Oltaim Putim Ol Hevi Long Han Bilong Jehova
PLANTI manmeri long nau ol i pilim olsem ol hevi i daunim ol. Ol i gat hevi long mani, hevi insait long famili, sik, na hatpela pasin ol bikman i mekim bilong daunim ol, i givim pen na hevi long ol—ol dispela samting na planti samting moa i olsem ol traipela ston i hangamap i stap long nek bilong ol. Na sampela i pilim olsem, pasin kranki bilong ol yet i mekim na ol i samting nating tasol na ol i no inap mekim wanpela gutpela wok, na dispela samting tu i save daunim ol. Planti manmeri i pilim olsem ol hevi bilong ol i bikpela tumas na ol i no inap karim moa. Taim yu pilim olsem, yu ken mekim wanem?
Wanpela taim King Devit i pilim olsem em i no inap karim moa ol hevi bilong em. Song 55 i tok bel bilong Devit i bagarap stret long wanem ol birua i mekim nogut long em. Em i bel hevi tru na i pret. Em i krai tasol. (Song 55:2, 5, 17) Tasol maski em i gat hevi, em i painim rot bilong karim. Em i mekim wanem? Em i beten askim God long helpim em. Em i givim gutpela tok long ol man i pilim wankain olsem em, olsem: “Olgeta hevi yu karim, em yu mas putim long han bilong Bikpela.”—Song 55:22.
Wanem insait bilong dispela tok, “putim [hevi] long han bilong Bikpela”? Yu ting yumi mas beten long Jehova na kamapim hevi bilong yumi na em tasol? O i gat sampela samting yumi yet i ken mekim na bai ol hevi i no ken daunim yumi tumas? Na olsem wanem sapos yumi pilim olsem yumi nogut tasol na yumi no inap go klostu long Jehova long rot bilong beten? Yumi inap save long insait bilong dispela tok bilong Devit sapos yumi save long sampela samting i bin painim em; ating em ol samting em i bin tingim taim em i raitim dispela tok.
Mekim Ol Samting Long Strong Bilong Jehova
Goliat i pretim ol soldia bilong Israel. Dispela traipela man, longpela bilong em i klostu 3 mita, em i mekim ol i pret nogut tru. (1 Samuel 17:4-11, 24) Tasol Devit i no pret. Bilong wanem em i no pret? Devit i no tingting long pait wantaim Goliat long strong bilong em yet. Kirap long taim God i makim Devit long kamap king bilong Israel, em i larim spirit bilong God i stiaim na strongim em long olgeta samting em i mekim. (1 Samuel 16:13) Olsem na em i tokim Goliat: “Mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. Em dispela God yu bin bikhet na tok bilas long en. Harim. Nau long dispela de tasol bai Bikpela i givim yu long han bilong mi.” (1 Samuel 17:45, 46) Tru Devit i save gut long mekim wok long katapel, tasol yumi ken bilip olsem, Jehova i stiaim dispela ston Devit i sutim i go, na bai i go stret long mak na kilim Goliat i dai.—1 Samuel 17:48-51.
Devit i mekim dispela bikpela wok na em i win, long wanem, em i bilip olsem God bai helpim na strongim em. Devit i bin wok long kamap pren bilong God, na ating dispela pasin pren i strong moa, long wanem, wanpela taim bipo Jehova i bin kisim bek em. (1 Samuel 17:34-37) Olsem Devit, yu tu yu ken pas gut wantaim Jehova na bilip olsem em inap strongim na helpim yu long olgeta taim na em i redi long mekim olsem.—Song 34:7, 8.
Wok Long Stretim Hevi
Tasol olsem Song 55 i kamapim klia, yu no ken ting bai i no gat wanpela taim na yu no pret o tingting planti o kisim pen, nogat. Olsem yumi stori pinis, Devit i bilip strong long Jehova na i no pret, tasol sampela yia bihain, ol birua i kam ranim em na em i pret nogut tru. King Sol i no amamas moa long Devit, na Devit i mas ranawe—nogut em i dai. Ating bel bilong Devit i bagarap stret, na em i gat planti askim, olsem: Laik bilong Jehova bai kamap olsem wanem? Ating em i gat askim olsem, long wanem, God i bin makim em long kamap king bilong Israel, tasol em i hait i stap long ples i no gat man na ol birua i wok long painim em olsem wanpela wel abus. Taim em i go hait long taun Get, em as ples bilong Goliat, ol man i luksave long em. Na wanem samting i kamap? Baibel i tok, “em i pret tru.”—1 Samuel 21:10-12.
Tru em i pret na tingting planti, tasol em i no larim dispela i pasim em long beten askim Jehova long helpim em. Long Song 34 (i stori long dispela samting i bin painim em), Devit i tok, “Mi bin beten long Bikpela bai em i helpim mi, na em i harim prea bilong mi. Em i tekewe olgeta pret long bel bilong mi, na nau mi stap bel isi.”—Song 34:4, 6.
