“God, Skelim Mi Gut”
“God, skelim mi gut na bai yu save long olgeta tingting i stap long bel bilong mi. . . . Na yu mas bringim mi long rot bilong kisim laip bilong i stap gut oltaim oltaim.”—SONG 139:23, 24.
YUMI laik bai ol man i tingim yumi na sori long yumi na save long ol hevi yumi mas karim na helpim yumi sapos yumi popaia, na no ken putim strongpela lo tumas long yumi. God Jehova i save mekim olsem long lain bilong em. Song 103:14 i tok: “Em i tingim yumi i olsem das tasol.” Na Krais Jisas i gat wankain pasin na tingting olsem bilong Papa bilong em, na long pasin sori em tu i tokim yumi: “Yupela ol man i save hatwok tru na i karim ol bikpela hevi, yupela olgeta i kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man . . . Samting mi givim yupela bilong karim, em i no hevi.”—Matyu 11:28-30.
2 Jehova i no save bosim lain bilong em olsem ol man bilong graun i save mekim long ol wokman bilong ol. Jehova i save tingim sampela samting bilong yumi ol man, na ol man yet i no save long dispela. Taim Jisas i stap long graun “ol man i bin givim baksait long em na rabisim em na ol i no laikim em.” Ol man i no bilip olsem em i Mesaia, ol i mekim long em olsem em i “man nating.” (Aisaia 53:3; Luk 23:18-21) Tasol long ai bilong God em i ‘Pikinini bilong em,’ na God i ‘laikim tumas’ Jisas, na em i tokim Jisas: “Bel bilong mi em i amamas long yu.” (Luk 3:22; 1 Pita 2:4) Sampela bilong lain bilong Jisas ol i olsem man nating long ai bilong ol man bilong graun, long wanem, ol i no gat planti samting bilong skin, na ol i save karim planti hevi. Tasol long ai bilong God na bilong Jisas ol i olsem ol man i gat namba na nem. (Rom 8:35-39; KTH 2:9) Olsem wanem na tingting bilong God long ol dispela man i narapela kain long tingting bilong ol man?
3 Jeremaia 11:20 i tok, Jehova i “save skelim bel na tingting bilong ol manmeri.” Em i save lukim wanem kain tingting na laik na pasin i stap hait long bel bilong yumi, na em i skelim yumi long dispela samting, na i no ol samting i stap ausait long ples klia na ai bilong ol man i lukim. Jehova i save lukim wanem kain tingting i save helpim yumi long i stap gut long em na i save helpim yumi long bihainim gutpela pasin. Yumi amamas long em i mekim olsem, tasol yumi tu i mas skelim wanem kain tingting i stap long bel bilong yumi na bai yumi ken save, Jehova bai orait long yumi ken i stap long nupela taim o nogat. Baibel inap helpim yumi long mekim olsem.—Hibru 4:12, 13.
Tingting Bilong God i Gutpela Tru!
4 Devit i tingim pasin bilong God, em i gat bikpela save moa yet long lain bilong em na long pasin bilong helpim ol, na dispela i kirapim Devit na em i tok: “God, i hat tumas long mi save long olgeta tingting bilong yu.” (Song 139:17a) Ol tingting na save bilong Jehova olsem i stap long Baibel i gutpela moa na i winim tru tingting na save bilong ol man, maski ol i ting ol i gat gutpela tingting na save long ol samting. (Aisaia 55:8, 9) Sapos yumi save long ol tingting bilong Jehova long ol samting, dispela bai helpim yumi long save wanem ol samting i bikpela samting na wanem ol samting i no bikpela samting tumas, na bai yumi ken givim bel long mekim wok bilong em. (Filipai 1:9-11) Sapos yumi skelim yumi yet long rot bilong ol tingting bilong God, bai yumi ken save yumi wanem kain man na wanem kain tingting i stap long bel bilong yumi. Yu laik skelim bel bilong yu yet olsem?
