Bilong Wanem Yumi Mas Litimapim Nem Bilong Jehova?

1-3. (a) Man bilong raitim song i raitim Buk Song 147 long wanem taim? (b) Yumi inap kisim wanem skul taim yumi skelim ol tok i stap long Buk Song 147?

TAIM wanpela man i mekim gut asainmen bilong em o em i kamapim wanpela gutpela pasin, i stret long yumi givim biknem long em. Sapos olsem, orait i stret tru long yumi litimapim nem bilong God Jehova! Yumi mas litimapim nem bilong God bikos em i gat olgeta strong. Olgeta samting em i wokim i kamapim klia bikpela strong bilong em. Na tu, em i mekim gutpela pasin long ol manmeri taim em i givim Pikinini bilong em olsem ofa bilong baim bek yumi.

² Man i raitim Buk Song 147 i bin litimapim nem bilong Jehova. Na tu, em i kirapim ol narapela long givim biknem long God.—Ritim Song 147:1, 7, 12.

³ Yumi no save husat i raitim tok i stap long Buk Song 147. Tasol i luk olsem man bilong raitim song i bin stap taim Jehova i kisim bek lain Israel long kalabus long Babilon. (Sng. 147:2) Taim lain Israel i go bek long Jerusalem na kirapim gen lotu i tru, ating dispela i kirapim man bilong raitim song long litimapim nem bilong Jehova. Na tu, em i kolim sampela moa risen na yumi mas litimapim nem bilong God. Wanem ol dispela risen? Bilong wanem yumi mas “litimapim nem bilong Bikpela!”?—Sng. 147:1.

 4. Taim King Sairus i daunim Babilon na larim lain Israel i go fri, ol i pilim olsem wanem? Bilong wanem?

⁴ Lain Israel i pilim olsem wanem taim ol i kalabus long Babilon? Ol Babilon i tok bilas long ol na i tok: “Mipela i laik bai yupela i singim ol song bilong mekim mipela i belgut. Kirapim wanpela song bilong Saion.” Jerusalem em ples we lain Israel i save amamas na litimapim nem bilong Jehova, tasol nau i no gat man i stap moa long dispela hap, olsem na ol i no laik singsing. (Sng. 137:1-3, 6) Ol i bel hevi stret na ol i nidim wanpela long mekim isi bel bilong ol. Tasol tok profet bilong God i kamap tru taim King Sairus bilong Persia i larim lain Israel i go fri. Sairus i daunim Babilon na em i tokaut olsem: “Bikpela . . . i tokim mi long wokim wanpela haus bilong em long taun Jerusalem . . . God, Bikpela bilong yupela Israel, em i ken i stap wantaim yupela ol manmeri bilong en. Na nau yupela i ken i go bek long Jerusalem.” (2 Sto. 36:23) Dispela tok i bin mekim isi bel bilong lain Israel husat i bin stap long Babilon!

 5. Man bilong raitim song i mekim wanem tok long pasin bilong Jehova long mekim gut bel bilong yumi?

⁵ Jehova i mekim gut bel bilong olgeta wan wan man bilong lain Israel. Em i mekim wankain samting long nau. Man bilong raitim song i tok: “Em [God] i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.” (Sng. 147:3) Yes, Jehova i save tingim tru ol lain i gat sik long bodi o ol i bel hevi. Long nau, Jehova i laik tru long mekim gut bel bilong yumi taim yumi bel hevi. (Sng. 34:18; Ais. 57:15) God i givim savetingting na strong long yumi bambai yumi inap sanap strong na karim ol hevi.—Jems 1:5.

 6. Olsem wanem yumi inap kisim helpim long tok bilong Buk Song 147:4 long ol samting bilong ples antap? (Lukim piksa long kirap bilong stadi.)

⁶ Man bilong raitim song i tingim ol samting bilong ples antap, na em i tok olsem Jehova i “makim pinis namba bilong ol sta, na em i save kolim nem bilong ol sta wan wan.” (Sng. 147:4) Bilong wanem em i stori long ol samting bilong ples antap? Tingim: Man bilong raitim song inap lukim ol sta, tasol em i no save hamas sta i stap antap. Inap planti yia, ol wok painimaut i soim klia olsem namba bilong ol sta i wok long i go planti tru. Sampela man i ting olsem i gat planti bilion sta i stap long Milkiwe galaksi em yumi stap long en. Na tu, ating i gat planti trilion galaksi i stap long yunives! Yumi no save long hamas sta i stap long ples antap! Tasol Man Bilong Wokim ol samting i givim nem long olgeta sta. Dispela i soim olsem Jehova i save gut tru long olgeta wan wan sta. (1 Kor. 15:41) Olsem wanem long ol manmeri em i wokim? God i save long yumi olgeta wan wan—hap yumi stap long en, tingting i stap long bel bilong yumi, na ol samting yumi nidim!

7, 8. (a) Jehova i tingim wanem samting taim em i helpim ol manmeri bilong em i karim hevi? (b) Stori long olsem wanem Jehova i save pilim tru hevi bilong yumi ol sinman?

