Bikpela Haus Spirit Bilong Jehova
“Yumi gat dispela kain gutpela hetpris i stap, . . . em i mekim wok pris long haus bilong God long heven, em haus tru bilong God. Dispela haus ol man i no bin sanapim. Nogat. Bikpela yet i bin sanapim.”—HIBRU 8:1, 2.
GOD JEHOVA i laikim tumas ol manmeri bilong graun, olsem na em i givim wanpela ofa bilong tekewe sin bilong ol. (Jon 1:29; 3:16) Bilong mekim olsem, em i mas kisim laip bilong namba wan Pikinini bilong em long heven na putim long bel bilong wanpela nupela meri Juda, nem bilong em Maria. Ensel bilong Jehova i tokaut klia long Maria olsem dispela pikinini bai kamap long bel bilong em ol bai “kolim em Pikinini Bilong God.” (Luk 1:34, 35) Ensel i tokim pinis Josep, em man bilong maritim Maria, long Jisas i bin kamap long bel bilong Maria long rot bilong wanpela mirakel, na Josep i kisim save olsem dispela pikinini “bai i tekewe sin bilong ol manmeri bilong en na kisim bek ol.”—Matyu 1:20, 21.
2 Taim Jisas i wok long i go bikpela, ating em i save long sampela samting bilong dispela mirakel, olsem wanpela meri bilong graun i bin karim em. Em i save, Papa bilong em long heven i laik bai em i mekim wanpela bikpela wok long graun bilong helpim ol man long kisim laip oltaim. Olsem na taim Jisas i bikpela man pinis na em i gat olsem 30 krismas, em i kam long profet bilong God, em Jon, bilong kisim baptais long wara Jordan.—Mak 1:9; Luk 3:23.
3 Taim Jisas i kisim baptais, em i wok long beten. (Luk 3:21) Yumi ken ting, kirap long dispela taim, em i truim tok bilong Song 40:6-8, olsem bihain aposel Pol i bin makim, em i tok: “Yu no laik bai ol i kilim abus na mekim ofa. Tasol yu bin redim wanpela bodi bilong givim long mi.” (Hibru 10:5) Olsem na Jisas i kamapim klia olsem em i save God i “no laik” moa long ol i kilim ol animal bilong mekim ofa long haus bilong God long Jerusalem. Jisas i save, God i bin redim wanpela bodi bilong Jisas i nambawan olgeta, bilong givim olsem ofa. Taim em i mekim olsem, bai i no gat wok moa long kilim ol animal na wokim ofa. Jisas i laik tumas long bihainim laik bilong God, olsem na em i beten moa olsem: “God, mi kam pinis. Olsem bipo ol i raitim tok long mi long buk. Nau mi kam pinis bilong bihainim laik bilong yu.” (Hibru 10:7) Long dispela de bilong kisim baptais, Jisas i stap olsem gutpela piksa tru bilong man i gat strongpela bel na i givim bel olgeta long Jehova, na em i makim pasin ol man bihain bai i kamap disaipel bilong em ol i ken bihainim!—Mak 8:34.
4 Olsem wanem? God i soim olsem em i orait long beten Jisas i mekim taim em i kisim baptais? Yumi ken larim wanpela aposel bilong Jisas i bekim dispela askim: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela bilong ol dispela kain pisin ol i kolim balus, na i kam i stap long em. Na long heven wanpela maus i singaut olsem, ‘Dispela em i Pikinini bilong mi. Mi laikim em tumas. Bel bilong mi em i amamas long em.’ ”—Matyu 3:16, 17; Luk 3:21, 22.
5 God i orait long Jisas i laik givim skin bilong em long God olsem ofa, na dispela i makim olsem: Long ol samting bilong spirit i gat wanpela alta i kamap pinis na em i winim tru dispela alta i stap insait long haus bilong God long Jerusalem. Alta tru long graun, em ol i bin putim ol animal long en bilong wokim ofa, em i olsem piksa na i makim dispela alta bilong spirit, na dispela i olsem “laik” bilong God o rot God i wokim bilong em i ken orait long Jisas i givim skin bilong em olsem ofa. (Hibru 10:10) Long dispela as, aposel Pol i tokim ol wanwok Kristen olsem: “Yumi gat alta i stap, na ol pris i save mekim wok long haus lotu sel, ol i no inap kisim kaikai long dispela alta.” (Hibru 13:10) I olsem: I gat wanpela ofa bilong tekewe sin i win tru na i helpim ol Kristen tru, tasol planti pris Juda i sakim dispela ofa.
