Bilong Wanem Yumi Mas Holimpas Stretpela Pasin?

“Bikpela, . . . helpim mi long winim kot, long wanem, mi bin mekim ol gutpela na stretpela pasin tasol.”​​—SNG. 7:8.

1, 2. Long wanem taim i hatwok long ol Kristen long holimpas stretpela pasin?

TINGIM tripela samting i kamap: Sampela wanskul i tok bilas long wanpela mangi. Ol i traim long skrapim bel bilong em na bai em i belhat, na tok swea long ol o pait wantaim ol. Olsem wanem? Em bai bekim pasin nogut long ol, o em bai bosim gut bel na lusim ol? Wanpela man marit i stap wanpis long haus na em i mekim sampela wok painimaut long Intenet. Wanpela tok i kamap long kompiuta bilong em, na toksave long wanpela Web-sait i soim ol piksa bilong ponografi. Olsem wanem? Em bai lukluk long dispela Web-sait, o em bai abrusim? Wanpela meri Kristen i toktok wantaim sampela sista na ol i kirap mekim tok baksait long wanpela sista long kongrigesen. Olsem wanem? Em bai insait long dispela tok, o em bai traim long senisim toktok?

² Yumi stori long ol narapela narapela samting, tasol dispela tripela stori i gat wanpela samting i wankain. Long tripela samting ol Kristen i mas wok strong long holimpas stretpela pasin. Yu save tingting long holimpas stretpela pasin bilong yu long ol samting yu tingting planti long en, ol samting yu sot long en, na ol mak yu laik winim long laip bilong yu? Long olgeta de ol man i save tingim lukluk na helt bilong ol, wok mani bilong lukautim ol, ol hevi na amamas inap kamap wantaim ol pren bilong ol, na ating pasin pren namel long man na meri. Ating yumi save tingim tru ol dispela samting. Tasol Jehova i save tingim wanem samting taim em i skelim bel bilong yumi? (Sng. 139:​23, 24) Em stretpela pasin bilong yumi.

 3. Jehova i larim yumi long makim wanem samting? Bai yumi skelim wanem samting long dispela stadi?

³ Jehova, Man Bilong Givim ‘ol presen i gutpela tru,’ em i bin givim yumi olgeta wan wan planti gutpela presen. (Jem. 1:17) Sampela presen em i givim long yumi em bodi, tingting, helt, na kain kain save bilong mekim ol samting. (1 Ko. 4:7) Tasol Jehova i no subim yumi long mekim stretpela pasin. Em i larim yumi long makim olsem yumi laik kamapim dispela pasin o nogat. (Lo 30:19) Olsem na yumi mas skelim, stretpela pasin i makim wanem samting? Bai yumi skelim tu 3-pela as na dispela pasin i bikpela samting tru.

Stretpela Pasin i Makim Wanem Samting?

 4. Stretpela pasin i makim wanem samting? Lo bilong Jehova long ol ofa bilong animal inap lainim yumi long wanem samting?

⁴ Planti man i no kliagut long stretpela pasin i wanem samting. Olsem: Taim ol man politik i tok ol i man bilong mekim stretpela pasin, ol i laik tok olsem ol i man bilong tok tru tasol. Em i bikpela samting long tok tru, tasol dispela em i wanpela hap tasol bilong stretpela pasin. Long tok Hibru dispela tok ol i tanim long Baibel olsem “stretpela pasin” em inap makim olsem man i stap stret tru long olgeta pasin bilong em, samting i no gat bagarap long en, na i no gat asua. Baibel i save yusim wanpela bilong ol dispela tok long ol ofa ol man i givim long Jehova. Jehova i amamas long ofa bilong animal sapos ofa i gutpela tru, i no gat bagarap long en. (Ritim Wok Pris 22:​19, 20.) Jehova i givim strongpela tok long ol man i sakim tok bilong em na ofaim ol animal i lek nogut, sik, o aipas.​—Mal. 1:​6-8.

5, 6. (a) Wanem tok piksa i soim olsem planti taim yumi save laikim ol samting i gutpela tru na i no bruk? (b) Olsem wanem? Yumi ol sinman inap holimpas stretpela pasin? Stori long dispela.

