Tok Bilong Jehova i Gat Laip
Sampela Bikpela Tok Bilong Buk 5 Bilong Buk Song
OL MANIMAN inap tok: “Ol yangpela pikinini man bilong mipela i ken kamap strong olsem ol diwai. Na mipela i laik bai ol pikinini meri i ken kamap gutpela olsem ol gutpela piksa i save bilasim banis bilong bikpela haus bilong king. Mipela i laik bai . . . ol haus kaikai i ken pulap tru. . . . Na ol sipsip i ken karim planti pikinini moa moa yet.” Na tu ol inap tok moa: “Lain manmeri i kisim kain gutpela samting olsem, ol i ken amamas.” Tasol man bilong raitim song i tok: “Ol manmeri i putim Bikpela i stap God bilong ol, ol tu i ken amamas.” (Song 144:12-15) Ol man i putim Jehova i stap God bilong ol i stret ol i amamas. Jehova em i man bilong amamas, na pasin bilong amamas em pasin bilong ol man i lotuim em. (1 Timoti 1:11) Dispela samting i stap ples klia long laspela hap bilong Buk Song, kirap long Song 107 i go 150.
Buk 5 bilong Buk Song i kamapim klia ol gutpela pasin bilong Jehova olsem, gutpela pasin sori, pasin bilong bihainim tok bilong em yet, na gutpela pasin. Taim yumi kisim save gut long ol pasin bilong God, dispela bai kirapim yumi long laikim em na pret long em. Dispela i mekim na yumi stap amamas. Em wanpela gutpela samting tru yumi inap kisim save long en long Buk 5 bilong Buk Song!—Hibru 4:12.
AMAMAS LONG GUTPELA-PASIN-SORI BILONG JEHOVA
Lain Juda i lusim kalabus long Babilon na i go bek long ples bilong ol, ol i singsing olsem: “Ol i mas tenkyu tru long Bikpela, oltaim em i save sori [“mekim gutpela-pasin-sori,” NW] long ol, na em i bin mekim gutpela wok tru bilong helpim ol.” (Song 107:8, 15, 21, 31) Devit i litimapim nem bilong God na i tok: “Oltaim yu save bihainim gutpela tok bilong yu. Sapos mipela inap kaunim olgeta taim yu bin mekim gut long mipela, bai mak i go inap long ol klaut.” (Song 108:4) Song 109 i tok: ‘God, Bikpela bilong mi, yu save laikim mi tru oltaim. Yu ken helpim [“mekim gutpela-pasin-sori,” NW] na kisim bek mi.’ (Song 109:18, 19, 26) Song 110 i tok profet long wok king bilong Mesaia. Song 111:10 i tok: “Sapos man i laik kamap saveman em i mas pret long Bikpela.” Song 112 i tok, “Man i save pret long Bikpela . . . i ken amamas.”—Song 112:1.
Long Baibel long tok Hibru, ol i kolim Song 113 i go 118 olsem ol Song Halel, long wanem, planti taim ol i kolim dispela tok “Haleluya,” o “litimapim nem bilong Jah!” Buk Misna—em wanpela buk i kamapim ol lo ol i bin kisim long maus bilong ol tumbuna—i tok ol dispela singsing ol i save mekim long taim bilong Pasova na long ol bikpela bung bilong lotu bilong ol Juda i save kamap 3-pela taim long olgeta yia. Song 119 em i longpela tru, winim ol narapela song na ol narapela sapta bilong Baibel. Dispela song i litimapim nem bilong Jehova.
Bekim Bilong Ol Askim Bilong Baibel:
109:23—Wanem mining bilong dispela tok bilong Devit: “Mi laik i go pinis olsem tewel san i mekim kamap em i go pinis long apinun, taim san i go daun”? Devit i mekim dispela tok, long wanem, em i pilim olsem klostu nau em i laik i dai.—Song 102:11.
