Pret Long Jehova na Stap Amamas
“Ol manmeri bilong Bikpela, yupela i mas i stap aninit long em. Ol man i aninit long em ol i no sot long wanpela samting.”—SONG 34:9.
1, 2. (a) Ol lain bilong Kristendom i gat wanem narapela narapela tingting long pasin bilong pret long God? (b) Nau bai yumi skelim wanem ol askim?
SAMPELA pris pasto bilong Kristendom i save skulim ol man long pret long God—ol i tok God i save kukim ol sinman long paia inap oltaim oltaim olsem strafe bilong ol. Dispela bilip i no stret wantaim ol tok Baibel i mekim long Jehova olsem em i God bilong pasin laikim na stretpela pasin. (Stat 3:19; Lo 32:4; Rom 6:23; 1 Jon 4:8) Tasol sampela pris pasto i holim narapela kain tingting. Ol i no stori liklik long yumi mas pret long God. Ol i tok God i save isi long ol man na i save laikim klostu olgeta manmeri maski ol i bihainim wanem kain pasin. Dispela tu em wanpela tok Baibel i no as bilong en.—Galesia 5:19-21.
2 Baibel i tokaut klia olsem yumi mas pret long God. (KTH 14:7) Dispela tok bilong Baibel i kamapim sampela askim. Bilong wanem God bilong pasin laikim i laik bai yumi mas pret long em? Em wanem kain pret? Pasin bilong pret long God inap helpim yumi olsem wanem? Bai yumi skelim ol dispela askim taim yumi stori moa long ol tok bilong Song 34.
As na Yumi Mas Pret Long God
3. (a) Wanem tingting bilong yu long dispela tok olsem yumi mas pret long God? (b) Bilong wanem ol man i pret long Jehova ol i stap amamas?
3 Jehova em Man Bilong Wokim olgeta samting na em i King bilong heven na graun, olsem na i stret yumi pret na aninit long em. (1 Pita 2:17) Tasol dispela pret i no kain pret olsem man i gat long wanpela god husat i save mekim nogut tru long ol man, nogat. Pasin bilong pret long God em pasin bilong rispek na daun long em. Na tu, em i pasin bilong pret long mekim ol samting Jehova i no orait long en. Pasin bilong pret long God i save helpim yumi, em i no bilong pretim yumi o mekim yumi bel hevi, nogat. Jehova em i God bilong “amamas,” na em i laik bai yumi ol man em i bin wokim i ken i stap amamas. (1 Timoti 1:11) Tasol bilong yumi ken stap amamas, yumi mas bihainim ol lo bilong em. Bilong mekim olsem, planti manmeri i bin senisim pasin bilong ol. Ol man husat i bin mekim ol senis em ol i mas mekim ol i luksave olsem dispela tok bilong Devit, man bilong raitim song, i kamap tru long ol: “Bikpela i save mekim gutpela pasin long yumi. Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru. Ol manmeri bilong Bikpela . . . i aninit [“pret,” NW] long em ol i no sot long wanpela samting.” (Song 34:8, 9) Ol i pas gut wantaim Jehova na pret long em, olsem na ol i no sot long wanpela samting.
4. Devit na Jisas i mekim wanem gutpela tok?
4 Long taim bilong Devit, Devit i kolim ol lain bilong em olsem “ol manmeri bilong Bikpela.” Ol i insait long lain holi bilong God. Ol lain i bihainim Devit inap lusim laip bilong ol long bihainim em. Ol i bin ranawe long King Sol, tasol Devit i bilip strong olsem Jehova bai lukautim ol long ol samting ol i mas i gat. Devit i tok: “Ol yangpela laion i save sot long abus na ol i hangre. Tasol ol manmeri i bihainim Bikpela ol i no save sot long ol gutpela samting.” (Song 34:10) Jisas i mekim wankain gutpela tok long ol disaipel bilong em.—Matyu 6:33.
5. (a) Jisas i bin kisim planti disaipel bilong em namel long wanem kain man? (b) Jisas i tok wanem long ol samting bilong pasin bilong pret?