⁷ Jehova i tingim yumi olgeta wan wan. Em i gat bikpela strong na pasin sori, na em i redi long helpim yumi. (Ritim Song 147:5.) Ating yu pilim olsem hevi i wok long daunim yu, na yu no inap long karim dispela hevi. Tasol God i save long mak bilong strong yu gat long karim ol hevi, bikos ‘em i tingim yu olsem das tasol.’ (Sng. 103:14) Yumi gat sin, olsem na planti taim yumi bai popaia. Yumi save bel hevi tru taim yumi mekim tok i no stret, taim ol laik nogut i kamap, o taim yumi mangalim ol samting bilong ol narapela! Jehova yet i no save mekim ol kain pasin, tasol em i kliagut long ol hevi yumi karim!—Ais. 40:28.

⁸ Ating yu yet i bin pilim tru strong bilong Jehova taim em i helpim yu long karim sampela hevi. (Ais. 41:10, 13) Kyoko em painia sista husat i slek long bilip taim em i go mekim nupela asainmen. Olsem wanem Jehova i soim olsem em i kliagut long hevi bilong Kyoko? Taim Kyoko i go long nupela asainmen bilong em, em i stap namel long ol manmeri husat i pilim tru hevi bilong em. Kyoko i pilim olsem Jehova i tokim em: “Mi laikim yu bikos yu pikinini bilong mi na yu dediketim laip bilong yu long mi. Mi laik bai yu stap amamas olsem wanpela Witnes bilong mi!” Tru tumas, God i gat olgeta strong na “yumi no inap makim save bilong en,” tasol em i save gut long hevi yumi wan wan i karim.

9, 10. Taim hevi i kamap, wanem namba 1 samting Jehova i save givim bilong helpim yumi? Stori long wanpela eksampel.

⁹ Ating yu tingting planti long ol samting yu nidim, olsem kaikai samting. Tasol Jehova i bin stretim rot long ol kaikai inap kamap long graun, na oltaim em i save givim kaikai long ol kotkot! (Ritim Song 147:8, 9.) Olsem na yumi ken bilip tru olsem em bai givim yumi olgeta samting yumi nidim.—Sng. 37:25.

¹⁰ Bikpela samting moa em olsem, Jehova i givim yumi ol kaikai bilong strongim bilip bambai yumi inap kisim “bel isi bilong God i winim tru tingting bilong man.” (Fili. 4:6, 7) Tingim ekspiriens bilong Mutsuo, em wanpela brata long Japan. Em na meri bilong em i pilim tru olsem Jehova i mekim gut bel bilong ol bihain long sunami i kamap long Japan long 2011. Ol i go antap long rup bilong haus na wara i no karim ol i go. Tasol wara i karim olgeta samting bilong ol i go. Olsem na long nait ol i slip long wanpela rum i stap antap long seken plua long haus bilong ol. Long moningtaim, ol i painim rot bilong strongim bilip bilong ol. Ol i painim 1-pela buk tasol, em Yearbook of Jehovah’s Witnesses bilong 2006. Kwiktaim Mutsuo i lukim het tok, “The Deadliest Tsunamis Ever Recorded.” Dispela em stori bilong wanpela guria i bin kamap long Sumatra long 2004. Dispela guria i kamapim bikpela sunami winim ol sunami i kamap bipo. Mutsuo na meri bilong em i krai taim ol i ritim ol ekspiriens. Ol i pilim tru pasin laikim bilong Jehova long tingim ol na givim kaikai bilong strongim bilip bilong ol long taim stret. Na tu, ol bratasista i lukautim ol long kaikai na klos samting. Tasol ol i kisim bikpela strong moa taim ol memba bilong Brens Komiti i go visitim ol. Mutsuo i tok: “Mi pilim tru olsem Jehova i stap klostu long mipela wan wan na i mekim gut long mipela. Dispela i mekim gut bel bilong mipela!” I klia tru olsem namba 1 samting God i givim long yumi em kaikai bilong strongim bilip, na bihain em i save givim yumi ol narapela samting.

11. Yumi mas mekim wanem bambai God inap helpim yumi?

¹¹ Oltaim Jehova i redi long ‘litimapim ol man i save daunim ol yet.’ (Sng. 147:6) Tasol yumi inap mekim wanem bambai God i ken helpim yumi? Yumi mas i gat pasin daun bambai yumi inap pas gut wantaim God. (Sef. 2:3) Ol man i gat pasin daun i save wet long God i stretim ol na helpim ol long karim ol hevi i painim ol. Jehova i save amamas long ol kain man olsem.

12, 13. (a) Sapos yumi laik bai God i helpim yumi, orait yumi mas sakim wanem samting? (b) Jehova i save amamas long wanem kain man?