110:1, 2—“Bikpela bilong [Devit],” Jisas Krais, i mekim wanem taim em i sindaun long han sut bilong God? Taim Jisas i kirap bek em i go bek long heven na sindaun long han sut bilong God na wet i stap inap long 1914 long kirap mekim wok king. Long dispela taim, Jisas i bosim ol lain bilong em, em God i bin makim ol, em i stiaim ol long wok bilong ol long autim tok na kamapim disaipel, na tu, redim ol long mekim wok king wantaim em long Kingdom bilong em.—Matyu 24:14; 28:18-20; Luk 22:28-30.
110:4—Jehova i tok “promis pinis” long wanem samting na “em i no inap senisim tok bilong em”? Dispela tok promis em kontrak Jehova i mekim wantaim Jisas Krais long mekim wok King na Hetpris.—Luk 22:29.
113:3—Long wanem rot ol bai litimapim nem bilong Jehova long “hap bilong sankamap i go inap hap bilong san i go daun”? Dispela i no makim tasol olsem wanpela lain i save lotuim God long olgeta de, nogat. Kirap long hap bilong sankamap na i go inap long hap bilong san i go daun, lait bilong san i save go long olgeta hap bilong graun. Olsem tasol, ol bai litimapim nem bilong Jehova long olgeta hap. Dispela wok i no inap kamap gut sapos ol i no stretim gut ol samting. Yumi ol Witnes Bilong Jehova i gat wok bilong mekim, em long litimapim nem bilong God na insait long wok bilong autim tok bilong Kingdom.
116:15—Jehova i gat wanem tingting long dai bilong ol manmeri bilong em? Long ai bilong Jehova ol man i lotuim em ol i dia tumas, olsem na em i no inap larim ol, olsem lain olgeta bilong ol, i dai. Sapos em i larim lain olgeta i dai dispela bai makim olsem ol birua bilong em i gat bikpela strong moa winim em. Na tu, bai i no gat ol man i stap long graun olsem ol namba wan lain bilong nupela taim.
119:71—Olsem wanem i gutpela long hevi i painim yumi? Ol hevi inap skulim yumi long bilip na wetim Jehova i helpim yumi, beten strong long em, na stadi gut long Baibel na wok strong long bihainim tok bilong en. Na tu, pasin yumi mekim long taim hevi i painim yumi, dispela inap kamapim sampela pasin kranki bilong yumi we yumi inap stretim. Sapos yumi larim hevi i helpim yumi long stretim pasin bilong yumi, dispela bai strongim yumi.
119:96—Wanem mining bilong dispela tok ‘i no gat wanpela samting i gutpela’? Man bilong raitim song i toktok long tingting bilong man long wanem samting i gutpela olgeta. Ating em i tingim tingting bilong ol man i sot long samting i gutpela tru. Tasol ol lo bilong God i no olsem. Lo bilong God i gutpela olgeta na em i stret long olgeta samting long i stap bilong man.
119:164—Olsem wanem pasin bilong litimapim nem bilong God “7-pela taim long olgeta de” em i bikpela samting? Namba 7 i makim samting em inap olgeta. Olsem na man bilong raitim song i tok olsem i stret yumi litimapim nem bilong Jehova wanpela tasol.
Skul Yumi Kisim:
107:27-31. Save bilong dispela graun “i no inap mekim wanpela samting bilong helpim” ol man taim Armagedon i kam. (KTH 16:14, 16) Em i no inap kisim bek man long bagarap. Ol man em ol i wetim Jehova i kisim bek ol, ol tasol bai stap laip na ‘tenkyu long Bikpela long em i save laikim ol tumas.’
113:4-9. Jehova em i stap antap tru olsem na em i mas “lukluk i kam daun na lukim heven.” Maski i olsem, em i save sori long ol man nating, ol rabisman, na ol meri i no save karim pikinini. Bikpela King Jehova i gat pasin daun na em i laik bai ol man i lotuim em ol tu i mas mekim olsem.—Jems 4:6.
114:3-7. Taim yumi kisim save long ol gutpela wok Jehova i bin mekim bilong helpim lain bilong em long solwara Retsi, long wara Jordan, na long maunten Sainai, dispela i mas mekim sampela samting long yumi. Ol man em “graun” i makim, ol i mas pret—olsem “guria”—long Bikpela.