5 Planti Juda i harim tok bilong Jisas, ol i man nating i no gat nem. Jisas i “sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Bai ol i strongim bel na bihainim Jisas? Bilong mekim olsem, ol i mas kisim pasin bilong pret long Jehova, na no ken pret long ol man. Jisas i tok: “Yupela i no ken pret long ol man i save kilim i dai bodi tasol, na bihain ol i no inap mekim wanpela samting moa. Tasol mi laik tok klia long yupela long yupela i mas pret long husat tru. Yupela i mas pret long God. Taim God i kilim man i dai, orait em i gat strong bilong tromoi dispela man i go long hel [“Gehena,” NW]. Mi tokim yupela stret, yupela i mas pret long God. Yupela i save, ol man i save baim 5-pela liklik pisin long 2 toea tasol. Na God i no save lusim tingting long wanpela bilong ol dispela liklik pisin. . . . Olsem na yupela i no ken pret. Yupela i winim planti lain liklik pisin.”—Luk 12:4-7.
6. (a) Wanem tok bilong Jisas i bin strongim ol Kristen? (b) Olsem wanem Jisas i stap nambawan gutpela piksa long pasin bilong pret long God?
6 Ol man i pret long Jehova i ken tingim tok bilong Jisas taim ol birua i strong long ol i mas lusim wok bilong God. Jisas i tok: “Sapos man i tokim ol manmeri olsem em i stap long lain bilong mi, orait Pikinini Bilong Man em tu bai i tokim ol ensel bilong God olsem dispela man em i man bilong em yet. Tasol man i tokim ol manmeri olsem em i no man bilong lain bilong mi, mi tu bai mi tokim ol ensel bilong God olsem em i no bilong mi.” (Luk 12:8, 9) Dispela tok i bin strongim ol Kristen, na moa yet ol Kristen long ol kantri we gavman i tambuim lotu i tru. Ol i bihainim savepasin na litimapim yet nem bilong Jehova long ol miting Kristen na long wok autim tok. (Aposel 5:29) Jisas i stap nambawan gutpela piksa long pasin bilong “pret long God.” (Hibru 5:7, NW) Baibel i tok profet long em olsem: “Spirit bilong Bikpela bai i kam i stap long em na . . . em bai i stap aninit [“pret,” NW] long Bikpela, na dispela pasin bai i mekim em i amamas moa yet.” (Aisaia 11:2, 3) Olsem na Jisas inap tru long skulim yumi long olsem wanem pasin bilong pret long God inap helpim yumi.
7. (a) Ol Kristen i ken mekim wanem na i olsem ol i bihainim wanpela singaut i wankain olsem singaut bilong Devit? (b) Olsem wanem ol papamama i ken bihainim gutpela pasin bilong Devit?
7 Olgeta man husat i bihainim pasin bilong Jisas na bihainim ol tok bilong em, i olsem ol i bihainim wanpela singaut i kain olsem dispela singaut bilong Devit: “Ol pikinini, yupela i mas i kam na putim yau gut long tok bilong mi. Mi laik skulim yupela na bai yupela i stap aninit [“pret,” NW] long God oltaim.” (Song 34:11) I stret Devit i kolim ol lain bilong em olsem “ol pikinini” bilong em, long wanem, ol i tingim em olsem lida bilong ol. Devit i skulim ol long pasin bilong pret long God na bai ol inap stap wanbel wantaim na God i ken orait long ol. Devit i stap gutpela piksa tru bilong ol papamama Kristen i ken bihainim! Jehova i bin givim namba long ol long “stretim gut ol pikinini bilong [ol] na skulim ol long tok bilong Bikpela.” (Efesus 6:4) Long rot bilong toktok wantaim ol pikinini long ol tok bilong God long olgeta de na stadi wantaim ol long Baibel, ol papamama i save helpim ol long pret long Jehova na amamas long laip bilong ol.—Lo 6:6, 7.