¹² God bai “krungutim strong tru ol manmeri nogut.” (Sng. 147:6) Dispela em strongpela tok! Sapos yumi laik kisim helpim long bikpela pasin laikim bilong Jehova na abrusim belhat bilong em, yumi mas sakim ol samting em i heitim. (Sng. 97:10) Olsem, yumi mas heitim tru pasin pamuk. Dispela i makim tu olsem yumi mas sakim ol samting we inap kirapim yumi long mekim pasin pamuk, kain olsem ponografi. (Sng. 119:37; Mat. 5:28) Em tru olsem i hatwok long daunim ol laik nogut, tasol Jehova bai blesim yumi sapos yumi wok strong long sakim ol dispela pasin nogut.

¹³ Yumi mas askim Jehova long helpim yumi long daunim ol laik nogut, na yumi no ken bilip long strong bilong yumi yet. God i no inap amamas sapos yumi bilip long strong bilong yumi yet, kain olsem man i save bilip long ol “strongpela hos,” o long ol “strongpela soldia” long lukautim em. (Sng. 147:10) Yumi mas beten long Jehova na askim em long helpim yumi. God i no olsem ol man bilong dispela graun husat i save pilim taiet taim yumi askim ol planti taim long wanpela samting, nogat. Em bai harim yet ol beten bilong yumi maski yumi beten inap planti taim. Baibel i tok: “Em [God] i save amamas long ol manmeri i save pret long em, na long ol manmeri i save bilip long em i save sori long ol oltaim.” (Sng. 147:11) Yumi ken bilip tru olsem em i gat bikpela pasin laikim, olsem na em bai pas wantaim yumi na helpim yumi long sakim ol laik nogut.

14. Man bilong raitim song i bilip tru long wanem samting na dispela i strongim em?

¹⁴ Jehova i mekim wanpela tok bilong helpim yumi long bilip olsem em bai sambai long ol manmeri bilong em taim ol i nidim helpim. Man bilong raitim song i tingim wok bilong stretim gen Jerusalem, na em i tok long Jehova olsem: “Em i save strongim ol dua bilong banis bilong yu, Jerusalem, na em i save mekim gut tru long ol manmeri bilong yu. Em i save lukautim graun bilong yupela.” (Sng. 147:13, 14) Man bilong raitim song i bilip tru olsem God bai strongim gen ol dua bilong banis bilong taun bambai ol lain i lotuim em i ken i stap gut!

15-17. (a) Yumi inap pilim olsem wanem long ol hevi i painim yumi? (b) Olsem wanem Jehova i yusim Baibel long helpim yumi na i olsem em i mekim wanpela tok na “wantu tasol dispela tok i kam daun”?

¹⁵ Ating yu bungim ol hevi we i daunim yu tru. Jehova inap givim yu savetingting bilong karim dispela hevi. Man bilong raitim song i tok: “Sapos [God] i mekim wanpela tok, orait wantu tasol dispela tok i kam daun long graun.” Bihain em i stori olsem Jehova i save ‘salim planti ais i kam daun, na em i save salim planti ren ais.’ Em i tok moa: “Em i mekim ples i kamap kol tru na i no gat man inap sakim kol.” Na tu, em i tok Jehova “i tok gen na ais i kamap wara.” (Sng. 147:15-18) God i gat olgeta strong na savetingting na em i save kontrolim ren ais, olsem na em inap helpim yu long karim hevi.

¹⁶ Long nau, Jehova i yusim Baibel long stiaim yumi. Oltaim em i redi long givim kaikai bilong strongim bilip bilong yumi long taim stret, na i olsem “wantu tasol dispela tok i kam daun.” Yumi save kisim helpim taim yumi ritim Baibel, ol pablikesen i kam long “gutpela wokboi i gat savetingting,” watsim JW Brodkas, go long jw.org, toktok long ol elda, na bung wantaim ol wanbilip. (Mat. 24:45) Olsem wanem? Yu luksave olsem kwiktaim Jehova i save givim ol tok bilong stiaim yumi?

¹⁷ Simone em wanpela sista, na em stori long olsem wanem Tok Bilong God i bin helpim em. Em i pilim olsem em i no gutpela tumas na God i no inap orait long em. Tasol em i save strongim bel na beten askim Jehova long helpim em. Na tu, em i givim bel long mekim pesenel stadi bilong em yet. Em i tok, “Oltaim mi pilim olsem Jehova i save strongim mi na stiaim mi.” Dispela i helpim em long holim stretpela tingting long em yet.

18. (a) Bilong wanem yu pilim olsem God i laikim yu?

¹⁸ Man bilong raitim song i save olsem God i bin laikim tru lain Israel bilong bipo. God i bin givim ol “tok na lo” bilong em long lain Israel. (Ritim Song 147:19, 20.) Long nau, yumi amamas tru olsem yumi holim nem bilong God. Taim yumi kisim save long Jehova na larim tok bilong Baibel i stiaim laip bilong yumi, orait yumi bai pas gut wantaim em. Wankain olsem man bilong raitim Buk Song 147, i gat planti gutpela risen na yumi tu inap “litimapim nem bilong Bikpela!” na strongim ol narapela long mekim olsem tu.