Jehova i Marimari na Yumi No Ken Bel Hevi

“God, yu as bilong sori, yu ken marimari long mi. Yu gat bikpela marimari tru, olsem na mi laik yu rausim olgeta pasin nogut bilong mi.”​—⁠SONG 51:⁠1.

MAN i no inap abrusim strafe sapos em i brukim lo bilong Jehova. Yumi pilim olsem sapos yumi mekim wanpela rong! Maski yumi bin mekim wok bilong Jehova inap planti yia pinis, sapos yumi kalapim lo bilong em, bai yumi kisim bikpela bel hevi tru long dispela samting, o tingting bilong yumi bai stap nogut tru. Bai yumi pilim olsem Jehova i givim baksait long yumi na yumi nogut pinis na yumi no inap holim moa sampela wok bilong em, na em i no ken laikim moa yumi.

² Long bipo dispela samting i bin painim King Devit. Em i bin mekim wanem rong na em i stap olsem?

Pasin Kranki Inap Kirapim Man Long Mekim Rong

³ Devit i bin laikim tru God, tasol em i mekim pasin kranki, na dispela i kirapim em long mekim bikpela rong. (Lukim Galesia 6:⁠1.) Yumi olgeta i gat sin na yumi no gutpela man tumas, olsem na yumi tu inap popaia. Ol bikman tu i mas was gut, nogut ol i mekim dispela samting. Devit i bin i stap king, na em i gat bikpela namba. Kwiktaim ol man i save bihainim tok bilong em. Tasol em i mekim sampela rong: Em i kisim planti meri, na em i kaunim ol man.​—⁠Lo 17:​14-20; 1 Stori 21:⁠1.

⁴ Taim Devit i gat gutpela sindaun na planti mani kago, em i mekim rong long God na long sampela man. Taim em i mekim wanpela rong, Satan i pulim em long mekim narapela narapela rong. Taim wantok Uria i stap long ami na em i pait long ol Amon, Devit i lukstil long meri bilong Uria, em Batseba, taim meri i waswas. Batseba i gat gutpela skin. Man bilong em i stap long pait, na Devit i kisim dispela meri i go long haus bilong em na em i slip wantaim em. Nau Batseba i gat bel, na Devit i tingting planti. Em i traim haitim dispela rong. Em i salim tok long Uria i mas kam. Em i ting Uria bai slip wantaim meri bilong em, na nau Uria bai ting dispela pikinini i bilong em yet. Devit i mekim na bai Uria i dring longlong, tasol Uria i no laik slip wantaim meri bilong em. Olsem na Devit i tingting planti. Uria i go bek long pait, na Devit i salim Joap, em kepten bilong ami, long putim Uria i go paslain long pait na bai ol birua i kilim em i dai. Joap i mekim olsem, na Uria i kisim bagarap. Batseba i krai inap sampela de, na taim dispela i pinis, kwiktaim Devit i maritim em, na taim ol man i lukim meri i gat bel, ol i mas ting em pikinini bilong Devit tasol.​—⁠2 Samuel 11:​1-27.

⁵ Profet Natan i givim tok bilong God long Devit, na i tok: “Bai mi mekim sampela man long famili bilong yu yet i givim bikpela hevi long yu.” Nau ol hevi i painim Devit. Pikinini bilong Batseba i dai pinis. (2 Samuel 12:​1-23) Namba wan pikinini man bilong Devit, em Amnon, i mekim pasin nogut long Tamar, em susa bilong em, olsem na brata bilong em i kilim em i dai. (2 Samuel 13:​1-33) Apsalom, em pikinini man bilong Devit, em i laik kisim wok king bilong Devit, na em i pamuk wantaim ol namba tu lain meri bilong Devit. (2 Samuel 15:​1–16:22) Apsalom i dai long pait, na Devit i bel hevi nogut tru long dispela. (2 Samuel 18:​1-33) Nau em i gat pasin daun. Em i save em i mas bihainim gut lo bilong God bilong em, em Jehova, na go klostu long em. Jehova em Man bilong marimari. Sapos yumi mekim rong, long pasin daun yumi mas tanim bel na go klostu long Jehova.​—⁠Lukim Jems 4:⁠8.