6 Taim God i kapsaitim spirit holi long Jisas, dispela i makim olsem nau God i kamapim wanpela samting i olsem haus bilong em bilong spirit, na Jisas i stap Hetpris bilong en. (Aposel 10:38; Hibru 5:5) Spirit holi i kirapim disaipel Luk long makim stret yia bilong dispela bikpela samting i kamap, olsem “long namba 15 yia bilong Sisar Taiberius i stap king.” (Luk 3:1-3) Dispela em yia 29 C.E.—em 69 taims 7-pela yia stret, olsem 483 yia, kirap long taim King Artaserksis i bin putim tok long wokim gen banis bilong Jerusalem. (Nehemia 2:1, 5-8) Tok profet i tok, “dispela bikman God i bin makim” em bai kamap long dispela yia Baibel i tok profet long en. (Daniel 9:25) Planti Juda i save long dispela samting. Olsem Luk i tok, ol manmeri i wok long wetim Mesaia, olsem Krais, i kamap; tupela biknem hia i kam long sampela tok Hibru na tok Grik i gat wankain insait bilong en, olsem “man God i makim.”—Luk 3:15.
7 Long taim Jisas i kisim baptais, God i makim ples bilong Em yet long heven olsem “ples tambu tru” insait long bikpela haus bilong em bilong spirit. (Daniel 9:24) “Dispela haus . . . Bikpela yet i bin sanapim” na “ol man i no bin sanapim,” em i kirap pinis long mekim wok. (Hibru 8:2) Na tu, taim dispela man Krais Jisas i kisim baptais long wara na long spirit holi, em i kamap nupela gen olsem wanpela Pikinini bilong God long spirit. (Skelim wantaim Jon 3:3.) Dispela i makim olsem bihain God bai singautim Pikinini bilong em i go bek long heven, na em bai i stap long han sut bilong Papa bilong em na mekim wok olsem King na Hetpris “wankain olsem Melkisedek, na em bai i stap hetpris oltaim oltaim.”—Hibru 6:20; Song 110:1, 4.
Rum Tambu Tru Long Heven
8 Long de Jisas i kisim baptais, i gat sampela nupela samting i kamap long sia king bilong God long heven. God i bin makim wanpela man i nambawan olgeta bilong kamap olsem ofa bilong tekewe sin bilong ol man bilong graun, na dispela i kamapim klia pasin holi bilong God, i narapela kain long pasin bilong ol man bilong mekim sin. Na marimari bilong God tu i kamap ples klia, long wanem, nau God i orait long ol man i ken kamap wanbel wantaim em. Olsem na nau sia king bilong God long heven i kamap olsem Rum Tambu Tru long haus bilong God, em hetpris i save karim blut bilong animal i go insait long en wanpela taim long olgeta yia bilong tekewe sin bilong ol man, olsem piksa bilong samting tru bai kamap bihain.
9 Laplap i stap olsem banis namel long Rum Tambu na Rum Tambu Tru i makim skin bilong Jisas, em skin bilong graun. (Hibru 10:19, 20) Dispela skin bilong Jisas i olsem banis i pasim em na em i no inap i go insait long heven na kamap long Papa bilong em taim em i stap man long graun. (1 Korin 15:50) Taim Jisas i dai, “dispela bikpela laplap i hangamap i stap insait long tempel em i bruk long antap i go inap long daunbilo bilong en, na i kamap tupela hap.” (Matyu 27:51) Dispela i makim klia olsem dispela banis i bin pasim Jisas na em i no inap i go insait long heven, nau em i tekewe pinis. Tripela de bihain, God Jehova i wokim wanpela bikpela mirakel tru. Em i kirapim bek Jisas long matmat, tasol Jisas i no kisim skin bilong man bilong graun, nogat; Jehova i kirapim em bek olsem wanpela spirit i gat bikpela namba, na em “i stap oltaim oltaim.” (Hibru 7:24) Foti de bihain, Jisas i go antap long heven na em i go insait long “Rum Tambu Tru,” na “em i stap klostu tru long God, na em i wok long helpim yumi.”—Hibru 9:24.