Bihainim Pasin Bilong Pret Long God
8, 9. (a) Olsem wanem pasin bilong pret long God em i gutpela samting? (b) Bilong abrusim pasin bilong mekim tok nogut, yumi mas mekim wanem?
8 Olsem yumi tok pinis, pasin bilong pret long Jehova i no pasim yumi long kisim amamas. Devit i askim: “Yu laik bai laip bilong yu i kamap gutpela? Na yu laik bai yu stap laip longtaim tru, na yu stap gut na amamas?” (Song 34:12) I klia tru olsem pasin bilong pret long Jehova em i rot bilong stap laip longtaim tru na stap gut na amamas. Em i isi long tok, “Mi pret long God,” tasol i hatwok moa long bihainim. Olsem na Devit i stori gut long olsem wanem yumi ken bihainim pasin bilong pret long God.
9 “Sapos yu laik i stap olsem, orait yu no ken mekim tok nogut, na yu no ken tok giaman.” (Song 34:13) Aposel Pita i kamapim dispela tok bilong Song 34 taim em i tokim ol Kristen long ol i mas laikim tru ol wanbilip. (1 Pita 3:8-12) Bilong abrusim pasin bilong mekim tok nogut, yumi no ken tok baksait long narapela. Yumi mas wok strong oltaim long mekim gutpela tok bilong strongim ol narapela. Yumi mas strongim bel na mekim tok tru tasol.—Efesus 4:25, 29, 31; Jems 5:16.
10. (a) Stori long olsem wanem yumi inap givim baksait long pasin nogut. (b) Kolim sampela samting yumi ken mekim bilong bihainim gutpela pasin.
10 “Yu mas givim baksait long pasin nogut, na bihainim gutpela pasin tasol. Yu mas wok long kamap wanbel wantaim ol arapela manmeri na yu mas strong long bihainim dispela pasin.” (Song 34:14) Yumi save givim baksait long ol samting God i no orait long en, olsem pasin pamuk, lukim ponografi, pasin stil, marila posin samting, pait na bagarapim man, dring spak, na kisim drak. Na yumi save sakim ol amamas i save kamapim kain pasin olsem. (Efesus 5:10-12) Yumi yusim taim bilong yumi long mekim gutpela pasin tasol. Nambawan gutpela wok yumi inap mekim em wok bilong autim tok bilong Kingdom na kamapim ol disaipel na helpim ol man long kisim laip. (Matyu 24:14; 28:19, 20) Na yumi mekim gutpela pasin taim yumi redim na go long ol miting Kristen, givim mani bilong helpim wok bilong yumi long olgeta hap, stretim ol samting long Haus Kingdom bilong yumi, na helpim ol Kristen i sot long ol samting.
11. (a) Olsem wanem Devit i bihainim ol tok em i bin mekim long kamap wanbel wantaim ol narapela? (b) Yu ken mekim wanem bilong “kamap wanbel” wantaim ol narapela long kongrigesen?
11 Devit i stap gutpela piksa tru long pasin bilong stap wanbel wantaim ol narapela. Inap tupela taim em i gat rot long kilim i dai Sol, tasol em i no mekim. Bihain em i toktok wantaim king long pasin rispek; em i laik kamap wanbel gen wantaim em. (1 Samuel 24:8-11; 26:17-20) Yumi long nau i ken mekim wanem sapos samting i kamap na i laik bagarapim pasin wanbel bilong kongrigesen? Yumi mas “wok long kamap wanbel wantaim ol arapela manmeri na mas strong long bihainim dispela pasin.” Olsem na sapos yumi pilim olsem hevi o kros i stap namel long yumi na wanpela wanbilip, yumi save bihainim dispela tok bilong Jisas: “Go pastaim na stretim tok wantaim brata bilong yu.” Stretim pinis, orait nau yu ken kirap mekim gen ol narapela wok bilong lotu i tru.—Matyu 5:23, 24; Efesus 4:26.
Pasin Bilong Pret Long God i Gat Gutpela Pe Bilong En
12, 13. (a) Ol man i pret long God i save kisim wanem ol gutpela samting long nau? (b) Klostu nau ol man i lotu tru long God bai kisim wanem gutpela pe?