⁵ Taim yumi laik painim wanpela samting, yumi laik kisim samting i no gat bagarap long en na i no gat wanpela hap bilong en i lus. Yumi ken tok piksa olsem: Inap longtaim wanpela man i raun long ol stua bilong painim wanpela buk em i laik ritim, tasol taim em i painim pinis em i lukim olsem sampela pes bilong buk i lus. Em i bel hevi, na ating em i putim buk i go bek. O tingim wanpela meri em i wokabaut long nambis na i bungim sampela sel em tait i bin tromoi i kam long nambis. Em i amamas tru long ol narapela narapela naispela sel, na sampela taim em i kisim wanpela bilong skelim. Em bai holim wanem sel? Ol sel i gutpela na i no bruk. Na olsem tasol God i save painim ol manmeri em ol i stap stret tru long olgeta pasin bilong ol.​—2 Sto. 16:9.

⁶ Tasol ating bai yu tingting, pasin bilong bihainim stretpela pasin i makim olsem man i mas i stap gutpela olgeta? Yumi gat sin na yumi no gutpela olgeta, olsem na ating yumi tingim yumi yet olsem wanpela buk we sampela pes bilong en i lus o olsem wanpela sel i bruk. Olsem wanem? Sampela taim yu save ting olsem long yu yet? Yu ken save olsem Jehova i no ting olsem yumi mas i stap gutpela olgeta. Em i no tokim yumi long mekim ol samting yumi no inap mekim.a (Sng. 103:14; Jem. 3:2) Tasol em i laik yumi mas holimpas stretpela pasin. Olsem na yu ting pasin bilong i stap gutpela olgeta na pasin bilong mekim stretpela pasin i wankain? Nogat. Yumi ken tok piksa olsem: Wanpela yangpela man i laikim tru wanpela yangpela meri em i tingting long maritim. Em bai i no ting olsem dispela meri bai gutpela olgeta. Tasol i stret em i laik bai meri i laikim em tru long bel olgeta, olsem laikim em wanpela tasol. Na olsem tasol, Jehova i laik yumi mas laikim em wanpela tasol na em i “no inap larim wanpela giaman god i senisim [em].” (Kis. 20:5) Tru, em i save yumi no gutpela olgeta, tasol samting em i laik yumi mas mekim em olsem: Yumi mas laikim em tru long bel olgeta na lotu long em wanpela tasol.

7, 8. (a) Olsem wanem Jisas i stap olsem gutpela piksa long holimpas stretpela pasin? (b) Long Baibel stretpela pasin i makim wanem samting?

⁷ Yumi ken tingim bekim bilong Jisas taim wanpela i askim em long wanem lo i nambawan na i winim olgeta narapela lo. (Ritim Mak 12:​28-​30.) Jisas i no bekim tasol dispela askim, nogat, em i bihainim ol tok em i bin givim olsem bekim. Em i nambawan gutpela piksa long pasin bilong laikim tru Jehova long tingting, bel, na strong olgeta. Em i soim olsem em i no toktok tasol long stretpela pasin, nogat, em i mekim ol gutpela wok em stretpela tingting i kirapim em long mekim. Sapos yumi laik holimpas stretpela pasin, yumi mas bihainim lek mak bilong Jisas.​—1 Pi. 2:21.

⁸ Olsem na long Baibel stretpela pasin bilong yumi i makim olsem yumi mas givim bel olgeta long God Jehova tasol, na long bihainim laik bilong em. Pasin bilong holimpas stretpela pasin i makim olsem long ol samting yumi mekim long ol wan wan de, yumi bai wok strong long mekim ol samting bilong amamasim God Jehova. Ol samting Jehova i ting i nambawan bikpela samting, em bai stap nambawan bikpela samting long i stap bilong yumi. Orait nau yumi ken skelim 3-pela as na dispela i bikpela samting.

1. Stretpela Pasin Bilong Yumi na Bikpela Tok Long Wok Bos Bilong Jehova

 9. Olsem wanem stretpela pasin bilong yumi i insait long bikpela tok long wok bos bilong Jehova?

⁹ I stret Jehova i stap nambawan bos, maski yumi bihainim stretpela pasin o nogat. Pasin bilong em long mekim wok bos i stretpela, bai stap oltaim, na em bai bosim olgeta samting. Wok bos bilong em bai i stap olsem inap oltaim, maski ol man o ensel i tok wanem o mekim wanem. Tasol Satan i bin sutim tok long wok bos bilong em. Olsem na long ai bilong olgeta lain long heven na graun, i gat wok long kamapim ples klia olsem i stret em i stap nambawan bos, na pasin bilong em long mekim wok bos i stretpela, na em i mekim long pasin laikim. Yumi ol Witnes Bilong Jehova i amamas long toktok long wok bos bilong Jehova long olgeta man i amamas long harim. Tasol olsem wanem yumi yet i ken mekim ol samting i kamapim klia olsem Jehova i stap nambawan bos? Olsem wanem yumi ken soim olsem yumi makim Jehova olsem nambawan Bos bilong yumi? Taim yumi holimpas stretpela pasin.

