Yumi Litimapim Nem Bilong Jehova

“Yumi tokaut long biknem bilong God. Yumi litimapim nem bilong em.”​​—SONG 34:3.

 1. Taim Jisas i mekim wok bilong em long graun, em i mekim wanem gutpela pasin yumi ken bihainim?

LONG nait bilong Nisan 14, 33 C.E., Jisas na ol aposel ol i bung long wanpela rum antap bilong wanpela haus long Jerusalem na ol i singim ol song i litimapim nem bilong Jehova. (Matyu 26:30) Em laspela taim bilong Jisas i mekim dispela samting wantaim ol aposel bilong em. Tasol i stret em i pinisim dispela bung wantaim ol long dispela pasin. Stat long taim Jisas i kirap mekim wok bilong em long graun na i go inap long taim em i pinisim dispela wok, em i save litimapim nem bilong Papa bilong em na em i givim bel long kamapim dispela nem long ol arapela. (Matyu 4:​10; 6:9; 22:​37, 38; Jon 12:28; 17:6) I olsem em i mekim wankain singaut olsem man bilong raitim song i bin mekim: “Yumi tokaut long biknem bilong God. Yumi litimapim nem bilong em.” (Song 34:3) Dispela i makim gutpela pasin yumi yet i ken bihainim, laka?

2, 3. (a) Olsem wanem yumi ken save olsem Song 34 i gat tok profet long en? (b) Long dispela stadi na stadi i kamap bihain, bai yumi stori long wanem samting?

² Sampela aua tasol bihain long ol i singim ol song wantaim Jisas, aposel Jon i lukim narapela kain samting. Em i lukim Bikman bilong em na tupela stilman i hangamap long diwai pos. Ol soldia bilong Rom i brukim lek bilong tupela stilman bilong hariapim dai bilong ol. Tasol Jon i tok ol i no brukim lek bilong Jisas. Taim ol soldia i kamap long Jisas, ol i lukim em i dai pinis. Long Gutnius Jon i raitim, em i tok dispela samting i bin truim Song 34 i tok: “Bai ol i no brukim wanpela bun bilong en.”​​—Jon 19:​32-​36; Song 34:20.

³ I gat planti tok moa long Song 34 em ol Kristen i laik save long en. Olsem na long dispela stadi na stadi i kamap bihain long dispela, bai yumi stori long i stap bilong Devit taim em i raitim dispela song, na bihain bai yumi stori long ol wan wan ves bilong dispela song.

Devit i Ranawe Long Sol

 4. (a) I gat wanem as na God i makim Devit long kamap king long Israel? (b) Bilong wanem Sol i “laikim tumas Devit”?

⁴ Taim Devit i yangpela, Sol i stap king long Israel. Tasol bihain, Sol i bikhet na Jehova i no orait moa long em. Olsem na profet Samuel i tokim em: “Nau Bikpela i rausim yu long wok king, na yu no inap bosim ol Israel moa . . . Em i givim wok king pinis long wanpela arapela man bilong Israel. Dispela man em i gutpela man na i winim yu.” (1 Samuel 15:28) Bihain, Jehova i tokim Samuel long makim Devit, laspela pikinini man bilong Jesi, long kamap king long Israel bihain long Sol. Spirit bilong God i no stap moa wantaim King Sol, olsem na Sol i save pret na tingting planti. Devit i save gut long pilaim musik, olsem na ol i bringim em i kam long Gibea na em i kamap wokman bilong king. Taim Devit i pilaim musik, tingting bilong Sol i kamap gutpela gen, olsem na Sol i “laikim tumas Devit.”​​—1 Samuel 16:​11, 13, 21, 23.