10 Olsem wanem? God i orait long pe bilong blut bilong Jisas i bin kapsait bilong tekewe sin bilong ol man bilong graun? Tru tumas, God i orait long en. Dispela samting i kamap ples klia inap 50 de bihain long taim Jisas i kirap bek long matmat, long bikpela de bilong Pentikos. Spirit holi bilong God i kam daun long 120 disaipel bilong Jisas ol i bung wantaim long Jerusalem. (Aposel 2:1, 4, 33) Olsem God i bin makim Hetpris bilong ol, em Krais Jisas, nau Em i makim ol tu bilong mekim wok olsem “lain pris” bilong givim ol ofa bilong spirit long God long bikpela haus spirit bilong God. (1 Pita 2:5) Na tu, dispela lain God i bin makim ol i kamap wanpela nupela lain, olsem “lain manmeri i holi,” em ol Israel bilong spirit. Kirap long dispela taim, olgeta tok profet long ol gutpela samting bilong Israel, olsem tok promis bilong “nupela kontrak” i stap long Jeremaia 31:31, ol i bilong kamap tru long lain Kristen God i bin makim, em ol “Israel tru bilong God.”—1 Pita 2:9; Galesia 6:16.
Ol Narapela Samting Bilong Haus Spirit Bilong God
11 Dispela Rum Tambu Tru i olsem piksa bilong makim “heven stret,” em ples God i stap long en long sia king, tasol olgeta narapela samting bilong haus spirit bilong God i olsem ol samting i stap long graun. (Hibru 9:24) Long haus bilong God long Jerusalem, i gat wanpela ples bung insait tru long banis bilong en, em bilong ol pris, na i gat wanpela alta bilong putim ol animal long en bilong wokim ofa, na wanpela traipela dis i gat wara, em ol pris i save mekim wok long en bilong wasim skin bilong ol taim ol i laik mekim wok holi bilong ol. Ol dispela samting i olsem piksa bilong wanem ol samting insait long haus spirit bilong God long heven?
12 Long ol samting bilong Krais Jisas, dispela ples ol pris i mekim wok long en insait tru long banis, i makim em i no gat sin taim em i stap Pikinini bilong God long graun, i nambawan olgeta. Ol disaipel bilong Krais em God i bin makim ol, ol i bilip long ofa bilong Jisas, na long dispela rot God i kolim ol stretpela man. Long dispela as, i stret God inap mekim ol samting long ol olsem ol i no gat sin. (Rom 5:1; 8:1, 33) Olsem na dispela ples insait tru long banis i makim tu olsem olgeta wan wan bilong dispela lain pris holi ol i stap olsem stretpela man long ai bilong God taim ol i stap yet long graun. Tasol ol Kristen God i bin makim, ol i stap yet olsem ol man i no gutpela olgeta, na ol inap mekim sin. Dis i gat wara em i makim Tok Bilong God, em Baibel, na Hetpris i mekim wok long en bambai lain pris holi ol i ken wok long kamap klin. Ol i larim Tok Bilong God i helpim ol long kamap klin, olsem na ol i kamap olsem klin tru na dispela i givim biknem long God na i pulim ol man bilong ausait i kam long klinpela lotu bilong em.—Efesus 5:25, 26; skelim wantaim Malakai 3:1-3.
Rum Tambu
13 Namba wan rum long haus bilong God i makim samting i winim ples bung i stap ausait. Long ol samting bilong Krais Jisas taim em i stap man long graun i nambawan olgeta, dispela rum i olsem piksa na i makim Jisas i kamap nupela gen olsem Pikinini bilong God long spirit na em i bilong i go bek long heven. Lain bilong Jisas em God i bin makim, taim ol i bilip pinis long blut bilong Krais i kapsait pinis, na God i kolim ol pinis olsem stretpela man, nau spirit holi bilong God i mekim wankain bikpela wok long ol tu olsem em i mekim long Jisas. (Rom 8:14-17) Long rot bilong “wara [olsem baptais bilong ol] na long Holi Spirit,” ol i “kamap nupela gen” olsem ol pikinini bilong God long spirit. Olsem na ol inap wet long kirap bek long matmat na i go antap long heven na i stap pikinini spirit bilong God, sapos ol i stap gut long God i go inap long taim ol i dai.—Jon 3:5, 7; KTH 2:10.