10. Satan i sutim wanem tok long pasin bilong ol man long stap gut long God? Yu gat laik long mekim wanem?

¹⁰ Tingim olsem wanem stretpela pasin bilong yu i bikpela samting. Satan i bin tok bai i no gat man i sambai long wok bos bilong God, olsem bai i no gat man i laikim tru Jehova na mekim wok bilong em. Long ai bilong planti ensel, Satan i tok long Jehova olsem: “Mi ting sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:4) Tingim: Satan i no sutim dispela tok long stretpela man Jop tasol, nogat, em i sutim dispela tok long olgeta manmeri. Olsem na Baibel i kolim Satan olsem “man bilong kotim ol brata bilong yumi.” (KTH 12:10) Em i sutim tok long Jehova olsem ol Kristen​—na yu tu​—bai i no i stap gut long Jehova. Satan i tok yu bai lusim pasin bilong stap gut long Jehova bilong lukautim laip bilong yu. Yu ting olsem wanem long dispela tok Satan i sutim long yu? Ating bai yu amamas long kamapim olsem Satan em man bilong giaman? Taim yu holimpas stretpela pasin yu inap mekim olsem.

11, 12. (a) Wanem sampela stori i kamapim ples klia olsem ol samting yumi mekim long olgeta de i insait long pasin bilong yumi long bihainim stretpela pasin? (b) Bilong wanem pasin bilong holimpas stretpela pasin em i wanpela gutpela samting yumi inap mekim?

¹¹ Olsem na pasin bilong yu long bihainim stretpela pasin long ol samting yu save mekim long olgeta de na ol samting yu makim long mekim, em i bikpela samting. Tingim gen 3-pela samting yumi bin stori long en long kirap bilong dispela stadi. Olsem wanem dispela mangi, man marit, na sista, ol i ken holimpas stretpela pasin? Dispela mangi ol wanskul i sutim tok long em, em i gat laik long bekim pasin nogut long ol, tasol em i tingim tok olsem: “Yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ” (Ro. 12:19) Em i lusim ol. Man marit i yusim Intenet inap lukluk long ol samting i kirapim bel long mekim maritpasin, tasol em i tingim stiatok bilong Jop, olsem: “Mi bin mekim strongpela promis pinis olsem, mi no ken aigris long ol meri.” (Jop 31:1) Olsem Jop, dispela man i sakim pasin bilong lukluk long ol piksa doti, na em i abrusim dispela olsem samting i gat posin. Meri i toktok wantaim sampela sista na i harim sampela tok baksait, em i tingim tok olsem: “Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong.” (Ro. 15:2) Em tu inap skruim sampela tok long dispela tok baksait, tasol em i save kain tok olsem i no strongim narapela. Dispela bai mekim nogut long sista Kristen bilong em, na Papa bilong em long heven bai i no amamas long dispela. Olsem na em i bosim gut maus bilong em na i toktok long narapela samting.

¹² Long dispela 3-pela samting, ol Kristen i makim samting ol i laik mekim, na i olsem dispela i tokaut: ‘Jehova i Bos bilong mi. Mi bai wok strong long mekim ol samting em i amamas long en.’ Taim yu makim ol samting yu laik mekim, yu save wok strong long amamasim Jehova? Sapos yu mekim olsem, yu bihainim tru gutpela tok bilong Sindaun 27:​11, i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Em wanpela gutpela wok tru yumi holim long mekim bel bilong Jehova i amamas! Olsem na yumi mas wok strong tru long holimpas stretpela pasin bilong yumi, a?

2. As Bilong Kot Bilong God

13. Olsem wanem tok bilong Jop na Devit i soim olsem stretpela pasin bilong yumi i olsem as na Jehova i skelim yumi long kot?

¹³ Yumi kisim save olsem pasin bilong bihainim stretpela pasin i helpim yumi long sapotim wok bos bilong Jehova. Dispela i olsem as na God i ken skelim yumi. Jop i bin kliagut long dispela samting. (Ritim Jop 31:6.) Jop i bin save olsem God i save “skelim stret” ol pasin bilong olgeta man, na God i mekim wok long ol stretpela lo bilong Em bilong skelim stretpela pasin bilong yumi. Devit i mekim wankain tok: “Bikpela, yu save skelim pasin bilong olgeta lain manmeri. Olsem na yu ken helpim mi long winim kot, long wanem, mi bin mekim ol stretpela na gutpela pasin tasol. God, yu stretpela olgeta. Yu save skelim tingting na bel bilong olgeta man.” (Sng. 7:​8, 9) Yumi save olsem God i ken save tru long “tingting na bel” bilong man. Tasol yumi mas tingim samting em i laik skelim. Olsem Devit i tok, Jehova i save skelim yumi long stretpela pasin bilong yumi.