Jehova i helpim Devit, tasol Devit i no sindaun nating tasol na wet long Jehova i helpim em, nogat. Em i save em i mas mekim olgeta samting em inap long mekim bilong helpim em yet. Em i tokaut olsem Jehova i bin helpim em, tasol em yet i bin mekim sampela samting; em i giaman long kamap longlong bambai king bilong Get i no ken kilim em i dai. (1 Samuel 21:14–22:1) Yumi tu mas mekim olgeta samting yumi inap mekim bilong karim ol hevi—nogut yumi wet nating tasol long Jehova i ken helpim yumi.—Jems 1:5, 6; 2:26.
No Ken Mekim Ol Hevi i Go Bikpela
Bihain gen Devit i lainim narapela samting. Em wanem samting? Samting yumi mekim inap mekim hevi bilong yumi i go bikpela. Olsem: Bihain long Devit i daunim ol Filistia, em i tingting long bringim bokis kontrak i go long Jerusalem, na nau hevi i kamap. Baibel i tok: “Devit i kisim ol [man] i go long dispela taun Bala . . . bilong kisim Bokis Kontrak bilong God. . . . [Ol i] putim long wanpela nupela karis . . . Usa na Ahio, tupela pikinini man bilong Abinadap, i wok long stiaim dispela karis.”—2 Samuel 6:2, 3.
Jehova i no bin tokim ol long mekim wok long karis bilong karim dispela Bokis, nogat. Lo i tok klia ol Kohat bilong lain Livai ol tasol i ken karim dispela Bokis, na ol i mas karim long sol bilong ol—ol i mas mekim wok long tupela hap diwai i go insait long ol ring long hap bilong Bokis. (Kisim Bek 25:13, 14; Namba 4:15, 19; 7:7-9) Tasol ol i sakim dispela lo na samting nogut i kamap. Ol bulmakau i pulim dispela karis, na ol i mekim, na Bokis i laik pundaun. Tasol Usa—ating em wanpela Livai, tasol em i no wanpela pris—em i putim han i go na holim, na Jehova i kilim em i dai, long wanem, Usa i no tingim Bokis i samting holi.—2 Samuel 6:6, 7.
Devit i king, olsem na hap asua i go long em. Na samting em i mekim i kamapim klia olsem maski man i stap pren bilong Jehova, taim hevi i kamap, em inap mekim sampela pasin kranki. Pastaim Devit i kros. Bihain em i pret. (2 Samuel 6:8, 9) Dispela i traim tru pasin pren i stap namel long em na Jehova. I olsem em i no putim hevi bilong em long han bilong Jehova; em i no bin bihainim lo bilong Em. Na ating sampela taim i wankain long yumi tu, a? Olsem wanem? Taim yumi sakim lo bilong Jehova na hevi i kamap, sampela taim yumi tok em asua bilong Jehova?—Sindaun 19:3.
Karim Hevi Long Bel i Gat Tok
Bihain, Devit i brukim lo bilong Jehova na em i karim bikpela hevi long rong em i mekim. Wanpela taim Devit i les long mekim wok bilong em long bringim ol ami bilong em i go long pait. Taim ol i go pait, em i stap long Jerusalem. Bikpela hevi i kamap long dispela.—2 Samuel 11:1.
King Devit i lukim Batseba i waswas—em i naispela meri tru. Em i slip wantaim em, na nau meri i gat bel. (2 Samuel 11:2-5) Bilong haitim dispela rong, em i singautim man bilong meri, em Uria, long lusim ples pait na kam bek long Jerusalem. Tasol Uria i no laik slip wantaim meri bilong em taim ol Israel i stap yet long pait. (2 Samuel 11:6-11) Orait, nau Devit i mekim wanpela samting i nogut tru bilong karamapim rong bilong em. Em i wokim rot bilong ol wansoldia bilong Uria i surik bek na larim ol birua i kilim em i dai. Dispela i bikpela rong tru, a?—2 Samuel 11:12-17.
Tasol i no longtaim na rong bilong Devit i kamap ples klia. (2 Samuel 12:7-12) Taim Devit i save em i bin mekim bikpela rong moa, ating em i bel hevi tru na bel i gat tok. Em i man bilong pilim tru ol samting long bel, olsem na ating em inap larim dispela rong i daunim em olgeta. Ating em inap pilim olsem em i nogut tasol!
Tasol kwiktaim Devit i tokaut long rong bilong em; em i tokim profet Natan: “Mi mekim sin long ai bilong Bikpela.” (2 Samuel 12:13) Song 51 i stori long Devit i pilim olsem wanem na em i beten askim God Jehova long mekim em i kamap klin na lusim dispela rong. Em i beten: “Yu wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Mi save mi mekim rong pinis. Mi no inap lusim tingting long sin bilong mi.” (Song 51:2, 3) Devit i tanim bel—em i no giaman—olsem na pasin wanbel i stap namel long em na Jehova i kamap strong gen. Tru, Devit i bel hevi long em i bin mekim rong na em i pilim olsem em i nogut tasol, tasol em i no wok long tingim tingim dispela samting, nogat. Em i putim ol hevi bilong em long han bilong Jehova, olsem: Long pasin daun em i tokaut long rong bilong em, na em i kamapim long ples klia em i tanim bel pinis, na em i beten strong askim Jehova long lusim rong bilong em. Bihain God i orait gen long em.—Song 51:7-12, 15-19.