14 Taim ol pris i mekim wok insait long Rum Tambu long haus bilong God long graun, ol man i stap ausait na lotuim God ol i no inap lukim ol. Na i wankain tu long ol Kristen em God i bin makim—ol i stap narapela kain long ol samting bilong spirit, na klostu olgeta manmeri i lotuim God, em ol i gat tingting long i stap oltaim long Paradais long graun, ol i no olsem, na ol i no inap save tru long dispela samting. Stik lam gol i stap insait long haus sel i makim gutpela save bilong Baibel ol dispela Kristen i kisim, em ol lain God i bin makim ol. Spirit holi bilong God i mekim wok olsem wel i stap long ol lam—em i givim lait, olsem save bilong Baibel, long ol. Ol dispela save ol Kristen i kisim long dispela rot, ol i no holim i stap bilong ol yet, nogat. Ol i bihainim tok bilong Jisas, em i tok: “Yupela i olsem lait bilong graun. . . . Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.”—Matyu 5:14, 16.
15 Bilong i stap olsem, na bilong kisim yet dispela lait o save bilong Baibel, ol Kristen God i bin makim ol i mas kaikai long olgeta taim long samting dispela bret long tebol i makim, em bret ol i save givim long God. Nambawan rot bilong ol long kisim kaikai bilong spirit, em Baibel, na long olgeta de ol i wok strong long kaunim na tingim tingim ol dispela tok. Na Jisas i tok promis long givim “kaikai long ol long taim bikman i makim,” long rot bilong “wokboi i gat gutpela tingting.” (Matyu 24:45) Dispela “wokboi” em olgeta Kristen wantaim em God i bin makim ol long spirit holi na ol i stap long graun, maski ol i stap long wanem wanem taim. Krais i bin mekim wok long dispela lain Kristen long wokim ol buk na nius samting i tokaut long truim bilong ol tok profet, na bilong soim rot long ol man long olsem wanem ol i ken bihainim ol lo bilong Baibel long olgeta wan wan de nau long taim bilong yumi. Olsem na ol Kristen God i bin makim, ol i amamas long kisim ol dispela kaikai bilong spirit. Tasol bilong i stap strong long ol samting bilong spirit, ol i no ken wok tasol long kisim save bilong God na putim long tingting na bel bilong ol. I gat narapela samting tu ol i mas mekim. Jisas i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Na ol dispela Kristen God i bin makim, bel bilong ol tu i gutpela taim ol i wok long olgeta de long bihainim laik bilong God em i kamapim long ples klia pinis.
16 Long olgeta moningtaim na apinun tru, wanpela pris i wokim smok i gat gutpela smel bilong givim long God olsem ofa long alta bilong kamapim smok i gat gutpela smel, i stap insait long Rum Tambu. Taim pris i mekim olsem, ol manmeri i no bilong lain pris ol i sanap long ples bung bilong haus bilong God i stap ausait na ol i beten long God. (Luk 1:8-10) Baibel i tok klia olsem: “Smok i gat gutpela smel . . . em i makim ol beten bilong ol manmeri bilong God.” (KTH 5:8) Devit, em man bilong raitim Song, em i tok: “Mi laik yu kisim prea bilong mi olsem smok i gat gutpela smel i go long yu.” (Song 141:2) Na ol Kristen God i bin makim, ol tu i amamas tru long ol inap beten long Jehova long rot bilong Krais Jisas. Taim bel bilong man i kirapim em long beten strong, dispela beten i olsem smok i gat gutpela smel. Na ol Kristen God i bin makim, ol i save litimapim nem bilong God long ol narapela rot tu—ol i mekim wok long maus bilong ol long skulim ol man. Ol i sanap strong long taim bilong hevi, na ol i holimpas bilip na stap gut long God taim ol man i mekim nogut long ol, na God i amamas long dispela pasin bilong ol.—1 Pita 2:20, 21.