119:97-101. Taim yumi kisim savetingting, na kliagut long Tok Bilong God, dispela i lukautim yumi long ol samting bilong spirit.
119:105. Tok Bilong God i olsem lam i soim rot long yumi, olsem na em inap helpim yumi long karim ol hevi i save painim yumi. Na tu, em i olsem lait i soim rot long yumi, long wanem, em i tokaut long ol samting God bai mekim bihain.
AMAMAS MASKI I GAT HEVI
Olsem wanem yumi ken sanap strong na winim ol traim na ol hevi i painim yumi? Song 120 i go 134 i kamapim bekim bilong dispela askim. Yumi winim ol hevi na holimpas amamas bilong yumi long rot bilong wetim Jehova i helpim yumi. Ol i kolim ol dispela song olsem singsing bilong ol lain i wokabaut i go long ples bilong lotu. Ating ol Israel i save mekim ol dispela singsing taim ol i wokabaut i go long Jerusalem bilong mekim ol bikpela de bilong lotu i save kamap long olgeta yia.
Song 135 na 136 i stori long Jehova, em i Man bilong mekim ol samting em i tingting long mekim na em i narapela kain long ol giaman god i no inap mekim wanpela samting. Long olgeta wan wan ves long Song 136, laspela hap bilong ol i bekim tok bilong namba wan hap bilong ves. Long Song 137, em i stori long bel hevi bilong ol Juda i stap long Babilon em ol i laik lotuim Jehova long Saion. Song 138 na 145 ol i singsing bilong Devit. ‘Bel bilong em i strong tru long tenkyu long God.’ Bilong wanem? Long wanem em i tok: “Olgeta samting yu [God] wokim i narakain na i nambawan tru.” (Song 138:1; 139:14) Long Song 140 i go 144, Devit i beten long Jehova i mas lukautim em long ol man nogut, givim gutpela tok bilong stretim em, kisim em bek long ol birua, na stiaim wokabaut bilong em. Em i stori long lain bilong Jehova i save stap amamas. (Song 144:15) Taim Devit i skelim biknem na gutpela pasin bilong God, em i tok: “Bai mi litimapim nem bilong Bikpela oltaim. Na yupela olgeta samting em i bin wokim, yupela tu i mas litimapim nem bilong en oltaim oltaim.”—Song 145:21.
Bekim Bilong Ol Askim Bilong Baibel:
122:3—Olsem wanem Jerusalem “i gutpela tumas”? Olsem ol taun bilong bipo, ol i wokim ol haus insait long Jerusalem klostu klostu. Olgeta samting long taun i stap klostu klostu olsem na i no hatwok long ol soldia i lukautim taun. Na tu, ol haus i stap klostu na dispela i mekim na narapela i helpim na lukautim narapela. Dispela i makim olsem 12-pela lain bilong Israel i stap wanbel long ol samting bilong spirit taim ol i bung wantaim long lotu.
123:2—Wanem mining bilong dispela tok piksa olsem wokboi na wokmeri i bilip long bosman na bosmeri bilong ol? Ol wokboi na wokmeri i save lukluk long bosman na bosmeri bilong ol long save long laik bilong ol, long wanem, ol i bilip olsem bosman na bosmeri bai lukautim ol na givim ol samting ol i mas i gat. Olsem tasol yumi lukluk long Jehova bilong save long laik bilong em na bilong em i ken orait long yumi.
131:1-3—Olsem wanem Devit i ‘sindaun gut na stap bel isi olsem pikinini i slip i stap long han bilong mama bilong em’? Devit i lain long sindaun gut na stap bel isi olsem “pikinini i slip i stap long han bilong mama bilong em.” Olsem wanem em i mekim olsem? Long rot bilong em i no litimapim nem bilong em yet na tingting long kisim ol samting i no bilong em. Devit i no tingting long kisim biknem, em i luksave olsem em i no inap mekim olgeta samting na em i mekim pasin daun. Yumi bihainim savepasin taim yumi bihainim pasin bilong em, moa yet taim yumi laik winim sampela mak insait long kongrigesen.