 5. Bilong wanem tingting bilong Sol long Devit i senis? Devit i mas mekim wanem?

⁵ Jehova i stap wantaim Devit. Jehova i helpim em long winim traipela man Filistia, em Goliat, na winim ol pait we em i kisim biknem long Israel. Taim Jehova i mekim gut long Devit, dispela i mekim na Sol i jeles na i bel nogut tru long Devit. Tupela taim, taim Devit i wok long paitim gita long ai bilong Sol, king i tromoi spia long em. Long dispela tupela taim, Devit i abrusim spia. Long namba 3 taim Sol i laik kilim em i dai, Devit i luksave olsem em i mas ranawe, nogut em i kisim bagarap. Sol i wok long painim em bilong kilim em i dai, olsem na Devit i mas ranawe i go hait long narapela hap, ausait long kantri Israel.​​—1 Samuel 18:11; 19:​9, 10.

 6. Bilong wanem Sol i tokim ol soldia long kilim i dai olgeta manmeri bilong Nop?

⁶ Klostu long boda bilong Israel, Devit i kamap long taun Nop, we haus lotu sel bilong Jehova i stap. Devit i laik kisim kaikai bilong em yet na bilong ol yangpela man i bin ranawe wantaim em. Sol i kisim save olsem hetpris i bin givim sampela kaikai long Devit na ol lain bilong em, na bainat tu em Devit i bin kisim long Goliat taim Goliat i dai pinis. Sol i belhat nogut tru na em i tokim ol soldia long kilim i dai olgeta manmeri bilong dispela taun, na ol i kilim 85 pris tu.​​—1 Samuel 21:​1, 2; 22:​12, 13, 18, 19; Matyu 12:​3, 4.

Narapela Taim Gen Em i Abrusim Dai

 7. Olsem wanem taun Get i no gutpela ples hait bilong Devit?

⁷ Devit i lusim Nop na i ranawe i go inap 40 kilomita long hap wes na i kamap long graun bilong ol Filistia. Em i kamap long King Akis bilong taun Get, em asples bilong Goliat. Ating Devit i ting olsem Get em wanpela ples we Sol bai ting Devit i no gat laik long go long en. Tasol i no longtaim na ol wokboi bilong king bilong Get i luksave long Devit em i husat. Taim Devit i harim olsem ol bin luksave long em, “em i pret tru, nogut King Akis i kilim em.”​​—1 Samuel 21:​10-​12.

 8. (a) Song 56 i tok wanem long samting i bin painim Devit long Get? (b) Olsem wanem Devit i abrusim gen dai?

⁸ Orait nau ol Filistia i holimpas Devit. Ating long dispela taim ol i holimpas em, Devit i kamapim wanpela song we em i askim Jehova long tingim krai bilong em na ‘raitim long buk bilong em.’ (Song 56:8 na het tok) Em i bilip strong olsem Jehova i no ken lusim tingting long bel hevi bilong em, Em bai helpim na lukautim em. Na tu, Devit i wokim wanpela plen bilong giamanim dispela king bilong Filistia. Em i mekim olsem em i longlong man. Taim King Akis i lukim dispela, em i krosim ol wokboi bilong em long bringim dispela “longlong” man i kam long em. I klia tru olsem Jehova i sapotim dispela plen bilong Devit. Ol Filistia i rausim Devit long taun. Em nau, Devit i abrusim gen dai.​​—1 Samuel 21:​13-​15.

9, 10. Wanem samting i bin kirapim Devit long raitim Song 34? Ating Devit i tingim husat taim em i raitim dispela song?

⁹ Lain bilong Devit i bin ranawe i go long Get wantaim em o ol i stap long sampela ples long Israel klostu long Get na was long Devit, Baibel i no stori long dispela. Tasol maski ol i mekim wanem, ating ol i amamas long bung gen wantaim Devit na harim em i stori long Jehova i bin lukautim em gen. Dispela samting i bin painim Devit i as bilong Song 34, olsem het tok bilong en i kamapim. Long Song 34 ves 1-7 i go 7 bilong dispela song, Devit i litimapim nem bilong God long Em i bin kisim bek em. Na Devit i singautim ol lain bilong em long ol tu i mas litimapim nem bilong Jehova, olsem Man bilong helpim ol na ol i no kisim bagarap.​​—Song 34:​3, 4, 7.