5 Ol man i save tingim ol samting ol i lukim long ai tasol, tasol Baibel i tok: “Olgeta taim yu mas was gut tru long tingting bilong yu.” (Sindaun 4:23) Ol lo bilong Baibel na ol stori i stap long en i helpim yumi long mekim olsem. Baibel i tok, Kein i mekim ofa long God, tasol long tingting na bel em i kros na bel nogut tru long brata bilong em Abel, na Baibel i tok, yumi no ken mekim kain pasin olsem. (Stat 4:3-5; 1 Jon 3:11, 12) Baibel i kolim Lo God i bin givim long Moses, na Lo i tok ol i mas bihainim tok bilong God, tasol Baibel i kamapim klia olsem bikpela samting long Lo em olsem: Ol man i lotuim Jehova ol i mas laikim em tru long bel na tingting na strong olgeta bilong ol, na ol i mas laikim ol narapela man olsem ol i laikim ol yet.—Lo 5:32, 33; Mak 12:28-31.
6 Na Sindaun 3:1 i tok, yumi mas bihainim tok bilong God, na dispela tok i mas i stap long tingting na bel bilong yumi, na bel bilong yumi i mas i gat laik long mekim. Yumi mas askim yumi yet olsem: ‘Mi gat laik long bihainim tok bilong God, o nogat?’ Sapos yumi ting yumi no bihainim tumas long sampela samting, orait, yumi ken givim narapela askim long yumi yet olsem: ‘Mi wok long mekim wanem na bai mi ken bihainim tru ol tok bilong God?’—Sindaun 20:9; 1 Jon 1:8.
7 Ol Farisi i giaman long givim biknem long God, na ol i mekim ol samting bilong helpim ol yet, olsem na Jisas i tok ol i man bilong tupela maus na ol i lotu nating long God. (Matyu 15:3-9) God i save lukim wanem tingting i stap long bel bilong man, olsem na Jisas i tok, sapos yumi laik mekim ol samting God i orait long en, nogut yumi giaman tasol long mekim ol samting i stret, tasol yumi wok long painim ol amamas nogut bilong skin i save kirapim bel bilong yumi na oltaim yumi tingting long ol samting i no stret. Yumi mas kirap na mekim ol samting bilong bosim na stretim tingting na bel bilong yumi. (Sindaun 23:12; Matyu 5:27-29) Nogut yumi tingting tumas long wok bilong skin o wok mani o kisim bikpela skul o tingting long ol spot na amamas. Ol man bilong graun i save tingim ol dispela samting, na sapos yumi tu i tingim ol dispela samting bai yumi kamap wankain olsem ol yet na bai yumi kirap bihainim pasin nogut bilong ol. Jems i tok: “Sapos man i laik pren wantaim ol pasin bilong graun, em bai i kamap birua bilong God,” long wanem, “dispela graun olgeta em i stap aninit long strong bilong Satan.”—Jems 4:4; 1 Jon 2:15-17; 5:19.
8 Bilong save gut long tingting bilong God, yumi mas kaunim Baibel o harim narapela i kaunim. Na yumi mas stadi long en tu na toktok long en na tingting long en. Planti man bilong kaunim Wastaua ol i save kam long ol miting bilong ol Witnes Bilong Jehova na harim ol tok bilong Baibel ol i kamapim. Ol i lusim ol narapela samting bambai ol i ken i kam long ol dispela miting. (Efesus 5:15-17) Olsem na ol i kisim ol gutpela samting i winim ol mani kago. Yu save ting olsem tu?
9 Ol i stadi na kam long miting, na sampela i kamap strong hariap long ol samting bilong spirit, na sampela nogat. Sampela i bihainim ol samting ol i save lainim, na dispela i strongim ol hariap. Ol i givim bel long stadi. Ol i save ol i mas kaikai long olgeta de na bai ol i no ken dai, na olsem tasol ol i mas stadi long olgeta de bilong kisim ol kaikai bilong spirit. (Matyu 4:4; Hibru 5:14) Olsem na ol i makim hap taim long olgeta de long kaunim Baibel na ol buk i kamapim tok bilong Baibel. Ol i redim ol samting bilong i go long miting, na stadim ol samting paslain long miting, na kaunim ol skripsa. Na ol i no kaunim nating tasol—ol i tingting tu long ol dispela samting, na long olsem wanem ol i mas bihainim. Na taim ol i wok long kamap strong ol i kisim wankain tingting olsem man bilong raitim Song long Baibel, em i tok: “Mi laikim tru lo bilong yu. Mi save tingting long en long san na long nait. . . . Tok bilong yu i gutpela tumas. Olsem na mi save bihainim olgeta.”—Song 1:1-3; 119:97, 129.