⁶ Asua bilong Devit i bikpela tru, long wanem, em i king bilong Israel na em i save pinis long Lo bilong Jehova. (Lo 17:​18-20) Em i no olsem wanpela king bilong Isip o Babilon em ol i no save long lo bilong Jehova na ol i save mekim ol samting i no stret long lo bilong em. (Lukim Efesus 2:12; 4:18.) Devit em wanpela Israel, na dispela lain i bin dediket long Jehova, olsem na Devit i save pasin pamuk na kilim man i dai em i bikpela rong. (Kisim Bek 20:​13, 14) Ol Kristen tu i save long ol dispela lo, tasol sampela i brukim olsem Devit i bin mekim, long wanem, ol tu i gat sin na ol i save popaia, na ol i larim laik bilong skin i pulim ol. Sapos kain samting olsem i painim yumi, yumi no ken ting yumi bagarap olgeta na i no inap stretim pasin bilong yumi.

Kamapim na Bai Yu Orait

⁷ Sapos yumi mekim bikpela rong, ating i hatwok long kamapim long narapela man, na long Jehova tu. Tasol sapos yumi no kamapim, dispela bai mekim wanem long yumi? Devit i tok: “Taim mi no autim sin bilong mi yet, mi krai nogut . . . na bodi bilong mi i slek . . . na . . . strong bilong mi i lus olgeta.” (Song 32:​3, 4) Taim Devit i laik haitim rong em i bin mekim, bel bilong em i gat tok, na dispela i daunim em na em i bel hevi na i no gat strong moa. Em i olsem wanpela diwai i no gat wara na i laik drai. Ating tingting bilong em i stap nogut na skin bilong em i gat sik. Em i no amamas moa. Sapos yumi stap olsem, yumi mas mekim wanem?

⁸ Sapos yumi kamapim rong bilong yumi long God, bel bilong yumi bai stap isi gen. Bihain Devit i bin mekim olsem. Em i beten long God na i tok: “Mi bin autim sin bilong mi long yu. Mi no haitim pasin nogut bilong mi. . . . Mi autim pinis na yu tekewe asua bilong mi na sin bilong mi tu.” (Song 32:⁠5) Olsem wanem? Yu bin mekim sampela rong na yu haitim, na dispela i mekim yu i bel hevi? Sapos olsem, gutpela yu kamapim long Jehova na bai em i ken marimari long yu, na yu lusim dispela rong yu bin mekim. Tokaut long ol elda na bai ol i ken oraitim yu long ol samting bilong spirit. (Sindaun 28:13; Jems 5:​13-20) Ol bai lukim yu i tanim bel, na bihain bai yu stap amamas gen. Olsem Devit i tok: “Sapos God i lusim pinis rong bilong wanpela man, na i tekewe sin bilong em, dispela man i ken amamas.”​—⁠Song 32:​1, 2.

⁹ Devit tupela Batseba i gat asua long ai bilong God Jehova, na inap ol i mas dai, tasol God i bin marimari long tupela. God i tingim kontrak bilong Kingdom na em i marimari long Devit. (2 Samuel 7:​11-16) Devit i tanim bel na em i bel hevi tru long rong em i mekim wantaim Batseba, olsem Song 51 i tok. Taim Natan i kamapim long em dispela rong em i bin mekim, em nau, bel bilong em i pilim tru na em i save em i bin mekim bikpela rong moa. Natan i mas i gat strongpela bel na bai em inap kamapim dispela rong bilong Devit, na i olsem tu long ol elda Kristen long nau, ol i mas i gat strongpela bel na bai ol i ken mekim olsem. Sapos Devit i bin sakim tok bilong Natan, Natan inap tokim ol man long kilim i dai Devit, tasol Devit i tokaut long rong bilong em. (2 Samuel 12:​1-14) Taim Natan i kamapim rong bilong Devit, em i beten na tokaut long pasin nogut em i bin mekim, olsem yumi lukim long Song 51, na sapos yumi tu i bin popaia na yumi laik bai Jehova i marimari long yumi, gutpela yumi lukim Song 51.

Yumi Mas Kot Long God

¹⁰ Devit i tokaut long rong em i mekim, na em i beten olsem: “Yu as bilong sori, yu ken marimari long mi. Yu gat bikpela marimari tru, olsem na mi laik yu rausim olgeta pasin nogut bilong mi.” (Song 51:⁠1) Em i bin kalapim lo bilong God, tasol sapos God i kamapim pasin sori long Devit na marimari long em, Devit inap kamap strong gen long spirit. God i bin mekim pasin marimari long bipo, olsem na Devit inap bilip olsem God bai marimari long em sapos em i tanim bel.