¹⁰ Devit na ol lain bilong em ol i go klostu long taun Adulam na hait long wanpela bikpela hul long maunten, long hap is bilong Get inap 15 kilomita. Ol Israel husat i no amamas long pasin bilong Sol long bosim ol, ol i kam joinim Devit hia long dispela ples maunten. (1 Samuel 22:​1, 2) Ating Devit i tingim dispela lain taim em i raitim Song 34:​8-​22. Ol tok bilong ol dispela ves i bikpela samting long yumi tu long nau, na taim yumi skelim ol wan wan ves bilong dispela gutpela song, dispela bai helpim yumi.

Yu Gat Wankain Laik Olsem Devit?

11, 12. Wanem sampela as na oltaim yumi mas litimapim nem bilong Jehova?

¹¹ “Bai mi tenkyu long God. Oltaim bai mi litimapim nem bilong en.” (Song 34:1) Ol birua i bin raunim Devit na em i mas hait long ples maunten, olsem na ating em i tingting planti long kaikai samting, tasol olsem ves 1 i kamapim klia, em i no larim dispela i tekewe strongpela tingting bilong em long litimapim nem bilong Jehova. Dispela i makim gutpela pasin yumi ken bihainim taim hevi i painim yumi! Maski yumi stap long skul o ples wok o wantaim ol brata Kristen o long autim tok, nambawan bikpela laik bilong yumi i bilong litimapim nem bilong Jehova. I gat planti as na yumi mas mekim olsem! Tingim: Long olgeta taim bai yumi inap kisim amamas na sampela save moa long ol gutpela samting God i bin wokim. Na tingim ol samting em i bin mekim long rot bilong oganaisesen bilong em long graun! Maski ol i sinman, Jehova i bin mekim bikpela wok long ol man i stap gut long em bilong kamapim bikpela wok long taim bilong yumi. Olsem wanem long ol dispela wok bilong God taim yumi skelim wantaim ol wok bilong ol man, em ol lain bilong dispela graun i save givim biknem long ol? Ating yu wanbel wantaim Devit, em i tok: “Bikpela, i no gat wanpela god i olsem yu. Yu winim ol. Na i no gat wanpela man inap mekim wankain wok olsem yu save mekim.”​​—Song 86:8.

¹² Olsem Devit, oltaim yumi tu i save litimapim nem bilong Jehova long ol wok bilong em i nambawan tru. Na yumi amamas long save olsem Kingdom Bilong God i stap nau long han bilong tumbuna bilong Devit, em Jisas Krais, na em bai stap King oltaim oltaim. (KTH 11:15) Olsem na pinis bilong ol pasin nogut bilong nau i klostu, na laip oltaim bilong planti manmeri, winim 6 bilion, inap lus. Long nau, winim olgeta taim bipo, i gat bikpela wok tru bilong tokim ol manmeri long Kingdom Bilong God na ol samting Kingdom bai mekim bilong helpim ol na long helpim ol long litimapim nem bilong Jehova wantaim yumi. Olsem na nambawan bikpela wok bilong yumi em i olsem: Long olgeta taim yumi gat rot long mekim, yumi laik kirapim ol man long kisim dispela “gutnius” taim rot i op i stap yet.​​—Matyu 24:14.

13. (a) Devit i amamas long husat? Dispela i pulim wanem kain man i kam long Jehova? (b) Olsem wanem ol man i gat pasin daun i kam long kongrigesen Kristen long nau?