14. Bilong wanem yumi no ken ting olsem yumi sinman na dispela i pasim yumi long holimpas stretpela pasin?

¹⁴ Tingim olsem God Jehova i save skelim bel bilong planti bilion manmeri long nau. (1 Sto. 28:9) Olsem wanem? Planti taim em i save painim man i holimpas stretpela pasin Kristen? Em wan wan taim tasol! Tasol yumi no ken ting olsem yumi sinman na yumi no inap holimpas stretpela pasin. Nogat. Olsem Devit na Jop, i gat as tru long yumi bilip olsem Jehova bai lukim olsem yumi holimpas stretpela pasin, maski yumi sinman. Tingim, sapos yumi gutpela olgeta, dispela bai i no mekim na yumi bai holimpas stretpela pasin. I gat tripela man tasol i bin stap long graun em ol i bin stap gutpela olgeta, na tupela bilong ol, Adam na Iv, ol i no bin holimpas stretpela pasin. Tasol planti milion manmeri em ol i no gutpela olgeta, ol i bin bihainim stretpela pasin. Yu tu inap mekim olsem.

3. Stretpela Pasin i Bikpela Samting Long Samting Yumi Wet Long En

15. Olsem wanem Devit i soim olsem pasin bilong bihainim stretpela pasin em i bikpela samting long samting yumi wetim i kamap bihain?

¹⁵ Jehova bai lukim stretpela pasin bilong yumi na skelim yumi long dispela, olsem na bilong yumi ken kisim gutpela samting yumi wet long en yumi mas i gat dispela pasin. Devit i bin save long dispela samting. (Ritim Song 41:12.) Em i wetim tru taim we God i save tingim em inap oltaim. Olsem ol Kristen tru long nau, Devit i gat tingting long i stap oltaim, na em i laik i go klostu moa long God Jehova taim em i mekim wok bilong em. Devit i save olsem pasin bilong bihainim stretpela pasin em i bikpela samting sapos em i laik lukim truim bilong ol samting em i wetim. Na wankain, Jehova i save sambai long yumi, skulim yumi, stiaim yumi, na blesim yumi taim yumi holimpas stretpela pasin.

16, 17. (a) Bilong wanem yu tingting strong long oltaim yu laik bihainim stretpela pasin? (b) Stadi i kamap bihain long dispela bai stori long wanem ol askim?

¹⁶ Pasin bilong wetim gutpela samting i kamap bihain em i bikpela samting bilong yumi ken i stap amamas long nau. Em inap helpim yumi long i stap amamas maski ol hevi i painim yumi. Pasin bilong wetim gutpela samting i kamap bihain em inap lukautim tu tingting bilong yumi. Tingim, Baibel i tok pasin bilong wetim gutpela samting i olsem wanpela hat kapa. (1 Te. 5:8) Hat kapa i lukautim het bilong soldia long taim bilong pait, na olsem tasol pasin bilong wetim gutpela samting inap lukautim tingting bilong yumi, bai yumi no kisim tingting nogut em Satan i save kirapim ol man long kisim long dispela taim nogut bilong nau. I stap bilong yumi i no gat as bilong en sapos yumi no gat gutpela samting bilong wet long en. Yumi mas skelim gut yumi yet, na tingim gut stretpela pasin bilong yumi na samting yumi wetim. Yu no ken lusim tingting olsem sapos yu holimpas stretpela pasin, yu save sapotim wok bos bilong Jehova na yu wetim gutpela samting bai kamap bihain. Long olgeta taim yu mas holimpas stretpela pasin!

¹⁷ Stretpela pasin em i bikpela samting, olsem na yumi mas skelim sampela askim moa. Olsem wanem yumi inap kisim stretpela pasin? Olsem wanem yumi inap holimpas dispela pasin? Man inap mekim wanem sapos inap sampela hap taim em i lusim stretpela pasin? Stadi i kamap bihain long dispela bai stori long ol dispela askim.

[Futnot]

Bai Yu Bekim Olsem Wanem?

• Stretpela pasin i makim wanem samting?

• Olsem wanem stretpela pasin i insait long bikpela tok i kamap long wok bos bilong Jehova?

• Olsem wanem stretpela pasin i helpim yumi long wetim gutpela samting?

[Ol Piksa long pes 5]

Ol samting i kamap long olgeta de i traim stretpela pasin bilong yumi