12 “Bikpela i save lukautim ol stretpela manmeri, na em i save harim beten bilong ol.” (Song 34:15) Ol samting God i mekim long Devit i kamapim klia olsem dispela tok em i tru. Long nau, yumi save kisim bikpela amamas na bel isi, long wanem, yumi save olsem Jehova i was long yumi. Yumi bilip olsem long olgeta taim, na long taim bilong bikpela hevi tu, em bai givim yumi ol samting yumi mas i gat. Yumi save olsem klostu nau, olsem Baibel i bin tok profet long en, Gok Bilong Magok bai mekim pait long olgeta manmeri i lotu tru long God na “De bilong Bikpela” bai kamap. (Joel 2:11, 31; Esekiel 38:14-18, 21-23) Long dispela taim, maski wanem wanem hevi i painim yumi, dispela tok bilong Devit bai kamap tru long yumi: “Ol stretpela manmeri i save beten long Bikpela na em i save harim ol. Em i save helpim ol na hevi i no daunim ol.”—Song 34:17.
13 Long dispela taim bai yumi amamas tru long lukim Jehova i litimapim nem bilong em! Bai yumi daun moa yet long em na pilim tru olsem em i bikpela man tru. Olgeta birua bai bagarap. “Bikpela i no save laikim ol manmeri nogut. Na bai em i kilim ol i dai na ol manmeri i no tingim ol gen.” (Song 34:16) Taim yumi abrusim dispela bagarap na go insait long nupela taim God bai kamapim i gat stretpela pasin i stap long en, dispela bai wanpela gutpela pe tru!
Sampela Promis Bilong Helpim Yumi Long Sanap Strong na Karim Hevi
14. Wanem samting bai helpim yumi long sanap strong, maski ol hevi i painim yumi?
14 Tasol long nau, bilong yumi ken bihainim yet tok bilong Jehova namel long ol man nogut, yumi mas kisim pasin bilong sanap strong na no ken les. Pasin bilong pret long God bai helpim yumi long bihainim tok bilong em. Yumi stap long taim bilong planti hevi nogut tru, olsem na sampela wokboi bilong Jehova i save kisim bikpela hevi i mekim bel bilong ol i bagarap na ol i no stap amamas. Tasol ol i ken bilip tru olsem sapos ol i wet long Jehova, em bai helpim ol long sanap strong. Tok bilong Devit i mekim gut bel bilong yumi: “God i save stap klostu long ol manmeri i gat hevi. Na em i save helpim ol manmeri bilip [“bel,” NW] bilong ol i bagarap.” (Song 34:18) Na Devit i tok moa: “Planti hevi i save kamap long stretpela man, tasol Bikpela i save helpim em na ol dispela hevi i no daunim em.” (Song 34:19) Maski planti hevi i painim yumi, Jehova i gat bikpela strong long helpim yumi.
15, 16. (a) Taim Devit i raitim pinis Song 34, em i kisim save long wanem hevi? (b) Wanem samting bai helpim yumi long sanap strong na karim hevi?
15 Bihain liklik long Devit i raitim Song 34, Devit i kisim save long bikpela hevi i bin kamap long taun Nop, taim Sol i kilim i dai olgeta manmeri bilong en na klostu olgeta pris. Ating bel bilong Devit i bagarap tru taim em i tingim bek olsem visit bilong em long Nop i bin kirapim Sol long bel nogut tru! (1 Samuel 22:13, 18-21) Yumi ken ting olsem Devit i bin beten askim Jehova long helpim em, na bilip bilong em olsem “ol stretpela man” bai kirap bek long bihain, dispela i bin mekim gut bel bilong em.—Aposel 24:15.
