tu, taim ol i mas lusim ples bilong ol na ranawe planti taim na i go long narapela kantri, Jehova i no bin lusim ol. Na ol man i bin i stap gut long wok bilong Jehova na ol i dai pinis na i stap insait long matmat, Jehova inap long kirapim bek ol.—Jop 14:13-15; Luk 20:37, 38.
God i Save Gut Long Yumi
15 Taim mama i no karim yet yumi, God i save pinis long yumi, olsem Devit i tokim em: “Yu bin wokim olgeta hap bilong bodi bilong mi. Yu wokim mi olgeta insait long bel bilong mama. Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.” (Song 139:13, 14) Sampela jin bilong papa na bilong mama i bung wantaim long bel bilong mama long taim em i kisim bel, na nau pikinini i kamap na em i gat hap pasin bilong papa na hap pasin bilong mama, na God i save pinis long dispela samting. Tupela kidni i “hap bilong bodi” bilong yumi, na kidni i makim tingting na pasin na laik bilong bel bilong yumi. (Song 7:9; Jeremaia 17:10) Jehova i save pinis long ol dispela samting bilong yumi taim yumi stap yet long bel bilong mama. Na long pasin sori em i wokim skin bilong yumi ol manmeri, na taim meri i kisim bel, bilum insait long bel bilong meri i haitim na lukautim gut pikinini, na em i stap gut “insait long bel bilong mama.”
16 Na Devit i tok: “Taim mi kamap isi isi long ples hait insait long bel bilong mama, yu bin lukim olgeta bun bilong mi i kamap na i pas wantaim. Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu olgeta de yu laik bai mi mas i stap long graun.” (Song 139:15, 16) Em nau, maski ol man i no save gut long yumi, Jehova i save moa yet long yumi. Tasol taim yumi save long dispela samting, dispela i mekim wanem long yumi?
17 Man i bin raitim ol tok bilong Song 139 em i save olgeta wok bilong God i gutpela tru, na em i tokaut long dispela samting olsem. Yu save pilim olsem tu? Sapos samting i gutpela tru, yumi save givim bel long en na tingim. Ating yu save mekim olsem long taim yu lukim ol samting Jehova i bin wokim na yumi save lukim. (Lukim Song 8:3, 4, 9.) Tasol olsem wanem? Yu save tingim tu ol samting em i bin mekim bilong kamapim Kingdom na long wok em i mekim bilong bosim wok bilong autim tok long olgeta hap bilong graun, na long olsem wanem tok bilong em i save kirapim man long senisim pasin bilong em?—Lukim 1 Pita 1:10-12.
18 Na taim yu tingim ol bikpela wok Jehova i bin mekim, yu save pilim? Dispela i mekim long yu na yu pret long Jehova na daun long em? Ol dispela samting i save kirapim yu long lusim ol samting i no stret na bai yu ken mekim ol gutpela wok tasol long olgeta taim? (Lukim Song 66:5.) Sapos olsem, orait, bel bilong yu bai kirapim yu long givim biknem long Jehova na litimapim nem bilong em, na bai yu painim rot bilong tokim ol narapela man long ol samting Jehova bai mekim long bihain na long ol gutpela samting em bai mekim long ol man i save givim bel long em.—Song 145:1-3.
Bai Yu Tok Wanem?
◻ Sapos yumi save Jehova i God tru, olsem wanem dispela save i helpim yumi na bai yumi amamas long mekim wok bilong em?
◻ Yumi save God i lukim olgeta samting yumi mekim, olsem na yumi mas mekim wanem?
◻ Bilong wanem yumi ken amamas long God i lukim yumi long olgeta taim?
◻ Olsem wanem God inap save long olgeta samting bilong yumi?
◻ Dispela stadi i kirapim yumi long mekim wanem?
[Askim Bilong Stadi]
1. Sampela i ting, ol narapela i no tingim ol i gat hevi o nogat; i gat planti man olsem, o nogat?
2. Wanem samting inap helpim lain bilong Jehova na bai ol i ken i stap amamas long ol wok samting bilong ol?
3, 4. (a) Sapos yumi bilip tru olsem Jehova i God tru na em yet i bin wokim yumi, olsem wanem dispela inap helpim yumi long i stap amamas long wok bilong em? (b) Bilong wanem yumi inap bilip tru olsem Jehova bai lukautim na tingim yumi?
5. Olsem wanem Jehova i ‘skelim bel’ bilong yumi? Bilong wanem dispela i gutpela samting?
6. Song 139:2, 3 i tok wanem na yumi ken save, Jehova i save long olgeta samting yumi mekim na long tingting bilong yumi tu?
7. (a) Stori long sampela samting inap painim yumi tu olsem i bin painim Devit na Jehova i save long en. (b) Taim yumi tingim dispela samting, em i mas mekim wanem long yumi?
8. (a) Olsem wanem Jehova i tingim ol tok maus bilong yumi i save autim? (b) Yumi ken mekim wanem sapos maus bilong yumi i save popaia? (Matyu 15:18; Luk 6:45)
9. (a) Olsem wanem Song 139:5 i makim olsem God i save gut long olgeta samting bilong yumi? (b) Olsem na yumi ken amamas long wanem samting?
10. Wanem sampela gutpela tok long Song 139:7-12 i ken strongim bel bilong yumi?
11, 12. (a) Jona i bin lusim tingting, tasol wanem samting i bin kamap na yumi ken save, Jehova inap save long olgeta samting? (b) Samting i bin painim Jona i ken helpim yumi olsem wanem?
13. (a) Paslain long taim Elaija i bin ranawe long Kwin Jesebel, em i bin mekim wanem gutpela wok bilong Jehova? (b) Taim Elaija i ranawe i go hait long narapela hap, Jehova i helpim em olsem wanem?
14. (a) Bilong wanem yumi no ken ting Jehova yet i stap long olgeta hap? (b) Wanem sampela taim Jehova i bin strongim lain bilong em long taim bilong yumi? (c) Maski yumi dai na i stap long matmat, olsem wanem Jehova i ken helpim yumi?
15. (a) Kirap long wanem taim Jehova inap long lukim yumi? (b) Taim Baibel i tok, “insait long bel bilong mama,” dispela i makim Jehova i save long yumi olsem wanem?
16. (a) Olsem wanem Song 139:15, 16 i makim olsem Jehova inap save gut long yumi? (b) Olsem wanem dispela inap strongim bel bilong yumi?
17. Taim yumi lukim ol gutpela samting God i bin kamapim, dispela i kirapim yumi long mekim wanem?
18. Sapos ol gutpela wok bilong Jehova i kirapim yumi na bai yumi pret long em, bai yumi mekim wanem?