¹¹ Bipo i gat ol ofa bilong Bikpela De Bilong God I Tekewe Sin Bilong Ol Manmeri, na dispela i makim wanpela rot na bai Jehova i tekewe rong bilong ol man i tanim bel. Dispela rot em ofa bilong Krais, na sapos yumi bilip long dispela ofa, Jehova bai marimari long yumi na lusim rong bilong yumi. Devit i bin tingim dispela Bikpela De i makim dispela samting, olsem na maski i gat piksa tasol bilong ofa bilong Krais long dispela taim bipo, Devit inap bilip tru olsem Jehova i ken marimari long em. Orait, yumi ol wokman bilong God long nau i mas bilip tru long ofa Krais Jisas i mekim pinis bilong tekewe rong bilong yumi na bai yumi ken kisim laip i stap oltaim!​—⁠Rom 5:8; Hibru 10:⁠1.

¹² Devit i krai long God na i tok: “Yu wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Mi . . . rong pinis. Mi no inap lusim tingting long sin bilong mi.” (Song 51:​2, 3) Sin i olsem yumi no bihainim lo bilong Jehova. Devit i bin mekim olsem, tasol em i hevi long rong em i mekim long kilim man i dai na long pamuk. Em i no ting dispela i samting nating, na em i no tingting tasol long abrusim strafe o sik bilong pamuk, nogat. Em i man bilong laikim tumas Jehova, na em i no laik tru long pasin nogut. (Song 97:10) Em i les pinis long dispela rong em i bin mekim, na em i laik bai God i tekewe dispela rong long em. Em i bin larim skin i pundaunim em, na em i bel hevi tru long dispela samting. Bel bilong em i gat tok, na bilong stretim dispela em i mas tanim bel na kamapim rong bilong em, na askim Jehova long marimari long em.

¹³ Devit i tokim Jehova olsem: “Mi mekim sin long yu wanpela tasol. Mi mekim pasin nogut long ai bilong yu. Olsem na yu mekim stretpela pasin tasol na yu kotim mi na yu bekim sin bilong mi.” (Song 51:⁠4) Devit i bin brukim lo bilong God na mekim nogut wok king em i holim, na em i no givim biknem long God, na em i givim rot long ol man na bai ol inap semim God. (2 Samuel 12:14; Kisim Bek 20:​13, 14, 17) Na rong bilong Devit i semim lain bilong em na famili bilong em tu. Na i olsem tu sapos wanpela Witnes i baptais pinis i mekim rong​—⁠em i mekim nogut nem bilong kongrigesen na bilong famili bilong em na mekim ol i bel hevi. Tasol Devit i tanim bel na em i save em i bin rongim Uria, na em i mas stretim dispela samting, tasol em i save tu, em i gat bikpela asua long ai bilong Jehova. (Lukim Stat 39:​7-9.) Em i save, wanem samting Jehova i laik mekim long em, dispela bai stret. (Rom 3:⁠4) Ol Kristen i bin mekim rong ol i mas i gat wankain tingting.

Em i No Gutpela Olgeta

¹⁴ Devit i no haitim rong bilong em, tasol em i tok: “Taim mama i karim mi, mi kamap man bilong mekim pasin nogut. Taim mi stap yet long bel bilong mama, mi man bilong mekim sin.” (Song 51:⁠5) Mama i gat pen taim em i karim Devit, long wanem, rong bilong Adam i kalap long ol tumbuna pikinini bilong em na i stap long mama tu, na i kalap i go long Devit tu. (Stat 3:16; Rom 5:12) Devit i no tok, marit na kamapim pikinini em i gat rong, nogat. Jehova yet i wokim rot na bai ol man na meri i ken marit na kamapim pikinini. Na Devit i no tok, mama i mekim pasin nogut na em i gat bel, nogat. Tasol sin i stap long skin bilong mama, na Devit tu i wankain, na i olsem tu long yumi olgeta man.​—⁠Jop 14:⁠4.