Narapela i No Stap Gut Long Yu
Nau yumi ken stori long samting i kirapim Devit long raitim Song 55. Bel bilong em i hevi tru. Em i tok: “Mi pret moa yet long ol, na mi tingting long i dai, na dispela i mekim bel bilong mi i hevi tru.” (Song 55:4) Wanem samting i mekim na em i hevi olsem? Apsalom, pikinini man bilong Devit, em i painim rot bilong stilim wok king bilong Devit. (2 Samuel 15:1-6) Devit i hevi tru, long wanem, dispela man i no stap gut long em, em pikinini bilong em yet. Tasol samting i mekim Devit i hevi moa em olsem: Gutpela pren bilong em, Ahitofel, em man bilong givim gutpela tingting long Devit, em tu i insait long dispela wok bilong rausim Devit. Devit i stori long Ahitofel long Song 55:12-14. Dispela wok bilong rausim Devit i mekim, na Devit i mas lusim Jerusalem na ranawe. (2 Samuel 15:13, 14) Ating dispela i givim bikpela hevi long em, a?
Tasol em i no larim hevi bilong em i mekim na bai em i no bilip strong long Jehova olsem pastaim, nogat. Em i beten askim Jehova long paulim wok bilong Apsalom tupela Ahitofel. (2 Samuel 15:30, 31) Olsem bipo, Devit i no sindaun nating na wet long Jehova i mekim olgeta samting, nogat. Taim rot i op, Devit i mekim olgeta samting em inap long mekim bilong daunim dispela wok bilong rausim em long wok king. Narapela man bilong givim gutpela tingting long Devit, em Husai, na Devit i salim em i go bek long Jerusalem bilong giamanim Apsalom olsem em i laik helpim dispela wok bilong rausim Devit—tasol as tru na em i go em bilong daunim dispela wok. (2 Samuel 15:32-34) Jehova i stiaim ol samting na Apsalom i bilipim Husai. Orait nau Devit i gat hap taim long bungim ol soldia bilong em na mekim ol samting bilong lukautim laip bilong em yet.—2 Samuel 17:14.
Long olgeta de Devit i stap laip, em i tenkyu tru long Jehova i bin lukautim em gut na i no bin les kwik long em na i bin redi long lusim rong bilong em! (Song 34:18, 19; 51:17) Devit i tingim ol dispela samting taim em i kirapim yumi long beten askim Jehova long helpim yumi long taim yumi gat hevi, em i tok, ‘putim ol hevi bilong yumi long han bilong Bikpela.’—Skelim wantaim 1 Pita 5:6, 7.
Wok Long Stap Klostu Long Jehova
Olsem wanem yumi inap bihainim pasin bilong Devit na stap klostu long Jehova? Dispela pasin i bin strongim Devit taim bikpela traim na hevi i painim em. Bilong stap klostu long Jehova, yumi mas stadi gut long Baibel. Yumi mas larim Jehova i skulim yumi long ol lo na ol tok bilong em, na long pasin bilong em. (Song 19:7-11) Taim yumi tingim gut long bel ol tok bilong God i stap long Baibel, dispela i helpim yumi long go klostu long em na bilip tru long em. (Song 143:1-5) Taim yumi bung wantaim ol wanlotu bilong yumi bambai Jehova i ken skulim yumi moa, dispela tu i helpim yumi long go klostu long em. (Song 122:1-4) Na taim yumi beten strong long Jehova, dispela tu i save helpim yumi long pas gut wantaim em.—Song 55:1.
Devit i bel hevi taim em i no pas gut wantaim Jehova, na i wankain long yumi tu. Taim man i mekim nogut long yumi na daunim yumi, yumi inap “mekim pasin kranki.” (Saveman 7:7, NW) Tasol Jehova i save lukim olgeta samting i kamap, na em i save long olgeta samting i stap long bel bilong yumi. (Saveman 4:1; 5:8) Yumi mas wok strong na bai yumi ken stap klostu long Jehova na pas gut wantaim em. Sapos olsem, orait, maski wanem wanem hevi yumi mas karim, yumi ken bilip olsem Jehova inap pinisim hevi bilong yumi o em inap strongim yumi long karim dispela hevi. (Filipai 4:6, 7, 13) Tru tumas, yumi mas stap klostu long Jehova. Taim Devit i mekim olsem, bel bilong em i stap isi—em i no pret liklik.
Olsem na maski wanem wanem hevi i painim yu, oltaim yu mas putim ol hevi bilong yu long han bilong Jehova, olsem Devit i tok. Long dispela rot bai yu inap pilim tru dispela tok promis: “Bai em i karim na bai em i strongim yu. Bai em i no larim wanpela samting i bagarapim ol stretpela man.”—Song 55:22.