Lotu Long Jehova Long Klinpela Han

SPIRIT holi i kirapim Devit long mekim song olsem: “Bikpela, mi wasim han bilong mi bilong soim yu mi no gat rong. Na mi wokabaut raunim alta bilong yu, na mi lotu long yu.”​—⁠Song 26:⁠6.

Taim Devit i mekim dispela tok, em i bin tingim pasin bilong ol pris Livai long Israel long wokabaut i go antap long alta na bihain putim ol ofa bilong ol antap long paia. Tasol taim ol pris i mekim dispela pasin bilong lotu, pastaim ol i mas wasim han lek bilong ol. Dispela em i no liklik samting. Sapos pris i no bihainim dispela pasin ol bai kilim em i dai!​—⁠Kisim Bek 30:​18-21.

Long tok piksa, waswas bai mekim yumi i kamap klin long spirit na long pasin bilong yumi. (Aisaia 1:16; Efesus 5:26) Long nau Jehova i laik bai yumi mekim wok bilong em, i olsem yumi ‘wokabaut raunim alta.’ Tasol em i laik yumi mekim olsem long klinpela han​—⁠olsem Devit i tok, yumi mas mekim long han yumi wasim pinis na i “no gat rong.” Dispela em i no wanpela liklik lo nating, long wanem, ol man i mekim ol pasin doti bai i no inap i go insait long Kingdom bilong God. (Galesia 5:​19-21) Maski man i mekim wok bilong God, dispela i no givim rot long em long mekim ol pasin i no stret. Olsem na aposel Pol i tok: “Mi save paitim tru bodi bilong mi na mekim em i bihainim laik bilong mi. Nogut mi autim gutnius long ol arapela man na bihain mi yet mi no kisim prais.”​—⁠1 Korin 9:⁠27.

Ol man i laik bai God i orait long ol na bai ol i amamas tru, ol i mas lotu long God long klinpela han. Olsem Devit, ol i wokabaut long “stretpela pasin na bihainim olgeta lo.”​—⁠1 King 9:⁠4.