Skul Yumi Kisim:
120:1, 2, 6, 7. Ol tok giaman na tok bilong sutim bel inap givim bel hevi long narapela. Taim yumi bosim gut maus bilong yumi em i wanpela rot bilong “sindaun gut” wantaim ol arapela na stap bel isi.
120:3, 4. Sapos yumi mas karim hevi long wanpela “man bilong giaman,” yumi ken bilip tru olsem Jehova bai stretim olgeta samting long taim stret bilong em. Ol man bilong tok giaman bai kisim bagarap long han bilong “soldia” o strongpela man. Ol bai kisim strafe long taim bilong kot bilong Jehova em “hatpela paia” i makim.
127:1, 2. Long olgeta samting yumi laik mekim, yumi mas larim Jehova i stiaim yumi.
133:1-3. Pasin wanbel i stap namel long lain bilong Jehova i gutpela, i mekim gut bel bilong ol, na givim nupela strong long ol. Yumi no ken bagarapim dispela pasin wanbel long rot bilong painim popaia bilong narapela, o kros, o toktok planti.
137:1, 5, 6. Lain bilong Jehova i stap kalabus long Babilon i pilim olsem ol i stap klostu long Saion, em i makim oganaisesen bilong God. Olsem wanem long yumi? Yumi save stap gut long oganaisesen em Jehova i mekim wok long en long nau?
139:1-6, 15, 16. Jehova i save long olgeta samting yumi mekim, tingting bilong yumi, na ol tok yumi laik mekim paslain long yumi toktok. Em i save long yumi taim yumi wok long kamap insait long bel bilong mama. God i save long yumi wan wan na dispela save i “antap tru” na i hatwok long save long en. Taim yumi save olsem Jehova i save long ol hevi i painim yumi na ol samting dispela hevi i mekim long yumi, dispela i mekim gut bel bilong yumi, laka?
139:7-12. I no gat wanpela hap we yumi go na em i longwe tumas long God i ken strongim yumi.
139:17, 18. Olsem wanem? Yumi amamas long save yumi kisim long Jehova? (Sindaun 2:10) Sapos olsem, oltaim dispela save bai mekim yumi amamas. Olgeta tingting bilong Jehova i “winim namba bilong olgeta wesan long nambis.” Oltaim bai i gat planti samting moa yumi inap lainim long em.
139:23, 24. Yumi mas larim Jehova i skelim bel bilong yumi nogut yumi gat “sampela tok giaman,” olsem ol tingting na laik nogut i stap long bel na tingting, na bai Em i ken helpim yumi long rausim dispela ol tingting na laik nogut.
143:4-7. Olsem wanem yumi ken karim ol bikpela hevi? Man bilong raitim song i tok, yumi mas tingim tingim long bel ol wok bilong Jehova, na beten long em i helpim yu.
“Litimapim Nem Bilong Bikpela”
Long laspela ves bilong buk 1, 2, 3, na 4 bilong Buk Song i gat tok bilong litimapim nem bilong Bikpela. (Song 41:13; 72:19, 20; 89:52; 106:48) Buk 5 bilong Buk Song i mekim wankain tok. Song 150:6 i tok: “Yupela olgeta samting i gat laip, litimapim nem bilong Bikpela! Litimapim nem bilong Bikpela!” Dispela bai kamap tru long nupela taim God bai kamapim.
Taim yumi wet long dispela gutpela taim, i gat as na yumi mas litimapim nem bilong God tru. Yumi amamas olsem yumi save long Jehova na yumi pas gut wantaim em, na dispela i mas kirapim yumi long litimapim nem bilong em, a?
[Piksa long pes 15]
Olgeta samting Jehova i wokim i nambawan tru
[Piksa long pes 16]
Olgeta tingting bilong Jehova i “winim namba bilong olgeta wesan long nambis”