¹³ “Mi ting long God i bin helpim mi na mi amamas long em. Ol manmeri i karim hevi ol i ken harim dispela tok na ol i ken belgut tru.” (Song 34:2) Hia long dispela ves Devit i no hambak na amamas long ol samting em yet i bin mekim, nogat. Olsem: Em i no litimapim nem bilong em long gutpela plen tru em i bin wokim bilong giamanim king bilong Get. Em i save olsem taim em i stap long Get, em Jehova tasol i bin lukautim em na helpim em long abrusim dai. (Sindaun 21:1) Olsem na Devit i amamas long Jehova, em i no amamas long em yet. Devit i givim biknem long Jehova na dispela i pulim ol man i gat pasin daun long i kam long Jehova. Jisas tu i save givim biknem long Jehova, na dispela i mekim na ol man i gat pasin daun na i larim God i skulim ol, ol i kam long Em. Long nau, ol man bilong olgeta lain, em ol i gat pasin daun, ol i save kam long kongrigesen bilong ol Kristen God i bin makim long holi spirit em ol i bilong olgeta hap, na Jisas i Het bilong en. (Kolosi 1:​18) Taim ol dispela man i gat pasin daun i harim ol wokboi bilong God i litimapim nem bilong em, na taim ol i harim ol tok bilong Baibel em holi spirit bilong God i helpim ol long kisimgut, bel bilong ol i pilim tru.​​—Jon 6:​44; Aposel 16:14.

Ol Miting i Save Strongim Bilip Bilong Yumi

14. (a) Wanem tingting bilong Devit long pasin bilong litimapim nem bilong Jehova? (b) Jisas i mekim wanem gutpela pasin yumi ken bihainim long pasin bilong i go long ol miting bilong lotu?

¹⁴ “Yumi tokaut long biknem bilong God. Yumi litimapim nem bilong em.” (Song 34:3) Devit i save litimapim nem bilong Jehova taim em wanpela tasol i stap, tasol em i pilim olsem dispela tasol i no inap. Olsem na long gutpela pasin em i singautim ol poroman bilong em long litimapim nem bilong God wantaim em. Na Jisas Krais, em man Devit i piksa bilong en, em tu i bin amamas long litimapim nem bilong Jehova wantaim ol arapela​​—long haus lotu, long ol bikpela bung bilong lotu long tempel bilong God long Jerusalem, na taim em i stap wantaim ol disaipel bilong em. (Luk 2:​49; 4:​16-​19; 10:21; Jon 18:20) Em gutpela samting tru yumi ken bihainim pasin bilong Jisas na litimapim nem bilong Jehova long olgeta kain taim wantaim ol wanbilip, na moa yet taim yumi lukim “De bilong Krais em i kam klostu”!​​—Hibru 10:​24, 25.

15. (a) Samting i painim Devit i mekim wanem long ol poroman bilong em? (b) Taim yumi go long ol miting, olsem wanem dispela i save helpim yumi?

¹⁵ “Mi bin beten long Bikpela bai em i helpim mi, na em i harim prea bilong mi. Em i rausim olgeta pret long bel bilong mi, na nau mi stap bel isi.” (Song 34:4) Dispela em bikpela samting tru long Devit. Olsem na em i tok moa: “Ol rabisman i prea long Bikpela na em i harim prea bilong ol, na i helpim ol long olgeta hevi bilong ol.” (Song 34:6) Taim yumi bung wantaim ol wanbilip, i gat planti rot bilong yumi ken kamapim ol gutpela ekspiriens i stori long olsem wanem Jehova i bin helpim yumi long karim ol bikpela hevi na sanap strong. Dispela i save strongim bilip bilong ol wanbilip, wankain olsem ol tok bilong Devit i bin strongim bilip bilong ol poroman bilong em. Ol dispela poroman bilong Devit “ol i bilip long Bikpela, [na] ol i save amamas. Olsem na bilip bilong ol i no bagarap.” (Song 34:5) Maski ol i ranawe long King Sol, ol i amamas, ol i no sem. Ol i bilip strong olsem God i helpim Devit. Na olsem tasol, ol nupela man wantaim ol man i bin stap Kristen longpela taim ol i save bilip na lukluk long Jehova long helpim ol. Ol i pilim tru olsem em i bin helpim ol na ol i gat strongpela tingting long stap gut long em.