17 Long Bikpela De Bilong God i Tekewe Sin Bilong Ol Manmeri, hetpris bilong Israel i mas i go insait long Rum Tambu Tru na kukim paura long wanpela plet gol i gat paia long en bilong kamapim smok i gat gutpela smel. Em i mas mekim olsem paslain long taim em i karim blut bilong ofa bilong tekewe sin i kam insait. Dispela samting em i mekim i olsem piksa bilong samting i mas kamap bihain, na long truim bilong en, dispela man Jisas em i stap gut olgeta long God Jehova paslain long taim em i givim laip bilong em olsem wanpela ofa tasol bilong tekewe sin bilong yumi inap oltaim oltaim. Olsem na em i kamapim klia olsem man i gutpela olgeta em inap holimpas bilip na stap gut long God, maski wanem hevi Satan i putim long em. (Sindaun 27:11) Taim traim i painim Jisas, em i save beten strong long God, na em i “singaut strong na i krai planti. Em i save . . . aninit long God, olsem na God i harim beten bilong em.” (Hibru 5:7) Long dispela pasin em i givim biknem long Jehova, em i stretpela King bilong heven na graun na i stret tru long em i stap King. God i givim gutpela pe long Jisas—em i kirapim bek Jisas long matmat na em i go antap long heven na i stap laip oltaim oltaim, i no inap dai moa. Jisas i holim bikpela namba long heven na nau em inap tingim nambatu as na em i bin i kam long graun, olsem bilong helpim ol sinman bilong graun i bin tanim bel na bai ol i ken kamap wanbel gen wantaim God.—Hibru 4:14-16.
Haus Spirit Bilong God i Gutpela Moa
18 Jehova i tok profet olsem: “Dispela nupela haus bai i kamap gutpela moa na bai i winim olpela haus.” (Hagai 2:9, NW) Taim Jehova i kirapim bek Jisas olsem King na Hetpris i no inap i dai, dispela i kamapim biknem tru long haus spirit bilong Jehova na em i kamap gutpela moa yet. Nau Jisas inap “kisim bek olgeta manmeri i bihainim tok bilong em, bai ol i stap gut oltaim oltaim.” (Hibru 5:9) Namba wan lain bilong bihainim tok bilong Jisas em 120 disaipel ol i bin kisim spirit holi long Pentikos bilong yia 33 C.E. Buk Kamapim Tok Hait long Baibel i tok profet olsem bihain ol dispela Israel bilong spirit bai inap olsem 144,000. (KTH 7:4) Taim ol i dai, planti bilong ol i bin slip long matmat na wetim taim Jisas i stap pinis olsem King. Tok profet bilong ol yia i stap long Daniel 4:10-17, 20-27 i makim yia 1914 em taim bilong Jisas long kirap mekim wok king namel long ol birua bilong em. (Song 110:2) Planti yia paslain long dispela taim, ol Kristen God i bin makim ol i wetim dispela yia. Namba wan pait bilong olgeta hap na ol bikpela hevi i kamap long graun bihain long en i kamapim klia olsem Jisas i kamap King pinis long 1914. (Matyu 24:3, 7, 8) Bihain liklik long en, taim i kamap bilong “God i kirapim kot long . . . lain bilong em yet,” na nau Jisas bai truim promis em i bin mekim long ol disaipel em God i bin makim ol na ol i dai pinis na i slip long matmat: “Bai mi kam bek na kisim yupela i go i stap wantaim mi.”—1 Pita 4:17; Jon 14:3.
19 Ol 144,000 bilong lain pris holi, God i no putim mak yet long olgeta bilong ol na kisim ol i go long ples bilong ol long heven, nogat. Liklik hap lain bilong ol i stap yet long graun, na dispela Rum Tambu i olsem piksa na i makim i stap bilong ol long ol samting bilong spirit long nau—ol i stap yet long skin bilong graun na dispela i olsem wanpela “laplap,” olsem banis, i pasim rot bilong ol na ol i no inap i go insait long heven na kamap long God. Taim ol i dai na ol i bin i stap gut long God, wantu tasol ol i kirap bek na kamap spirit i no inap i dai moa, na ol i go bung wantaim ol narapela bilong lain 144,000 ol i stap pinis long heven.—1 Korin 15:51-53.