¹⁵ Sapos yumi tu i mekim rong, na yumi beten askim God long marimari long yumi, yumi tu i ken beten na tokim em long ol samting i bin pulim yumi o sampela hevi i bin painim yumi na yumi bin mekim dispela rong. Tasol nogut yumi mekim nabaut long gutpela pasin sori bilong God. Nogut yumi ting em bai sori nating long yumi, olsem na i orait long yumi ken mekim sampela pasin nogut; na nogut yumi ting, olgeta man i gat sin, olsem na God bai sori long yumi na yumi no gat asua long dispela rong yumi bin mekim. (Jut 3, 4) Devit i save em i gat asua long rong em i bin mekim, olsem em i no bin rausim tingting nogut i kamap long em na dispela i kirapim em long mekim pasin nogut. Na taim wanpela traim i laik pulim yumi, yumi ken beten askim God long helpim yumi long sakim, na nau yumi mas wok strong long mekim ol samting i stret long dispela beten bilong yumi.​—⁠Matyu 6:13.

God i Ken Stretim Yumi

¹⁶ God i save lukim bel bilong man, em i givim bel tru long God o nogat. Devit i bin beten: “Yu laikim tumas long mi mas bihainim yu tru. Olsem na mi laik yu lainim mi long gutpela tingting bilong yu.” (Song 51:⁠6) Em i bin mekim ol samting i no stret na bai Uria i dai, na ol man i no ken save long dispela samting o long olsem wanem Batseba i kisim bel. Tasol em i save God i laikim ol man i bihainim pasin i stret na pasin holi, na em i no laikim pasin giaman. Yumi tu i mas tingim dispela samting na bai yumi ken bihainim gutpela pasin tasol, long wanem, yumi save Jehova bai givim strafe long yumi sapos yumi giaman long bihainim pasin i stret. (Sindaun 3:32) Na Devit i save tu, sapos God i ‘lainim em long gutpela tingting,’ em bai inap long bihainim pasin i stret inap long olgeta taim.

¹⁷ Devit i save God i mas helpim em long daunim laik nogut bilong skin, olsem na em i beten na i tok: “Yu rausim sin bilong mi bai mi kamap klin. Yu wasim mi [long hisop] na bai mi kamap klin olgeta, na i winim ais i waitpela tru.” (Song 51:⁠7) Bipo ol i save mekim wok long lip bilong liklik diwai hisop long wasim ol man em pastaim ol i gat sik lepra na bai ol i kamap klin long ol samting bilong lotu. (Wok Pris 14:​2-7) Olsem na i stret Devit i mekim dispela beten. Na em i toktok tu long ais i no gat pipia long en na em i klin tru. Em i laik kamap klin long ai bilong God, winim dispela ais i waitpela tru. (Aisaia 1:18) Sapos bel bilong yumi i gat tok long sampela rong yumi bin mekim, yumi mas bilip long ofa Jisas i bin mekim na yumi mas askim God long lusim dispela rong na mekim yumi i kamap klin gen. Na yumi mas bilip tru long God bai mekim olsem.

Mas Kamap Gutpela Gen

¹⁸ Ol Kristen i bin mekim rong na bel bilong ol i gat tok, ol bai pilim tru beten bilong Devit, em i krai long Jehova na i tok: “Yu mekim bel bilong mi i amamas gen. Tru tumas, yu bin daunim mi olgeta, na yu bekim pinis sin bilong mi. Tasol nau mi laik belgut gen.” (Song 51:⁠8) Taim Devit i no kamapim yet rong bilong em, em i bel hevi na em i pilim olsem God i lusim em na givim baksait long em, na em i no amamas long harim ol gutpela singsing na musik. Bel bilong em i bagarap stret. Em i krai long God i mas lusim tingting long rong em i bin mekim na bai em i ken kamap strong gen long spirit na em i ken stap amamas gen olsem long bipo, long taim em i no gat rong na em i stap gutpela long ai bilong God. Sapos Kristen i bin mekim rong na em i tanim bel, na Jehova i lusim rong em i bin mekim, “na Holi Spirit i kirapim [em] na [em] i amamas” gen, dispela i makim olsem Jehova i laikim em gen. (1 Tesalonaika 1:⁠6) Dispela i mekim gut bel bilong em na em i no bel hevi moa.