16 Long nau, bilip bilong kirap bek i strongim yumi tu. Yumi save olsem i no gat wanpela samting ol birua i mekim inap nogutim yumi inap long olgeta taim bihain. (Matyu 10:28) Devit i bilip olsem, em i tok: “Bikpela i save lukautim em olgeta [em stretpela man], na i no gat wanpela bun bilong en i bruk.” (Song 34:20) Dispela ves i bin kamap tru long Jisas. Ol i kilim em i dai, tasol i no gat wanpela bun bilong em i “bruk.” (Jon 19:36) Song 34:20 i strongim yumi tu long nau olsem maski wanem hevi i painim ol Kristen God i bin makim ol na “ol arapela sipsip,” dispela i no inap nogutim ol inap long olgeta taim bihain. I olsem ol bun bilong ol i no bruk.—Jon 10:16.
17. Wanem samting nogut bai painim ol man i birua long ol lain bilong Jehova na ol i no tanim bel?
17 Tasol narapela kain samting bai painim ol man nogut. Klostu nau ol bai kisim strafe long pasin nogut ol i bin mekim. “Ol kain kain samting nogut bai i kilim i dai ol man nogut. Na Bikpela bai i mekim save long ol man i save birua long ol stretpela man.” (Song 34:21) Olgeta husat i wok long birua yet long ol manmeri bilong God, samting nogut tru bai painim ol. Taim Jisas Krais i kamap ples klia, ol “bai i kisim pe nogut . . . Ol bai i bagarap i stap oltaim oltaim.”—2 Tesalonaika 1:9.
18. Olsem wanem yumi ken tok God i kisim bek pinis lain “planti manmeri tru”? Na wanem samting bai painim ol long bihain?
18 Devit i pinisim song bilong em long dispela gutpela tok: “God i save kisim bek ol wokman bilong en na ol i stap laip. Na olgeta manmeri i bilip long em i lukautim ol, bai ol i no inap lus. Nogat tru.” (Song 34:22) Klostu long pinis bilong 40 yia bilong Devit i stap king, em i tok: “[God] i bin helpim mi na i kisim bek mi long olgeta kain hevi.” (1 King 1:29) Olsem Devit, klostu nau ol man i pret long Jehova bai tingim ol samting i bin painim ol na amamas long God i bin kisim bek ol long olgeta hevi bilong ol na long ol asua bilong sin bilong ol. Nau long dispela taim, klostu olgeta Kristen God i bin makim ol i kisim pinis gutpela pe bilong ol long heven. “Planti manmeri tru” bilong olgeta lain i wok nau long bung wantaim ol brata bilong Jisas i stap yet long graun long mekim wok bilong God, na dispela i mekim na ol i stap klin long ai bilong Jehova. Dispela i olsem, long wanem, ol i bilip long strong bilong blut bilong Jisas long kisim bek ol. Long Taim Bilong Wan Tausen Yia Bilong Krais i Stap King, ofa bilong Krais bai helpim ol na ol bai kamap gutpela olgeta.—KTH 7:9, 14, 17; 21:3-5.
19. Olgeta wan wan bilong lain “planti manmeri tru” i tingting strong long mekim wanem?
19 Bilong wanem ol dispela blesing bai kam long lain “planti manmeri tru” i lotu long God? Long wanem, ol i tingting strong long bihainim yet pasin bilong pret na daun long Jehova, na bihainim tok bilong em. Tru tumas, pasin bilong pret long Jehova i helpim yumi long stap amamas long nau na i helpim yumi long holimpas “laip tru”—em laip i stap gut oltaim oltaim long nupela taim God bai kamapim.—1 Timoti 6:12, 18, 19; KTH 15:3, 4.
Yu Tingim Yet?
• Bilong wanem yumi mas pret long God? Pasin bilong pret long God i makim wanem samting?
• Pasin bilong pret long God i mas mekim wanem long pasin bilong yumi?
• Pasin bilong pret long God i save kamapim wanem gutpela pe?
• Wanem ol promis i helpim yumi long stap strong na karim hevi?
[Piksa long pes 26]
Ol man i pret long Jehova i save bihainim gutpela tingting taim ol birua i tambuim wok bilong ol
[Piksa long pes 28]
Nambawan gutpela wok yumi ken mekim bilong helpim ol narapela em wok bilong autim gutnius bilong Kingdom long ol