20 Em nau, bai i gat planti pris i wok wantaim bikpela Hetpris long heven, olsem na haus spirit bilong God i kamap gutpela moa yet. Tasol nau liklik hap lain pris holi ol i mekim wanpela bikpela wok tru hia long graun. Long wok bilong ol long autim tok, God i “seksekim olgeta lain man” long tok bilong em long kot bai painim ol, olsem tok profet bilong Hagai 2:7 i tok. Na long dispela taim yet, “ol gutpela samting bilong olgeta lain” ol i wok long kam insait long banis bilong haus bilong Jehova long ples bung bilong en, em i stap long graun. Orait, taim yumi tingim samting Jehova i bin putim bilong lotuim em, yumi laik save, olsem wanem long dispela lain nau i wok long kam insait? Na bihain dispela bikpela haus spirit bilong God bai kisim biknem na kamap gutpela moa yet o olsem wanem? Bai yumi skelim ol dispela askim long stori i kamap bihain long dispela.
Ol Askim Bilong Tingim Gen
◻ Long yia 29 C.E. Jisas i mekim wanem na em i stap olsem nambawan gutpela piksa?
◻ Wanem nupela samting God i putim na i kirap mekim wok long yia 29 C.E.?
◻ Rum Tambu na Rum Tambu Tru i makim wanem samting?
◻ Olsem wanem bikpela haus spirit bilong God i kamap gutpela moa yet?
[Askim Bilong Stadi]
1. God i mekim wanem pasin sori bilong helpim ol sinman bilong graun?
2. Taim Jisas i gat olsem 30 krismas, em i mekim wanem? Bilong wanem em i mekim olsem?
3. (a) Wanem insait bilong tok bilong Jisas, em i tok, “Yu no laik bai ol i kilim abus na mekim ofa”? (b) Jisas i mekim wanem na em i stap nambawan gutpela piksa bilong olgeta man i laik kamap disaipel bilong em?
4. God i mekim wanem na i kamapim klia olsem em i orait long Jisas i ofaim skin bilong em yet?
5. Alta i stap long haus bilong God long graun, dispela i makim wanem samting?
6. (a) Taim Jisas i kisim baptais, wanem samting i kamap long dispela taim? (b) Wanem insait bilong dispela biknem olsem Mesaia, o Krais?
7. (a) Wanem taim God i makim ples bilong em yet olsem “ples tambu tru”? Olsem na wanem samting i kamap? (b) Wanem samting moa i painim Jisas taim em i kisim baptais?
8. Nau wanem ol nupela samting i kamap long sia king bilong God long heven?
9. (a) Laplap i stap olsem banis namel long Rum Tambu na Rum Tambu Tru i makim wanem samting? (b) Olsem wanem Jisas inap abrusim laplap long haus spirit bilong God na go insait tru?
10. (a) Taim Jisas i givim pinis pe bilong ofa bilong em long Papa bilong em long heven, wanem samting i kamap? (b) Taim God i makim ol disaipel bilong Krais long spirit holi, dispela i mekim wanem long ol?
11, 12. (a) Long ol samting bilong Jisas, ples bung bilong ol pris i makim wanem samting? Na long ol samting bilong lain bilong Jisas em God i bin makim ol, dispela ples bung bilong ol pris i makim wanem samting? (b) Dis i gat wara em i makim wanem samting? Ol i mekim wanem wok long en?
13, 14. (a) Long ol samting bilong Jisas na ol disaipel em God i bin makim, Rum Holi long haus bilong God i makim wanem samting? (b) Stik lam gol i makim wanem samting?
15. Bret i stap long tebol na i bilong givim long God, em i makim wanem samting?
16. Wok ol i mekim long alta bilong kamapim smok i gat gutpela smel, dispela i makim wanem samting?
17. Namba wan taim hetpris i go insait long Rum Tambu Tru long Bikpela De Bilong God i Tekewe Sin Bilong Ol Manmeri, wanem samting i insait long truim bilong dispela piksa?
18. Olsem wanem Jehova i kamapim biknem moa yet long haus spirit bilong em?
19. Olsem wanem hap lain bilong 144,000 i stap yet long graun ol inap i go insait long Rum Tambu Tru long heven?
20. Hap lain bilong ol pris holi i stap yet long graun, ol i mekim wanem bikpela wok nau long dispela taim? Wanem samting i kamap long wok bilong ol?
[Piksa long pes 17]
Taim God i makim Jisas long spirit holi long yia 29 C.E., bikpela haus spirit bilong God i kirap mekim wok