¹⁹ Na Devit i beten moa long Jehova olsem: “Yu no ken lukluk long sin bilong mi gen. Na mi laik yu tekewe olgeta rong bilong mi.” (Song 51:⁠9) Jehova i no inap orait long sin o rong bilong Devit, olsem na Devit i no laik bai God i “lukluk long sin” bilong em. Em i krai long God i mas tekewe ol dispela rong long em na lusim tingting long en. Olsem na bai em i no gat rong moa na bel bilong em i no gat tok moa na em i ken save God i ken laikim em gen na orait long em. Devit i laikim olsem.

Sapos Yu Bin Mekim Rong

²⁰ Yumi tingim tok bilong Song 51 na yumi save, sapos wanpela bilong lain bilong Jehova em i bin dediket pinis long Jehova na bihain em i mekim bikpela rong, sapos em i tanim bel, em i ken askim Jehova long lusim dispela rong bilong em na mekim em i kamap gutpela gen. Sapos yu wanpela Kristen na yu bin mekim rong, yu ken beten long Papa long heven na askim em long lusim rong bilong yu. Yu mas save yu gat asua, na yu no ken i stap olsem; na yu save Jehova i mas helpim yu na bai yu kamap gutpela gen na yu ken amamas na stap belgut gen. Sapos Kristen i tanim bel, em i no ken pret long askim God long marimari long em, long wanem, God “i save marimari moa yet long ol manmeri i kam bek long em, na em i save lusim sin bilong” ol. (Aisaia 55:7; Song 103:​10-14) Ol i mas askim ol elda bilong kongrigesen long helpim ol bambai ol i ken kamap strong gen long spirit.​—⁠Jems 5:​13-15.

²¹ Marimari bilong Jehova i save helpim lain bilong em na bel bilong ol i no bagarap olgeta. Yumi ken stori long sampela beten moa bilong Devit, olsem Song 51 i kolim, na yumi ken save, Jehova i no save givim baksait long man em i bel hevi tru long rong em i bin mekim na em i krai long Jehova i marimari long em.

Bai Yu Bekim Olsem Wanem?

◻ Sapos Kristen i mekim bikpela rong, dispela inap mekim wanem long em?

◻ Taim Devit i haitim rong bilong em, bel bilong em i olsem wanem?

◻ Bilong wanem Devit i tokim God, “Mi mekim sin long yu wanpela tasol”?

◻ Sapos yumi bin mekim rong yumi no ken mekim wanem, maski God i save yumi no gutpela olgeta?

◻ Sapos Kristen i mekim bikpela rong em i mas mekim wanem?

[Askim Bilong Stadi]

1, 2. Sapos wanpela wokman bilong Jehova i mekim rong, dispela inap mekim wanem long em?

3, 4. Wanem samting i bin painim King Devit?

 5. Taim Devit i mekim rong wantaim Batseba, wanem ol hevi i kamap? Dispela i mekim wanem long Devit?

 6. Olsem wanem na Devit i gat bikpela asua tru?

7, 8. (a) Olsem wanem long Devit taim em i laik haitim rong bilong em? (b) Bilong wanem yumi mas kamapim rong bilong yumi na lusim dispela rong?

 9. Wanem taim Devit i bin raitim dispela beten i stap long Song 51? Bilong wanem em i beten olsem?

10. Olsem wanem Devit inap kamap strong gen?

11. Ol ofa bilong Bikpela De Bilong God I Tekewe Sin Bilong Ol Manmeri, em i makim wanem samting?

12. Sin em i wanem samting? Devit i ting olsem wanem long rong em i bin mekim?

13. Bilong wanem Devit i tokim Jehova, “Mi mekim sin long yu wanpela tasol”?

14. Devit i tokaut long wanem samting na bai Jehova i ken marimari long em?

15. Ating God i ken tingim ol samting i bin kirapim yumi long mekim rong, tasol yumi no ken mekim wanem?

16. God i laik bai yumi mekim wanem?

17. Bilong wanem Devit i tingim hisop na ais?

18. Taim Devit i no tanim bel yet na kamapim rong bilong em, em i bin stap olsem wanem? Dispela save i ken helpim yumi olsem wanem?

19. Sapos God i lusim olgeta rong bilong Devit, bel bilong Devit bai pilim olsem wanem?

20. Sapos Kristen i mekim bikpela rong, em i mas mekim wanem?

21. Bihain bai yumi stori long wanem samting?