“Raun Long Solwara Long Taim Bilong Bikpela Win na Ren”

ATING kain taim olsem i no gutpela taim bilong raun long en na yu inap painim bagarap, a? Tasol long tok piksa i olsem sampela i bin putim ol yet insait long dispela kain taim nogut. Ol i mekim olsem wanem? Tomas Fuler, wanpela saveman i bin stap olsem 300 yia samting i go pinis, em i tok: “No ken mekim wanpela samting taim yu belhat yet. Em i olsem yu raun long solwara long taim bilong bikpela win na ren.”

Taim man i belhat yet na em i laik mekim wanpela samting, bikpela hevi inap kamap long dispela. Wanpela stori bilong Baibel i kamapim klia dispela samting. Simeon na Livai, tupela pikinini bilong Jekop, tupela i belhat taim wanpela man i bagarapim Daina na tupela i kirap wantu tasol na kamapim belhat bilong tupela. Em nau, tupela i kilim i dai ol man na bagarapim na stilim planti samting. Olsem na Jekop i no amamas long pasin nogut bilong tupela na em i tok: “Yupela i givim bikpela hevi long mi. Olgeta manmeri long dispela hap, em ol Kenan na ol Peres, ol bai i lukim mi olsem man nogut tru.”​—⁠Stat 34:​25-​30.

Gutpela savetok bilong Baibel i tokim yumi long bihainim narapela pasin. Em i tok: “Yu no ken kros, na yu mas lusim pasin bilong belhat. . . . Dispela pasin em inap pulim yu long mekim pasin nogut.” (Song 37:⁠8) Sapos yumi bihainim dispela gutpela tok, dispela bai helpim yumi na yumi no inap mekim ol bikpela rong.​—⁠Saveman 10:4; lukim tu Sindaun 22:​24, 25.