Amamas Long Ol Helpim Bilong Ol Ensel

16. Olsem wanem Jehova i bin mekim wok long ol ensel bilong helpim yumi?

¹⁶ “Ensel bilong Bikpela i save stap klostu long ol manmeri i aninit [“pret,” NW] long Bikpela, na em i save helpim ol bai ol i no kisim bagarap.” (Song 34:7) Jehova i bin helpim Devit, tasol Devit i no ting em samting Jehova bai mekim long em wanpela tasol. Tru, Jehova i bin makim Devit long kamap king long Israel, tasol Devit i save olsem Jehova i save mekim wok long ol ensel bilong em bilong was long olgeta man i lotu long em, maski ol i gat biknem o nogat. Long nau tu, Jehova i bin lukautim ol man i lotu tru long em. Long Natsi Jemani​—na long Angola, Malawi, Mosambik, na planti narapela kantri tu​—ol bikman i bin mekim bikpela wok bilong pinisim ol Witnes Bilong Jehova. Tasol dispela wok i lus nating. Ol lain bilong Jehova long ol dispela kantri ol i stap gut tru na ol i wok wantaim long litimapim nem bilong Jehova. Bilong wanem ol i stap gut tru? Long wanem, Jehova i save mekim wok long ol ensel holi bilong em bilong lukautim na stiaim ol manmeri bilong em.​​—Hibru 1:​14.

17. Olsem wanem ol ensel bilong God i helpim yumi?

¹⁷ Na tu, ol ensel bilong Jehova inap stiaim ol samting long lain bilong Jehova na rausim ol man i mekim ol narapela i pundaun. (Matyu 13:41; 18:​6, 10) Na maski yumi no save long dispela samting long taim em i kamap, ol ensel i save rausim ol samting em inap pasim yumi long mekim wok bilong God, na ol i lukautim yumi na bai ol samting i no ken bagarapim pasin bilong yumi long pas gut wantaim Jehova. Na bikpela samting moa, ol i save stiaim yumi long wok bilong autim “gutnius bilong i stap oltaim oltaim” long olgeta manmeri, na tu, long ol hap we yumi save yumi inap kisim hevi o lusim laip bilong yumi long mekim dispela wok. (KTH 14:6) Planti taim ol buk ol Witnes Bilong Jehova i wokim i kamapim ol samting ol ensel i bin mekim bilong helpim yumi.a Kain ekspiriens olsem ol i planti tru, olsem na yumi no ken ting ol i bin kamap nating.

18. (a) Yumi mas mekim wanem na bai ol ensel i ken helpim yumi? (b) Bai yumi stori long wanem samting long stadi i kamap bihain long dispela?

¹⁸ Bilong ol ensel i ken wok yet long stiaim na helpim yumi, yumi mas wok yet long litimapim nem bilong Jehova, maski ol man i birua long yumi. Tingim, ensel bilong God i save ‘stap klostu long ol manmeri i pret long Bikpela.’ Wanem mining bilong dispela? Pasin bilong pret long God em wanem samting, na olsem wanem yumi inap kisim dispela pasin? I gat wanem as na God bilong pasin laikim i laik bai yumi mas pret long em? Stadi i kamap bihain long dispela bai bekim ol dispela askim.

[Futnot]

Bai Yu Bekim Olsem Wanem?

• Wanem ol hevi i painim Devit taim em i stap yangpela?

• Wankain olsem Devit, yumi tingim wanem samting pastaim?

• Yumi gat wanem tingting long ol miting Kristen?

• Olsem wanem Jehova i save mekim wok long ol ensel bilong helpim yumi?

[Mep long pes 21]

(Bilong save ol dispela rait i stap we long pes, lukim buk o magasin)

Rama

Get

Siklag

Gibea

Nop

Jerusalem

Betlehem

Adulam

Keila

Hebron

Sif

Hores

Karmel

Maon

En-gedi

Raunwara Detsi

[Kredit Lain]

Map: Based on maps copyrighted by Pictorial Archive (Near Eastern History) Est. and Survey of Israel

[Piksa long pes 21]

Maski Devit i raun olsem wanpela ranaweman, em i save litimapim nem bilong Jehova

[Piksa long pes 23]

Taim yumi harim ol gutpela ekspiriens long ol miting Kristen, dispela i save strongim bilip bilong yumi

Song 34 ves 1-7