10 Maski yumi stadi long Baibel inap wanpela yia o 5-pela yia o 50 yia, yumi no save les long kisim save long ol tingting bilong God; yumi ting em i gutpela samting tru. Maski yumi bin lainim planti samting bilong Baibel, i gat planti samting moa i stap na yumi mas lain long en tu. Devit i tokim God: “Tingting bilong yu i no liklik, na i no gat rot long mi ken save long en. Sapos mi kaunim ol samting yu save tingting long en, bai namba bilong ol i winim namba bilong olgeta wesan long nambis.” Sapos yumi kaunim ol tingting bilong God i go inap long taim yumi slip, yumi no inap pinisim, na taim yumi slip pinis, planti tingting moa bilong God i stap yet na yumi mas kisim save long en. Olsem na Devit i tok: “Taim mi kirap long slip mi stap yet wantaim yu.” (Song 139:17, 18) Long olgeta taim bihain bai yumi lain yet long ol samting bilong Jehova na long pasin bilong em. Bai yumi no inap save long olgeta samting bilong em.—Rom 11:33.
Klia Long Samting Jehova i No Laikim
11 Taim yumi stadi long Baibel, em i no bilong kisim save tasol. Yumi mas larim ol dispela save i go long bel na bai yumi ken kisim tingting bilong God. Dispela i bikpela samting tru. Na nogut yumi save tasol long planti tok bilong Baibel na bai yumi gat laik yet long sampela samting God i tambuim o yumi hevi long bihainim ol lo bilong God. Tru, yumi no laik mekim pasin nogut, tasol ol laik nogut bilong skin inap pulim yumi na yumi hatwok long sakim. (Rom 7:15) Olsem na yumi mas wok strong long bosim laik bilong bel na bai Jehova i ken orait long yumi. Em i laik save, “yumi gutpela man o man nogut, na em i traim bel bilong yumi.”—Sindaun 17:3.
12 Yumi mas nolaik tru long pasin nogut, olsem Jehova i nolaik tru long en, na yumi mas laikim tru ol gutpela stretpela pasin. (1 Jon 5:3) Planti taim Baibel i tok olsem. “Bikpela i laikim tru ol manmeri i no save laikim pasin nogut.” (Song 97:10) “Yupela i mas givim baksait tru long pasin nogut, na yupela i mas pas tru long gutpela pasin.” (Rom 12:9) Yumi save mekim olsem?
13 Jehova i tokaut klia olsem em bai rausim ol man nogut na kamapim nupela taim na bai stretpela pasin tasol i ken i stap. (Song 37:10, 11; 2 Pita 3:13) Ol man i laikim pasin i stret ol i laik bai dispela nupela taim i mas kamap. Ol i wanbel wantaim Devit, em i beten long God na i tok: “God, mi laik bai yu kilim i dai ol man nogut. Na mi laik bai ol man bilong pait i mas lusim mi. Ol dispela man i save tok nogut long yu. Na ol i save mekim ol kain kain tok nogut long nem bilong yu.” (Song 139:19, 20) Devit yet i no laik kilim i dai ol man nogut. Em i laik bai Jehova i bekim nogut long ol. (Lo 32:35; Hibru 10:30) Ol i no bin rongim Devit yet, tasol ol i mekim nogut long nem bilong Jehova. (Kisim Bek 20:7) Ol i bin giaman long mekim wok bilong Jehova, na ol i kolim nating nem bilong em na bai ol i ken mekim wok nogut bilong ol yet. Devit i no save laikim ol birua bilong God.
14 Planti milion man i no save long Jehova, na planti bilong ol i mekim pasin nogut, tasol ol i no save na ol i mekim olsem. Sapos ol i no laik lusim ol dispela pasin nogut ol bai bagarap long taim bilong ‘bikpela hevi tru.’ Tasol Jehova i no amamas long ol man nogut i bagarap, na yumi tu i olsem. (Esekiel 33:11) Olsem na yumi mas wok strong long helpim ol na bai ol i ken lain long pasin bilong Jehova na ol i ken bihainim. Tasol olsem wanem sapos sampela i nolaik tru long Jehova?
15 Devit i tok long ol olsem: “Mi no laikim tru ol man i no laikim yu. Na mi bel nogut tru long ol man i save bikhet long yu. Tru tumas, mi no laikim tru ol dispela man. Mi lukim ol i olsem ol birua bilong mi yet.” (Song 139:21, 22) Devit i bin bel nogut long ol dispela man, long wanem, ol i nolaik tru long Jehova, olsem birua long em. Ol man i bin lusim Jehova na ol i bikhet long em ol i bilong dispela lain; ol i kamapim bel bilong ol, ol i nolaik tru long Jehova. Sampela man olsem, ol i tok ol i save long God na ol i mekim wok bilong em, tasol ol i sakim tok na lo bilong em olsem i stap long Baibel. Sampela i tok ol i bilip long Baibel, tasol ol i givim baksait long oganaisesen bilong Jehova na ol i laik pasim wok bilong en. Ol i lain pinis long tok i tru, tasol ol i kamap bikhet na pasin nogut i pas pinis long ol, na long laik bilong ol yet ol i sakim Jehova, olsem na ol Kristen tru i nolaik tru long ol, em dispela pasin bilong nolaik long man olsem Baibel i makim. Ol Kristen tru i mas i gat wankain tingting olsem bilong Jehova long ol dispela lain, na no ken harim ol tok bilong ol. Ol Kristen i “bel nogut tru long ol man i save bikhet” long Jehova, tasol ol i larim Jehova yet i bekim long ol.—Jop 13:16; Rom 12:19; 2 Jon 9, 10.
God i Skelim Bel Bilong Yumi
16 Devit i no laik i stap wankain olsem ol dispela man nogut. Planti man i no laik bai ol narapela man i ken save long wanem kain tingting na laik i stap hait long bel bilong ol, tasol Devit i no olsem. Em i beten long Jehova olsem: “God, skelim mi gut na bai yu save long olgeta tingting i stap long bel bilong mi. Traim mi, na bai yu save gut long olgeta tingting bilong mi. Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.” (Song 139:23, 24) Taim Devit i tok, “bel,” dispela i makim ol tingting na laik na pasin tru i stap hait insait long Devit, na yumi tu i mas orait long God i ken skelim bel bilong yumi tu na bai Jehova i ken save, yumi wanem kain man tru—yumi gat sampela laik o tingting i no stret o nogat. (Song 26:2) Jehova i tokim yumi olsem: “Pikinini, yu mas harim gut tok bilong mi na amamas long lukim pasin bilong mi.”—Sindaun 23:26.
17 Sapos yumi bin mekim sampela samting i no stret o yumi gat sampela laik o tingting nogut, na bel bilong yumi i gat tok long dispela, nogut yumi haitim i stap. Yumi mas beten askim God long helpim yumi long stretim dispela samting. Ating yumi no save gut long wanem samting bel bilong yumi i gat tok long en, na i hatwok long yumi kamapim dispela hevi bilong yumi long God, tasol em i save long dispela na em inap helpim yumi. (Rom 8:26, 27) Yumi no ken kirap nogut sapos i gat sampela tingting nogut i stap long bel, tasol nogut yumi larim i stap. (Stat 8:21) Yumi mas beten askim God long helpim yumi long rausim olgeta tingting na laik nogut i stap long bel bilong yumi. Sapos yumi laikim tumas Jehova na pasin bilong em, dispela laik bai kirapim yumi long askim em long helpim yumi, na yumi ken bilip tru olsem em bai mekim. “Maski sapos bel bilong yumi i kotim yumi long wanpela samting, . . . God em i save long olgeta samting, na save bilong en i winim tru save i stap long bel bilong yumi.”—1 Jon 3:19-21.
18 Devit i bin beten askim Jehova long bringim em long rot bilong i stap gut inap longpela taim. Jehova i save mekim olsem long ol man i gat pasin daun na i bihainim tok bilong em. Em i no bringim ol long rot bilong i stap gut long nau tasol, em i bringim ol long rot bilong i stap oltaim long bihain. Jehova i laik bai yumi save gut long ofa bilong Jisas long baim rong bilong yumi, na yumi mas bilip long dispela na tingim gut. Long rot bilong Baibel na bilong oganaisesen em i lainim yumi long ol samting em i laik bai yumi mas mekim. Yumi mas larim em i helpim yumi na bai yumi stap gutpela man long bel, na i no long skin tasol. (Song 86:11) Na em i tokim yumi long gutpela samting yumi inap kisim long bihain, olsem yumi ken i stap oltaim long nupela taim bai kamap, na stretpela pasin tasol bai stap, na yumi no gat sik moa—skin bilong yumi bai kamap gutpela olgeta, na yumi ken mekim sampela wok moa bilong em, em wanpela tasol i God tru. Sapos yumi stap gut long em na larim em i bosim na stiaim yumi, em bai mekim wankain tok long yumi olsem em i bin mekim long Jisas, olsem: “Mi laikim yu tumas. Bel bilong mi em i amamas long yu.”—Luk 3:22; Jon 6:27; Jems 1:12.
Yu Ting Olsem Wanem?
◻ Bilong wanem Jehova i gat narapela tingting long lain bilong em na i no wankain olsem bilong ol man bilong graun?
◻ Olsem wanem yumi ken save God i lukim wanem kain tingting i stap long bel bilong yumi?
◻ Yumi mas stadi olsem wanem na dispela bai helpim yumi long kisim save na was gut long bel bilong yumi?
◻ Yumi mas save long tok bilong God, tasol bilong wanem yumi mas save tu long tingting bilong God?
◻ Bilong wanem yumi mas beten askim God long skelim bel bilong yumi?
[Askim Bilong Stadi]
1. Jehova i save mekim wanem pasin long lain bilong em?
2. (a) Jehova i ting olsem wanem long Jisas na long lain bilong Jisas? (b) Ol man i bin ting olsem wanem long Jisas na long lain bilong Jisas?
3. (a) Taim Jehova i lukim ol man, olsem wanem tingting bilong em i narapela kain long tingting bilong ol man? (b) Bilong wanem yumi mas skelim bel bilong yumi?
4. (a) Wanem samting i kirapim Devit na em i laik tumas long kisim save long tingting bilong God? (b) Bilong wanem yumi mas kisim save long tingting bilong God?
5. (a) Baibel i tok yumi mas was gut long wanem samting? (b) Stori bilong Kein long Baibel i ken helpim yumi olsem wanem? (c) Yumi no aninit long Lo God i givim long Moses, tasol olsem wanem dispela Lo inap helpim yumi long save wanem samting Jehova i save laikim?
6. Yumi tingim tok bilong Sindaun 3:1 na yumi mas givim wanem ol askim long yumi yet?
7. (a) Strongpela tok Jisas i givim long ol Farisi long Matyu 15:3-9, olsem wanem dispela i ken helpim yumi long skelim bel bilong yumi yet? (b) Wanem samting inap kamap na yumi mas strong long bosim na stretim tingting na bel bilong yumi?
8. Yumi mas mekim wanem na bai yumi ken save gut long tingting bilong Jehova?
9. Olsem wanem sampela manmeri i kam long miting ol i kamap strong hariap na sampela nogat?
10. (a) Yumi mas stadi na kisim save long Baibel i go inap hamas yia? (b) Baibel i tok wanem long dispela samting?
11. Bilong wanem yumi mas save gut long tingting bilong God?
12. Bilong wanem yumi mas laikim ol samting God i save laikim na nolaik tru long ol samting God i nolaik tru long en?
13. (a) Wanem beten bilong Devit long ol man nogut i mas bagarap na yumi wanbel long en? (b) Devit i tingim husat ol i man nogut na em i beten long God i mas bagarapim ol?
14. I gat sampela man nogut yumi ken traim helpim ol? Yumi ken mekim wanem bilong helpim ol?
15. (a) Devit i tingim husat ol i birua tru long Jehova? (b) Yumi mas mekim wanem bilong kamapim bel bilong yumi, yumi nolaik tru long ol man i bikhet long Jehova?
16. (a) Bilong wanem Devit i laik bai God i skelim bel bilong em? (b) Yumi laik bai Jehova i ken helpim yumi long save long wanem samting bilong bel bilong yumi?
17. (a) Sapos bel bilong yumi i gat tok long sampela samting, yumi mas mekim wanem? (b) Sapos sampela laik nogut i stap long bel, yumi ken kirap nogut long dispela? Yumi mas mekim wanem long dispela samting?
18. (a) Jehova i mekim wanem na bai yumi ken i stap longpela taim? (b) Sapos yumi wok yet long bihainim rot Jehova i bringim yumi long en, bai yumi kisim wanem gutpela samting?
[Piksa long pes 16]
Taim yu stadi, wok long kisim tingting bilong God na bai yu tu yu ken tingting olsem
[Piksa long pes 18]
Tingting bilong Jehova i planti tru olsem wesan long nambis
[Kredit Lain]
Pictorial Archive (Near Eastern History) Est.